Salmos
Manaña ima ruwakuytapas atispan ñakariqpa mañakusqan. Llakinkunamanta Jehova Diosman willakusqan.+
102 Jehova Dioslláy, mañakusqaytayá uyariykullaway.+
Yanapaykuwanaykipaq mañakusqayqa qanmanyá chayamuchun.+
2 Llakipi kaptiyqa amayá qipancharullawaychu.+
Kurkuykamuspayá uyariykullaway.
Qayakamusqaytayá chaylla uyariykullaway.+
3 Kawsakuyniyqa qusni hina chinkaruqllam,
tullullaykunam ninapa rupasqan hina kachkan.+
4 Sunqullaypas ñitisqa kasqanraykum qura hina chakirun,+
tantay mikuytapas qunqaruniñam.
6 Chunniqpi pelicano hinam kallachkani.
Raqaykunapi chusiq hinam kallachkani.
7 Manam puñuytapas tarillanichu*.
Teja wasipa hawanpi sapallan pichinkucha hinam kallachkani.+
8 Chiqniwaqniykunam tukuy punchaw tuku-tukuyta kamiwanku.+
Ñuqamanta asikuqkunaqa ñakanankupaqmi sutiypiraq rimanku.
9 Uchpatañam tantata hina mikuchkani.+
Tomanaypipas wiqillayñam kachkan.+
10 Piñakusqaykiraykum chayna kachkani,
qamqa hatarichiwarqanki mana qawariwanaykipaqmi.
11 Kawsakuyniyqa llantuy hina chinkaruqllam.+
Qura hinam chakichkani.+
12 Jehova Dioslláy, qanmi ichaqa wiñaypaq kawsakunki.+
Ancha riqsisqa kaynikipas wiñaypaqmi kanqa.+
13 Hatarispaykim qamqa Sion muqutaqa llakipayanki.+
Kuyapayanaykipaq punchawmi chayaramun.+
14 Yupaychasuqnikikunaqa Sionpi rumi pirqakunawanmi kusikunku.+
Runaykikunaqa ñutu allpantapas kuyankum.+
15 Llapallan runakunam Jehova Diospa sutinta manchakunqaku.
Kay allpa pachapi llapallan kamachiqkunam kanchaynikita manchakunqaku.+
16 Jehova Diosqa Sion muqutam kaqmanta hatarichinqa.+
Payqa kanchayninpim rikuriykamunqa.+
17 Wakchakunapa qayakusqantam uyarinqa.+
Mañakusqantapas sumaqtam uyariykunqa.+
18 Kayqa qillqasqa kachkan qipa wiñaykunapaqmi.+
Kayqa qillqasqa kachkan qipa wiñay runakuna Jehova* Diosta hatunchanankupaqmi.
19 Payqa hanaq pachamantam qawamuchkan.+
Jehova Diosqa hanaq pachamantam kay allpa pachata qawamuchkan.
20 Qawamuchkanqa presochasqakunapa qayakusqanta uyarinanpaqmi.+
Wañunankupaqña kaqkunata yanapananpaqmi.+
21 Jehova Diospa sutin Sion muqupi willakusqa kananpaqmi,+
Jerusalenpi hatunchasqa kananpaqmi,
22 chaynaqa kanqa llaqtachakunawan hatun llaqtakuna
Jehova Diosta yupaychanankupaq hukllawakuptinkum.+
23 Payqa manaraq machuyachkaptiymi pisi kallpayarachiwan.
Payqa manaraq tiempoypim machuyarachiwan.
24 Ñuqam nirqani:
“Dioslláy, amayá wañurachiwaychu manaraq tiempoypiqa,
qamqa wiñaypaq kawsakuqmi kanki.+
25 Qamqa ñawpaqmantaraqmi allpa pachatapas suma-sumaqta takyachirqanki,
hanaq pachatapas qanmi ruwarqanki.+
26 Chaykuna chinkaptinpas qamqa hinallam kawsanki,
paykunaqa mawka pacha hinam tukunqaku.
Qamqa mawka pachata hurquspa musuq pachawanña hinaruchkaq hinam paykunata cambianki, hinaptinmi chinkanqaku.
27 Qanmi ichaqa hina kaqlla kanki, qamqa manam haykapipas chinkankichu.+
28 Yupaychasuqnikikunapa churinkunaqa hawkam kawsakunqaku.
Qampa ñawpaqnikipim miraynikikunapas allin takyachisqa kanqaku”, nispay.+