Apocalipsis
12 Chaymantam mana haykapipas rikusqayta hanaq pachapi rikururqani, intiwan pachasqa warmitam rikurqani,+ chay warmiqa killamanmi sarupakusqa, umanpiñataqmi kachkasqa 12 lucerokunamanta corona, 2 chay warmim wiksayuq kachkasqa hinaspam wachakunanpaq nanaynin hapiptin qaparkacharqa.
3 Kaqmantam rikurqani mana haykapipas rikusqayta: Nina kaqllaña mancharikuypaq hatu-hatun culebratam rikurqani.+ Chay culebraqa kasqa qanchis umayuq hinaspa chunka waqrayuqmi, qanchis umankunañataqmi kasqa coronayuqkama, 4 chupanwanpas hanaq pachapi yaqa parten* lucerokunata aysaspanmi+ kay pachaman wischuykamurqa.+ Hinaspapas unqukunanpaqña kaq warmipa ñawpaqninpim suyachkarqa+ warmipa wawan naceruptin mikurunanpaq.
5 Chay warmim qari wawata wachakurqa,+ chay wawam michichkaq hina llapallan nacionkunata fierromanta tawnawan kamachinqa.+ Chay wawam trononpi kaq Diospa qayllanman apasqa karqa. 6 Warmiñataqmi Diospa alistapusqan chunniqman ayqikurqa, chaypi 1.260 punchaw mikuchisqa kananpaq.+
7 Chaymantam hanaq pachapi guerra karurqa, Miguelmi*+ angelninkunapiwan manchakuypaq culebrawan pelearqa, manchakuypaq culebrapas angelninkunapiwanmi pelearqa, 8 ichaqa vencerachikurqakum, manataqmi hanaq pachapi sitiopas paykunapaqqa karqañachu. 9 Chaymi chay manchakuypaq culebraqa kay pachaman wischumusqa karqa.+ Payqa diablowan+ hinaspa satanaswan+ sutichasqa ñawpaqmantaraq kaq culebram.+ Paymi kay pachapi llapallan runakunata pantachichkan.+ Paymá angelninkunapiwan kay pachaman wischumusqa karqa.+ 10 Chaymantam hanaq pachapi qayakuyta uyarirqani, kaynatam nirqa:
“¡Kunanmi Diosqa runakunata salvaykun,+ atiyniyuq kasqanpas sutillam kachkan, kamachiytapas* qallaykunñam,+ Cristopas* atiynintaqa servichikuchkanñam, Cristoqa Diospam! Iñiqmasinchikkunata Diospa qayllanpi tuta-punchaw yanqamanta tumpaqqa ñam hanaq pachamanta wischurachikamunña.+ 11 Iñiqmasinchikkunaqa malta carnerowan sutichasqapa yawarninwanmi+ hinaspa willakusqanku palabrawanmi+ vencerunku,+ paykunaqa wañuypa patanpiña kaspankupas manam wañuytaqa manchakurqakuchu.+ 12 Chayraykuyá, ¡cielokuna kusikuychik, kusikuychiktaqyá chaypi yachaqkunapas*! ¡Imaynaraq kanqa kay pachawan lamar quchaqa!+ Diabloqa llumpay piñasqallañam qamkunaman uraykaramun, payqa yachakunmi pisi tiempoyuqllaña kasqanta”, nispa.+
13 Chay manchakuypaq culebram kay pachaman wischurachikamuspan+ qari wawa wachakuq warmita qatikacharqa.+ 14 Warmimanmi ichaqa quykurqaku ankapa iskaynin rapranta,+ chaynapi Diospa alistapusqan chunniqman pawananpaq, culebramanta+ chay karu-karupi huk tiempo, iskay tiempo hinaspa parte tiempo*+ mikuchisqa kananpaq.
15 Chay culebrañataqmi siminmanta aqtuykamurqa mayu hina achka-achka yakuta chay warmita hiqiparachinanpaq. 16 Ichaqa kay allpa pacham warmita yanapaykurqa, hinaspam kay pachaqa siminta kichariykuspan manchakuypaq culebrapa aqtusqan mayuta millpururqa. 17 Hinaptinmi chay manchakuypaq culebraqa warmipaq piñakuruspan warmipa wakin wawankunawanña peleaq rirqa,+ warmipa chay wawankunaqa Diospa kamachikuyninkunatam kasukunku, hinaspapas Jesusmanta willakunankupaqmi kamachisqa kachkanku.+