2 Cronicas
23 Qanchis wataña Atalia kamachichkaptinmi sacerdote Jeoyada mana manchakuspan contratota* ruwarqa 100 soldadokunapa kamachiqninkunawan.+ Paykunam karqaku: Jeroampa churin Azarias, Jeoananpa churin Ismael, Obedpa churin Azarias, Adayapa churin Maaseya hinaspa Zicripa churin Elisafat. 2 Chay kamachiqkunam Juda nacionpi llaqtakunaman rispanku huñumurqaku Leviy ayllukunatawan+ Israel runakunapa ayllunkupi kamachiqkunata. Chaymi Jerusalen llaqtaman hamurqaku. 3 Chaypim llapallan runakuna Diospa wasinpi kamachiqwan contratota ruwarqaku+ kasukunankupaq. Chaymantam Jeoyadaqa nirqa:
“Kaypim kamachiqpa churin Jehoas kachkan, paymi Davidpa miraynin kasqanrayku Jehova Diospa nisqanman hina kamachinqa.+ 4 Sacerdotekuna, Leviy ayllukuna, qamkunam kimsaman rakinakunkichik. Wakiqnikichikmi samana punchawpi* punkuta cuidankichik.+ 5 Wakiqnikichikñataqmi kamachiqpa wasinpi kankichik.+ Wakiqnikichikñataqmi Cimiento sutiyuq punkupi kankichik. Wakiqnikichikñataqmi Jehova Diospa wasinpa pationpi kankichik.+ 6 Amam pipas Jehova Diospa wasinmanqa yaykunqachu, yaykuspaqa-yaykunqaku sacerdotekunawan Leviy ayllukunallam,+ chaypaq sapaqchasqa kasqankurayku. Wakin runakunañataqmi Jehova Diospa kamachisqanman hina hawapi kanqaku. 7 Kamachiq Jehoastam Leviy ayllukuna muyuriqninmanta chawpicharunkichik sapakama lanzayuq hinaspa espadayuq. Pipas Diospa wasinman yaykumuqtaqa wañuchinkichikmi. Kamachiq Jehoaswanmi kankichik maymanña riptinpas”, nispa.
8 Hinaptinmi Leviy ayllukunawan Juda runakunaqa Jeoyadapa kamachisqanta kasukurqaku. Sapa kamachiqmi runankunata huñurqa, chay runankunam karqa samana punchawpi llamkaqkuna chaynataq chay punchawpi samaqkuna.+ Jeoyadaqa manam saqirqachu samanankutaqa, chaymi llapankuta huñurqaku.+ 9 Hinaptinmi Jeoyadaqa 100 soldadokunapa kamachiqninkunaman+ qurqa lanzakunata hinaspa ruyru harkachikunankuta. Chaykunaqa karqa kamachiq Davidpam+ Diospa wasinpi churasqa.+ 10 Llapa runakunatam lanzayuqtakama hinaspa espadayuqtakama churarurqa wasipa alliq* lawninmanta ichuq* lawninkama. Kamachiqta chawpicharuspankum altarpa waqtanpi karqaku. 11 Chaymantam kamachiqpa churin Jehoasta pusaramuspan+ umanman churaykurqa coronata hinaspa wankukuq qillqapi Diospa kamachikuyninkunata.+ Kamachiq kananpaq churaruspankum Jeoyadawan churinkuna umanman aceiteta talliykurqaku, hinaspam nirqaku: “¡Unaytayá kawsakuchun kamachiqninchikqa!”, nispa.+
12 Ataliañataqmi uyarirurqa runakuna kallpaspanku kamachiqta hatunchasqankuta, hinaspanmi Jehova Diospa wasinpi runakunapa kasqanman rirqa.+ 13 Chaypim kamachiq Jehoasta rikururqa wasipa pilarninpa waqtanpi sayachkaqta, paywanmi karqaku kamachiypi yanapakuqkuna+ hinaspa cornetilla tocaqkuna. Llapallan runakunam kusisqa kachkarqaku+ cornetillata tocaspanku. Takiqkunapas tocaptinkum hatuncharqaku. Chayta rikuruspanmi Ataliaqa pachanta llikikuspan qaparirqa: “¡Qamkunaqa qipancharuwankichikmi! ¡Qipancharuwankichikmi!”, nispa. 14 Hinaptinmi sacerdote Jeoyada 100 soldadokuna kamachiqta lluqsirachispan nirqa: “¡Ataliata hurquychik! ¡Payta qatiqtapas espadawan wañuchiychik!”, nispa. Chaynataqa ruwananku karqa “Jehova Diospa wasinpiqa amam wañuchinkichikchu” nispa Jeoyada nisqanraykum. 15 Chaymi Ataliataqa hapirurqaku, hinaspankum kamachiqpa wasinman yaykunapi caballokunapa yaykunan punkupi wañurachirqaku.
16 Chaymantam Jeoyadaqa runakunawan hinaspa kamachiqwan rimarqa* Jehova Diospa runankuna hinalla kanankupaq.+ 17 Chaymantam llapallan runakuna taytacha Baalpa wasinman rispanku ñutuparurqaku.+ Ñutuparurqakutaqmi llapallan altarkunatapas hinaspa Baalman rikchakuq taytachakunatapas.+ Chaypitaqmi Baalpa+ sacerdoten Matanta wañurachirqaku. 18 Chaymantam Jeoyadaqa Leviy ayllukunata hinaspa sacerdotekunata churarqa Jehova Diospa wasinmanta nanachikunankupaq. Paykunataqa Davidmi rakiruspan churarqaña Moisespa chaskisqan kamachikuyman hina+ Jehova Diospaq animalkunata kañanankupaq.+ Paykunaqa Jehova Diospa wasinpim kusikuywan takispanku kañaqku. 19 Churarqataqmi punku cuidaqkunatapas+ Jehova Diospa wasinman yaykuna punkukunapipas. Chaynapi Diospaq mana chuya kaqkuna mana yaykunanpaq. 20 Jeoyadaqa huñururqataqmi 100 soldadokunapa kamachiqninkunatapas,+ ancha riqsisqa runakunatapas, llaqtakunapi kamachiqkunatapas chaynataq llapallan runakunatapas. Chaynapi Jehova Diospa wasinmanta Jehoasta kamachiqpa wasinman pusanankupaq. Pusaruspankum Jehoastaqa kamachiqpa tiyananpi tiyaykachirqaku.+ 21 Llapallan runakunam kusisqa hinaspa hawka tarikurqaku Ataliata wañurachiptinku.