1 Corintios

7 Qillqamusqaykichikmantaqa kaytam nikichikman: Allinmi kanman warmita qari mana llachpayninqa*, 2 ichaqa achkallaña huchapakusqankuraykuyá* sapakama warmiyuq kachunku,+ warmipas sapakamayá qusayuq kachunku.+ 3 Qusaqa warminmanyá imam qunanta quchun*, chaynallataqyá warmipas qusanman imam qunanta quchun.+ 4 Warmiqa manañam cuerponpa dueñonñachu aswanqa qusanñam, chaynallataqmi qusapas manaña cuerponpa dueñonñachu aswanqa warminñam. 5 Amayá warmi-qari puñuytaqa neganakuychikchu, negaspaqa-neganakuychik huk tiempollayá iskaynikichik tantianakuspa, chaynapi Diosta mañakunaykichikpaq, chaymantaqa hinallayá kakuychik, yanqañataq munasqaykichikwan aysachikuptikichik satanas huchallichisunkichikman. 6 Kaytaqa niyllam-nichkaykichik manam kamachichkaykichikchu. 7 Chaywanpas munaymanmi llapallanku ñuqa hina sapallanku* kanankuta. Ichaqa Diosqa manam chaynallatachu ruwawarqanchik,+ payqa manam harkakunchu wakin solterolla kanankuta wakinñataq casado kanankutaqa.

8 Allinmi kanman solterokunapa hinaspa viudakunapa ñuqa hina kayninkuqa, chaynatam paykunata nini.+ 9 Ichaqa sapallanku kayta* mana atispankuqa casarakuchunku, casarakuymi aswan allinqa qaripas warmita utaq warmipas qarita munapayaspan purinanmantaqa.+

10 Casarasqakunatam rimapayani, warmikunaqa amayá qusankumantaqa rakikuchunkuchu, chaytaqa manam ñuqachu nini aswanqa señormi.+ 11 Rakikuruspanqa amayá hukwanqa casarakuchunchu, aswanqa qusanwanyá amistachun. Qusapas manam warmintaqa saqinanchu.+

12 Wakinkunatam ichaqa ñuqa nini, manam señorninchikchu,+ mayqan iñiqmasinchikpapas warmin mana iñiq kachkaspan paywan qipakuyta munaptinqa amayá warminta saqichunchu. 13 Chaynallataqyá warmipas qusan mana iñiq kachkaspan paywan qipakuyta munaptinqa ama qusanta saqichunchu. 14 Mana iñiq qusaqa warminraykum casado vidanpi chuyanchasqa kachkan, chaynallataqmi mana iñiq warmipas Diospi iñiq qusanrayku casada vidanpi chuyanchasqa kachkan. Mana chayna kaptinqa churi-wawankunam Diospaq mana chuyachu kanmanku, paykunaqa kachkanku chuyanchasqañam. 15 Mana iñiq warmi utaq qusa ripukuyta* munaspanqa ripukuchun, wawqinchiktaqa utaq paninchiktaqa manam pipas hikutanmanchu mana iñiqwan kuska kananpaqqa. Diosqa hawkayaymanmi qamkunataqa qayasurqankichik.+ 16 Qam warmi, ¿imaynatataq yachawaq qusaykita mana salvanaykita?+ Qampas qusa, ¿imaynatataq yachawaq warmikita mana salvanaykita?

17 Dios qayasuptikichik+ imayna tarikusqaykichikman hinallayá kawsaychik sapakamaman Jehova* Diospa qusqanman hina. Chaynatam nini llapallan iñiqkunata. 18 ¿Qari kayninpi señalasqa kachkaspanchu pipas qayasqa karqa?+ Chaynaqa hinallayá kachun. ¿Mana señalasqa kachkaspanchu pipas qayasqa karqa? Chaynaqa amayá señalachikuchunchu.+ 19 Qari kayninpi señalasqa utaq mana señalasqa kaypas manam imananchu,+ Diospa kamachisqankunata kasukuymi ichaqa aswan allin.+ 20 Imayna tarikuchkaspa qayasqa kasqaykichikman hinallayá sapakama kawsakuychik.+ 21 ¿Hukpa serviqnin kachkaspachu qayasqa karqanki? Chaynaqa amayá llakikuychu,+ sichu librakuyta atinki hinaspaqa librakuruyá. 22 Señorpa mayqin qatiqninpas hukpa serviqnin kachkaspa qayasqa kaspanqa libreñam,+ hinaspanmi señorpaña. Chaynallataqmi libre kachkaspan qayasqa kaqpas Cristopa* serviqninña rikurirun. 23 Qamkunaqa preciowanmi rantisqa karqankichik,+ amañayá runapa serviqninqa kaychikchu. 24 Wawqi-panillaykuna, imayna tarikuchkaspa qayasqa kasqaykichikman hinallayá Diospa qayllanpi sapakama kawsakuychik.

25 Mana casarasqakunapaqmi* ichaqa mana ima kamachikuytapas señorninchikmantaqa chaskirqanichu. Ichaqa señorpa llakipayasqan kasqayraykum ñuqamanta mana iskayrayanaykichikpaq kikiymantaña kayta nikichik.+ 26 Sasallaña tiempopi kasqanchikraykum ñuqamantaqa allin kanman casarasqa kaqpas utaq sapallan kaqpas imayna kasqanman hinalla kayninku. 27 ¿Warmiyuqchu kachkanki? Chaynaqa amayá rakikuytaqa munaychu.+ ¿Mana warmiyuqchu kachkanki? Chaynaqa amayá warmitaqa maskaychu. 28 Chaywanpas casarakuspaykiqa manam huchallikunkichu. Mana casarasqakuna casarakuspankupas manam huchallikunkuchu. Casarakuqkunam ichaqa sasachakuykunapi tarikunqaku*. Chayna sasachakuykunapi mana tarikunallaykichikpaqmi ñuqaqa nichkaykichik.

29 Chaymantapas wawqi-panillaykuna, manañam tiempo kanchu*,+ kunanmantaqa warmiyuqkunapas mana warmiyuq hinayá kachunku, 30 waqaqkunapas mana waqaq hinayá kachunku, kusisqa kaqkunapas mana kusisqa kaqkuna hinayá kachunku, tukuy ima rantiqkunapas mana imayuq hinayá kachunku, 31 kay pachapi kaqkunata servichikuqkunapas mana servichikuqkuna hinayá kachunku, kay pachapi tukuy imakunaqa manam chaynallachu kachkan. 32 Chiqaptapuniqa munani mana llakiyuq kanaykichiktam. Mana casarasqa qariqa señorpa chaskisqan kananraykum señorninchikpaq llamkayllapi umayuq. 33 Casarasqa qarim ichaqa warminta kusichinanrayku kay pachapi kaqkunamanta+ afanakun, 34 hinaspanmi payqa rakinasqa kachkan. Mana casarasqa warmiqa utaq sipasqa señorninchikpaq llamkayllapim afanakun+ cuerponpipas hinaspa yuyayninpipas chuya kananpaq. Casarasqa warmim ichaqa qusanta kusichinanrayku kay pachapi tukuy ima ruwaykunapi umayuqllaña. 35 Kaytaqa nikichik qamkunapa allinnikichikpaqmi, manam harkakuspaychu, nikichikqa allin kaqkunata ruwanaykichikpaqmi hinaspa huk ruwaykunawan mana harkachikuspa señorninchikta hinalla servinaykichikpaqmi.

36 Pipas mana casarasqa kaspan sapallanraq kayta mana atispanqa chaynataq musu-sipasyasqan tiempopas pasarunñataq hinaptinqa casarakuyta munaspanqa casarakunmanmi, chayqa manam huchachu.+ 37 Ichaqa sichu pipas sunqunpi sumaqta tantiakun mana casarakunanpaq chaynataq cuentata qukun casarakuy mana necesitasqanta, sapallan kaytapas atispanqa allintam ruwachkan.+ 38 Chaynaqa, pipas casarakuqqa allintam ruwan, mana casarakuqmi ichaqa aswan allintaraq ruwan.+

39 Qusan kawsanankamaqa warmiqa qusanpa makinpim kachkan.+ Qusan wañukuptinmi ichaqa libreña piwanpas munasqanwan casarakunanpaq, ichaqa señorpi iñiqllawanmi casarakunan.+ 40 Ñuqallamantaqa aswan kusisqam kanman imayna tarikusqanman hinalla kaspanqa, ñuqapas manam iskayrayanichu Diospa atiynin yanapawasqanmantaqa.