Eclesiastes

8 Pitaq yachayniyuq runa hina? ¿Pitaq sasachakuyta allichayta atinman? Yachayniyuq runapaqa uyanpas kancharinmi, manchakuypaq uyanpas sumaqyaykunmi.

2 Ñuqam nini: “Kamachiqpa nisqantayá kasukuy,+ chayta ruwanaykipaq Diosta nisqaykirayku.+ 3 Qayllanmantaqa amayá chayllaqa lluqsikuruychu,+ mana allin ruwaqkunamanqa amayá sayapakuychu,+ payqa imapas munasqantam ruwanman. 4 Kamachiqpa nisqanmantaqa manam pipas imatapas ninmanchu.+ Manam pipas ninmanchu ‘¿imatataq ruwachkanki?’ nispanqa”, nispa.

5 Kamachikuyninkunata kasukuqqa manam sasachakuypiqa kanqachu.+ Yachayniyuq runaqa yachanmi haykapi hinaspa imaynata ruwaytapas.+ 6 Tukuy imapaqmi tiempo kan chaynataq imaynata ruwanapaqpas,+ runakunapa sasachakuyninqariki achkallay-achkam. 7 Ima pasananta pipas mana yachaptinqa, ¿pitaq ninman ima pasananmanta?

8 Manam pipapas vidanqa makillanpichu, chaynapi hinalla kawsakunanpaqqa. Manam pipas wañuymantaqa lluptinmanchu.+ Imaynam wañuchinakuy kaptinqa soldadokuna pasakunantaqa mana saqinkuchu, chaynam mana allin runakunaqa mana allin ruwasqankurayku mana lluptinqakuchu*.

9 Tukuy chaykunata qawaspaymi yuyaymanarqani kay pachapi runakunapa tukuy ima ruwasqanpi, qawarqanim runaqa runamasinta munaychakuspan ñakarichisqanta.+ 10 Rikurqanitaqmi mana allin ruwaq runakunata pampasqankuta. Paykunaqa Diospa wasinmanmi sapa kuti yaykuqku chaynataq lluqsiqku. Mana allinkunata ruwasqanku llaqtapiqa chayllam qunqasqa karqaku,+ chaypas yanqam.

11 Runata mana allin ruwasqanmanta mana chaylla castigaruptinkuqa,+ wakin runakunapas chayllam mana allin ruwayman qukurunman.+ 12 Huchallikuq runa pachak kutikama mana allinta ruwachkaspan unay kawsakuptinpas, Diosta manchakuqqa payta kasukusqanraykum allin kawsakunqa.+ 13 Mana allin runam ichaqa sasachakuyllapi kawsakunqa.+ Vidanpas llantuy hinalla kasqanraykum mana unaychu kawsakunqa.+ Payqariki manam Diostapas manchakunchu.

14 Kay pachapiqa tukuy imapas yanqallam. Allin ruwaq runakunatam mana allin ruwaq runakunata hina qawanku.+ Mana allin ruwaq runakunatañataqmi allin ruwaq runakunata hina qawanku.+ Ñuqam nini chaypas yanqa kasqanta.

15 Chaymi nirqani mikukuspa, tomakuspa kusirikuyninku aswan allin kasqanta,+ chaynam kananku kay pachapi anchata llamkaspa Dios munaptin kawsananku punchawkama.+

16 Yachayniyuq kayman hinaspa kay pachapi runakunapa imapas ruwasqankuta qawaymanmi qukururqani.+ Tutapas punchawpas manam puñurqanichu*. 17 Hinaspam Diospa tukuy ima ruwasqankunapi yuyaymanarqani. Chaymantapas yacharurqanim runakunaqa kay pachapi imapas pasakusqanta mana entiendey atisqankuta.+ Maynataña munaspanpas runaqa manam entiendeyta atinchu. Yachanankupaq hina yachaysapapaq hapikuspankupas manam entiendeytaqa atinkuchu.+