Josuey

10 Jerusalen llaqtapi kamachiq Adoni-zedecmi uyarirurqa Josueyqa Jerico llaqtata hina Hai llaqtatapas kañaykusqanta, Hai llaqtapi kamachiqtapas+ Jerico llaqtapi kamachiqta hina wañurachisqanta.+ Uyarirurqakutaqmi Gabaon llaqtayuqkuna Israelpa mirayninkunawan hawkalla kanankupaq rimanakuspa kuskaña kasqankutapas.+ 2 Hinaspanmi Adoni-zedecqa llumpayta hukmanyarurqa+ Gabaon llaqta munayniyuq kamachiqkunapa hina hatu-hatun llaqta kasqanrayku. Gabaon llaqtaqa Hai llaqtamantapas aswan hatunmá karqa,+ runankunapas lliwmi guerrapi peleaqkuna karqaku. 3 Chaymi Jerusalenta kamachiq Adoni-zedecqa Hebron llaqtata kamachiq Hoqanman,+ Jarmut llaqtata kamachiq Piranman, Lakis llaqtata kamachiq Jafiaman hinaspa Eglon llaqtata kamachiq Debirman+ willachimurqa: 4 “Hamuspayá yanapaykuwaychik, Gabaon llaqtayuqkunawanyá peleasunchik. Paykunaqa Josueywan hinaspa Israelpa mirayninkunawanmi rimanakurunku hawkalla kanankupaq”, nispa.+ 5 Hinaptinmi Amorreo runakunapa+ pichqa kamachiqninkunaqa tropankunapiwan huñunakururqaku. Paykunaqa karqaku Jerusalen llaqtapa, Hebron llaqtapa, Jarmut llaqtapa, Lakis llaqtapa hinaspa Eglon llaqtapa kamachiqninkunam. Paykunamá rispanku Gabaon llaqtapa hichpanpi carpankuta sayachirqaku peleanankupaq.

6 Chaymi Gabaon llaqtayuq runakunaqa Josueyman samasqanku Guilgalpi+ kachkaptin willachimurqaku: “Amayá kay serviqnikikunataqa qunqaruwaykuchu.+ Chaylla hamuspayá yanapaykuwayku, wañuymantayá libraykullawayku. Urqukunapa kasqan lawpi kaq Amorreo runakunapa kamachiqninkunam ñuqaykuwan peleanankupaq huñunakaramunku”, nispa. 7 Chaymi Josueyqa Guilgalmanta qispirqa llapallan soldadonkunawan, paykunawanqa karqataqmi kallpasapa soldadonkunapas.+

8 Chaymantam Jehova Diosqa Josueyta nirqa: “Amayá paykunataqa manchakuychu,+ ñuqam makikiman churaykuni.+ Manam mayqanninkupas qanwan peleaytaqa atinqakuchu”, nispa.+ 9 Josueyqa Guilgalmantam runankunapiwan tukuy tuta rirqaku, hinaspankum qunqayllamanta chayaruspa Amorreo runakunawan peleayta qallaykurqaku. 10 Israelpa miraynin runakunapa ñawpaqninpim Jehova Diosqa Amorreo runakunata pantanarachirqa.+ Chaymi Israelpa mirayninkunaqa Gabaon llaqtapi achkallataña wañurachirqaku. Bet-horonman riq ñanninta hanayman qatispankuñataqmi Azeka llaqtakama chaynataq Makeda llaqtakama wañuparachirqaku. 11 Israelpa mirayninkunamanta Bet-horonta urayninpaman ayqichkaptinkuñataqmi hanaq pachamanta runtu parata Jehova Dios kachaykamurqa hatun rumi sayaykunata Azeka llaqtakama, hinaptinmi wañururqaku. Israelpa mirayninkuna espadawan wañuchisqankumantapas aswan achkaraqmi runtu parawanqa wañurqaku.

12 Chaynapim Josueyqa Israelpa mirayninkuna qawachkaptin Amorreo runakunata Jehova Diospa wañuchisqan punchawpi Jehova Diosta mañakurqa, hinaspam Israelpa mirayninkunapa qayllanpi nirqa:

“¡Inti, Gabaon llaqtapa hawanpiyá sayaykuy!+

¡Killa, Ayalon pampapa hawanpiyá sayaykuy!”, nispa.

13 Hinaptinmi intipas killapas sayarurqa llapa chiqniqninkuta Israelpa mirayninkuna wañuchiyta tukunankukama. ¿Manachu chayqa qillqasqa kachkan Jasar sutiyuq libropi?+ Intimá hanaq pachapa chawpinpi sayarurqa, yaqa huk punchawmi mana siqaykurqachu. 14 Manamá chayna punchawqa karqachu ñawpaqtapas nitaq qipatapas. Chay punchawllapim Jehova Diosqa kasurqa runapa chayna qayakusqantaqa.+ Jehova Diosmá Israel runakunapa rantinpi pelearqa.+

15 Chaymantam Josueyqa Israelpa lliw mirayninkunapiwan kuska Guilgalpi samasqankuman kutirqa.+

16 Ichaqa pichqa kamachiqkunam lluptikuspanku Makeda law machaypi pakakururqaku.+ 17 Chaymi Josueyman willaykurqaku: “Pichqa kamachiqkunatam Makeda law machaypi pakakuqta tarirunku”, nispa.+ 18 Josueyñataqmi nirqa: “Hatun rumikunata machaypa punkunman tanqaspa tapamuychik, hinaspayá cuidaqkunata chaypi churamuychik. 19 Wakiqnikichikñataqyá ama samaykuspa chiqniqnikichikkunata qatiychik hinaspa wañuchimuychik.+ Amayá llaqtankuman chayanankutaqa saqiychikchu, Jehova Diosninchikmi paykunataqa makikichikman churaykun”, nispa.

20 Josueywan Israelpa mirayninkunaqa achka runakunatam wañurachirqaku. Paykunaqa yaqa lliwtam wañurachirqaku, waki-wakillantañam mana wañuchirqakuchu murallayuq llaqtakunaman lluptikusqankurayku. Chayna wañuchisqankumantam 21 lliw peleaqkunaqa hawkalla hinaspa sanolla Josueypa kasqanman kutirqaku, Josueyqa kachkarqa Makeda lawpim. Manamá pipas Israel runakunapa contranpiqa imatapas rimarqachu. 22 Chaymantam Josuey nirqa: “Machayta kichaspaykichik chay pichqa kamachiqkunata pusamuwaychik”, nispa. 23 Chaymi machaymanta hurqumurqaku Jerusalen llaqtapa, Hebron llaqtapa, Jarmut llaqtapa, Lakis llaqtapa hinaspa Eglon llaqtapa kamachiqninkunata,+ hinaspam pichqanta Josueyman pusarqaku. 24 Chay kamachiqkunata pusaruptinkum Josueyqa Israelpa lliw miraynin qarikunata qayachirqa, hinaspam paywan riq tropakuna kamachiqkunata nirqa: “Asuykamuychik. Kay kamachiqkunata matankanpi* saruychik”, nispa. Chaymi asuykuspanku chay runakunata matankanpi sarurqaku.+ 25 Josueyqa nirqaraqmi: “Amayá manchakuychikchu nitaq hukmanyaychikchu.+ Kallpanchakuspaykichikyá qarinchakuychik. Kaynatam Jehova Diosqa ruwanqa qamkunawan peleaq llapallan chiqnisuqnikichikkunata”, nispa.+

26 Chaymantam Josueyqa chay pichqa kamachiqkunata wañurachispan sapakamata sachapi* warkururqa. Chayna warkusqam karqaku inti siqaykunankama. 27 Inti siqaykuptinñataqmi Josueyqa kamachirqa sachapi warkusqankumanta uraykachispanku+ pakakusqanku machayman wischumunankupaq. Chaynata ruwaspankum hatun rumikunawan machaypa punkunta taparurqaku, chaynam kunankamapas kachkan.

28 Chay punchawmi Josueyqa Makeda llaqtaman yaykuspa chaypi kaq lliw runakunata espadawan wañurachirqa.+ Payqa kamachiqnintawan chaypi lliw runakunatam wañurachirqa, manamá pipas lluptirqachu.+ Makeda llaqtapi kamachiqtaqa+ Jerico llaqtapi kamachiqta hinam ruwarurqa.

29 Chaymantam Josueyqa Israel lliw tropakunawan Makeda llaqtamanta Libna llaqtaman rirqa, hinaspam chaypi kaq runakunawan pelearqa.+ 30 Jehova Diosqa chay llaqtatapas kamachiqnintawanmi Israelpa miraynin runakunapa makinman churaykurqa.+ Chaymi yaykuruspanku lliw runakunata espadawan wañurachirqaku, manam pipas lluptirqachu. Kamachiqnintaqa Jerico llaqtapa kamachiqninta hinam ruwarurqaku.+

31 Chaymantam Josueyqa Israel lliw tropakunawan kuska Libna llaqtamanta Lakis llaqtaman rirqa.+ Chaypim samarurqaku, hinaspam chaypi kaq runakunawan pelearqaku. 32 Jehova Diosqa Lakis llaqtatapas Israelpa miraynin runakunapa makinmanmi churaykurqa, hinaptinmi paqarintinta yaykuruspanku lliw runakunata espadawan wañurachirqaku.+ Chaynataqa ruwarqaku Libna llaqtata ruwasqankuta hinam.

33 Guezer llaqtata kamachiq+ Horanñataqmi Lakis runakunata yanapaq qispirqa. Josueymi ichaqa paytawan tropankunata mana chullapas puchunankama wañurachirqa.

34 Chaymantam Josueyqa Israel lliw tropakunawan kuska Lakis llaqtamanta Eglon llaqtamanña rirqa.+ Chaypim samarurqaku, hinaspañam chaypi kaq runakunawan pelearqaku. 35 Hina chay punchawllapim yaykuruspanku espadawan llaqtapi lliw runakunata wañurachirqaku Lakis llaqtapi runakunata ruwasqankuman hina.+

36 Chaymantam Josueyqa Israel lliw tropakunawan kuska Eglon llaqtamanta Hebron llaqtamanña rirqa,+ hinaspam chaypi kaq runakunawan pelearqa. 37 Hebron llaqtaman yaykuruspankum kamachiqnintawan kuskata lliw runakunata espadawan wañurachirqaku. Wañurachirqakutaqmi muyuriqnin llaqtachakunapi kaq runakunatapas, manam chullallatapas puchurqakuchu. Josueyqa Eglon llaqtata ruwasqanman hinam lliw runakunata wañurachirqa.

38 Peleayta tukunanpaqñataqmi Josueyqa Israel lliw tropakunawan kuska Debir llaqtamanña muyurqa+ hinaspam paykunawan pelearqa. 39 Debir llaqtaman yaykuruspankum kamachiqnintawan kuskata lliw runakunata espadawan wañurachirqaku.+ Wañurachirqakutaqmi muyuriqnin llaqtachakunapi kaq runakunatapas, manam chullallatapas puchurqakuchu.+ Josueyqa Hebron runakunatawan kamachiqninta hinaspa Libna runakunatawan kamachiqninta hinam Debir llaqtatapas ruwarqa.

40 Josueyqa urqukunapi, Sefela muqukunapi, Negueb qichwapi+ chaynataq waqtakunapi lliw llaqtakunamanpas yaykuruspam kamachiqkunatawan runankunata wañurachirqa, manam chullallapas puchurqachu.+ Israel runakunapa yupaychasqanku Jehova Diospa kamachisqanman hinam+ lliw runakunata wañurachirqa. 41 Josueypa yaykusqan chay allpakunaqa karqa Cades-barnea lawmanta+ Gaza lawkamam+ hinaspa enteron Gosen lawmanta+ hanay Gabaon lawkamam.+ 42 Josueyqa huk kutillatam chaypi kaq llapallan kamachiqkunata wañurachispan allpankunatapas hapikuykurqa. Israel runakunapa yupaychasqan Jehova Diosmá Israelpa mirayninkunapa rantinpi pelearqa.+ 43 Chaymantam Josueyqa Israel tropakunawan kuska Guilgalpi samasqankuman kutirqa.+