1 Reyes
2 Davidqa wañukunanpaqña kachkaspanmi churin Salomonta nirqa imata ruwananpaq. 2 Nirqam: “Ñuqaqa wañukusaqñam, chaynaqa kallpanchakuspaykiyá qarinchakuy.+ 3 Jehova Diosninchikta ama qunqaspayá munasqanman hina kawsakuy, llapallan kamachikuyninkunata hinaspa yachachikuyninkunata kasukuy. Tukuy chaykunataqa kasukunayki Moisespa qillqasqan kamachikuykunaman hinam.+ Chaynata kawsaspaykiqa imata ruwaspaykipas utaq maymanña rispaykipas allinmi kanki*. 4 Hinaptinqa Jehova Diospa niwasqanman hinam kanqa. Paymi niwarqa: ‘Sichum churikikuna ñuqapa munasqayman hina kawsaspanku tukuy sunqunkuwan hinaspa tukuy vidankuwan* kasuwaptinkuqa,+ miraynikikunam Israel runakunata haykapipas kamachinqa’, nispa.+
5 Qamqa yachankim Zeruyapa wawan Joab ima ruwawasqanta. Joabmi Israel soldadokunapa kamachiqnin Abnerta+ hinaspa Amasata+ wañurachirqa. Abnerqa karqa Nerpa churinmi, Amasañataqmi karqa Jeterpa churin. Paykunatam hawkayay punchawkunapi wañurachirqa,+ hinaspam wiqaw watakunanta chaynataq usutanta yawarninkuwan chapururqa. 6 Chaynaqa, yachaywanyá ruway. Joabtaqa manaraq machuyachkaptinmi wañuchinayki.+
7 Galaad lawmanta Barzilaipa+ churinkunatam ichaqa imaña kaptinpas hinalla kuyanki. Paykunaqa wawqiki Absalonmanta ayqikuptiymi+ yanapawarqa.+ Paykunaqa qanwan kuskam mikunqaku.
8 Qanwantaqmi kachkan Guerapa churin Simeipas. Simeiqa Benjamin ayllupi Baurim llaqtamantam. Paymi Maanaim llaqtaman riptiy+ ñakawarqa.+ Jordan mayuman taripamuwaptinmi ichaqa Jehova Diospa sutinpi nirqani: ‘Manapunim wañuchisqaykichu’, nispay.+ 9 Qamqa yachayniyuq runam kanki, yachankim imam ruwanaykita. Simeitaqa manaraq machuyachkaptinmi wañuchinayki”, nispa.+
10 Chaymantam Davidqa wañukurqa. Hinaptinmi pamparurqaku Davidpa llaqtan sutiyuq llaqtapi.+ 11 Davidqa 40 watam Israel runakunata kamachirqa. Hebron+ llaqtamantam qanchis wata kamachirqa, Jerusalen llaqtamantañataqmi 33 wata.+
12 Salomonqa taytan Davidpa rantinpim kamachiyta qallaykurqa. Punchawkunapa risqanman hinam Salomonqa munayniyuq kamachiq karqa.+
13 Chaymanta qipatam Aguitpa wawan Adoniasqa Salomonpa maman Bat-sebaman rirqa. Hinaptinmi Bat-seba nirqa: “¿Allin sunquwanchu hamuchkanki?”, nispa. Adoniasñataqmi nirqa: “Arí”, nispa. 14 Hinaspam nirqaraq: “Willanaymi kachkan”, nispa. Bat-sebañataqmi nirqa: “Niway”, nispa. 15 Adoniasñataqmi nirqa: “Yachasqaykiman hinapas ñuqam kamachiq kanay karqa, Israelpi llapallan runakunapas ñuqa kamachiq kanaytam suyarqaku.+ Ichaqa Jehova Dios munaptinmi wawqiy Salomonña kamachiq kachkan.+ 16 Kunanqa kayllatam mañakuyki, yanapaykuwayá”, nispa. Bat-sebañataqmi nirqa: “Niway”, nispa. 17 Hinaptinmi Adonias nirqa: “Ama hina kaspaykiyá kamachiq Salomonta rimapayaykapuway Sunem llaqtayuq Abisagwan+ casarakunaypaq, qamtaqa kasusunkim”, nispa. 18 Hinaptinmi Bat-sebaqa nirqa: “Allinmi, rimapayaykapusqaykim”, nispa.
19 Chaymi Bat-sebaqa kamachiq Salomonman rirqa Adoniaspa mañakusqanta nimunanpaq. Salomonñataqmi mamanman taripaykuspan ñawpaqninpi qunqurakuykurqa. Chaymantam tiyananpi tiyaykurqa, hinaspanmi huk tiyanata apachimurqa alliqninpi* maman tiyananpaq. 20 Chaymantam Bat-seba nirqa: “Kaytam mañakuyki, ‘arí’ niykullawankimá”, nispa. Kamachiq Salomonñataqmi nirqa: “Niykuway mamáy, ‘arí’ nisqaykim”, nispa. 21 Mamanñataqmi nirqa: “Wawqiki Adoniasyá Sunem llaqtayuq Abisagwan casarakuchun”, nispa. 22 Salomonñataqmi nirqa: “¿Imanasqataq Abisagta Adoniaspaq mañakuwachkanki? Chaynaqa, pay kamachiq kananpaqñayá mañakuruway.+ Payqa mayor wawqiymi,+ hinaspapas kamachiq kananpaqmi yanapachkan sacerdote Abiatar hinaspa Zeruyapa+ wawan Joab”,+ nispa.
23 Hinaspanmi kamachiq Salomonqa Jehova Diospa sutinpi nirqa: “Chayta mañakusqanraykuyá Adoniasqa wañuchisqa kachun, manachayqa Diosyá castigawachun. 24 Jehova Diosmi taytay Davidpa tiyananpi tiyaykachiwan munayniyuq kamachiq kanaypaq,+ hinaspapas niwasqanman hinam ñuqata chaynataq mirayniykunata+ kamachiq kanaykupaq churaykuwanku. Paypa sutinpim nini, Adoniasqa kunanpunim wañunan”, nispa.+ 25 Salomonqa chayllam Jeoyadapa churin Benayata+ kamachirqa Adoniasta wañuchimunanpaq. Chaymi Benayaqa rispan wañurachimurqa.
26 Sacerdote Abiatartam+ Salomon nirqa: “¡Anatot llaqtapi wasikiman ripukuy!+ Qamqa wañuchisqam kanayki, ichaqa manam kunan punchawchu wañuchisqayki. Qamqa taytay Davidpa ñawpaqnintam+ llapallan kamachiq Jehova Diospa baulninta aparqanki. Hinaspapas taytaywan kuskam tukuypi ñakarirqanki”, nispa.+ 27 Chaynata nispanmi Salomonqa Abiatarta qarqururqa hinaptinmi Abiatarqa manaña Jehova Diospa sacerdotenñachu karqa. Chaynapi Silo llaqtapi+ Eliypa ayllunmanta+ Jehova Diospa nisqanman hina kananpaq.
28 Chaykunata Joab uyariruspanmi Jehova Diospa carpanman ayqikurqa.+ Hinaspam altarpa waqrankunaman hapipakururqa. Joabqa Absalonta mana yanapaspanpas+ Adoniastam yanaparqa.+ 29 Kamachiq Salomonmanmi willaykurqaku: “Joabmi Jehova Diospa carpanman ayqikuruspan altarpa waqtanpi kachkan”, nispa. Chaymi Salomonqa Jeoyadapa churin Benayata nirqa: “Rispaykiyá wañurachimuy”, nispa. 30 Hinaptinmi Benayaqa Jehova Diospa carpanman rirqa, hinaspam Joabta nirqa: “Kamachiq Salomonmi nisunki: ‘¡Lluqsiy chaymanta!’”, nispa. Joabñataqmi nirqa: “¡Manam lluqsisaqchu! Kaypim wañusaq”, nispa. Chaymi Benayaqa kutispan Joabpa nisqanta kamachiq Salomonman willarqa. 31 Salomonñataqmi nirqa: “Nisusqaykiman hinayá wañurachispayki pamparamuy. Ñuqaqa chaynataq taytaypa ayllunkunaqa manam huchayuqchu kasaqku Joabpa ruwasqanmantaqa. Payqa mana huchayuq runakunatam wañurachirqa.+ 32 Taytay Davidpa mana yachasqallantam Joabqa kikinmantapas aswan allin hinaspa allin ruwaq runakunata espadawan wañurachirqa. Hukninmi karqa Israel soldadokunapa kamachiqnin+ Abner,+ payqa karqa Nerpa churinmi. Hukninñataqmi karqa Juda soldadokunapa kamachiqnin+ Amasa,+ payqa karqa Jeterpa churinmi. Chayraykum runakunata wañuchisqanmanta Jehova Dios kutichipunqa. 33 Chay runakunata wañuchisqanmantam Joabwan mirayninkuna wiñaypaq huchayuq kanqaku.+ Ichaqa Jehova Diosyá Davidman, mirayninkunaman, ayllunman hinaspa munaychakuyninman wiñaypaq hawkayayta quchun”, nispa. 34 Chaymi Benayaqa rispan Joabta wañurachimurqa. Hinaptinmi Joabtaqa kikinpa wasinpi pamparurqaku, chay wasinqa karqa chunniqpim. 35 Chaymantam kamachiq Salomonqa soldadokunapa kamachiqnin Joabpa rantinpi churarurqa Jeoyadapa churin Benayataña.+ Sacerdote Abiatarpa rantinpiñataqmi churarurqa Sadoctaña.+
36 Chaymantam Salomonqa Simeita+ qayarachimuspan nirqa: “Kay Jerusalen llaqtapi wasita ruwakuruspaykiyá chaypi yachay*. Amam kay llaqtamantaqa maymanpas lluqsinkichu. 37 Haykapipas Cedron wayquta+ chimparuspaykiqa wañunkipunim, hinaspapas kikikim huchayuq kanki”, nispa. 38 Chaynata niptinmi Simeiñataq nirqa: “Allinmi kamachiqlláy, niwasqaykitam kasukusaq”, nispa. Chaymi Simeiqa Jerusalen llaqtapi unay yacharqa.
39 Ichaqa kimsa wata pasaruptinmi Simeipa iskay sirvientenkuna Gat llaqtata kamachiq Akispaman+ ayqikururqaku, Akisqa karqa Maacapa churinmi. Hinaptinmi Simeiman willaykurqaku: “¡Yaw!, iskay sirvientekikunam Gat llaqtapi kachkanku”, nispa. 40 Simeiqa chayllam asnonman sillakuykuspan Gat llaqtapi Akispata rirqa sirvientenkunaman. Chaymantam Simeiqa paykunapiwan Gat llaqtamanta kutimurqaku. 41 Kutiramuptinkum Salomonman willaykurqaku: “Simeiqa Jerusalen llaqtamantam lluqsirun. Gat llaqtata riruspanmi kutiramun”, nispa. 42 Chaynata willaykuptinkum kamachiq Salomonqa Simeita qayachispan nirqa: “¿Manachu Jehova Diospa sutinpiraq ‘arí’ niwarqanki ‘kay llaqtamanta lluqsispaykiqa wañunkipunim’ nispa niptiy? ¿Manachu niwarqanki: ‘Allinmi, kasukusaqmi’, nispa?+ 43 Chaynaqa, ¿imanasqataq Jehova Diospa sutinpi nisqaykitaqa hinaspa kamachisqaytaqa mana kasukurqankichu?”, nispa. 44 Chaymantam Salomonqa Simeita nirqa: “Sunquykipim yachakunki taytay Davidta mana allin ruwasqaykita.+ Chay mana allin ruwasqaykimantam Jehova Dios kutichipusunki.+ 45 Ñuqatam ichaqa Jehova Dios yanapawanqa.+ Taytay Davidpa kamachikuyninqa Diospa yanapakuyninwanmi mana tukunqachu”, nispa. 46 Chaynata nispanmi Salomonqa Benayata kamachirqa Simeita wañuchimunanpaq. Benayañataqmi pasaspan wañurachimurqa.+
Chaynapimá Salomonqa munayniyuq kamachiq karqa.+