2 Samuel
21 Davidpa kamachisqan punchawkunapim kimsa wata muchuy* karurqa.+ Hinaptinmi Davidqa Jehova Diosta tapurqa. Jehova Diosñataqmi nirqa: “Saulmi Gabaon runakunata wañurachirqa, chaymi Saulwan ayllunkuna huchayuq kanku”, nispa.+ 2 Gabaon runakunaqa+ manam Israelpa mirayninkunachu karqaku, aswanqa Amorreo runakunamanta+ puchuqkunam. Paykunata manapuni wañuchinankupaqmi Israel runakunaqa rimarqaku.+ Saulmi ichaqa Israel runakuna ukupi hinaspa Juda ayllu ukupi mana yachanankuta* munaspan Gabaon runakunata chinkarachiyta munarqa. Davidqa paykunatam qayarqa rimanankupaq. 3 Hinaspanmi nirqa: “¿Imatataq qamkunapaq ruwayman? ¿Imatataq huchaykumanta ruwaymanku, chaynapi runankunata bendecinanpaq Jehova Diosta mañakunaykichikpaq?”, nispa. 4 Gabaon runakunañataqmi nirqaku: “Saulwan ayllun ima ruwawasqankumantaqa manam qullqitapas nitaq quritapas+ munanikuchu. Manataqmi Israel runakunataqa hukllatapas wañuchiymankuchu”, nispa. Chaymi Davidñataq nirqa: “Imapas munasqaykichikta mañakuwaptikichikqa qusqaykichikmi”, nispa. 5 Hinaptinmi paykunañataq nirqaku: “Israel runakunapa allpanpi mana pipas puchunaykuta munaspanmi Saulqa chinkarachiwaykuta munarqa.+ 6 Chaynaqa, Saulpa mirayninmantayá qanchis qarikunata quwayku. Paykunata wañurachispaykum Jehova Diospaq Guibea llaqtapi+ warkumusaqku,+ chay llaqtaqa Jehova Diospa akllasqan Saulpa llaqtanmi”, nispa.+ Davidñataqmi nirqa: “Ñuqam qusqaykichik”, nispa.
7 Jonatanpa churin Mefibosettam+ ichaqa llakipayaspan Davidqa mana qurqachu. Paytaqa llakipayarqa Jehova Diospa sutinpi Jonatanwan rimasqanraykum, Jonatanqa+ Saulpa churinmi karqa. 8 Kamachiq Davidmi akllarurqa Rizpa+ sutiyuq warmipa wawankunata. Paykunapa sutinmi karqa Armoni hinaspa Mefiboset. Paykunaqa karqa Saulpa churinkunam. Rizpañataqmi karqa Aya sutiyuq runapa warmi churin. Akllarurqataqmi Saulpa churin Micalpa*+ pichqa wawankunatapas. Payqa karqa Adrielpa+ warminmi. Adrielñataqmi karqa Meola llaqtayuq Barzilaipa churin. 9 Chay akllasqan runakunatam Davidqa quykurqa Gabaon runakunaman. Hinaptinmi paykunaqa wañurachispanku urqupi warkururqaku Jehova Diospaq.+ Qanchisninkutam wañurachirqaku cosecha qallariyta, cosechaqa qallarirqa cebada rutuywanmi. 10 Chaymantam Aya sutiyuq runapa churin Rizpaqa+ qachqa pachata rumipa hawanman churarurqa. Hinaspanmi wañusqa runakunapa waqtanpi karqa cosecha qallariymanta para chayamunankama. Punchawmi qawarqa alton pawaqkuna mikurunanmanta, tutanñataqmi purun animalkunamanta.
11 Rizpapa chayna ruwasqantam Davidman willaykurqaku, Rizpaqa karqa Saulpa huknin warminmi. 12 Chaymi Davidqa Saulpa hinaspa churin Jonatanpa tullunkunata maskaq rirqa. Paykunapa ayantam Jabes-galaad llaqtapi+ kamachiqkuna* Bet-san plazamanta upallalla apakurqaku. Chay plazapim Saulpa hinaspa churin Jonatanpa ayanta Filistea runakuna warkururqaku Guilboa muqupi+ wañurachispanku. 13 Davidqa Jabes-galaad llaqtamantam Saulpatawan churin Jonatanpa tullunkunata apamurqa. Huqarimurqakutaqmi warkusqa runakunapa tulluntapas.+ 14 Saulpa hinaspa churin Jonatanpa tullunkunatam pamparurqaku Benjamin ayllupa allpanpi kaq Zela llaqtapi.+ Pamparurqakuqa Saulpa taytan Quispa+ pampakusqanpim. Davidpa lliw kamachisqanta ruwaruptinkum Israel nacionpaq mañakusqankuta Dios uyarirqa.+
15 Kaqmantam Filistea runakunaqa Israel runakunawan pelearqaku.+ Davidqa runankunawanmi rirqa Filistea runakunawan peleaq. Peleasqanpim Davidqa qalaypaqta pisiparurqa. 16 Refaim runakunapa+ mirayninmi karqa Isbi-benob. Paypam karqa broncemanta kimsa kilo masnin*+ llasaq lanzan hinaspa musuq espadan. Isbi-benobqa Davidtam wañurachiyta munarqa. 17 Ichaqa Zeruyapa wawan Abisaimi+ Davidta chaylla yanaparqa.+ Hinaspanmi chay Filistea runata wañurachirqa. Chaymantam Davidta runankuna nirqaku: “¡Amapunim kunanmantaqa ñuqaykuwan peleaqqa lluqsimunkichu,+ manam munanikuchu Israelpa achkiynin wañurunantaqa!”, nispa.+
18 Chaymanta qipatam kaqmanta Filistea runakunaqa+ Israel runakunawan Gob lawpi pelearqaku. Chaypim Safta wañurachirqa Husa llaqtayuq* Sibecai.+ Safqa karqa Refaim runakunapa mirayninmi.+
19 Kaqmantam Gob lawpi pelearqaku.+ Chaypim Elanan wañurachirqa Gat llaqtayuq Goliatta. Elananqa karqa Belen llaqtayuq Jaare-oreguimpa churinmi. Goliatpa lanzanqa karqa telarpa qirun hinam.+
20 Kaqmantam pelearqaku Gat llaqtapiña. Chay llaqtapim karqa hatunkaray runa. Paypa makinkunam karqa suqta dedoyuqkama, chaynallataqmi karqa chakinkunapas. Llapan dedonkunam karqa 24. Chay runapas karqa Refaim runakunapa mirayninmi.+ 21 Chay hatunkaray runaqa Israel runakunamantam asikuq,+ chaymi Simeipa+ churin Jonatan wañurachirqa. Simeiqa karqa Davidpa wawqinmi.
22 Chay tawa runakunam karqaku Refaim runakunapa mirayninkuna. Paykunaqa Gat llaqtapim yacharqaku. Paykunatam Davidwan runankuna wañurachirqaku.+