1 Cronicas

15 Davidpa llaqtan sutiyuq llaqtapiqa hinallam Davidqa wasikunata ruwachirqa. Sapaqcharqataqmi allpatapas Diospa baulninpaq carpata ruwachinanpaq.+ 2 Hinaspanmi Davidqa nirqa: “Leviy ayllumanta kaqkunallam Jehova Diospa baulnintaqa apananku. Paykunatam Jehova Diosqa akllarqa baulninta apanankupaqwan paypaq kaqta haykapipas ruwanankupaq”, nispa.+ 3 Chaymantam Davidqa llapallan Israel runakunata huñurachirqa Jerusalen llaqtaman, chaynapi ruwachisqan carpaman Jehova Diospa baulninta apachimunanpaq.+

4 Davidqa huñurachirqam Aaronpa mirayninkunatapas+ chaynataq Leviy ayllumanta kaqkunatapas.+ 5 Koatpa mirayninmantam huñurachirqa 120 runakunata kamachiqninku Urieltawan. 6 Meraripa mirayninmantañataqmi 220 runakunata kamachiqninku Asayatawan.+ 7 Guersompa mirayninmantañataqmi 130 runakunata kamachiqninku Joeltawan.+ 8 Elizafanpa+ mirayninmantañataqmi huñurachirqa 200 runakunata kamachiqninku Semayatawan. 9 Hebronpa mirayninmantañataqmi 80 runakunata kamachiqninku Elieltawan. 10 Uzielpa+ mirayninmantañataqmi 112 runakunata kamachiqninku Aminadabtawan. 11 Chaymantapas, Davidqa qayachirqam sacerdote Sadoctawan+ Abiatarta+ chaynataq Leviy ayllumanta Urielta, Asayata, Joelta, Semayata, Elielta hinaspa Aminadabta. 12 Paykunatam David nirqa: “Qamkunaqa kankichik Leviy ayllupi kamachiqkunam. Chaynaqa, aylluykichikkunapiwanyá chuyanchakuychik, hinaspayá Israelpa yupaychasqan Jehova Diospa baulninta ruwachisqay carpaman apamuychik. 13 Qayna apamusqaykupiqa manam qamkunachu apamurqankichik,+ chaymi ñuqaykupaq Jehova Dios piñakururqa.+ Ñuqaykuqa manam Diospa kamachisqanman hinachu apamurqaniku”, nispa.+ 14 Chaynata David niptinmi sacerdotekunawan Leviy ayllumanta kaqkunaqa chuyanchakurqaku, chaynapi Israelpa yupaychasqan Jehova Diospa baulninta apamunankupaq.

15 Chaymantam Leviy ayllumanta kaqkunaqa Diospa baulninta chakanawan apamurqaku.+ Chaynataqa apamurqaku Moisesman Jehova Diospa kamachisqanman hinam. 16 Davidqa kamachirqataqmi Leviy ayllupi jefekunatapas, chaynapi ayllunkumanta takiqkunata churanankupaq. Paykunam kusikuywan takirqaku arpakunapa,+ platillokunapa+ hinaspa cuerdayuq kaqkunapa waqasqanwan.

17 Chaymi Leviy ayllumanta kaqkunaqa churarqaku Joelpa churin Hemanta,+ Berekiaspa churin Asafta,+ Kusayapa churin Etanta.+ Etanqa karqa Meraripa mirayninmi. 18 Paykunawantaqmi karqaku iskay kaq grupopi+ ayllunku Zacariaspas, Benpas, Jaazielpas, Semiramotpas, Jeyelpas, Unipas, Eliabpas, Benayapas, Maaseyapas, Matitiaspas, Elifeleupas, Mikneyapas, punku cuidaq Obed-edompas chaynataq Jeielpas. 19 Broncemanta platillokunatam+ tocarqaku Heman,+ Asaf+ hinaspa Etan. Paykunaqa takiqkunataqmi karqaku. 20 Cuerdayuq kaqkunata llañumanta* tocaqkunam karqaku: Zacarias, Aziel, Semiramot, Jeyel, Uni, Eliab, Maaseya hinaspa Benaya.+ 21 Rakumanta*+ arpata tocaqkunañataqmi karqaku: Matitias,+ Elifeleu, Mikneya, Obed-edom, Jeiel hinaspa Azazias. Paykunatam wakin tocaqkuna qatichiqku. 22 Leviy ayllukunapa kamachiqnin Kenaniasmi+ baul apaypi allin yachayniyuq karqa, chaymi baul apamusqankuta qawarqa. 23 Berekiaswan Elcanañataqmi baulta churana carpapa punkunta cuidaqkuna karqaku. 24 Diospa baulninpa ñawpaqninpim cornetillata nisyuta pukurqaku+ sacerdote Sebanias, Josafat, Natanael, Amasai, Zacarias, Benaya hinaspa Eliezer. Obed-edompas, Jeyaspas baulta churana carpapa punkunta cuidaqkunam karqaku.

25 Davidqa, Israelpi punta apaqkunaqa hinaspa 1.000 runakunata kamachiqkunaqa kusisqallañam rirqaku Obed-edompa wasinta, chaynapi Jehova Diospa baulninta* apamunankupaq.+ 26 Leviy ayllumanta kaqkuna baulta apamuptinkum Jehova Dios yanaparqa, chaymi qanchis malta torokunatawan qanchis carnerokunata nakarqaku.+ 27 Davidqa llañu qaytumanta ruwasqa mana makituyuq pachawan pachasqam karqa. Chayna pachasqataqmi karqa Leviy ayllumanta baulta apamuqkunapas, takiqkunapas chaynataq Kenaniaspas. Kenaniasqa karqa baul apamuqkunapawan takiqkunapa kamachiqninmi. Davidqa linomanta mandilniyuqtaqmi* karqa.+ 28 Israel runakunam llapallanku Jehova Diospa baulninta apamurqaku kusikuyllawanña qaparistin,+ waqrata, cornetillakunata,+ platillokunata, arpakunata hinaspa cuerdayuqkunata nisyuta waqachistin.+

29 Jehova Diospa baulninta Davidpa llaqtan sutiyuq llaqtaman chayarachimuptinkum+ Saulpa churin Mical+ wasinpa ventananmanta qawarqa. Payqa kamachiq Davidtam kusikuyllawanña pawaykachastin hamuqta qawaspan pinqarqa.+