Apocalipsis
13 Chaymantam chay manchakuypaq culebraqa mana kuyurispan lamar qucha aqupa hawanpi qiparurqa.
Chaymantam rikururqani lamar quchamanta lluqsimuq+ qanchis umayuq hinaspa chunka waqrayuq manchakuypaq animalta,+ chay chunka waqrankunam kasqa coronayuqkama, umankunapiñataqmi kasqa Diosta kamiq sutikuna. 2 Chay rikusqay manchakuypaq animalqa tigre kaqllañam kasqa, chakinkunañataqmi kasqa osopa chakinkuna hina, siminñataqmi kasqa leonpa simin hina. Hinaptinmi chay mancharikuypaq culebra+ chay animalman qurqa atiyninta hinaspa trononta,+ yanaparqataqmi ancha munayniyuq kananpaqpas.
3 Chay manchakuypaq animalpa huknin umanta tuksiruptinkum wañusqa hina kachkasqa, ichaqa tuksisqa kasqanmi sanoyarurqa,+ hinaptinmi kay pachapi llapallan runakuna “¡imataq kayqa!” nispanku chay animalta qatirqaku. 4 Chay runakunam mancharikuypaq culebrata yupaycharqaku chay animalman atiyta quykusqanrayku, yupaycharqakutaqmi chay manchakuypaq animaltapas: “¿Pitaq kay manchakuypaq animal hinaqa kanman? ¿Pitaq paywanqa peleayta atinman?”, nispanku. 5 Manchakuypaq animalqa atiytam chaskirqa alabakunanpaq hinaspa Diospa contranpi mana allinkunata rimananpaq chaynataq 42 killapuni munasqanta ruwananpaqpas.+ 6 Chay manchakuypaq animalqa Diospa contranpim mana allinkunata rimarqa,+ hinaspapas Diospa sutintawan maymi yachanantam* kamirqa, kamirqataqmi hanaq pachapi yachaqkunatapas.+ 7 Payqa atiytam chaskirqa Diospa runankunapa contranpi peleaspan vencerunanpaq,+ hinaspa llapa kastakunata, llaqtakunata, tukuy rikchaq rimayniyuqkunata chaynataq nacionkunata munaychakunanpaq. 8 Paytaqa kay pachapi yachaq llapallan runakunam yupaychanqaku. Ichaqa runakuna unanchasqa kasqanmantapas* chay yupaychaqkunapa sutinqa manam mayqinninkupapas qillqasqachu karqa wañuchisqa malta carneropa libronpiqa,+ chay libropim qillqasqa kachkan kawsaqkunapa sutin.+
9 Pipas rinriyuqqa uyarichunyá.+ 10 Pipas presochasqa kananpaq kaqqa presochasqam kanan. Pipas espadawan wañuchiqqa espadawanmi wañunqa*.+ Chayraykum Diospa runankunaqa+ yachananku ñakariykunapipas allin takyayta+ hinaspa Diospi ancha-ancha hapipakuyta*.+
11 Chaymantapas rikurqanim kay pachamanta lluqsimuchkaq manchakuypaq huk animalta, chay animalqa kasqa carnero hina iskay waqrayuqmi, rimasqapas manchakuypaq culebra hinam.+ 12 Atiyninpas kasqa manchakuypaq punta kaq animalpa atiynin hinam,+ chayna atiynintam punta kaq animalpa qayllanpi qawachin. Chay iskay waqrayuq animalqa kay pachapi runakunawanmi yupaychachin punta kaq chay manchakuypaq animalta, chay punta kaq animalqa yaqalla wañurachiqnin heridanmanta sanoyaruqmi,+ 13 iskay waqrayuq animalqa hatun milagrokunatam ruwan, chaymantapas runakuna qawachkaptinmi hanaq pachamanta kay pachaman ninata wichichimun.
14 Chay iskay waqrayuq animalqa kay pachapi yachaqkunatam pantachin milagrokuna ruwasqanwan, payqa manchakuypaq punta animalpa qayllanpi chayna milagrokuna ruwananpaqmi atiyta chaskirqa, hinaspapas kay pachapi yachaqkunatam kamachin manchakuypaq punta kaq animalpa imagenninta ruwanankupaq,+ chay punta animalqa tuksiruptinku wañusqa hina kasqanmanta kawsariruqmi.+ 15 Chaymantapas chay iskay waqrayuq animalqa atiytam chaskirqa manchakuypaq punta animalpa imagenninta kawsachinanpaq, chaynapim punta animalpa imagenninqa rimayta qallaykurqa, hinaspam kamachirqa mana yupaychaqninkunataqa lliwta wañuchinanpaq.
16 Kamachirqataqmi llapallan runakuna riqsisqa kaqpas mana riqsisqa kaqpas, apupas mana apupas hinaspa sirviente kaqpas mana sirviente kaqpas alliq* makinkupi utaq urkunkupi marcasqa kanankupaq,+ 17 chaynapi chay animalpa sutinwan+ utaq numeronwan+ mana marcasqa kaqkunaqa imatapas mana rantinankupaq chaynataq mana rantikunankupaq*. 18 Kayqa yachayniyuqkunapaqmi: Pipas yachayniyuqqa chay manchakuypaq animalpa numeron hayka kasqantayá yachachun, chay numeroqa runapa numeronmi, chay numerom 666.+