1 Cronicas
23 Davidqa yuyaqña hinaspa wañukunanpaqña kachkaspanmi churin Salomonta churarqa Israel nacionta kamachinanpaq.+ 2 Hinaspanmi Israel nacionpi huñururqa autoridadkunata, sacerdotekunata,+ Leviy ayllumanta kaqkunata.+ 3 Leviy ayllukunatam yupachirqa 30 watayuqmanta hanayman,+ hinaptinmi karqaku 38.000 qarikuna. 4 Paykunamantam 24.000 runakuna Jehova Diospa wasinpi llamkaymanta cuentallikurqaku, 6.000 runakunañataqmi karqaku kamachiqkuna, juezkuna,+ 5 4.000 runakunañataqmi punku cuidaqkuna karqaku,+ 4.000 runakunañataqmi Jehova Diosta hatuncharqaku+ Davidpa ruwachisqan tocana kaqkunawan. Chay ruwachisqankunamantam Davidqa nirqa: “Diosta hatunchanapaqmi ruwachirqani”, nispa.
6 Chaymantam Davidqa Leviy aylluta churinkuman hina rakirurqa,+ paykunam karqaku: Guersonpa, Koatpa hinaspa Meraripa mirayninkuna.+ 7 Guersonpa mirayninkunamantam karqa Ladanwan Simei. 8 Ladanpa kimsa mirayninkunam karqa: Jeyel, Zetam hinaspa Joel.+ Jeyelmi karqa kamachiq. 9 Simeipa* kimsa churinkunam karqa: Selomot, Haziel hinaspa Haran. Paykunam karqaku Ladanpa ayllunpi kamachiqkuna. 10 Simeipa tawa churinkunam karqa: Jaat, Zina, Jeus hinaspa Berias. 11 Jaatmi karqa kamachiq, payman qatiqñataqmi karqa Ziza. Jeuswan Beriasqa manam achka churiyuqchu karqaku, chaymi paykunaqa huk ayllu hinallaña yupasqa kaspanku huk ruwayniyuqlla karqaku.
12 Koatpa churinkunam karqa tawa: Amram, Izar,+ Hebron hinaspa Uziel.+ 13 Amrampa churinkunam karqa Aaronwan+ Moises.+ Aaronqa churinkunapiwanmi rakisqa karqaku.+ Chaynapi Chuyay-chuyay sutiyuq cuartopi haykapipas yanapakunankupaq, Jehova Diospaq animalta kañanankupaq, Diosta yupaychanankupaq hinaspa Diospa sutinpi runakunata bendecinankupaq.+ 14 Diosta yupaychaq Moisespa churinkunaqa Leviy aylluwan kuskam yupasqa karqaku. 15 Moisespa churinkunam karqa Guersonwan+ Eliezer.+ 16 Guersompa churinkunamantam Sebuel+ karqa kamachiq. 17 Eliezerpa churinmi karqa Reabias,+ paymi karqa kamachiq. Eliezerpa churinqa manañam hukqa karqachu, Reabiaspa churinkunam ichaqa achkallaña karqa. 18 Izarpa+ churinkunamantam Selomit+ karqa kamachiq. 19 Hebronpa churinmi karqa Jerias, paymi karqa kamachiq. Iskay kaqñataqmi karqa Amarias. Kimsa kaqñataqmi karqa Jaaziel. Tawa kaqñataqmi karqa Jecameam.+ 20 Uzielpa+ churinmi karqa Miqueas, payqa karqa kamachiqmi, payman qatiqñataqmi karqa Isias.
21 Meraripa churinkunam karqa Maliwan Musi.+ Malipa churinkunañataqmi karqa Eleazarwan Quis. 22 Eleazarqa mana qari churiyuqmi wañukurqa, warmi churinkunallam karqa. Chaymi paykunaqa tionku Quispa qari churinkunawan casarakururqaku. 23 Musipa kimsa churinkunam karqa: Mali, Eder hinaspa Jeremot.
24 Paykunapa sutinmi listasqa karqa Leviypa mirayninkuna sapa ayllupi haykam kamachiq kasqankuman hina. 20 watayuqmanta hanayman Leviy ayllumanta kaqkunaqa yupasqa hinaspa sutin-sutin listasqam karqaku, chaynapi Jehova Diospa wasinpi yanapakunankupaq. 25 Davidmi nirqaña: “Israelpa yupaychasqan Jehova Diosmi runankunaman hawkayayta quykun,+ paymi Jerusalen llaqtapi wiñaypaq kanqa.+ 26 Chaymantapas, Leviy ayllukunaqa manam Diospa carpantaqa nitaq payta yupaychanapaq kaqkunataqa apakachanqakuñachu”, nispa.+ 27 Davidpa kamachisqanman hinam Leviy ayllukunataqa 20 watayuqmanta hanayman yuparqaku. 28 Paykunaqa Aaronpa mirayninkunatam yanaparqaku+ Jehova Diospa wasinpi imapas ruwaykunapi.+ Yanaparqakum Diospaq sapaqchasqa kaqkunata chuyanchaypi, Diospa wasinpi tukuy ima ruwaypi, patiokunapi hinaspa cuartokunapi. 29 Yanaparqakum Diospaq sapaqchasqa tanta* ruwaypipas.+ Paykunataqmi ruwaqku Diospaq kañapuspanku servichikunanku harinata, mana levadurayuq llaspa tantata.+ Ruwarqakutaqmi latapi tantatapas, pitusqa harinatapas+ aceiteyuqta. Paykunataqmi qawaqku tukuy imapa llasaynintawan sayaynintapas. 30 Paykunaqa sapa achikyaqtawan+ inti siqaykuytam Jehova Diospa tukuy ima ruwasqanmanta agradecekuspanku hatunchaqku.+ 31 Paykunaqa Jehova Diospaq animalkunata kañaypim yanapakuqku samana punchawpi*,+ llullu killapi+ hinaspa hatun huñunakuykunapi.+ Chaytaqa ruwaqku kamachikuypa nisqanman hinam. Hinaspapas sapa kutim chaytaqa Jehova Diospaq ruwaqku. 32 Paykunaqa cuentallikurqakutaqmi Diospa carpanpi chaynataq Chuya sutiyuq cuartopi imapas ruwaypi. Paykunamá yanaparqaku Aaronpa churinkunata Jehova Diospa wasinpi llamkaptinku.