1 Cronicas
12 Quispa churin Saul+ chiqnispa qatikachaptinmi Davidqa Ziclag llaqtapi+ pakakurqa, chaypi kachkaptinmi kallpasapa achka soldadokuna Davidman hukllawakururqaku. Paykunam peleaypi yanaparqaku.+ 2 Davidman hukllawakuqkunaqa flechayuqkamam karqaku, paykunaqa ichuqwanpas* alliqwanpas* warakaqkum+ chaynataq flechaqkum. Paykunaqa Benjamin ayllupi Saulpa ayllunmi karqaku.+ 3 Paykunapa kamachiqninmi karqa Ayezer, payman qatiqñataqmi karqa Joas. Iskayninkum karqaku Guibea llaqtayuq+ Semaapa churinkuna. Karqataqmi Azmavetpa+ churin Jezielpas, Peletpas, Beracapas, Anatot llaqtayuq Jehupas, 4 Gabaon llaqtayuq+ Ismayapas. Payqa karqa 30 kallpasapa soldadokunapa hukninmi+ hinaspa paykunapa kamachiqninmi. Davidman hukllawakuqkunaqa karqataqmi Jeremiaspas, Jahazielpas, Joananpas, Guedera llaqtayuq Jozabadpas, 5 Eluzaipas, Jerimotpas, Bealiaspas, Semariaspas, Harif llaqtayuq Sefatiaspas, 6 Elcanapas, Isiaspas, Azarelpas, Joezerpas chaynataq Jasobeampas. Pichqankum karqaku Coreypa mirayninkuna.+ 7 Karqataqmi Guedor llaqtayuq Jeroampa churin Joelapas chaynataq Zebadiaspas.
8 Gad ayllumanta wakinkum Davidmanña hukllawakururqaku chunniqpi pakakuchkaptin,+ paykunaqa karqaku peleanankupaq yachachisqa kallpasapa soldadokunam, hatun harkachikunawan chaynataq lanzawan allin peleaqkunam. Rikchayninkupas leonpa hinaraqmi karqa, kallpaqkupas urqukunapi luwichukuna hinaraqmi. 9 Punta kaq kamachiqninkum karqa Ezer, iskay kaqñataqmi karqa Abdias, kimsa kaqñataqmi karqa Eliab, 10 tawa kaqñataqmi karqa Mismana, pichqa kaqñataqmi karqa Jeremias, 11 suqta kaqñataqmi karqa Atai, qanchis kaqñataqmi karqa Eliel, 12 pusaq kaqñataqmi karqa Joanan, isqun kaqñataqmi karqa Elzabad, 13 chunka kaqñataqmi karqa Jeremias, 11 kaqñataqmi karqa Macbanai. 14 Paykunaqa karqaku Gad ayllumanta+ soldadokunapa kamachiqninmi. Pisi kallpayuq soldadom karqa 100 soldadokuna hinaraq. Kallpasapa soldadoñataqmi karqa 1.000 soldadokuna hinaraq.+ 15 Paykunam Jordan mayu huntay-huntay richkaptin punta kaq killapi chimparqaku. Paykunaqa pampapi yachaqkunatam* intipa qispimunan lawmanwan intipa siqaykunan lawman chiqirachirqaku.
16 Benjamin ayllumantawan Juda ayllumanta kaqkunapas Davidpa pakakusqanmanmi rirqaku.+ 17 Chaymi Davidqa pakakusqanmanta lluqsiramuspan paykunata nirqa: “Sichum yanapawanaykichikpaq hamuchkankichik, hinaptinqa kusikuywanmi chaskisqaykichik. Sichum mana huchayuq kachkaptiypas chiqniwaqniykunaman quykuwanaykichikpaq hamuchkankichik, hinaptinqa ñawpaq abuelonchikkunapa Diosninyá imatapas ruwasunkichik”, nispa.+ 18 Chaymantam Diospa atiynin huntaykurqa 30 soldadokunata kamachiq Amasaiman,+ hinaptinmi nirqa:
“Jeseypa churin David, ñuqaykuqa qamtam yanapasqaykiku.+
Qamtaqa Diosmi yanapasuchkanki, chaynaqa amayá imamantapas llakikuychu.
Yanapaqnikikunapas amayá imamantapas llakikuchunkuchu”, nispa.+
Chaynapimá Davidqa paykunata chaskiykuspan soldadonkunapa kamachiqnin kanankupaq churaykurqa.
19 Manases ayllumanta wakinkupas Davidmanmi hukllawakururqaku. Hukllawakururqakuqa Saulwan peleanankupaq Filistea soldadokuna Davidwan riptinkum. Chay kutipim Filistea runakunata kamachiqkuna+ Davidmanta rimaspa ninakurqaku: “Davidqa kamachiqnin Saulman hukllawakuykuspanmi wañurachiwachwan”, nispa. Chaynata nispa kutirachiptinkum Davidqa mana yanaparqachu.+ 20 Kaykunam karqaku Ziclag llaqtapi+ kachkaptin Davidman hukllawakuq Manases ayllumanta kaqkuna: Adnaa, Jozabad, Jediel, Miguel, Jozabad, Eliu hinaspa Ziletai. Paykunam karqaku Manases ayllupi 1.000 runakunata kamachiqkuna.+ 21 Paykunaqa karqaku kallpasapa mana manchakuq soldadokunam,+ chaymi Davidta yanaparqaku suwakunawan peleaptinpas. Hinaspapas soldadokunapa kamachiqninkunam karqaku. 22 Sapa punchawmi runakunaqa Davidman hukllawakuqku yanapanankupaq,+ chaymi tropankunaqa achkallay-achka karqa Diospa angelninkuna hinaña.+
23 Hebron llaqtapi+ David kachkaptinmi peleaq soldadokuna payman hukllawakurqaku, chaynapi Jehova Diospa nisqanman hina kamachiq Saulpa rantinpi Davidtaña churanankupaq. Chay hukllawakuqkunam karqaku:+ 24 Juda ayllumanta 6.800 runakuna, paykunaqa karqaku peleanankupaq hatun harkachikunayuqmi hinaspa lanzayuqmi. 25 Simeon ayllumantañataqmi karqa 7.100 kallpasapa mana manchakuq runakuna.
26 Leviy ayllumanta Davidman hukllawakuqkunañataqmi karqa 4.600 runakuna. 27 Aaronpa mirayninkunapa kamachiqninmi+ karqa Jeoyada,+ paywanmi karqaku 3.700 runakuna. 28 Paykunawantaqmi karqa Sadocpas,+ Sadocqa karqa kallpasapa mana manchakuq musum. Paywan kuskataqmi karqaku ayllunpi 22 kamachiqkunapas.
29 Benjamin ayllupi Saulpa+ ayllunmantañataqmi karqaku 3.000 runakuna. Paykunaqa yaqa llapankum ñawpaqtaqa Saulpa ayllunta yanapaqku. 30 Efrain ayllumantañataqmi karqaku 20.800 kallpasapa mana manchakuq runakuna. Paykunaqa karqaku ayllunkupi riqsisqa runakunam.
31 Manasespa wakin ayllunmantañataqmi karqaku 18.000 akllasqa runakuna, paykunam Davidta kamachiq kananpaq churaq rirqaku. 32 Isacar ayllumantañataqmi karqaku 200 kamachiqkuna, paykunaqa punchawkuna imayna kanantam allinta yacharqaku, yacharqakutaqmi Israel runakunapa ima ruwanankutapas. Lliw ayllunkum paykunata kasukuqku. 33 Zabulon ayllumantañataqmi karqaku 50.000 runakuna, paykunaqa karqaku yuyayniyuq runakunam hinaspa peleanankupaq listolla kaqkunam. Tukuy rikchaqtaqmi karqa peleanankupas. Llapallankum mana iskayrayaspa Davidta yanaparqaku. 34 Neftaliy ayllumantañataqmi karqaku 1.000 kamachiqkuna, paykunawantaqmi karqaku 37.000 runakunapas hatun harkachikunayuq hinaspa lanzayuq. 35 Dan ayllumantañataqmi karqaku 28.600 peleanankupaq listo kaqkuna. 36 Aser ayllumantañataqmi karqaku 40.000 yuyayniyuq runakuna, paykunaqa karqaku peleanankupaq listom.
37 Jordan mayupa+ waklawnin chimpapi Ruben ayllumanta, Gad ayllumanta hinaspa Manasespa wakin ayllunmanta Davidman hukllawakuqkunañataqmi karqaku 120.000 soldadokuna, paykunapaqa tukuy rikchaqtaqmi karqa peleanankupas. 38 Llapallankum karqaku peleay yachaq runakuna, peleanankupaq chaylla kaq runakuna. Paykunam mana iskayrayaspa Hebron llaqtaman rirqaku Davidta rey kananpaq churanankupaq. Israelpi wakin runakunapas munarqakum David reyninku kananta.+ 39 Ayllunku tukuy imata quptinkum mikuspanku hinaspa tomaspanku chaypi Davidwan kimsa punchaw karqaku. 40 Hichpankupi yachaqkunapas, Isacar aylluwan, Zabulon aylluwan chaynataq Neftaliy aylluwan kuskam asnokunapi, camellokunapi, mulakunapi hinaspa torokunapi apamurqaku: Harinata, llapisqa higosmantawan uvas pasasmanta tantakunata, vinota chaynataq aceiteta. Apamurqakutaqmi vaca aychatapas chaynataq oveja aychatapas. Chaykunataqa apamurqaku Israelpi hatun kusikuy kasqanraykum.