2 Cronicas
17 Asa wañukuptinmi churin Jeosafatña+ kamachirqa, Jeosafatqa Israel kamachiqmantapas aswan munayniyuqmi karqa. 2 Juda nacionpi murallasqa llaqtakunapim churarqa soldadonkunata. Churarqataqmi taytan Asapa munaychakusqan Efrain ayllupa llaqtankunapipas.+ 3 Jeosafatqa ñawpaq abuelon David+ hinam Jehova Diospa munasqanman hina kawsakurqa, payqa manam Baal taytachakunataqa yupaycharqachu. Chaymi Diosqa Jeosafatta yanaparqa. 4 Jeosafatqa taytan hinam Diosta maskarqa,+ hinaspapas kamachikuyninkunatam kasukurqa, manam payqa Israel nacionpi runakunapa ruwasqankutaqa qatipakurqachu.+ 5 Chaymi Jehova Diosqa hinalla kamachinanpaq yanaparqa.+ Jeosafatmanmi Juda nacionpi lliw runakuna imatapas qunankupaq apamuqku, hinaptinmi payqa kapuqniyuq hinaspa ancha riqsisqa karqa.+ 6 Jeosafatqa mana manchakuspanmi tukuy sunqunwan Jehova Diosta kasukurqa. Juda nacionpi yupaychana patakunatapas+ chaynataq sayachisqa kullukunatapas chinkarachirqam.+
7 Kimsa wata kamachichkaspanmi pusachimurqa yanapaqnin Ben-ailta, Abdiasta, Zacariasta, Natanaelta hinaspa Micayata. Paykunatam kamachirqa Juda nacionpi yachachinankupaq. 8 Paykunawanmi karqa: Leviy ayllumanta Semaya, Netanias, Zebadias, Asael, Semiramot, Jeonatan, Adonias, Tobiya hinaspa Tob-adonias. Paykunawantaqmi karqa sacerdote Elisamapas chaynataq Jeorampas.+ 9 Paykunam Jehova Diospa kamachikuyninkunamanta rimaq librota aparikuspanku+ Juda nacionpi lliw runakunaman yachachimurqaku.
10 Juda nacionpa hichpan nacionkunapi kamachiqkunapas Jeosafatta Jehova Dios yanapasqanta yacharuspankum mancharisqallaña karqaku, chaymi Jeosafatwanqa mana pelearqakuchu. 11 Filistea runakunam Jeosafatman apamuqku qullqita hinaspa imapas mañakusqanta. Arabia runakunapas apamuqkum 7.700 carnerokunata hinaspa 7.700 chivokunata.
12 Jeosafatqa aswan-aswan munayniyuqmi rikurirurqa,+ hinaspam llaqtakunapa murallanta pirqachirqa+ chaynataq kawsaykuna churana llaqtakunatapas.+ 13 Juda nacionpiqa ruwachirqataqmi tukuy imakunatapas, Jerusalen llaqtapiñataqmi karqa kallpasapa soldadonkuna. 14 Paykunaqa ayllunkuman hinam huñusqa karqaku. Juda ayllumantam karqaku 1.000 runakunapa kamachiqninkuna. Huknin kamachiqmi karqa Adna, paywanmi karqa 300.000 kallpasapa soldadokuna.+ 15 Adnaman qatiqñataqmi karqa Jeoanan. Paywanmi karqa 280.000 soldadokuna. 16 Adnaman qatiqmi karqa Zicripa churin Amasiapas, payqa kikinmantam Jehova Diospaq llamkayta munarqa, paywanmi karqa 200.000 kallpasapa soldadokuna. 17 Benjamin ayllumantañataqmi+ karqa Eliada, payqa kallpasapa soldadom karqa. Paywanmi karqa 200.000 soldadokuna sapakama flechayuq hinaspa sapakama harkachikunayuq.+ 18 Eliadaman qatiqñataqmi karqa Jeozabad. Paywanmi karqa 180.000 soldadokuna. 19 Paykunam kamachiq Jeosafatta yanaparqaku. Karqataqmi Juda nacionpa murallayuq llaqtankunapi churasqan soldadonkunapas.+