Jeremias
21 Kamachiq Sedequiasmi+ Jeremiasta tapumunankupaq kacharqa Malkiaspa churin Pasjurtawan+ sacerdote Maaseyapa churin Sofoniasta,+ paykuna Jeremiaspaman chayaruptinkum Jehova Diosqa Jeremiasta rimapayayta qallaykurqa. 2 Paykunaqa Jeremiastam nirqaku: “Ama hina kaspayá Jehova Diosta tapuykapuwayku. Babiloniata kamachiq Nabucodonosormi* wañuchiyta munawachkanku,+ ichapas Jehova Diosqa yanapawanankupaq imallatapas ruwanman, ichaya imallatapas ruwanman pasakunankupaq”, nispa.+
3 Jeremiasñataqmi nirqa: “Kamachiq Sedequiasmanyá nimuychik: 4 ‘Israelpa Jehova Diosninmi nin: “Muyurusuqnikichik Babiloniata+ kamachiqwan chaynataq murallapa waqtanpi kaq soldadonkunawan peleanaykichikpaq kaq espadallawanmi hinaspa lanzallawanmi wañunkichik. Espadaykichiktawan lanzaykichiktam llaqtapa chawpinman huñumusaq*. 5 Kikiypunim qamkunapa contraykichikpi peleasaq,+ kallpasapa makiyta haywarispaymi peleasaq, llumpa-llumpay piñakuyniypim peleasaq, piñakuyniy rawrasqanraykum peleasaq.+ 6 Kay llaqtapi runakunatawan animalkunatam castigasaq, unquywanmi wañunqaku”’, nispa.+
7 ‘Jehova Diosmi nin: “Chaymanta qipamanmi Babiloniata kamachiq Nabucodonosorpa makinman churasaq Juda llaqtata kamachiq Sedequiasta, runankunata, kay llaqtapi runakunata, unquywan mana wañuqkunata chaynataq espadawan mana wañuchisqa kaqkunata. Chiqniqninkunapa makinmanmi churasaq, wañuchiyta munaqkunapa makinmanmi churasaq.+ Paymi espadawan wañuchinqa, paykunataqa manam llakipayanqachu, manataqmi kuyapayanqachu”’, nispa.+
8 Chay runakunata nimuy: ‘Jehova Diosmi nin: “Kunanmi ñawpaqnikichikman churani kawsayta utaq wañuyta akllakunaykichikpaq. 9 Kay llaqtapi qipaqkunaqa llapallankum espadawan wañuchisqa kanqaku, unquywanmi wañunqaku, yarqaymantam wañunqaku. Kay llaqtamanta lluqsispan Caldea runakunapa makinman churakuqmi ichaqa kawsanqa, vidanmi peleaspa imapas apakusqan hina kanqa”’, nispa.+
10 ‘Jehova Diosmi nin: “Ñuqaqa kay llaqtaman allin kaqkunata apamunaymantaqa mana allin kaqkunatam apamusaq,+ kay llaqtaqa Babiloniata kamachiqpa makinmanmi wichinqa,+ paymi pasaypaqta kañanqa”, nispa.+
11 Juda llaqtata kamachiqpa wasinpi kaqkunatañataqmi ninki: Jehova Diospa nisqantayá uyariychik. 12 Davidpa mirayninkuna, Jehova Diosmi nin:
“Sapa achikyaqtayá allin kaqta ruwaychik,
suwakunapa makinmantayá suwachikuqkunata yanapaychik,+
manachayqa mana allinllata ruwasqaykichikraykum
piñakuyniy nina hina rawranman,+
mana pipa amachay atinan nina hinam rawranman”’, nispa.+
13 Jehova Diosmi nin: ‘Wayqu lawpi yachaq* runa, qanmanmi hamuchkani.
Pampapi rumi, qanmanmi hamuchkani’, nispa.
‘“¿Pitaq ñuqanchikman hamunman?” nisparaqmi ninkichik.
“¿Pitaq wasinchikman yaykumunman?” nisparaqmi ninkichik.
14 Qamkunamanqa imam ruwasqaykichikman hinam kutichipusqaykichik’,+
Jehova Diosmi chaynata nin.
‘Montentapas kañasaqmi,
qalaypaqmi kañakunqa’”, nispa.+