1 Reyes
12 Israel runakunam Sichem* llaqtapi huñunakururqaku,+ chaypim Reoboamta kamachiqninku kananpaq churarqaku.+ 2 Nebatpa churin Jeroboanñataqmi chayta yacharurqa. Jeroboanqa kamachiq Salomonmanta ayqikuruspanmi Egipto nacionpi yachachkarqa*.+ 3 Hinaptinmi Israel runakunaqa Jeroboanta maskarachimuspanku paywan kuska kamachiq Reoboanman rirqaku, hinaspam nirqaku: 4 “Taytaykim llumpayta llamkachiwarqaku.+ Amañayá qamqa llumpaytaqa llamkachiwaykuchu, hinaptinqa kasukusqaykikum”, nispa.
5 Reoboamñataqmi nirqa: “Kutikuspayá kimsa punchawmantaña kutimuychik”, nispa. Chaynata niptinmi runakunaqa kutikurqaku.+ 6 Chaymantam Reoboamqa taytan Salomonta serviq yuyaqkunata* tapukurqa: “Niykuwaychik, ¿imatataq runakunaman nisaq?”, nispa. 7 Hinaptinmi paykunañataq nirqaku: “Sichu runaykikunapa mañakusqanta uyarispayki yanapaykunki, hinaptinqa kasukusunkim haykapikamapas”, nispa.
8 Reoboamñataqmi chay yuyaqkunapa nisqantaqa mana kasurqachu. Hinaspanmi yanapaqnin wiñaymasin musukunata tapukurqa.+ 9 Paykunatam nirqa: “Runakunam niwan: ‘Amañayá taytayki hinaqa llumpaytaqa llamkachiwaykuchu’, nispa. ¿Imatataq niwankichikman? ¿Ima nichwantaq chay runakunata?”, nispa. 10 Hinaptinmi chay musukunaqa nirqaku: “‘Amañayá taytayki hinaqa llumpaytaqa llamkachiwaykuchu’ nisuqniki runakunatayá niy: ‘Taytaymantapas astawanraqmi ñuqaqa ñakarichisqaykichik*. 11 Taytaymi llumpayta llamkachisurqankichik, ñuqañataqmi astawanraq llamkachisqaykichik. Taytaymi azotewan waqtasurqankichik, ñuqañataqmi raku puntayuq azotewanraq waqtasqaykichik’”, nispa.
12 Jeroboanqa hinaspa Israel runakunaqa kimsa punchawmantañam kamachiq Reoboampa nisqanman hina kutimurqaku, paymi nirqa: “Kutikuspayá kimsa punchawmantaña kutimuychik”, nispa.+ 13 Yuyaqkunapa nisqanta mana kasukuspanmi Reoboamqa nanay simiwan runakunata rimapayarqa. 14 Payqa musukunapa nisqanta kasukuspanmi nirqa: “Taytaymi ñakarichisurqankichik, ñuqam ichaqa astawanraq ñakarichisqaykichik. Taytaymi azotewan waqtasurqankichik, ñuqam ichaqa raku puntayuq azotewanraq waqtasqaykichik”, nispa. 15 Kamachiq Reoboamqa manam runakunapa nisqantaqa kasurqachu. Jehova Diosmi chayna kananta munarqa,+ chaynapi Nebatpa churin Jeroboanman Diospa willachisqanman hina kananpaq. Jehova Diosqa willachirqa Silo llaqtayuq Aiyawanmi.+
16 Mañakusqankuta mana uyariyta munaptinmi Israel runakunaqa kamachiq Reoboamta nirqaku: “¿Davidqa imaykutaq ñuqaykupaqa? Jeseypa churin Davidmantaqa manam imatapas chaskisaqkuchu. Israel runakuna, llapallanchikyá taytacha-mamachanchikman kutikusunchik. Davidpa mirayninkuna, ¡ñuqaykuqa manam yanapasqaykikuchu!”, nispa. Chaynata niruspankum Israel runakunaqa wasinkuman* kutikurqaku.+ 17 Reoboanmi ichaqa Juda ayllupa allpanpi yachaq Israel runakunata hinalla kamachirqa.+
18 Chaymantam Reoboamqa Israel runakunaman kacharqa llamkapuqninkunapa kamachiqnin Adoramta.+ Israel runakunañataqmi rumiwan chuqapaspanku wañurachirqaku. Kamachiq Reoboamñataqmi carretanman qispiruspan Jerusalenman lluptikurqa.+ 19 Israel runakunaqa kunankamapas manam Davidpa mirayninkunataqa yanapankuchu.+
20 Jeroboan kutiramusqanta yacharuspallankum Israel runakunaqa huñunakuruspa qayarachirqaku, hinaspankum kamachiqninku kananpaq churarurqaku.+ Davidpa mirayninkunataqa Juda ayllu runakunallam yanaparqaku.+
21 Reoboanmi Jerusalen llaqtaman chayaramuspan Juda ayllumantawan Benjamin ayllumanta huñurachirqa 180.000 allin peleaq soldadokunata, chaynapi Israel runakunawan peleaspan munaychakusqan allpata kutichikunanpaq.+ 22 Hinaptinmi Diosñataq yupaychaqnin Semayata+ nirqa: 23 “Salomonpa churin kamachiq Reoboamta, Juda ayllu runakunata, Benjamin ayllu runakunata hinaspa Israelpi wakin runakunatayá nimuy: 24 ‘Jehova Diosmi nin: “Amayá aylluykichik Israel runakunawan peleaqqa riychikchu. Sapakamayá wasikichikman kutikuychik. Ñuqam saqirqani tukuy chaykuna pasakunantaqa”’”, nispa.+ Chaymi Jehova Diospa nisqanta kasukurqaku, hinaspankum wasinkuman kutikurqaku Jehova Diospa nisqanman hina.
25 Jeroboanqa Efrain ayllupa urqunpi kaq Sichem llaqtata+ allicharachispanmi* chaypi yacharqa. Chaymanta lluqsispanmi Penuel llaqtata+ allicharachirqa*. 26 Jeroboanmi sunqunpi nirqa: “Pisi-pisimantachá Davidpa mirayninña kaqmanta kamachiq kanqa.+ 27 Sichu kay runakuna Jerusalenpi Jehova Diospa wasinman hinalla rinqaku animalkunata nakapuq,+ hinaspaqa Juda aylluta kamachiq Reoboampañam rikurirunqaku. Ñuqata wañurachiwaspankuchá Reoboanmanña kaqmanta kutikunqaku”, nispa. 28 Jeroboanqa yanapaqninkunata tapukuspanmi qurimanta iskay malta torokunata ruwarurqa,+ hinaspanmi runakunata nirqa: “Israel runamasillaykuna, sasañam Jerusalen llaqtaman riyqa. Kayqaya Egiptomanta hurqumuwaqninchik Diosninchikqa”, nispa.+ 29 Chaynata nispanmi Jeroboanqa qurimanta malta torota sayarachirqa Betel llaqtapi,+ huktañataq Dan llaqtapi.+ 30 Chayta ruwasqanwanmi runakunata huchallirachirqa.+ Runakunaqa Dan llaqtakamaraqmi riqku qurimanta torota yupaychanankupaq.
31 Jeroboanqa muqukunapim yupaychana wasikunata ruwarachirqa, hinaspanmi mana Leviy ayllumanta kaqkunata churarurqa sacerdote kanankupaq.+ 32 Jeroboanqa pusaq kaq killapa 15 punchawninpim Juda ayllukuna hina hatun huñunakuyta qallarichirqa.+ Betel llaqtapim altarta ruwarqa,+ chaypim qurimanta malta torokunapaq animalkunata kañarqa. Betel llaqtapa muqunkunapim sacerdotekunata churarqa. 33 Tantiasqan pusaq kaq killapa 15 punchawninpim Betel llaqtapi animalkunata kañayta qallaykurqa. Chaynatam qallarichirqa watan-watan Israel runakuna huñunakunankupaq, hinaspam altarman qispirqa kañananpaq chaynataq qusnichinanpaq.