2 Corintios

2 Ñuqaqa tantiaruni kaqmanta watukuspay qamkunata manaña llakichinaypaqmi. 2 Qamkunata llakichiptiyqa, ¿pitaq kallpanchaqniyqa kanqa? Llakichisqay kaqkunallachiki kallpanchawanman. 3 Chayraykum qillqamurqaykichik hamuspay qamkunarayku mana llakisqa kanaypaq. Ñuqaqa manam iskayrayanichu imapas kusichiwaqniyqa qamkunatapas llapaykichikta ñuqata hina kusichisusqaykichikmantaqa. 4 Ñuqaqa llumpay ñakariypi hinaspa sunquypi llakisqa kaspaymi wiqi ñawintin qamkunaman qillqamurqaykichik, qillqamurqaykichikqa manam llakichinaypaqchu,+ aswanqa ancha kuyasqayta yachanaykichikpaqmi.

5 Llakichisuqnikichik runaqa manam ñuqatachu llakichiwarqa,+ llapaykichiktam llakichisurqankichik, ichaqa manam llumpa-llumpaytachu. Chaymantaqa manam llumpayta rimayta munanichu. 6 Chay runataqa yaqa llapallaykichikmi qaqcharunkichikña, chayllapaqñayá kachun. 7 Chaynaqa, chay runatam sumaq sunqu kaspaykichik pampachanaykichik,+ hinaspam sunqunta tiyaykachinaykichik, chaynapi llumpay llakipa intusqan* mana kananpaq.+ 8 Chayraykum ruegakuykichik pay kuyasqaykichikta niykunaykichikpaq*.+ 9 Chaymantapas, qillqamuchkaykichikqa tukuy imapi kasukuq utaq mana kasukuq kasqaykichikta yachanaypaqmi. 10 Imamantaña pitapas pampachasqaykichiktaqa ñuqapas pampachanim, pitapas pampachaspayqa Cristopa* qayllanpim qamkunarayku pampachani, 11 chaynapi satanaspa+ munayninta mana ruwananchikpaq, ñuqanchikqa yachanchikmi paypa tuqllankunamantaqa*.+

12 Cristomanta sumaq willakuykunata willakunaypaq Troas+ llaqtaman chayaruptiymi punku kichakuchkaq hina señorninchikpa llamkayninpi astawan llamkay karqa. 13 Sunquypim ichaqa mana hawkachu karqani wawqinchik Titota+ mana tarisqayrayku, chaymi paykunamanta despedikuykuspay Macedonia+ lawman pasakurqani.

14 Ichaqa Diosmanyá gracias kachun, paymi Cristotawan kuskata pusawanchik guerrapi ganaramusqankumanta kutimuq soldadokunata hina*, chaymantapas Diosqa yachaynintam miski asnaqta hina ñuqanchikwan tukuy hinastinman chiqichin*. 15 Cristomanta willakuqkunaqa Diospaqmi kanchik imapas miskillaña asnariq hina, chay asnaymi chayachkan salvakunankupaq kaqkunaman hinaspa wañunankupaq kaqkunaman. 16 Wañunankupaq kaqkunapaqmi wañuchiq asnay kanchik,+ salvasqa kaqkunapaqñataqmi kawsay qukuq asnay kanchik. Hinaptinqa, ¿pitaq kachkan kaykunata ruwananpaq hinaqa? 17 Ñuqaykum. Ñuqaykuqa manam wakin runakuna hinachu Diospa+ palabranwanqa negociota ruwaniku*. Aswanqa Diospa kamachisqankuna kaspam Cristowan kuska Diospa qayllanpi imam kaqta tukuy sunquwan rimaniku.