1 Corintios
2 Chaynaqa wawqi-panillaykuna, Diospa pakasqan kaqkunamanta+ qamkunaman willaq hamuspayqa manam suma-sumaqllaña rimaywanchu utaq suma-sumaqllaña yachaywanchu hamurqaykichik.+ 2 Ñuqaqa Jesucristomanta hinaspa pay qirupi* wañukusqanmanta yachanaykichiktam munarqani.+ 3 Chaymantapas qamkunaman hamuspayqa mana kallpayuqllaña hinaspa mancharisqallañam karqani, llumpaytam katkatatarqanipas, 4 rimasqaypas hinaspa willakusqaypas manam yachaysapa runakunapa rimasqanman hinachu karqa, paykunaqa suma-sumaqllatañam rimanku, ñuqapa rimasqaymi ichaqa karqa Diospa atiyninpa yanapakuyninwan,+ 5 chaynapi runakunapa yachachisqanpi mana hapipakunaykichikpaq, aswanqa Diospa atiyninpi hapipakunaykichikpaq.
6 Allin yuyayniyuq* runakunawanmi ñuqanchikqa yachaymanta rimanchik,+ rimanchikqa manam kay tiempopi* kaq yachaymantachu nitaq kay tiempopi kamachiqkunapa yachayninmantachu, paykunaqa chinkachisqam kanqaku.+ 7 Rimanchikqa Diospa kaq pakasqa kaqkunamantam,+ chayqa Diospa pakasqan yachaymi, Diosmi hatunchasqa kananchikpaq chay yachayman hina ñawpaqmantaraq tantiarqa manaraq mana allin ruwaq runakuna mirachkaptin*. 8 Kay yachaytaqa manam kay tiempopi mayqin kamachiqpas yacharqachu,+ yachaspankuqa manachiki suma-sumaq señorninchiktaqa wañuchinmankuchu* karqa. 9 Qillqasqam kachkan: “Manam ñawipas rikurqachu, manam rinripas uyarirqachu, manataqmi runapa sunqunpas musyayta atirqachu kuyaqninkunapaq Diospa churasqantaqa”, nispa.+ 10 Ñuqanchikmanmi chaykunata Diosqa atiyninwan riqsiykachiwanchik,+ atiyninqa tukuy imatam riqsichiwanchik,+ riqsichiwanchiktaqmi Diospa kaq pakasqa kaqkunatapas.+
11 ¿Pitaq yachanman runapa imapas tantiasqanta? Manamá pipas yachanmanchu, yachaspaqa yachan kikin runapa sunqullanmi*. Chaynallataqmi Diospa tantiasqankunatapas mana pipas yachanchu, chaytaqa pipas yachanman Diospa atiynin yanapaptillanmi. 12 Ñuqanchiktaqa Diospa atiyninmi yanapawanchik,+ manam runakunapa imayna tantiasqankuchu*, chaynapi allin sunqu kaspa Diospa quwasqanchik kaqkunata riqsinanchikpaq. 13 Kaykunamantapas ñuqanchikqa rimanchikmi, ichaqa manam runakunapa yachachisqanman hinachu,+ aswanqa atiyninwan Diospa yachachiwasqanchikman hinam,+ chaymi Diosmanta yachachinapaqqa atiyninwan Dios yachachiwasqanchikmanta rimanchik*.
14 Munasqallanman hina kawsaq runam ichaqa atiyninwan Diospa yachachisqantaqa* mana chaskinchu paypaq yanqapaq kasqanrayku, manataqmi chaykunataqa entiendeytapas atinmanchu. Pipas yachaytaqa atinman atiyninwan Dios yanapaptillanmi. 15 Atiyninwan Diospa yanapasqan runam ichaqa tukuy imata suma-sumaqta yachaykun,+ paytam ichaqa mana pipas juzganmanchu. 16 “¿Pitaq Jehova* Diospa piensasqantaqa yachanman chaynapi Diosta yachachinanpaq?”.+ Ñuqanchikmi ichaqa Cristopa* piensasqanman hina piensanchik.+