1 Samuel
12 Chaymantam llapallan Israel runakunata Samuel nirqa: “Tukuy ima mañawasqaykichiktam ruwaruni, kamachisuqnikichik runatapas churarunitaqmi.+ 2 ¡Kayqaya kamachisuqnikichik runaqa!+ Ñuqaqa yuyaqña hinaspa suqu umañam kachkani. Churiykunapas qamkunawanmi kachkan.+ Ñuqaqa musu kasqaymantapacham kunankama yanaparqaykichik.+ 3 Chaymanta kunankama, ¿yaqachu haykapipas toroykichikta utaq asnoykichikta qichurqaykichik?+ ¿Yaqachu pipa imantapas suwakurqani utaq pitapas ñakarichirqani? ¿Yaqachu pipa mana allin ruwasqantapas pakarqani imatapas quwasqanrayku?+ Chayna kaptinqa, Jehova Diospa hinaspa akllasqan kamachiqpa qayllanpiyá niykuwaychik,+ ñuqaqa kutichipusqaykichikmi”, nispa.+ 4 Chaymi Israel runakunañataq nirqaku: “Qamqa taytáy, manam pipa imantapas suwakurqankichu nitaqmi pitapas ñakarichirqankichu, manataqmi pimantapas imatapas chaskikurqankichu”, nispa. 5 Chaymi paykunata Samuel nirqa: “Kunanmi Jehova Diospas hinaspa akllasqa kamachiqpas chayna nisqaykichikta uyarichkanku, manam ñuqapiqa ima mana allintapas tarinkichikchu”, nispa. Hinaptinmi paykunañataq nirqaku: “Arí, chaynamá taytáy”, nispanku.
6 Chaymi Samuelñataq runakunata nirqa: “Jehova Diosmi chayna nisqaykichikta uyarichkan. Payqa Moisestawan Aarontam akllarqa Egipto nacionmanta ñawpaq abueloykichikkunata hurqumunanpaq.+ 7 Kunanñataqyá asuykamuychik Jehova Diospa qayllanpi rimapayasqayta uyariwanaykichikpaq. Qamkunapaqpas chaynataq ñawpaq abueloykichikkunapaqpas Jehova Diospa allinkuna ruwasqanmantam rimapayasqaykichik.
8 Egiptoman Jacobpa astakusqan qipatam+ ñawpaq abueloykichikkunaqa Jehova Diosta mañakurqaku yanapaykunanpaq.+ Hinaptinmi Jehova Diosqa Moisestawan+ Aaronta kacharqa Egiptomanta kayman pusamunankupaq.+ 9 Chaywanpas ñawpaq abueloykichikkunaqa Jehova Diostam qipancharurqaku.+ Chaymi Diosqa paykunata churaykurqa Hazor llaqtayuq soldadokunapa kamachiqnin Sisarapa makinman,+ Filistea runakunapa makinman+ hinaspa Moab llaqtata kamachiqpa makinman.+ Hinaptinmi paykunawan pelearqaku. 10 Chaymi Jehova Diosta mañakuspanku+ nirqaku: ‘Jehova Diosllayku, Baal taytachakunatawan+ Astoret mamachakunata+ yupaychasqaykuwanmi huchallikuruniku,+ hinaspam qamta saqiruykiku. Kunanyá kay runakunapa makinmanta libraykullawayku qamllataña yupaychanaykupaq’, nispa. 11 Chaynata mañakuptinkum chiqniqninku runakunapa makinmanta libraykunanpaq Jehova Diosqa churarqa Jerubaalta,+ Bedanta hinaspa Jefteyta.+ Churawarqataqmi ñuqa Samueltapas,+ chaynapi hawkalla kawsanaykichikpaq.+ 12 Chaywanpas Ammon runakunata kamachiq Naas+ qamkunawan peleananpaq hamuptinmi Jehova Dios kamachisuqnikichik kachkaptinpas+ qayaykachakuspa niwarqankichik: ‘¡Kamachiqniyuq kaytam munaniku!’, nispa.+ 13 Chaynaqa, kayqaya kaypi kachkan mañakusqaykichik kamachiqqa. Paytaqa Jehova Diosmi churaykun kamachiqnikichik kananpaq.+ 14 Kunanqa Jehova Diospa kamachikuyninkunata kasukuspayá+ Jehova Diosllata yupaychaychik.+ Sichu kamachiqnikichikpas chaynataq qamkunapas Jehova Diosllata yupaychaspaykichikqa allinmi kankichik. 15 Ichaqa Jehova Diosmanta karunchakuspa Jehova Diospa kamachikuyninkunata mana kasukuptikichikqa, Jehova Diosmi castigasunkichik qamkunatapas hinaspa taytaykichiktapas.+ 16 Kunanñataqyá allinta qawaychik atiyniyuq Jehova Diospa ima ruwasqanta. 17 Kunanqa trigo rutuy tiempom ¿aw? Chaywanpas Jehova Diostam mañakusaq rayokunata tunrururuchispan parata chayachimunanpaq. Hinaptinmi yachankichik kamachiqniyuq kayta munasqaykichikqa Jehova Diospaq mana allin kasqanta”, nispa.+
18 Samuelqa Jehova Diostamá mañakurqa, hinaptinmi Jehova Diosqa rayokunata tunrururuchispan chay punchaw parachimurqa. Chaymi runakunaqa Jehova Diosta hinaspa Samuelta manchakurqaku. 19 Hinaspankum Samuelta nirqaku: “Jehova Diostayá mañapuwayku,+ manam wañuytaqa munanikuchu. Huchallikurunikutaqmi kamachiqniyuq kayta munasqaykuwanpas”, nispa.
20 Hinaptinmi Samuelqa llapallankuta nirqa: “Ama manchakuychikchu. Tukuy mana allinkunatam ruwarunkichik. Kunanqa amayá Jehova Diosmantaqa karunchakuychikchu.+ Jehova Diostayá tukuy sunquykichikwan yupaychaychik.+ 21 Amayá Diosmantaqa karunchakuychikchu yanqa kaqkunata maskaspaqa.+ Chaykunaqa manam imapaqpas valenchu,+ manataqmi pitapas yanapayta atinmanchu. 22 Jehova Diosmi akllasurqankichik runankuna kanaykichikpaq.+ Chaymi Jehova Diosqa sutinrayku+ mana saqisunkichikchu.+ 23 Ñuqaqa hinallam Jehova Diosta mañapusqaykichik, manachayqa Diospa qayllanpichá huchallikuchkayman. Hinallataqmi yachachisqaykichik Diospa munasqanman hina kawsakunaykichikpaqpas. 24 Qamkunaqa Jehova Diostayá kasukuychik,+ tukuy sunquykichikwanyá yupaychaychik. Qamkunarayku allinkuna ruwasqantayá yuyariychik.+ 25 Sichu qamkunapas chaynataq kamachisuqnikichikpas mana allinllata ruwaspaykichikqa+ wañuchisqam kankichik”, nispa.+