Salmos
33 Allin kawsakuq runakuna, Jehova Diosraykuyá kusikuymanta qapariychik.+
Allin ruwaqkunaqa Diostam hatunchananku.
2 Arpawanyá Jehova Diospaq takipuychik.
Cuerdayuq kaqkunawanyá Diosta hatunchaychik.
3 Musuq takitayá takipuychik.+
Kusikuymanta qaparispayá tocapuychik.
4 Jehova Diospa rimasqankunaqa allinmi,+
tukuy ima ruwasqankunapas allinpunim.
5 Allin kawsakuqtawan allin ruwaqtam Diosqa kuyan.+
Jehova Diosqa llapallan runakunatam imaña kaptinpas kuyan.+
6 Jehova Dios rimariykuptillanmi hanaq pacha unanchasqa karqa.+
Chaypi tukuy ima kaqkunapas paypa samaynillanwanmi unanchasqa karqa.
7 Lamar quchapi yakutapas huk hawaqllamanmi huñun.+
Urqucharikuq yakutam payqa quchachin.
8 Llapallan runakunayá Jehova Diosta manchakuchunku.+
Llapallan runakunayá payta yupaychachunku.
9 Pay rimariykuptillanmi tukuy imapas rikurirqa.+
Pay kamachiptillanmi tukuy imapas maymi kananpi kachkan.+
10 Runakunapa mana allin tantiasqantam Jehova Diosqa pantarachirqa.+
Runakunapa tantiasqantam yanqacharurqa.+
11 Jehova Diospa tantiasqankunam ichaqa wiña-wiñaypaq kanqa.+
Sunqunpa munasqankunapas wiña-wiñaypaqmi kanqa.
12 ¡Mayna kusisqam Jehova Diosta Diosninkupaq hapiq runakunaqa!+
¡Mayna kusisqam Diospa akllasqan nacionqa!+
13 Jehova Diosqa hanaq pachamantam qawamuchkan.
Llapallan runakunatam qawamuchkan.+
14 Maymi yachasqanmantam*
kay allpa pachapi runakunata qawamuchkan.
15 Paymi llapallan runakunapa sunqunta ruwaqqa.
Tukuy ima ruwasqankutam payqa qawamuchkan.+
16 Kamachiqqa manam tropankuna kasqanraykuchu kawsan.+
Soldadopas manam kallpasapa kasqanraykuchu kawsan.+
17 Caballoqa maynataña kallpaspanpas
wañuymantaqa manam pitapas ayqichinmanchu.+
18 Jehova Diosqa kasukuqninkunatam qawamuchkan.+
Imaña kaptinpas kuyakuq kasqanmanta mana iskayrayaqkunatam qawamuchkan.
19 Qawamuchkanqa wañuymanta harkaykunanpaqmi.
Qawamuchkanqa muchuypi* mana wañurunankupaqmi.+
20 Ñuqanchikqa Jehova Dios yanapaykuwananchiktam suyachkanchik.
Paymi yanapaykuwaqninchikqa, paymi harkaykuwaqninchikqa.+
21 Paymi sunqunchikta kusiriykachiqqa.
Ñuqanchikqa paypa chuya sutinpim hapipakunchik.+
22 Jehova Dioslláy, yanapawanaykikuta suyanaykukamayá+
imaña kaptinpas hinalla kuyallawayku.+