1 Samuel
21 Chaymantam Davidqa Nob llaqtaman rirqa.+ Chay llaqtapim yacharqa* sacerdote Aimelec. Aimelecqa Davidwan tupaykuspanmi manchakuymanta katkatatarqa, hinaspanmi nirqa: “¿Imanasqam sapallayki hamuchkanki?”, nispa.+ 2 Hinaptinmi Davidñataq nirqa: “Kamachiq Saulpa niwasqantam ruwanay kachkan, ichaqa paymi niwarqa: ‘Amamá pipas yachanqachu ima ruwanaykipaq nisqaykunataqa’, nispa. Chaymi runaykunata nirqani huklawpi tupanaykupaq. 3 Mañakuykim pichqa tantata utaq imallatapas quykuwanaykipaq”, nispa. 4 Aimelecñataqmi Davidta nirqa: “Diospaq sapaqchasqa tantallam kachkan,+ manam huk tantaqa kapuwanchu. Sichu runaykikuna warmikunawan mana puñurqachu, hinaptinqa quykusqaykim”, nispa.+ 5 Davidñataqmi nirqa: “Peleanaykupaq wakin kutipi lluqsisqaykuman hinam kay kutipipas warmiwanqa mana puñurqanikuchu.+ Chay kutikunapipas runaykuna Diospaq sapaqchasqa kachkaspankuqa, ¡imaynamá kay kutipiqa puñukunmanku!”, nispa. 6 Hinaptinmi Aimelecqa Diospaq sapaqchasqa tantata quykurqa,+ chayllam paypaqa kapurqa. Chay tantaqa manam Jehova Diospa carpanpiñachu karqa, hurqusqanku punchawmi huk tantataña chayllaraq ruwasqata churarurqaku.
7 Edom kastamanta+ Doeg sutiyuq+ Saulpa runanpas chaypim kachkarqa, payqa Jehova Diospa carpanpim qipanan karqa. Doegqa Saulpa ovejankunata michiqkunapa kamachiqninmi karqa.
8 Davidmi sacerdote Aimelecta nirqa: “¿Manachu kapusunki lanzayki utaq espadayki? Kamachiq Saulpa niwasqanta chaylla ruwanay kaptinmi mana apamurqanichu”, nispa. 9 Hinaptinmi Aimelecñataq nirqa: “Ela pampapi+ wañuchisqayki Goliatpa* espadallanmi kachkan.+ Pachaypa* qipanpim wankusqa kachkan.+ Chayllatam quspaqa-quykiman, munaspaykiqa apakuyá”, nispa. Davidñataqmi nirqa: “Quykuwayá, chay espada hinaqa manam hukqa kanchu”, nispa.
10 Chay punchawmi Davidqa Saulmanta ayqikusqanrayku+ chaymanta pasakurqa. Hinaspanmi chayarurqa Gat llaqtayuq kamachiq Akispa kasqanman.+ 11 Hinaptinmi kamachiq Akista runankuna nirqaku: “¿Manachu payqa Israel runakunapa kamachiqnin David? ¿Manachu paymanta runakunapas tusustin takirqaku:
‘Saulmi waranqantin runakunata wañurachimun,
Davidñataqmi chunka waranqantinta’, nispanku?”, nispa.+
12 Chayna nisqankuta uyarispanmi Davidqa kamachiq Akista manchakurqa.+ 13 Chaymi Davidqa paykunapa qayllanpi locotukururqa.+ Hinaspanmi llaqtapa punkunkunapi qillqapayta qallaykurqa, lawtanpas barban uraytam suturirqa. 14 Chaymi kamachiq Akisqa runankunata nirqa: “¡Locom kay runaqa! ¿Imapaqtaq pusamuwankichik? 15 Achkañam kaypi locokunaqa. Manam munanichu huk locotawan pusamuwanaykichiktaqa, ¿piensankichikchu kay locota wasiyman pusaykunayta?”, nispa.