Isaias
8 Jehova Diosmi niwarqa: “Rikunankupaq hina tablapi+ qillqay*: ‘Maer-salal-as-baz*’, niqta. 2 Chay qillqasqaykitam sacerdote* Uriaswan+ Jeberekiaspa churin Zacarias qayllaykipi qillqananku”, nispa.
3 Warmiywanmi puñururqani, payqa karqa Diosmanta willakuqmi*, puñuruptiymi wiksayakuruspan qari wawata wachakurqa,+ hinaptinmi Jehova Dios niwarqa: “Maer-salal-as-bazwan sutichay, 4 warmacha manaraq ‘papay’ ‘mamay’ nichkaptinmi Damasco llaqtapa hinaspa Samaria llaqtapa tukuy imanta Asiriata kamachiqman apanqaku”,+ nispa.
5 Jehova Diosmi kaqmanta rimapayawaspan niwarqa:
6 “Kay runakuna Siloe yarqapi yakukunata wischupakusqanraykum+
hinaspa Rezinmantawan Remaliaspa churinmanta kusikusqankuraykum+
7 Jehova Diosqa achkallay-achka yakuta paykunaman apamunqa,
llimparichkaq Eufrates mayutam paykunaman apamunqa,
Asiriapi kamachiqkunatawan+ soldadonkunatam paykunaman apamunqa.
Mayupa rinan lawkunatam
llimpayllaña-llimpanqa, llimpayllaña-llimpasqanraykum
8 Judaman yaykunqa.
Judamanmi huntanqa, qalaypaqmi pampanqa,
kunkan kuchukamam chayanqa.+
¡Emanuel*,+ mastarisqa raprankunapas allpaykitam tapanqa!”, nispa.
9 Qamkunapas llaqtakuna, imatapas ruwaychik, ichaqa chinkankichikmi.
¡Karu-karumanta kaqkuna, llapaykichik uyariychik!
¡Peleanaykichikpaq alistakuychik, ichaqa wañunkichikmi!+
¡Peleanaykichikpaq alistakuychik, ichaqa wañunkichikmi!
10 ¡Tantiaychik imatapas ruwanaykichikpaq, ichaqa manam ruwankichikchu!
¡Imatapas niychik, ichaqa manam allinchu kanqa,
11 Atiyniyuq makinta hawayman churaykuwaspanmi Jehova Diosqa kay runakunapa imam ruwasqanta mana qatipakunaypaq niwarqa:
12 “¡Kay llaqtapi runakuna hinaqa amayá niychikchu ‘payqa paypa contranpim kachkan’ nispaqa!
Amayá manchakuychikchu paykunapa manchakusqan kaqtaqa,
amayá katkatataychikchu chaypa ñawpaqninpiqa.
13 Angelkunata kamachiq Jehova Diosllatam..., payllatam chuyapaqqa hapinaykichik,+
payllatam manchakunaykichikqa,
paypa qayllallanpim katkatatanaykichikqa”,+ nispa.
14 Paymi pakakunanku wasi hina kanqa,
hina paytaqmi takakunanku rumipas kanqa,
paymi urmananku rumipas kanqa,+
Israelpa iskaynin mirayninkunapaqmi chayna kanqa.
Tuqlla waska hinam Jerusalenpi yachaqkunapaqpas* kanqa.
15 Achkaqmi mitkanqaku, wichinqaku hinaspa chinkanqaku.
Tuqllaman wichiykuspam hapichikunqaku.
16 ¡Qillqasqaykita wankuy,
qatiqniykunapa qayllanpi sellay!
17 Jacobpa mirayninkunata+ mana qawariq Jehova Diostam qawan-qawanlla suyasaq,+ payllapim hapipakullasaq.
18 ¡Uyariychik! Jehova Diospa quwasqan churiykunapiwanmi+ kachkani señal hina+ hamuq tiempomanta yachanaykichikpaq, Sionpi yachaq angelkunata kamachiq Jehova Diospa atiyninwan ruwasqan hinam Israelpi kachkaniku.
19 “Qayaqkunatawan qawaqkunata* tapukuychik”, nisuptikichikqa, ¿manachu llaqtapi runakunaqa Diosnikichikta tapukuwaqchik? ¿Imaynamá wañusqakunataqa tapukunkichik kawsaqkunapa allinninpaqqa?+ 20 ¡Chaykunata ruwanaykichikmantaqa kamachikuytayá qawaychik, qillqasqa kaqtayá qawaychik!
Chaykunapa nisqanman hina mana rimaspaykichikqa tutayaypim kachkankichik.+ 21 Sapakamam allpankupi llakisqa yarqaymanta purinqaku.+ Paykunaqa yarqaymanta kasqankuraykum hinaspa piñasqa kasqankuraykum kamachiqninkuta ñakanqaku, altota qawarispam Diosninkutapas ñakanqaku. 22 Allpa pachata qawarispanpas ñakariytawan tutayayllatam rikunqa, yana-yanayllatam, sasachakuyllatam rikunqa, manchakuypaq tutayayllatam rikunqa, achkitaqa manam rikunqachu.