Job
22 Teman lawmanta Elifazñataqmi+ nirqa:
2 “¿Yaqachu runaqa imallapipas Diosta yanapanman?
¿Yaqachu runaqa mayna yachayniyuqña kaspanpas yanapanman?+
3 ¿Yaqachu tukuy atiyniyuq Diosta allin ruwaq kasqayki kusichinman?
¿Yaqachu Diosqa imallatapas chaskinman allin ruwaq kasqaykirayku?+
4 ¿Allin ruwaq kachkaptikichu payqa ñakarichisunkiman?
¿Allin ruwaq kachkaptikichu payqa qaqchasunkiman?
5 ¿Manachu chaykunaqa llumpay mana allin ruwaq kasqaykirayku
hinaspa huchasapa kasqaykirayku?+
6 Yanqapas-yanqam qamqa wawqikikunamanta imatapas mirayniyuqtaraq mañanki,
qamqa runamasikipa imantapas qichunkim.+
7 Manam pisipasqa runamanqa yakullatapas quykunkichu
nitaq yarqasqa runamanqa tantallatapas quykunkichu.+
9 Qanmi ichaqa imallatapas viudakunamanqa mana quykunkichu,
mana taytayuqkunatapas manam qawariykunkichu.
10 Chaymi tuqllakunapa muyurisqan kachkanki,+
chaymi sasachakuyllapiña kachkanki,
11 chaymi tutayaypi kaspa manaña qawakunkichu,
hinaspapas yakupa pampaykusqan hinam kachkanki.
12 ¿Manachu Diosqa hanaq pachapi kachkan?
Qawayá lucerokunapas alto-alto cielopi kasqanta.
13 Qanmi nirqanki: ‘¿Imatataq Diosqa yachan?
¿Yaqachu yanay-yanay puyu ukumanta juzgamunman?
14 Chay puyukuna harkaptinmi payqa mana qawarimunchu,
cielopa muyuriqninpim purikuchkan’, nispa.
15 ¿Ñawpaq mana allin ruwaq runakunapa
ruwasqantachu qampas hinalla ruwanki?
16 Chay runakunaqa manaraq tiemponkupim wañururqaku,
paykunaqa mayupa apasqan wasi hinam chinkarurqaku.+
17 Chay runakunaqa Diostam niqku: ‘¡Ñuqaykumanta asurikuy!’, nispa.
Niqkutaqmi: ‘¿Imatataq tukuy atiyniyuq Diosqa ruwawanchikman?’, nispapas.
18 Chaynata nichkaspankupas Diospa yanapakuyninwanmi allinlla kawsakurqaku.
Ñuqapa tantiasqaykunaqa manam paykunapa mana allin tantiasqanku hinachu.
19 Allin ruwaq runakunam chaykunata qawaspanku kusikunqaku,
mana huchayuq runakunam asikuspa ninqaku:
20 ‘Chiqniwaqninchik runakunaqa tukurunñam,
puchuptinkupas manchakuypaq ninam ruparunqa’, nispa.
21 Diostaraqyá sumaqta riqsiykuy hawka kawsakunaykipaq,
hinaptinqa qampaqmi imapas allin kanqa.
22 Kamachikuyninkunatayá kasukuy,
imapas nisusqaykikunatayá sunquykipi waqaychay.+
23 Tukuy atiyniyuq Diosman kutirikuspaykiqa allinmi kanki.+
Carpaykipi mana allin ruwaq mana kaptinqa,
24 ñutu qurikitapas pampaman wischuptikiqa
hinaspa Ofir lawmanta+ qurikitapas wayqukunaman wischuptikiqa,
25 tukuy atiyniyuq Diosmi kanqa allinnin quriki hina
hinaspa allinnin qullqiki hina.
26 Tukuy atiyniyuq Diosraykum kusisqa kawsakunki,
mana iskayrayaspam qayakunkipas.
27 Tukuy sunqumanta mañakuptikiqa payqa uyarisunkim,
hinaptinmi qampas imata ruwanaykipaq nisqaykikunata ruwanki.
28 Imata ruwanaykipaq tantiasqaykikunapas allinmi kanqa,
purisqayki ñanpas achkisqam kanqa.
29 Hatuntukuspa rimaspaykim ichaqa pinqayman churasqa kanki,
Diosqa mana hatuntukuqtam qawarinqa.
30 Diosqa mana huchayuqtam yanapanqa,
chaymi mana huchayuq kaspaykiqa paypa yanapasqan kanki”, nispa.