1 Samuel

18 Saulwan rimayta tukuruspanmi Davidqa Jonatanpa amistadnin rikurirurqa.+ Jonatanqa kikinta hinam Davidtaqa kuyarqa.+ 2 Chay punchawmantam Saulqa Davidta wasinpiña qipachirqa, manañam munarqañachu taytanpa wasinman kutinantaqa.+ 3 Jonatanqa kikinta hina kuyasqanraykum+ Davidwan contratota* ruwarqaku wañukunankukama yanapanakunankupaq.+ 4 Hinaspapas Jonatanqa hawan pachanta hurqukuykuspanmi Davidman quykurqa, quykurqataqmi peleananpaq pachanta, espadanta, flechanta hinaspa wiqaw watakunantapas. 5 Chaymantam Davidqa Saulpa kamachisqanman hina maymanpas peleaq riq, hinaspam allinlla kutimuq.+ Chaymi Saulqa soldadokunapa kamachiqnin kananpaq Davidta churarurqa.+ Chayraykum Saulpa runankuna chaynataq llapallan Israel runakunapas kusikurqaku.

6 Filistea runakunata wañuchisqankumanta kamachiq Saulpas, Davidpas hinaspa soldadokunapas kutimuptinkum Israelpi llapallan llaqtakunamanta warmikuna Saulta taripaq lluqsiqku.+ Chay warmikunaqa panderetakunata salsalyachistinmi+ chaynataq mandolinakunata tocaspankum tusustin hinaspa takistin kusikuyllawanña riqku. 7 Chay warmikunaqa kusikuymantam takiqku:

8 Chaywanmi Saulqa llumpayta piñakururqa.+ Takispanku chayna nisqankum Saulpaqqa mana allinchu rikchakurqa. Chaymi nirqa: “Davidmantam takichkanku chunka waranqantin runakunata wañuchisqanmanta, ñuqamantam ichaqa waranqantin runallata wañuchisqaymanta. ¡Kamachiqninku kananpaqñayá churaruchunku!”, nispa.+ 9 Chaymantapacham Saulqa Davidta chiqniyta qallaykurqa.

10 Paqarintintam Davidqa arpata tocapuchkarqa,+ Saulñataqmi manchakuypaq piñasqallaña rikurirurqa+ Dios saqirusqanrayku. Chaymi loco hinaña imatapas wasinpi ruwayta qallaykurqa. Chayna tarikuspanmi Saulqa hapisqan lanzawan+ 11 Davidta chuqarurqa.+ Payqa nirqam: “¡Kay lanzawanmi Davidtaqa wañurachisaq!”, nispa. Iskay kutipim Davidtaqa lanzawan chuqarurqa, Davidmi ichaqa ayqikururqa. 12 Jehova Diosqa Davidtam yanaparqa,+ Saultam ichaqa manaña yanaparqachu, chaymi Saulqa Davidta chiqnirqa*.+ 13 Saulqa Davidta manaña rikuyta munaspanmi 1.000 soldadokunapa kamachiqnin kananpaqña churarurqa. Davidñataqmi kamachiq kaspan soldadonkunawan peleaq riq.+ 14 Jehova Dios yanapasqanraykum+ Davidqa yachaywan imatapas ruwaq.+ 15 Chayna yachaywan ruwasqanta qawaspanmi Saulqa Davidta astawanraq chiqnirurqa. 16 Juda ayllumanta hinaspa wakin ayllumanta runakunam ichaqa Davidta kuyarqaku soldadokunapa kamachiqnin kasqanrayku.

17 Chaymanta qipatam Saulqa Davidta nirqa: “Merab sutiyuq mayor warmi churiywanmi casarachisqayki.+ Ñuqaqa munani mana manchakuspa Jehova Diospa runankunata peleaypi yanapanaykitam”, nispa.+ Sunqunpim ichaqa Saulqa nirqa: “Manam ñuqachu Davidtaqa wañuchisaq, Filistea runakunam wañuchinqaku”, nispa.+ 18 Davidñataqmi Saulta nirqa: “¿Pitaq ñuqaqa kani kamachiqpa masanraq kanaypaqqa? Taytaypa ayllunpas Israel runakunapiqa mana ancha riqsisqam”, nispa.+ 19 Davidpa casarakunan punchaw chayaramuptinmi Saulqa warmi churin Merabtaqa Adrielwanña casararachisqa.+ Chay runaqa Abel-meola llaqtayuqmi karqa.

20 Saulpa huknin churin Micalñataqmi+ Davidwan sunqunta suwarachikurqa. Chayta Saulman willaykuptinkum Saulqa kusikurqa. 21 Saulqa sunqunpim nirqa: “Churiywan casarakunanpaqmi nisaq, chaynapim wichiykachisaq Filistea runakunapa makinpi wañunanpaq”, nispa.+ Chaymi Saulqa Davidta kaqmanta nirqa: “Kunanmi ichaqa masayña kanki”, nispa. 22 Chaymantam Saulqa runankunata kaynata kamachirqa: “Mana pipa uyarisqallanta Davidman nimuychik: ‘Kamachiq Saulqa anchatam kuyasunki, kuyasunkitaqmi runankunapas. Chaynaqa masanyá kay’”, nispa. 23 Saulpa runankuna chaynata niykuptinkum, Davidñataq nirqa: “¿Yanqallapaqchu kamachiqpa masan karuyta hapinkichik? Ñuqaqa kani wakcha hinaspa mana ancha riqsisqam”, nispa.+ 24 Davidpa chayna nisqantam Saulman willarqaku.

25 Saulñataqmi runankunata kaqmanta kamachirqa: “Davidman nimuychik: ‘Kamachiqqa warmi churinmantaqa manam imatapas qunaykitaqa munanchu.+ Payqa munan chiqniqnin 100 Filistea runakunata wañuchimunallaykitam hinaspa wañusqa kasqanta yachananpaq qari kayninpa qarachanta apamunallaykitam’”, nispa.+ Chaytaqa Saulqa tantiachkarqa Filistea runakuna Davidta wañuchinankuta munaspanmi. 26 Saulpa tantiasqantam runankunaqa Davidman willamurqaku, chaymi Davidqa kamachiqpa masan kayta munarqa.+ Hinaspam apananpaq punchaw manaraq chayamuchkaptin 27 Davidqa runankunawan 200 Filistea runakunata wañurachimurqa, hinaspanmi qari kayninpa qarachanta llapankupata Saulman aparqa. Chaymi Saulqa churin Micalwan Davidta casarachirqa.+ 28 Chaywanmi Saulqa cuentata qukururqa Davidtaqa Jehova Dios yanapasqanta+ hinaspa churin Micalpas Davidta kuyasqanta.+ 29 Chaymi Saulqa Davidta astawanraq chiqnirqa, chiqnirqaqa wañukunan punchawkamam.+

30 Filistea runakunapa kamachiqninkuna peleanankupaq lluqsimuptinkum Davidqa paykunata wañurachiq. Payqa Saulpa runankunamantapas aswan achkataraqmi wañurachiq.+ Chaynapim Davidqa runakunapa alabasqan karqa.+