1 Corintios
11 Imayna kasqaytayá qatipakuwaychik, imaynam ñuqapas Cristopa* imayna kasqanta qatipakusqayman hina.+
2 Tukuy imapi yuyariwasqaykichikraykum alabaykichik, qamkunaqa yachachisqayman hinam kamachikuykunata allintapuni kasukuchkankichik. 3 Ichaqa munanim kayta yachanaykichikta: Llapa qaripa umanqa* Cristom,+ warmipa umanñataqmi qari,+ Cristopa umanñataqmi Dios.+ 4 Sichu pi qaripas umanta tapakuruspan Diosta mañakunqa utaq Diospa nisqankunamanta willakunqa hinaspanqa umantam pinqaypi churachkan. 5 Sichu pi warmipas umanta mana tapakuspan Diosta mañakunqa utaq Diospa nisqankunamanta willakunqa+ hinaspanqa umantam pinqayman churan, chayqa kanman chukchanta kachiy-kachiyta rutukurunmanpas hinam. 6 Chayrayku, sichu pi warmipas umanta mana tapakunqachu hinaspanqa chukchantayá rutuchikuchun, warmipa chukchan rutuchikuynin utaq kachiy-kachiyta rutuchikuynin pinqaypaq kaptinqa umantayá tapakuchun.
7 Qariqa manam umantaqa tapakunanchu Diosman rikchakuq kasqanrayku+ hinaspa Diosta hatunchananpaq kasqanrayku, warmim ichaqa qarita hatunchananpaq kachkan. 8 Manam qarichu warmipa cuerponmanta unanchasqa karqa, aswanqa warmim qaripa cuerponmanta unanchasqa karqa.+ 9 Chaymantapas qariqa manam warmipa allinninpaqchu unanchasqa karqa, aswanqa warmim qaripa allinninpaq unanchasqa karqa.+ 10 Chaymi angelkunarayku warmiqa umanta tapakunan qusan kasukusqanta qawachinanpaq.+
11 Chaymantapas, señorpi iñiqkuna ukupiqa warmiqa manam qarimanta sapaqchu nitaqmi qaripas warmimanta sapaqchu. 12 Imaynam warmipas qaripa cuerponmanta unanchasqa karqa,+ chaynataqmi qaripas warmimanta nacen, ichaqa tukuy imatam Dios unancharqa.+ 13 Kikikichikyá tantiaykuychik: ¿Allinchu kanman umanta mana tapakuspan warmipa Diosta mañakuynin? 14 ¿Manachu yachankichik qaripa hatun chukchayuq kayninqa pinqaypaq kasqanta, 15 warmipaqñataq hatun chukchayuq kayninqa sumaqllaña kikinpaq kasqanta? Warmipa chukchanqa uman tapakunan hinam. 16 Ichapas kaytaqa mana allinpaq pipas hapinman, chayna kaptinpas manam kanchu huk costumbreqa ñuqaykupaqpas nitaq Diospi iñiqkunapaqpas.
17 Kaykunata nispayqa manam alabachkaykichikchu, qamkunaqa manam allinpaqchu huñunakunkichik, aswanqa mana allinpaqmi. 18 Uyarirunim huñunakuypi kaspaykichik rakinasqa kasqaykichikta, chayna uyarisqaymanta wakintaqa chayna kasqanpaqmi hapini. 19 Kanqam qamkuna ukupi rakinakuykunaqa,+ chaynapim yachakunqa qamkunamanta pikuna Diospa chaskisqan kasqanta.
20 Señorninchikta yuyarinapaq huñunakuyta ruwaspaykichikqa manam tantata mikunaykichikpaq nitaq vinota tomanaykichikpaq hinachu tarikunkichik.+ 21 Señorpa cenan mikuna horapaqqa wakinmi mikuramunña, wakinñataqmi sinkaña kachkan, wakinmi ichaqa yarqaymanta kachkan. 22 Qamkunapaqqa, ¿manachu wasikichik kan mikunaykichikpaq hinaspa tomanaykichikpaq? Icha, ¿Diospi iñiqkunatachu mana kaqpaqta hina hapinkichik hinaspa mana imayuq kaqkunatapas pinqaypi churachkankichik? ¿Ima nikichikmantaq? ¿Alabaykichikmanchu? Manam kaymantaqa alabaykichikchu.
23 Ñuqaqa señormanta chaskisqaytam willarqaykichik, señor Jesusmi qipanchasqa kanan tuta+ tantata hapiykurqa, 24 hinaspanmi Diosta agradecekuspan partiykurqa, hinaspam nirqa: “Kayqa cuerpoywanmi tupan,+ cuerpoyqa qamkunaraykum qusqa kanqa. Hinallayá kayta ruwaychik ñuqata yuyariwaspa”, nispa.+ 25 Cenaruptinkuñataqmi vasotapas hapiykuspan+ nirqa: “Kay vasopi vinoqa Diospa musuq contrato* ruwasqanwanmi tupan,+ chayqa yawarniyraykum valorniyuq kanqa,+ hinallayá kayta ruwaychik ñuqata yuyariwanaykichikpaq sapa kuti tomaspa”, nispa.+ 26 Qamkunaqa tantata sapa kuti mikuspa hinaspa vasopi vinota sapa kuti tomaspam señorninchikpa wañukusqanta willakuchkankichik señorninchik hamunankama.
27 Chaynaqa, pipas señorninchikpa tantanta mana chaypaq hina kachkaspan mikuqqa utaq señorninchikpa vinonta mana chaypaq hina kachkaspan tomaqqa señorninchikpa cuerponpa chaynataq yawarninpa contranpim huchallikun. 28 Puntataqa sapakamayá imayna kasqanta qawakuchun chaynapi allin ruwasqanta yachananpaq,+ hinaspanña tantata mikuchun hinaspa vasopi vinotapas tomachun. 29 Pipas señorninchikpa cuerpon imawan tupasqanta mana entiendespan mikuqqa hinaspa tomaqqa kikillanmi juzgasqa kananpaq churakuchkan. 30 Chayraykum qamkunamanta achkallaña mana kallpayuq hina chaynataq unqusqa hina kachkankichik, achkallañataqmi wañusqa hinapas kachkankichik*.+ 31 Ichaqa sapakama imayna kasqanchikta qawakuspaqa manam juzgasqachu kachwan. 32 Jehova* Diosqa juzgawaspanchikmi corregiwanchik,+ chaynapi mana iñiq runakunawan kuska mana castigasqa kanapaq.+ 33 Chaynaqa kuyasqay wawqi-panillaykuna, chay cenata mikunaykichikpaq huñunakuspaykichikqa suyanakuychikyá. 34 Pipas yarqaymanta kaspanqa wasinpiyá mikumuchun, chaynapi huñunakuspan Diospaq huchayuq mana kananpaq.+ Wakin sasachakuykunataqa chayamuspayñam allichasaq.