Jeremias
13 Jehova Diosmi niwarqa: “Linomanta chumpitayá rantikuykuy, hinaspaykiyá chaywan wiqawnikita watakuy, ichaqa amam yakumanqa challpunkichu”, nispa. 2 Jehova Diospa niwasqanman hinam chumpita rantikuykuspay chaywan wiqawniyta watakurqani. 3 Jehova Diosqa kaqmanta rimapayawaspam niwarqa: 4 “Chay rantisqayki chumpita aparikuspaykiyá Eufrates mayuman riy, hinaspaykiyá chay chumpikita rumi kakllupi pakamuy”, nispa. 5 Jehova Diospa niwasqanman hinam Eufrates mayupa patanpi pakaramurqani.
6 Punchawkuna pasasqanman hinam Jehova Diosqa niwarqa: “Hatarispaykiyá Eufrates mayu patanpi pakamusqayki chumpiman riy”, nispa. 7 Niwasqanman hinam chay chumpitaqa maymi pakasqaymanta hurquramurqani, hinaptinmi chay chumpiqa qalaypaq pumpusqaña kasqa, manañam valesqachu.
8 Jehova Diosñataqmi niwarqa: 9 “Ñuqa Jehova Diosmi nini: ‘Kaynatam ruwasaq Juda runakunata hatuntukuq kasqankurayku, kaynatam ruwasaq Jerusalen runakunata hatuntukuqllaña kasqankurayku.+ 10 Nisqaykunata mana kasukuq,+ munasqankuta ruwaq+ chaynataq qunqurakuykuspa taytacha-mamachata yupaychaq kay mana allin runakunaqa chay chumpi hinam tukunqaku’, nispa. 11 Jehova Diosqa nirqaraqmi: ‘Imaynam runapas chumpiwan wiqawninta watakun chaynam ñuqapas Israel runakunatawan Juda runakunata chumpiwan watakuchkaq hina ñuqapi hapipakunankupaq nirqani, chaynapi runaykuna kananpaq,+ ancha riqsisqata ruwawanankupaq,+ hatunchawanankupaq hinaspa sumaq kasqaymanta rimanankupaq. Ichaqa manam paykunaqa kasuwarqachu’, nispa.+
12 Willanaykitaqmi kaytapas: ‘Israelpa Jehova Diosninmi nin: “Hatun puyñukunamanmi vinotaqa huntachinku”’, nispa. Paykunañataqmi nisunki: ‘¿Ñuqaykuqa manachu yachaniku hatun puyñukunaman vino huntachisqankuta?’, nispa. 13 Qamñataqmi ninki: ‘Jehova Diosmi nin: “Chaynam ñuqapas hatun puyñuman vinota huntachichkaq hina haykam kay llaqtapi yachaq runakunaman vinota qusaq,+ qusaqmi Davidpa trononpi tiyaq kamachiqkunaman, sacerdotekunaman, willakuqkunaman* chaynataq Jerusalenpi yachaqkunaman. Hinaptinmi paykunaqa llapallanku sinkanqaku. 14 Sapakamata hapiykuspaymi takanachisaq, taytantapas churintapas takanachisaqmi,+ manam kuyapayasaqchu, mana llakipayarispaymi paykunataqa wañuchisaq, manam imapas harkawanqachu. Ñuqa Jehova Diosmi chaynata nini”’, nispa.+
15 Uyariychikyá, sumaqtayá uyariychik.
Amayá hatuntukuqqa kaychikchu, Jehova Diosmi chaynata nin.
16 Jehova Dios manaraq tutaykachimuchkaptinyá
payta hatunchaychik,
urqukunapi tutan manaraq urmachkaspaykichikyá payta hatunchaychik.
Qamkunaqa achikyamunantam munankichik,
paymi ichaqa tutayaypi kachisunkichik,
punchawtapas yanay-yanaytam tutayachinqa.+
17 Qamkunam ichaqa mana uyarinkichikchu,
hatuntukuq kasqaykichikmantam pakallapi waqasaq.
18 Kamachiqtawan mamantayá nimuy:+ ‘Pampapiyá tiyaychik,
kuyayllapaq coronaykichikqa umaykichikmantam wichinqa’, nispa.
19 Sur lawpi llaqtakunamantaqa manam lluqsiyta atinkuchu, manam pipas kichaqninku kanchu.
Juda runakunatam apakunku, llapallankutam huklawman apakunku.+
20 Umaykita huqarispayá norte lawmanta hamuqkunata qaway.+
¿Maytaq qusqay ovejaykikuna? ¿Maytaq kuyayllapaq ovejaykikuna?+
21 ¿Imataraq ninki ñawpaqmanta kuyasqayki runakunalla contraykipi kaptin?+
¿Manachu wachakuq warmipa nanaynin hina qamtaqa hapisunki?+
22 Sunquykipiqa ichapas nikunki, ‘¿imaynanpitaq kaykuna pasawan?’, nispa.+
Ichaqa walikitaqa huchaykiraykum qichusurqanki,+
talonnikikunapipas sarupasurqankim.
23 ¿Yaqachu Cus runa imayrikuq kayninta cambiarunman? ¿Yaqachu tigre* muru kachkaspan muru kayninta cambiarunman?+
Chayna kaptinqa qamkunaqa allin kaqtach ruwawaqchik,
mana allin ruwayllapiña kaqkuna, allin kaqtañach ruwawaqchik.
24 Chaki allpapi pajata apaq wayra hinam kayman-chayman chiqichisqaykichik.+
25 Kaymi herenciaykiqa, kaymi qampaq medisqay kaqqa,
qamqa qunqaruwankim,+ qamqa llullallapim hapipakunki,+ ñuqa Jehova Diosmi chaynata nini.
26 Chayraykum walikita umaykikama qimpisqayki,
hinaptinmi pinqaynikita qawanqaku,+
27 qawanqakum hukwan pierdekusqaykita*,+
hapikuchkaq yegua hina wiqiqiqisqaykita chaynataq chuchumika warmi hina kasqaykitapas.
Muqukunapi hinaspa pampakunapi
millakuypaq ruwasqaykitam qawarqani.+
¡Imaynaraq kanki Jerusalen llaqta!
¿Haykapikamaraq chayna millakuypaq kanki?”, nispa.+