Isaias
59 Jehova Diospa atiyninqa manam pisillachu salvayta mana atinanpaqqa,+
manataqmi karutachu uyarikun mana uyarinanpaqqa.+
2 Diosnikichikmantaqa karuncharusunkichik mana allinkunata ruwasqaykichikmi.+
Huchaykichikkunaraykum payqa manaña qawarisunkichikñachu
nitaq uyarisunkichikñachu.+
3 Qamkunaqa runa wañuchiqmi kankichik,+
hucha ruwaqmi kankichik.
Llullallatam rimankichik,+ mana allinkunallatam rimapakunkichik.
4 Manam pipas rimarinchu allin ruwayman hina ruwanankupaqqa,+
juezmanpas llullallawanmi rinku.
Paykunaqa yanqakunapim hapipakunku,+ mana kaqkunatam rimanku.
Sasachakuyllatam wiksayakunku, mana allinllatam wachakunku.+
5 Kachukuq culebrapa runtuntam uqllanku,
arañapa llikantam ruwanku.+
Pipas chay runtukunata mikuqqa wañunqam,
chay runtumantaqa culebram tuqyanqa.
6 Arañapa llikanta ruwasqankuqa
manam pachakunankupaq hinachu kanqa.+
Ruwasqankuwanpas manam tapakunqakuchu,
paykunapa imapas ruwasqankuqa mana allinllam, makinkupas mana allin ruwaqllam.+
7 Chakinkupas utqaymanmi kallpan mana allinta ruwamunankupaq,
paykunaqa mana huchayuq runata wañuchinankupaqmi chaylla rinku.+
Mana allinkuna ruwasqankuwanmi runamasinkuta
llumpayta ñakarichinku hinaspa waqachinku.+
8 Paykunaqa manam yachankuchu runamasinkuwan hawka kawsakuytaqa,
ñanninkupiqa manam kanchu allin ruwayqa.+
Ñanninkutapas qiwinkum,
chayninta puriqqa manam hawkayaytaqa tarinqachu.+
9 Allin ruwayqa chayraykum ñuqanchikmanta karupi kachkan,
chayraykum allin kaqpas mana kanchu.
Achkitam munanchik, ichaqa tutayayllam,
achikyamunantam munanchik, ichaqa hinallam tutayaypi purichkanchik.+
10 Ñawsakuna hinam pirqata llachpakachachkanchik,
mana ñawiyuq hinam llachpakachachkanchik.+
Tutayaypi hinam chawpi punchawpi urmanchik,
kallpasapakunapa kasqanpiqa wañusqa hinam kanchik.
11 Osokuna hinam llapallanchik qaparichkanchik,
palomakuna hinam llakikuymanta waqachkanchik.
Allin ruway kanantam munanchik, ichaqa manam kanchu,
yanapakuy hamunantam munanchik, ichaqa ñuqanchikmanta karupim kachkan.
12 Ñuqaykupa mana kasukusqaykuqa achka-achkam qampa ñawpaqnikipiqa,+
tukuy ima huchaykum pantasqaykuta qawachiwanku.+
Ñuqaykuqa yachakunikum mana kasukusqaykutaqa,
riqsikunikupunim mana allin ruwasqaykutaqa.+
13 Jehova Diospa ñawpaqninpim huchallikururqanchik,
paytam saqirurqanchik, Diosninchiktam qipancharurqanchik,
ñakarichiyllamantam rimarqanchik, mana kasukuyllamantam rimarqanchik,+
llullakuyllam umanchikpi karqa, sunqunchikpipas rimapakuyllam karqa.+
14 Allin ruwaytam qipaman kutichinku,+
allin kaqpas karullapim kachkan,+
chiqap kaqpas llaqtapa punkunpim urmarun,
allin kaqpas manam yaykumuyta atinchu.
15 Chiqap kaqmi chinkarun,+
mana allinmanta karunchakuqkunapatam tukuy imanta apakunku.
Jehova Diospaqqa chayqa manam allinchu karqa,
allin ruwayqa manam karqachu.+
16 Manam tarirqachu ni huk runallatapas,
hukmanyarqam mana pipas harkakusqanta qawaspan,
chayta qawasqanraykum makinwan yanaparqa,
allin ruwaq kasqanraykum yanaparqa.
17 Payqa qasqu harkachikunawan churakuchkaq hinam allin ruwaywan churakurqa,
salvasqa kayninwanmi cascowan hina churakurqa.+
Pachawan churakuchkaq hinam vengakuywan churakurqa,+
llikllawan hinam imapas ruway munasqanwan wankukuykurqa.
18 Imam ruwasqankuman hinam kutichipunqa,+
piñakuytam chiqniqninkunaman kacharinqa, chiqniqninkunatam castiganqa.+
Islakunapi kaqkunamanpas imam ruwasqankuman hinam kutichipunqa.
19 Intipa siqaykunan lawpi kaqkunaqa Diospa sutintam manchakunqaku,
intipa qispimunan lawpi kaqkunaqa Jehova Diospa kanchaynintam manchakunqaku,
payqa hamunqa manchakuypaq mayu hinam,
Jehova Diospa atiyninwan kallpanchasqam hamunqa.
20 Jehova Diosmi nin: “Libraqqa*+ Sion muqumanmi hamunqa,+
huchankumanta wanakuq Jacobpa mirayninkunamanmi hamunqa”,+ nispa.
21 Jehova Diosmi nin: “Kayqa paykunawan contrato* ruwasqaymi,+ qanman qusqay atiyniywan imapas nisqaykunaqa qanmantaqa manam chinkanqachu, churikikunamantapas manam chinkanqachu, willkaykikunamantapas manam chinkanqachu, kunanmanta wiña-wiñaykamam mana chinkanqachu”, nispa. Jehova Diosmi chaynata nin.