Apocalipsis
7 Chaymantam rikurqani kay pachapa tawan cantonkunapi sayachkaq tawa angelkunata. Paykunaqa kay pachapa tawa lawninmanta hamuq wayratam tukuy kallpankuwan harkachkasqaku kay pachamanpas, lamar quchamanpas chaynataq ima sachamanpas mana wayramunanpaq. 2 Rikurqanitaqmi intipa lluqsimunan lawmanta hamuchkaq huk angeltapas, paymi Diospa sellonta hapichkasqa, hinaspam kay pachata hinaspa lamar quchata chinkachinanpaq kamachisqa kaq chay tawa angelkunata kallpawan qayaspan 3 nirqa: “Amaraqyá imanaychikchu kay pachataqa, lamar quchataqa nitaq sachakunatapas Diosninchikpa serviqninkunata urkunpi sellowan marcanaykukama”, nispa.+
4 Chaymi uyarirqani 144.000+ runakuna sellowan marcasqa kasqankuta, paykunaqa kasqaku Israelpa llapallan ayllunkunam.+
5 Juda ayllumantam kasqa 12.000,
Ruben ayllumantam kasqa 12.000,
Gad ayllumantam kasqa 12.000,
6 Aser ayllumantam kasqa 12.000,
Neftaliy ayllumantam kasqa 12.000,
Manases+ ayllumantam kasqa 12.000,
7 Simeon ayllumantam kasqa 12.000,
Leviy ayllumantam kasqa 12.000,
Isacar ayllumantam kasqa 12.000,
8 Zabulon ayllumantam kasqa 12.000,
Josey ayllumantam kasqa 12.000,
Benjamin ayllumantapas kasqa 12.000 sellasqa runakunam.
9 Chaymantam rikururqani mana pipa yupay atinan achkallay-achka runakunata, paykunaqa kasqaku llapallan nacionkunamanta, kastakunamanta, llaqtakunamanta hinaspa tukuy rikchaq rimayniyuqkunamantam,+ paykunam hatun yuraq pachayuq+ sayachkasqaku tronopa ñawpaqninpi hinaspa malta carneropa ñawpaqninpi, hinaspam palmera sachapa kallmanta sapakama hapichkasqaku.+ 10 Paykunaqa kallpawan qayakuspankum nirqaku: “Salvasqaqa kanchik tronopi+ tiyaq Diosninchik hinaspa malta carnero yanapawaptinchikmi”, nispa.+
11 Llapallan angelkunam tronopa muyuriqninpi hinaspa kamachiqkunapa*+ chaynataq querubin sutiyuq tawa angelkunapa muyuriqninpi kachkasqaku, paykunam chay tronopa ñawpaqninpi qunquranpa kumuykuspanku Diosta yupaychaspanku 12 nirqaku: “¡Amen! Diosllayku qamyá kay wiña-wiñaypaq alabasqa, hatunchasqa, yachayniyuq, respetasqa, atiyniyuq hinaspa kallpayuq. Llapallaykum qamtaqa wiña-wiñaypaq agradecekusqaykiku.+ Chaynayá kachun*”, nispa.
13 Hinaptinmi huknin kamachiq* niwarqa: “¿Pikunataq kay hatun yuraq pachawan pachasqakunaqa?+ ¿Maymantataq hamurunku?”, nispa. 14 Ñuqañataqmi nirqani: “Señorlláy, qanmi chaytaqa yachanki”, nispay. Payñataqmi niwarqa: “Paykunaqa kanku llumpa-llumpay ñakariypi+ mana wañuqkunam hinaspa hatun pachankutapas malta carneropa yawarninwan taqsaspa yuraqyachiqkunam.+ 15 Chaymi paykunaqa Diospa trononpa ñawpaqninpi kachkanku, hinaspam tuta-punchaw wasinpi* payta servichkanku. Chay tronopi+ tiyaq Diosqa paykunatam imamantapas harkaykunqa.+ 16 Paykunaqa manañam yarqaymantapas nitaq yakumantapas kanqakuchu, manataqmi intipas nitaq ima rupaypas paykunataqa llumpaytaqa rupanqañachu,+ 17 chaynam kanqa tronopa chawpinpi kaq malta carnero+ paykunata michiptin+ hinaspa kawsakuyta qukuq yakukunapa kanan pukyukunaman pusaptin.+ Diosmi paykunapa wiqinta pichanqa”, nispa.+