Jeremias
31 Jehova Diosmi nin: “Chay punchawkunapiqa Israelpi llapallan runakunapaqmi Diosnin kasaq, paykunañataqmi runaykuna kanqa”, nispa.+
2 Jehova Diosmi nin:
“Espadawan mana wañuchisqanku runakunatam chunniqpi llakipayarqani
Israel runakuna samananku allpaman riptinku”, nispa.
3 Jehova Diosqa karullamanta rikuriykuwaspanmi niwarqa:
“Qamtaqa wiñaypaqmi kuyarqayki.
Imaña kaptinpas kuyakuq kasqayraykum qayarqayki.+
4 Kaqmantam hatarichisqayki, kaqmanta pirqasqam kanki.+
6 Hamuchkanmi punchawkuna Efrain urqukunamanta llaqtata cuidaqkuna
‘¡hakuchik Sion muquman qispisun, Jehova Diosninchikpa kasqanman qispisun!’” nispa qaparinankupaq.+
7 Jehova Diosmi nin:
“Jacobraykuyá kusikuymanta qapariychik.
Kusikuymantayá qapariychik, qamkunaqa nacionkunapa hawanpim kachkankichik.+
Hatunchaspayá kaynata niychik:
‘Jehova Dioslláy, runaykikunatayá yanapaykuy, Israelmanta puchuqkunatayá yanapaykuy’, nispa.+
Ñawsakunatawan wiqrukunatapas paykunatawan kuskatam kutichimusaq,+
wiksayuqkunatawan wachakunankupaq hinaña kaqkunatam paykunatawan kuskata kutichimusaq.
Achkallay-achkam kutimunqaku.+
9 Waqastinmi kutimunqaku.+
Qayakamuwachkaptinkum pusasaq.
Kallpaq yakumanmi pusasaq,+
allin ñannintam pusasaq mana urmanankupaq.
Ñuqaqa Israelpa taytanmi kani, Efrainpas piwi churiymi”, nispa.+
10 Nacionkuna, Jehova Diospa nisqantayá uyariychik,
karupi islakunamanyá willamuychik:+
“Israelta chiqichiqmi huñumunqa.
Ovejata michiq runa hinam payqa paykunawan kanqa.+
12 Sion muquman hamuspankum kusikuymanta qaparinqaku,+
Jehova Dios kuyakuq kasqanraykum kusisqa kanqaku.
Kusisqataqmi kanqaku vinorayku,+ aceiterayku, kawsaykunarayku,
ovejakunapa uñankunarayku chaynataq vacakunapa uñankunarayku.+
Paykunaqa parqupayasqa* huerta hinam kanqaku,+
paykunapa kallpanqa manam haykapipas pisiyanqachu”, nispa.+
13 “Chay punchawkunapiqa qariwan manaraq puñuq sipasmi kusisqallaña tusunqa,
musukunapas yuyaqkunawanmi kusisqallaña tusunqaku.+
Llakisqa kanankumantaqa kusisqañam kanqaku.+
Sunqunkutam tiyaykachisaq, sasachakuypi kanankumantaqa kusisqañam kanqaku.+
14 Sacerdotekunapapas manam imankupas pisinqachu,
kuyakuyniyraykum runaykunaqa kusisqa kanqa”,+ Jehova Diosmi chaynata nin.
15 “Jehova Diosmi nin:
‘Rama+ llaqtapim qapariy uyarikuchkan, llakikuywan llumpay waqayllañam uyarikuchkan.
Raquelmi wawankunamanta waqachkan.+
“Amaña waqaychu” ninankutapas manam munanchu,
wawankunam manaña kanñachu’”, nispa.+
16 Jehova Diosmi nin:
“‘Amaña waqayñachu, yanqañam wiqikita usuchinki,
kaykuna ruwasqaykiqa manam yanqachu kanqa’, nispa.
Jehova Diosmi nin: ‘Chiqniqnin runakunapa allpanmantam paykunaqa kutinqaku’, nispa.+
17 Jehova Diosmi nin: ‘Hamuq punchawkunapiqa allinñam kanki,+
wawaykikunapas allpankumanmi kutinqaku’”, nispa.+
18 “Efrainpa waqasqantam uyarirqani, waqaspanmi nirqa:
‘Novicio torota hinam maynin purinayta yachachiwarqanki,
allin ñanpi purinaypaqmi rimapayawarqanki.
Kutichiway, kutichiwaptikiqa kutisaqmi,
qamqa Jehova Diosniymi kanki.
19 Kutiramuspaymi sunquypi hukman tarikurqani,+
tukuy chaykunata imam kaqta niykuwaptinkum muquyta takakurqani wanakusqayta yachanankupaq.
Pinqakuymantam karqani, mana allin qawasqam karqani,+
warma kaspay mana allinkunata ruwasqayraykum chayna karqani’”, nispa.
20 Jehova Diosmi nin: “¿Manachu Efrainqa kuyayllapaq churiy? ¿Manachu kuyasqay churiy?+
Paymanta tukuy imataña nispaypas yuyariniraqmi.
21 “Rinayki ñanpiyá señalta churay,
ñantayá señalay.+
Ñantayá sumaqta qaway, rinayki ñantayá sumaqta qaway.+
Israel llaqtalláy*, kutimuy. Kay llaqtaykikunamanyá kutimuy.
22 ¿Haykapikamataq mana huklla rimaq kanki? Yaw, mana kasukuq llaqta.
Jehova Diosmi kay allpapi mana haykapipas rikusqankuta rikurirachin:
Warmim qarita wañuy kawsay maskanqa”.
23 Angelkunata kamachiq Jehova Diosmi nin, Israelpa Diosninmi nin: “Juda llaqtakunaman chayarachimuptiymi ninqaku, huklawman apasqa kaqkunata kutirachimuptiymi ninqaku: ‘Yaw alli-allin llaqta,+ sapaqchasqa urqu,+ Jehova Diosyá bendecisunki’, nispa. 24 Chaypim yachanqaku* Juda runakunapas, llaqtapi runakunapas, chakrapi llamkaqkunapas chaynataq michiqkunapas.+ 25 Pisipasqakunatam samaykachisaq, hinaspapas mana kallpayuqkunatam saksaykachisaq”, nispa.+
26 Rikchariruspaymi qawaykacharikurqani, miskitam puñurusqani.
27 Jehova Diosmi nin: “Hamuchkanmi punchawkuna Israelpa miraynintawan Judapa mirayninta achkayachinaypaq, animalninkunata mirachinaypaq”, nispa.+
28 Jehova Diosmi nin: “Imaynam qawan-qawanlla karqani paykunata pilanaypaq, taqmanaypaq, tuñichinaypaq, wichichinaypaq hinaspa ñakarichinaypaq,+ chaynam qawan-qawanlla kasaq pirqanaypaqpas chaynataq plantanaypaqpas.+ 29 Chay punchawkunapiqa manañam ninqakuñachu: ‘Tayta-mamakunam puchqu uvasta mikurunku, ichaqa churi-wawankunapa kirunmi sallirun*’, nispa.+ 30 Sapakamam huchankurayku wañunqaku, pipas puchqu uvasta mikuruptinqa kikinpa kirunmi sallirunqa”, nispa.
31 Jehova Diosmi nin: “Hamuchkanmi punchawkuna Israelpa mirayninkunawan hinaspa Judapa mirayninkunawan musuq contratota* ruwanaypaq.+ 32 Kay contrato ruwasqayqa manam ñawpaq abuelonkuwan contrato ruwasqay hinachu kanqa, paykunataqa Egiptomantam hurqumurqani,+ ‘paykunam contrato ruwasqayta yanqacharurqaku,+ paykunapa taytan* hina kachkaptiypas yanqacharurqakum’, ñuqa Jehova Diosmi chaynata nini”, nispa.
33 Jehova Diosmi nin: “Chay punchawkunamanta qipata Israelpa mirayninkunawan contrato ruwasqayqa kaymi: Kamachikuyniytam sunqunkuman churasaq,+ sunqunkupim qillqasaq,+ ñuqam Diosninku kasaq, paykunañataqmi runaykuna kanqaku”, nispa.+
34 Jehova Diosmi nin: “Manañam pipas runamasintaqa nitaq wawqi-panintaqa ninqañachu ‘¡Jehova Diosmantayá yachaychik!’ nispaqa.+ Hatun-uchuymi ñuqataqa riqsiwanqaku.+ Imapas pantasqankuta pampachaspaymi huchankutaqa manaña yuyarisaqñachu”, nispa.+
35 Punchawta intiwan kancharichiq Jehova Diosmi,
killatawan lucerokunata tutan kanchananpaq kamachiqmi,
lamar quchata taspiqmi,
lamar quchata piñachiqmi,
angelkunata kamachiq Jehova sutiyuqmi nin:+
36 “‘Intipas, killapas chaynataq lucerokunapas mana kanchaptillanñach
Israel runakunataqa saqiyman, chayllañach paykunataqa wiñaypaq saqiyman, ñuqa Jehova Diosmi chaynata nini’”.+
37 Jehova Diosmi nin: “‘Cielokunata tupuptillankuch, allpa pachapa uku pampanta qawaptillankuch Israelpa mirayninkunataqa saqiyman, chayllañach tukuy imata ruwasqankuraykuqa saqiyman’, ñuqa Jehova Diosmi chaynata nini”, nispa.+
38 Jehova Diosmi nin: “Hamuchkanmi punchawkuna ñuqa Jehova Diospaq kay llaqtata kaqmanta ruwanankupaq,+ Hananel+ torremanta Esquina+ sutiyuq punkukamam ruwanqaku. 39 Waskawanmi tupunqaku+ Gareb muqukama hinaspam tupustin Goa lawman muyunqaku. 40 Ñuqa Jehova Diospaq sapaqchasqam kanqa+ ayakunapa kanan wayqu, uchpa wayqu, tarpunanku qatamanta Cedron wayqukama.+ Ñuqa Diospaq sapaqchasqataqmi kanqa intipa qispimunan lawpi Caballo sutiyuq punku+ esquinakama, kay llaqtaqa manam haykapipas wichinqañachu nitaq tuñinqañachu”, nispa.