1 Samuel

20 Rama llaqtapi Nayot lawmantam Davidqa ayqikurqa. Hinaspanmi Jonatanpa kasqanman chayaruspan nirqa: “¿Imatataq ruwaruni?+ ¿Imataq huchay? ¿Imanarqanitaq taytaykitaqa wañuchiwaypi rinanpaq?”, nispa. 2 Jonatanñataqmi nirqa: “¡Manapunim wañunkichu!+ Taytayqa manam imatapas ruwanmanchu mana willawaspanqa. ¿Imanasqataq taytayqa chayta pakawanman? Payqa willawanpunim”, nispa. 3 Chaynata niptinpas Davidqa nirqaraqmi: “Taytaykiqa yachanmi kuyawasqaykita,+ chayraykuchá sunqunpi nichkan: ‘Jonatanqa amayá yachachunchu, chaynapi ama llakikunanpaq’, nispa. ¡Jehova Diospa sutinpimá niki, ñuqaqa wañuypa patanpiñam tarikuchkani!”, nispa.+

4 Chaymi Jonatanqa Davidta nirqa: “Ñuqaqa imapas niwasqaykitam ruwasaq”, nispa. 5 Hinaptinmi Davidqa nirqa: “Paqarinqa llullu killa kasqanraykum+ taytayki Saulwan mikunay. Kaynatam ruwasun: Llaqtayta rinaypaq saqiykuwasqaykitam ninki, ñuqam ichaqa mincha inti siqaykuykama chunniqpi pakakaramusaq. 6 Chaypi mana kasqayta taytayki cuentata qukuruptinqa ninkim: ‘Davidqa Belen llaqtata rinanpaqmi niwarqa,+ chaypis watan-watan ruwasqankuman hina ayllunpiwan Diospaq animalta nakapunqaku’, nispa.+ 7 Sichu ninqa: ‘Allinmi’, nispa. Hinaptinqa manañam manchakusaqchu. Piñakuptinmi ichaqa yachanki wañuchiwaytapuni munasqanta. 8 Imaña kaptinpas kuyakuq kasqaykitaqa amayá qunqaruychu,+ wañukunanchikkama yanapanakunanchikpaqmi Jehova Diospa sutinpi contratota* ruwarqanchik.+ Imapas huchay kaptinqa+ kikikiyá wañurachiway. Amayá taytayki wañuchiwanantaqa suyaychu”, nispa.

9 Chaymi Jonatanñataq Davidta nirqa: “¡Amayá chaytaqa piensayllapas-piensaychu! Taytay wañuchisunaykimanta yachaspayqa, ¿manachu willaykuykiman?”, nispa.+ 10 Hinaptinmi Davidqa Jonatanta nirqa: “¿Pitaq willawanqa taytayki piñakusqantaqa?”, nispa. 11 Jonatanñataqmi nirqa: “Hakuchik purikuq, chaypim nisqayki”, nispa. Chaymi iskayninku chunniqman rirqaku. 12 Chaypim Jonatanqa Davidta nirqa: “Israel runakunapa yupaychasqan Jehova Diosraykum niki, paqarin utaq mincha kay horatam taytayta tapusaq imam ruway munasusqaykimanta. Qanmanta mana piñasqa kaptinqa willachimusqaykim. 13 Sichu wañuchiy munasusqaykimanta yacharuspay lluptikunaykipaq mana willachimuptiyqa Jehova Diosyá imatapas ruwawachun. Jehova Diosmi yanapasunki+ imaynam taytayta yanapasqanman hina.+ 14 Jehova Dios hinamá imaña kaptinpas kuyawanki. Contrato ruwasqanchiktaqa amataqyá qunqaychu kunanpas nitaq wañukuptiypas.+ 15 Amamá mirayniykuna kuyaytaqa* qunqarunkichu,+ chiqnisuqnikikunata kay pachamanta Jehova Dios chinkarachiptinpas paykunataqa llakipayariykunkimá”, nispa. 16 Chaynatamá Jonatanqa Davidwan contratota ruwarqa mirayninkupas yanapanakunankupaq. Jonatanqa nirqaraqmi: “Jehova Diosyá chiqnisuqnikikunataqa imatapas ruwachun”, nispa. 17 Jonatanqa kikinta hinam Davidtaqa kuyarqa, chaymi nirqa yanapanakunankupaq huktawan contratota ruwanankupaq.+

18 Jonatanqa nirqataqmi Davidta: “Paqarinqa llullu killam.+ Tiyanaykipi mana kaptikichá taytayqa watukusunki. 19 Minchatawan mana kaptikiqa astawanraqchá watukusunki. Chaynaqa, qayninpa pakakusqaykiman hinam kay rumipa waqtanpi pakakunki. 20 Ñuqam kay rumipa waqtanman kimsakama flechamusaq imatapas flechamuchkaq hina. 21 Yanapawaqniytam nisaq: ‘Flechakunata maskamuy’, nispay. Sichu nisaq: ‘Flechakunaqa kaylawniqpim kachkan huqarimuy’, nispa. Hinaptinqa ama manchakuspam kutikamunki. Chaywanmi yachanki taytayqa mana wañuchisunaykita, chaytaqa Jehova Diospa sutinpim niki. 22 Sichu nisaq: ‘Flechakunaqa waklawniqpim kachkan’, nispa. Hinaptinqa yachankim pasakunaykita Jehova Dios munasqanta. 23 Jehova Diosyá yachachun wañukunanchikkama+ yanapanakunanchikpaq contrato ruwasqanchikta”, nispa.+

24 Chaynapimá Davidqa chunniqpi pakakurqa. Saulñataqmi llullu killa punchaw chayaramuptin mikunanpaq tiyaykurqa.+ 25 Saulqa hina tiyananpimá pirqapa waqtanpi tiyaykurqa. Paypa chimpanpiñataqmi tiyarqa Jonatan, Saulpa waqtanpiñataqmi tiyarqa Abner.+ Davidpa tiyananpiñataqmi mana pipas karqachu. 26 Chay punchawqa Saulqa manam imatapas nirqachu Davidmantaqa. Saulqa sunqullanpim nirqa: “Davidqa ima mana allintachá ruwarun, chaychá mana asuykuna* kasqanrayku mana hamunchu”, nispa.+ 27 Llullu killa punchawpa paqarintinpas Davidpa tiyananpiqa manam pipas karqachu. Chaymi Saulqa churin Jonatanta nirqa: “¿Imanasqataq Jeseypa churin Davidqa mikuq mana hamunchu+ qayna punchawpas nitaq kunanpas?”, nispa. 28 Hinaptinmi Jonatanqa nirqa: “Davidqa Belen llaqtata rinanpaqmi niwarqa.+ 29 Niwarqam: ‘Wawqiymi llaqtayta rinaypaq willachimuwasqa. Ama hina kaychu rirusaqyá, aylluymi Diospaq animalta nakapunqa. Qam munaptikiqa wawqiykunata watukuqyá rirullasaq’, nispa. Chayraykum mikuqqa mana hamunchu”, nispa. 30 Hinaptinmi Saulqa llumpayta piñakuspan Jonatanta nirqa: “¡Yaw mana kasukuq! Ñuqaqa allintam yachani chay Jeseypa churinman sayapakusqaykita. ¡Kayqa hatun pinqaymi kikikipaqpas chaynataq mamaykipaqpas! 31 Jeseypa churin kawsanankamaqa manam yachakunchu kawsanaykipas nitaq kamachiq kanaykipas.+ Chaynaqa, maskachimuspayá pusamuway wañuchinaypaq”, nispa.+

32 Jonatanñataqmi taytan Saulta nirqa: “¿Imatataq payqa ruwarun wañuchinaykipaqqa?”, nispa.+ 33 Chaymi Saulqa wañurachiyta munaspan Jonatanta lanzawan chuqarurqa.+ Chay ruwasqanwanmi Jonatanqa mana iskayrayarqachu taytanqa Davidta wañurachiy munasqanmanta.+ 34 Chayllam Jonatanqa tiyasqanmanta piñasqallaña hatarirurqa. Chay punchawqa manam mikuypas chayarqachu. Davidmantam Jonatanqa llumpay hukmanyasqa tarikurqa.+ Llumpay piñasqataqmi tarikurqa taytanpa mana allinkuna rimasqanwanpas.

35 Paqarintintam Jonatanqa Davidwan rimasqankuman hina chunniqman rirqa. Jonatanwantaqmi rirqa yanapaqnin musupas.+ 36 Chaypim yanapaqninta nirqa: “Kallpay* flechasqay flechakunata maskamunaykipaq”, nispa. Yanapaqninqa kallpayllam pasarqa. Jonatanqa flechaspanmi huknintaqa yanapaqninpa waklawninkamaraq chayarachirqa. 37 Flechasqanman yanapaqnin chayaruptinmi Jonatanqa qayarqa: “¡Waklawnikipiraqmi huknin flechaqa kachkan!”, nispa. 38 Jonatanqa qayarqataqmi: “¡Apurawman kallpay ama sayaykuspa!”, nispa. Yanapaqninñataqmi flechakunata huqariramuspan Jonatanpa kasqanman kutimurqa. 39 Jonatanpa yanapaqninqa manamá cuentata qukurqachu imanasqa tukuy chaykuna ruwasqanmantaqa. Chaytaqa Jonatanwan Davidllam yacharqaku. 40 Chaymantam Jonatanqa yanapaqninman flechanta quykuspan nirqa: “Kayta llaqtaman kutichiy”, nispa.

41 Jonatanpa yanapaqnin pasakuptinmi Davidqa chay hichpanpi pakakusqanmanta lluqsiramurqa. Lluqsiramuspanmi Davidqa Jonatanpa ñawpaqninpi pampaman qunqurakuykuspan kimsakama kumuykurqa. Chaymantam iskayninku abrazanakuykuspanku* waqarqaku, Davidmi astawanqa waqakurqa. 42 Jonatanmi Davidta nirqa: “Hawkallayá pasakuy. Jehova Diospa sutinpim rimarqanchik:+ ‘Jehova Diosyá yachachun yanapanakunanchikpaq rimasqanchikta, yachachuntaqyá mirayninchikkuna yanapanakunankupaq rimasqanchiktapas’”, nispa.+

Chaymantam Davidqa pasakurqa, Jonatanñataqmi llaqtaman kutikurqa.