LEVITICO

1 Jehova Diosmi carpanmanta Moisesta rimapayaspan+ nirqa: 2 “Israelpa mirayninkunatayá niy: ‘Mayqinnikichikpas ñuqa Jehova Diospaq animalnikichikta quspaqa vacata, torota, ovejata utaq cabratam quwanan.+

3 Pipas ñuqapaq kañananpaq vacankunamanta quyta munaspaqa allinnin kaq sano malta torotam quwanan.+ Chaytaqa ñuqa Jehova Diospaqmi sunqumanta qunan+ carpaypa ñawpaqninpi. 4 Hinaspam kañapuwananpaq qusqan malta toropa umanman makinta churanan, chaynapim payqa huchanmanta pampachasqa kanqa.

5 Chaymantam chay malta toroqa ñuqa Jehova Diospaq wañuchisqa kanan. Hinaptinmi sacerdote*+ Aaronpa churinkuna chay toropa yawarninta apamuwanqa, chaymantam carpaypa ñawpaqninpi kaq altarpa* muyuriq waqtanman challananku.+ 6 Chaymantapas kañapuwananpaq quwasqanku malta toropa qarantam chustunanku, hinaspam aychantañataq taksa-taksallata kuchunanku.+ 7 Chaymantam Aaronpa churinkunaqa altarpi sansata churananku,+ hinaspam hawanman yantata hinananku ratananpaq. 8 Hawanmanñataqmi hinananku taksa-taksalla kuchusqa malta toropa aychanta, hinanankutaqmi umantawan rurunninkunapi kaq wirantapas.+ Chaytaqa ruwananku sacerdote Aaronpa churinkunam. 9 Chunchulninkunatawan atakankunatapas mayllaspam qusnichinanku, chaytaqa altarpim qusnichinanku sacerdotekuna. Chayqa animalta nakaspa ñuqa Jehova Diospaq kañapuwasqaykichikmi, hinaptinmi chayqa miskillataña asnarinqa.+

10 Kañapuwanaykichikpaq qusqaykichik malta carneroqa+ utaq malta chivoqa allinnin kaq sanom kanan.+ 11 Chayqa ñuqa Jehova Diospaqmi wañuchisqa kanan altarpa ichuq* lawninpi. Yawarnintañataqmi Aaronpa churinkuna challananku altarpa muyuriq waqtanta.+ 12 Aychanñataqmi taksa-taksalla kuchusqa kanan, hinaptinmi sacerdoteqa chay aychata, umanta hinaspa rurunninkunapi kaq wiranta kañanqa. Chaykunataqa kañanqa altarpi rupachkaq yantapa hawanpim. 13 Chunchulninkunatawan atakankunatapas mayllananmi, hinaspam sacerdoteqa llapanta altarpi ñuqapaq qusnichinan. Chayqa animalta nakaspa ñuqa Jehova Diospaq kañapuwasqaykichikmi, hinaptinmi kañapuwasqaykichikqa miskillataña asnarinqa.

14 Chaymantapas, ñuqa Jehova Diospaq pipas alton pawaqta kañapuwananpaq quyta munaspanqa kullkuta utaq mallqu palomatam qunan.+ 15 Chay qusqantaqa sacerdotem wañuchinan sillunwan kunkanta ikispa, hinaspam altarpi qusnichinan. Yawarnintam ichaqa altarpa huklaw waqtanman sutuchinan. 16 Uytuntawan puruntañataqmi altarpa waqtanpi kaq uchpaman wischunan, chayqa kachkan intipa qispimunan lawpim.+ 17 Qasquntañataqmi chitqanan mana iskayman rakispalla. Hinaspam sacerdoteqa altarpi qusnichinan, qusnichinanqa rupachkaq yantapa hawanpim. Chayqa animalta nakaspa ñuqa Jehova Diospaq kañapuwasqaykichikmi, hinaptinmi chayqa miskillataña asnarinqa’”, nispa.

2 Diosqa nirqataqmi: “Sichu pipas ñuqa Jehova Diospaq kawsaykunamanta kañapuwananpaq ofrendata quspanqa+ harinatam qunan. Quqñataqmi chay harinapa hawanman tallinan aceiteta, hinanantaqmi sachapa miski asnaq wiqintapas*.+ 2 Hinaspam apanan sacerdote Aaronpa churinkunaman, hinaptinmi payñataq huk aptiyta kañaspan qusnichinan altarpi. Chaytaqa ruwanan ñuqaman quwasqanta qawachinanpaqmi.+ Chay kañasqanmi ñuqa Jehova Diospaq miskillataña asnarinqa. 3 Chay kawsaykuna quwasqankumanta puchuqñataqmi kanan Aaronpaqwan churinkunapaq.+ Ñuqa Jehova Diospaq chay kañapuwasqaykichikqa ñuqapaq sapaqchasqam kanan.+

4 Kawsaykunamanta quwanaykichik tantata hornopi ruwaspaykichikqa harinamantam ruwankichik. Chaytaqa ruwankichik aceitewan chapusqa uchkuyuq ruyru tantatam utaq aceitewan llusisqa llaspa tantatam, chaykunataqa ruwankichik mana levadurayuqtam.+

5 Kawsaykunamanta quwanaykichik tantata latapi ruwaspaykichikpas harinata aceitetawan chapuspam ruwankichik,+ hinaspapas mana levadurayuqtam ruwankichik. 6 Chaytam pakipankichik, hinaspam hawanman aceiteta tallinkichik.+ Chayqa kawsaymanta quwasqaykichik ofrendam.

7 Kawsaykunamanta quwanaykichik tantata mankapi ruwaspaykichikñataqmi harinata aceitewan chapuspa ruwankichik. 8 Chaynata ñuqa Jehova Diospaq ruwaruspaykichikñataqmi sacerdoteman apankichik, payñataqmi altarman apanan. 9 Hinaptinmi sacerdoteqa lliw apasqaykichikmanta wakillanta altarpi qusnichinan,+ chaytaqa ruwanqa ñuqaman quwasqanta qawachinanpaqmi. Chay kañasqanqa ñuqa Jehova Diospaqmi miskillaña asnaq kanqa.+ 10 Chay qusqaykichikmanta puchuqñataqmi kanan Aaronpaqwan churinkunapaq. Ñuqa Jehova Diospaq chay kañapuwasqaykichikqa ñuqapaq sapaqchasqam kanqa.+

11 Chaymantapas kawsaymanta ruwasqa ima ofrendapas ñuqa Jehova Diosman quwasqaykichikqa mana levadurawan ruwasqam kanan,+ amam levadurawan ruwasqataqa nitaq imapa miskintapas ñuqa Jehova Diospaqqa kañapuwankichikchu.

12 Imapas levadurayuq kaqta hinaspa imapas miskitaqa ñuqa Jehova Diosmanmi quwankichik cosechasqaykichikpa punta rurunta hina,+ ichaqa miski asnaqta hinaqa amam altarpiqa kañankichikchu.

13 Kawsaykunamanta imapas ñuqaman quwanaykichikqa kachiyuqmi kanan. Amam mana kachiyuqtaqa quwankichikchu, chay kachiqa ñuqa Dioswan contrato* ruwasqanchikta yuyarinapaqmi. Chaynaqa, imatapas ñuqapaq apamuspaykichikqa kachitawanmi quwankichik.+

14 Sichu ñuqa Jehova Diospaq kawsaymanta punta kaq rurunta quwaspaykichikqa punta puquq* rurutam harwisqata hinaspa chamralla kutasqata quwankichik. Chayqa kawsaykunamanta qusqaykichik punta kaq rurum.+ 15 Chaypa hawanmanmi tallinkichik aceiteta, hinankichiktaqmi sachapa miski asnaq wiqintapas. Chayqa kawsaykunamanta ñuqa Diosman quwasqaykichik ofrendam. 16 Hinaptinmi sacerdoteqa chay chamralla kutasqa kawsaymanta, aceitemanta hinaspa sachapa miski asnaq wiqinmanta wakinta kañaspan qusnichinan.+ Chaytaqa ñuqa Jehova Diospaqmi kañapuwankichik”, nispa.

3 Diosqa nirqataqmi: “Pipas ñuqawan hawka kasqanrayku vacata utaq torota quwaspanqa,+ ñuqa Jehova Diospaqmi pusamunan allinnin kaq sano animalta. 2 Chaymantam qusqan vacapa utaq toropa umanman makinta churanan, hinaspam carpaypa ñawpaqninpi nakanan. Chaymantam sacerdote Aaronpa churinkunaqa yawarninta challanan carpaypa ñawpaqninpi altarpa muyuriq waqtanta. 3 Ñuqa Jehova Dioswan hawkalla kasqaykichikrayku quwasqaykichik vacapata utaq toropatam ñuqapaq kañananku llika wiranta,+ chunchulninpi kaq wiranta 4 hinaspa iskaynin rurunninta lliw wirantinta. Quwanantaqmi kichpanninpi* kaq wirantapas rurunninkunatawan kuskata.+ 5 Chaykunataqa Aaronpa churinkunam qusnichinan altarpi, qusnichinanqa rupachkaq yantapa hawanpi kaq animal kañasqanpa hawanpim.+ Chayqa ñuqa Jehova Diospaq kañapuwasqaykichik miskillaña asnariqmi kanqa.+

6 Pipas ñuqawan hawka kasqanrayku ovejata utaq cabrata quwaspanqa ñuqa Jehova Diospaqmi pusamunan allinnin kaq sano animalta, kanmanmi urqupas utaq chinapas.+ 7 Pipas malta carnerota pusamuspanqa ñuqa Jehova Diospaqmi qunan. 8 Pusamuqmi makinta chay malta carneropa umanman churanan, hinaspam carpaypa ñawpaqninpi nakanan. Aaronpa churinkunañataqmi yawarninta challananku altarpa muyuriq waqtanta. 9 Quwanantaqmi ñuqawan hawkalla kasqaykichikrayku wirantapas, chayqa ñuqa Jehova Diospaq animal kañapuwasqaykichik hinam kanan.+ Quwanantaqmi wira chupanta kuchunmanta kuchuspa, llika wiranta, chunchulninpi kaq wiranta 10 hinaspa iskaynin rurunninta lliw wirantinta. Kichpanninpi kaq wirankunatapas rurunninkunatawan kuskatam quwanan.+ 11 Chaykunatam sacerdoteqa qusnichinan altarpi. Chayqa ñuqa Jehova Diospaq kañapuwasqaykichik mikuymi.+

12 Pipas cabrata quwaspanqa ñuqa Jehova Diospaqmi pusamunan. 13 Pusamuqmi makinta chay cabrapa umanman churanan, hinaspam carpaypa ñawpaqninpi nakanan. Aaronpa churinkunañataqmi carpaypa ñawpaqninpi yawarninta challanan altarpa muyuriq waqtanman. 14 Chaymantapas payqa ñuqa Jehova Diospaqmi kañapuwanan llika wiranta hinaspa chunchulninpi kaq wiranta,+ 15 kañapuwanantaqmi iskaynin rurunninta lliw wirantinta chaynataq kichpanninpi kaq wirantapas rurunninkunatawan kuskata. 16 Tukuy chaykunatam sacerdoteqa qusnichinan altarpi. Chayqa ñuqapaq kañapuwasqaykichik mikuymi, hinaspapas miskillaña asnaqmi. Ñuqa Jehova Diospaqmi animalpa llapallan wirankunaqa.+

17 Kay kamachisqayqa una-unaypaqmi kanqa llapallan miraynikichikkunapaq, maypiña kaspapas amam mikunkichikchu wiratawan yawartaqa”, nispa.+

4 Jehova Diosqa Moisestaqa nirqataqmi: 2 “Israelpa mirayninkunamanyá willay: ‘Sichu pipas mana yachastin ñuqa Jehova Diospa kamachikuyniykunata mana kasukuspan huchallikuruspanqa+ kaytam ruwanan:

3 Akllasqa sacerdote+ huchallikuruspa+ lliw runakunata huchallirachispanqa, ñuqa Jehova Diospaqmi pusamunan huchanrayku allinnin kaq sano malta torota, chayqa hucharayku quwasqan ofrendam.+ 4 Hinaspam ñuqa Jehova Diospaq carpaypa ñawpaqninman pusamuspan toropa umanman makinta churanan, hinaspam ñuqa Jehova Diospaq nakanan.+ 5 Chaymantam sacerdotekunata kamachiqqa+ chay toropa as yawarninta carpayman apaykunan. 6 Hinaspam chay yawarman dedonta hinaykuspan+ Chuya sutiyuq cuartopi kaq hatun cortinapa ñawpaqninpi qanchiskama sutuchinan,+ chaytaqa ñuqa Jehova Diospaqmi sutuchinan. 7 Hinaspapas chay yawartaqa llusinanmi carpay ukupi kaq incienso* kañana altarpa waqrachankunaman,+ chayqa ñuqa Jehova Diospaqmi churasqa kachkan. Puchuq yawartañataqmi carpaypa ñawpaqninpi kaq altarpa sikinman tallinan.+

8 Chaymantam hucharayku ofrenda qusqan chay toropa lliw wiranta hurqunan, hurqunanqa llika wirantawan chunchulninpi kaq wirantam. 9 Hurqunantaqmi iskaynin rurunnintapas wirantinta chaynataq kichpanninpi* kaq wirankunatapas rurunninkunatawan kuskata.+ 10 Chaykunataqa hurqunan ñuqawan hawkalla kasqaykichikrayku qusqaykichik toropata hinam.+ Hinaspañataqmi altarpi lliw hurqusqanta qusnichinan.

11 Ichaqa chay toropa aychanta, qaranta, umanta, atakankunata, chunchulninkunata hinaspa akantam+ 12 samasqankumanta karuman apanan, uchpa wischunankumanmi* apanan. Hinaspam yantapa hawanpi lliwta kañanan.+ Chaytaqa kañanan uchpakuna wischusqaykichikpim.

13 Sichu Israel runakuna qunqayta imapipas pantaruspa huchallikurunmanku + hinaspa mana yachanmankuchu ñuqa Jehova Diospa mana kamachisqanta ruwarusqankuta,+ 14 hinaptinñataq chay ruwasqankuqa hucha kasqanta yacharunmanku, hinaptinqa huchallikusqankumantam paykunaqa* malta torota quspanku carpaypa ñawpaqninman pusananku, chay toroqa hucharayku quwasqan ofrendam. 15 Israelpa mirayninpi punta apaqkunaqa ñuqa Jehova Dios qawachkaptiymi toropa umanman makinkuta churananku, hinaptinmi ñuqa Jehova Diospaq nakasqa kanan.

16 Chaymantañataqmi sacerdotekunata kamachiqqa chay toropa as yawarninta carpayman apaykunan. 17 Hinaspam chay yawarman dedonta hinaykuspan Chuya cuartopi kaq hatun cortinapa ñawpaqninpi qanchiskama sutuchinan, chaytaqa ñuqa Jehova Diospaqmi sutuchinan.+ 18 Hinaspapas chay yawartaqa carpay ukupi kaq incienso kañana altarpa waqrachankunamanmi llusinan,+ chay altarqa ñuqa Jehova Diospa qayllaypim kachkan. Puchuq yawartañataqmi carpaypa ñawpaqninpi kaq altarpa sikinman tallinan.+ 19 Chaymantañataqmi qusqanku toropa lliw wiranta hurquspan altarpi qusnichinan.+ 20 Hucharayku qusqanku torowan hinam kay torowanpas ruwanan. Chaynata ruwaspam sacerdoteqa Israel runakunapa huchan pampachasqa kananpaq torota quwanan,+ hinaptinmi pampachasqa kanqaku. 21 Kay nakasqanku torotapas samasqankumanta karumanmi apachinan, hinaspam huknin torota hina kañanan.+ Chay toroqa huchayuq kasqankumanta Israel runakunapa quwasqan ofrendam.+

22 Sichu Israel runakunapi hukkaqnin kamachiq+ qunqayta ñuqa Jehova Diospa kamachikuyniykunata mana kasukuspan huchallikurunman, 23 utaq qipataña yacharunman kamachikuyta mana kasukusqanrayku huchallikurusqanta, hinaspaqa allinnin kaq sano chivochatam ñuqapaq pusamunan. 24 Hinaspam chay chivochapa umanman makinta churanan, chaymantañataqmi nakapuwananku lawpi ñuqa Jehova Diospaq nakanan.+ Chay chivochaqa hucharayku quwasqan ofrendam. 25 Chaymantañataqmi sacerdoteqa dedonwan as yawarta llusinan altarpa waqrankunaman,+ chay yawarqa hucharayku ofrenda quwasqaykichik animalpam kanan. Puchuq yawartañataqmi altarpa sikinman tallinan.+ 26 Chivochapa lliw wirantañataqmi altarpi lliwta qusnichinan, qusnichinqaqa ñuqawan hawkalla kasqaykichikrayku quwasqaykichik animalpa wiranta hinam.+ Chaynapim chay kamachiqqa huchanmanta pampachasqa kanqa.

27 Sichu Israel runakunamanta pipas qunqayta ñuqa Jehova Diospa kamachikuyniykunata mana kasukuspan huchallikurunman,+ 28 utaq qipataña yacharunman huchallikurusqanta, hinaspaqa chay huchanraykum allinnin kaq sano cabrachata ñuqapaq pusamunan. 29 Hinaspam huchanrayku qusqan cabrachapa umanman makinta churanan, chaymantam chay cabrachata nakanan kañapuwanaykichik animalta nakanaykichik lawpi.+ 30 Chaymantañataqmi sacerdoteqa dedonwan as yawarta llusinan altarpa waqrankunaman. Puchuq yawartañataqmi altarpa sikinman tallinan.+ 31 Chaymantapas cabrachapa lliw wirantam hurqunan,+ hurqunanqa ñuqawan hawkalla kasqaykichikrayku quwasqaykichik animalpa wiranta hurqusqanman hinam.+ Hinaspanmi sacerdoteqa altarpi qusnichinan, chay kañasqanqa ñuqa Jehova Diospaqmi miskillataña asnarinqa. Chaynatam sacerdoteqa ruwanan huchallikuq runapa huchan pampachasqa kananpaq.

32 Sichu huchanrayku malta ovejata quyta munaspanqa chinan kaqtam sanota qunan. 33 Hinaspam huchanrayku ofrenda qusqan chay ovejachapa umanman makinta churanan, chaymantam chay ovejachata hucharayku qusqanku animalta hina nakanan kañapuwanaykichik animalta nakanaykichik lawpi.+ 34 Chaymantañataqmi sacerdoteqa dedonwan as yawarta llusinan altarpa waqrankunaman.+ Puchuq yawartañataqmi altarpa sikinman tallinan. 35 Chaymantapas ovejachapa lliw wirantam hurqunan, hurqunanqa ñuqawan hawkalla kasqaykichikrayku malta carneropa wiranta hurqusqanman hinam. Hinaspanmi sacerdoteqa altarpi qusnichinan, chaytaqa qusnichinan ñuqa Jehova Diospaq kañasqaykichik animalpa hawanpim.+ Chaynatam sacerdoteqa ruwanan huchallikuq runapa huchan pampachasqa kananpaq’”, nispa.+

5 Diosqa nirqataqmi: “Pipas mana allin ruwaqta rikuchkaspan utaq yachachkaspan mana willakuqqa huchayuqmi kanqa.+ Payqa willakunanpaq qayakuyta* uyarichkaspanmi mana willakurqachu, chaymi huchayuq kanqa.

2 Pipas mana llachpanata llachparuspanqa huchayuqmi kanqa mana yachachkaspan llachparuspanpas, wañusqa purun animal kaptinpas, wañusqa uywa animal kaptinpas utaq wañusqa uruchakuna kaptinpas.+ 3 Pipas mana yachastin mana asuykuna* runata+ llachparuspanqa utaq runapa millakuypaq kaqninta llachparuspanqa, huchayuqmi kanqa qipataña yacharuspanpas.

4 Pipas mana cuentata qukustin allinta utaq mana allinta imatapas ruwananpaq chaylla rimaruspanqa, qipataña cuentata qukuspanpas huchayuqmi kanqa chaylla rimasqanrayku*.+

5 Pipas kaykunamanta mayqillantapas ruwaruspan huchallikuruqqa, willakunanmi imapi huchallikusqanmanta.+ 6 Hinaspam ñuqa Jehova Diospaq apamunan pantarusqanrayku malta ovejata utaq malta cabrata, chayqa kanqa huchaykichikrayku qusqaykichik ofrendam.+ Chaynatam sacerdoteqa ruwanan huchallikuq runapa huchan pampachasqa kananpaq.

7 Sichu chay runa mana atinmanchu oveja quyta hinaspanqa ñuqa Jehova Diospaqmi pantarusqanrayku apamunan iskay kullkuta utaq iskay mallqu palomata.+ Hukninmi kanqa huchan pampachasqa kananpaq, hukninñataqmi kañapuwananpaq.+ 8 Chay alton pawaqkunataqa apamunan sacerdotemanmi, hinaptinmi payqa hukninta chay runapa huchanrayku quwanan. Paytaqmi mana umanta quruspallan kunkanta sillunwan ikinan. 9 Hinaspam huchanrayku qusqan alton pawaqpa yawarninta challanan altarpa waqtanman, puchuq yawarnintañataqmi tallinan altarpa sikinman.+ Chayqa hucharayku quwasqan ofrendam. 10 Huknin alton pawaqtañataqmi sapa kuti ruwakusqanman hina kañapuwanan.+ Chaynatam sacerdoteqa ruwanan huchallikuq runapa huchan pampachasqa kananpaq.+

11 Chay huchallikuq runa iskay kullkuta utaq iskay mallqu palomata quyta mana atispanqa huk kilo*+ harinatam qunan. Chaytaqa qunan huchanrayku pampachasqa kananpaqmi. Chay harinamanqa manam aceitetaqa tallinanchu nitaq sachapa miski asnaq wiqintapas* hinananchu huchanmanta ofrendata qusqanrayku. 12 Chaytam huchallikuq runaqa qunan sacerdoteman, hinaptinmi payñataq huk aptiyta kañaspan qusnichinan altarpi. Chaytaqa ñuqaman quwasqanta qawachinanpaqmi* kañanan ñuqa Jehova Diospaq kañasqaykichik animalpa hawanpi. Chayqa hucharayku quwasqan ofrendam. 13 Chaynatam sacerdoteqa ruwanan huchallikuq runapa ima huchanpas pampachasqa kananpaq.+ Chay quwasqankumanta puchuqñataqmi kanan sacerdotekunapaq,+ chayqa kanan ñuqaman kawsaykunata quwasqaykichik ofrenda hinam”, nispa.+

14 Jehova Diosqa hinallam Moisesta nirqa: 15 “Pipas ñuqa Jehova Diospaq sapaqchasqa kaqwan qunqaymanta mana allinta ruwaruspa huchallikuruspanqa,+ ñuqa Jehova Diospaqmi pantarusqanrayku pusamunan allinnin kaq sano carnerota.+ Chay carneropa chanin qullqiqa* kanan carpaypi tantiasqa llasayman hinam.+ 16 Huchallikuqmi sayachipuwanan ñuqapaq sapaqchasqa kaqwan mana allinta ruwasqanrayku, hinaspam chay qusqanmantapas pichqaman rakisqapa huknintawan yapanan.+ Tukuy chaytam lliwta qunan sacerdoteman, chaynapi pantarusqanrayku qusqan carnerowan chay runapa huchan pampachasqa kananpaq.+

17 Pipas ñuqa Jehova Diospa kamachisqaykunata mana kasukuspan huchallikuruspanqa huchanman hinam sasachakuypi kanqa, qunqaymanta huchallikuruspanpas chaynam kanqa.+ 18 Chay runaqa pantarusqanraykum allinnin kaq sano carnerota sacerdoteman pusanan,+ chay carneroqa kanan tantiasqa qullqipa chaninman hinam. Chaynatam sacerdoteqa ruwanan huchallikuq runapa huchan pampachasqa kananpaq. 19 Chay carneroqa pantarusqanrayku qusqanmi. Chay runaqa ñuqa Jehova Diospa qayllaypim huchayuq kachkan”, nispa.

6 Chaymantapas Jehova Diosqa Moisestam nirqa: 2 “Pipas runamasinta llullakuspanqa ñuqa Jehova Diosta mana kasukuspanmi huchallikuchkan.+ Ichapas apakunman churapachikusqanta utaq qawapunanpaq saqipakusqanta utaq suwakurunman utaq llullakuspa imatapas chaskikurunman+ 3 utaq imatapas tariruspan mana willakunmanchu utaq llullakuspa ninman ima huchatapas mana ruwasqanta.+ Hinaspanqa 4 huchallikurusqanraykum kutichinan suwakusqanta, churapachikusqanta, saqipachikusqanta, llullakuspa imatapas chaskikusqanta, tarikusqanta 5 utaq llullakusparaq apakusqantapas. Llapantam kutichipunan,+ hinaspapas kutichipusqanmantam pichqamanta huknintawanraq yapanan. Tukuy chaytaqa qunan huchayuq kasqanta nisqanku punchawpim. 6 Chaymantapas pantarusqanraykum ñuqa Jehova Diospaq qunan allinnin kaq sano carnerota, chay carnerotaqa sacerdotepa nisqanman hinam pantarusqanrayku qunan.+ 7 Hinaptinmi sacerdoteqa ñuqa Jehova Diospaq ruwasqanwan yanapanqa huchallikuq runapa huchan pampachasqa kananpaq”, nispa.+

8 Jehova Diosqa hinallaraqmi Moisesta nirqa: 9 “Aaronta hinaspa churinkunatayá kamachiy: ‘Animalta ñuqapaq kañapuwasqaykichikqa tukuy tutam paqarintinkama rupanan altarpi, chaypiqa tukuy tutam nina ratanan.+ 10 Sacerdoteqa linaza llañu qaytumanta ruwasqa pachawanmi churakunan,+ hinaspapas chankan mana qalalla kananpaqmi churakunan linazamanta ruwasqa ukun pachanwan.+ Chaymantam kañasqan animalpa uchpanta+ hurquspan altarpa waqtanman churanqa. 11 Hinaspam huk pachawan+ churakuspan uchpataqa samasqankumanta karuman apanan, apananqa uchpa wischunankumanmi*.+ 12 Ninaqa altarpim mana wañuspa hinalla ratanan. Sapa achikyaytam sacerdoteqa yantata churanan,+ hinaspam hawanman churanan kañanapaq animalta. Hawanpitaqmi qusnichinan ñuqawan hawkalla kasqaykurayku quwasqanku animalpa wirankunatapas.+ 13 Ninaqa altarpim mana wañuspa hinalla ratanan’, nispa.

14 Chaymantapas Aarontawan churinkunatayá niy: ‘Kawsaykunamanta ofrendata quwaspankuqa altarpa ñawpaqninpim ñuqa Jehova Diospaq kasqanta qawachinanku.+ 15 Hukninmi quwasqanku harinamanta huk aptiyta altarpi qusnichinan, chayqa kanan aceiteyuq hinaspa sachapa miski asnaq wiqinwan* chapusqam. Chaytaqa ñuqaman quwasqanta qawachinanpaqmi* ruwanan. Chay kañasqanmi ñuqa Jehova Diospaq miskillataña asnarinqa.+ 16 Qusqankumanta puchuqtañataqmi Aaronwan churinkuna mikunanku mana levadurawan ruwasqa tantata hina sapaqchasqa lawpi, mikunankuqa carpaypa kasqan patiopim.+ 17 Mana levadurayuqtam chaytaqa ruwananku.+ Kañasqa kananpaq quwasqankumantam paykunaman quni.+ Chay qusqankuqa ñuqapaq sapaqchasqa chuyay-chuyaymi+ kanan hucharayku chaynataq pantarusqankurayku qusqanku animal hina. 18 Chaytaqa Aaronpa lliw qari churinkunam mikunanku,+ chaynallatam ruwananku mirayninkunapas ñuqa Jehova Diospaq kañanankupaq quwasqankuwanqa.+ Chaykunata ruwanankupaq lliw servichikusqankuqa ñuqapaq sapaqchasqam kanan’”, nispa.

19 Jehova Diosqa Moisestaqa nirqataqmi: 20 “Aaronta ñuqa Jehova Diospaq akllasqayki punchawmi huk kilo*+ harinata quwanan,+ chaynatam quwananku churinkunamanta hukkaqnin akllasqa kaptinpas. Chaytaqa quwananku kawsaykuna quwasqankuta hinam,+ wakintam achikyayta quwananku wakintañataq inti siqaykuyta. 21 Chaytam aceitewan chapuspa latapi tiqtichinanku.+ Chaymantam aceitewan llusispa pakipasqata quwananku. Chay quwasqanku ofrendaqa ñuqa Jehova Diospaqmi miskillataña asnarinqa. 22 Chaytaqa quwanan sacerdotekunamanta akllasqa kaqmi, payqa kanan Aaronpa mirayninmi.+ Ñuqa Jehova Diospaq qusqankumanta lliwta qusnichiyqa una-unaypaq kamachikuymi. 23 Sacerdotekunarayku kawsay quwasqanku ofrendataqa llapantam kañapuwananku, manam mikunankuchu”, nispa.

24 Moiseswan yapamanta rimaspanmi Jehova Dios nirqa: 25 “Aaronta hinaspa churinkunatayá niy: ‘Hucharayku qusqanku animaltaqa ñuqa Jehova Diospaqmi nakananku kañapuwanankupaq animalta nakananku lawpi.+ Chay qusqankuqa ñuqapaq sapaqchasqa chuyay-chuyaymi. 26 Chaytaqa mikunan ñuqaman quwaqniy sacerdotem.+ Chaytaqa mikunan carpaypa kasqan patiopim ñuqapaq sapaqchasqa lawpi.+

27 Chay qusqaykichik animalpa aychanta imapas tupaqqa ñuqapaq sapaqchasqam kanan, yawarnin pachanman pawaykuptinpas ñuqapaq sapaqchasqa lawpim taqsanan. 28 Allpa mankapi aychata yanuptinkuñataqmi chay allpa manka pakipasqa kanan. Bronce mankapi yanuptinkuñataqmi chay manka sumaq qatqasqa kaspan yakuwan mayllasqa kanan.

29 Chay aychataqa mikunanku sacerdotekunamanta lliw qarikunam,+ chay aychaqa ñuqapaq sapaqchasqam.+ 30 Ichaqa hucharayku qusqanku animalpa yawarnin carpay ukuman apasqa kaptinqa manam aychantaqa mikunankuchu, chay yawarqa huchankumanta pampachasqa kanankupaqmi apasqa karqa.+ Chaymi lliwta kañananku’”, nispa.

7 Diosqa Moisestaqa nirqataqmi: “Aaronta hinaspa churinkunatayá niy: ‘Pantarusqankurayku qusqanku animalqa kanqa ñuqapaq sapaqchasqam.+ 2 Chaytam nakananku kañapuwanankupaq animalta nakananku lawpi, hinaspam yawarninta+ challananku altarpa muyuriq waqtanman.+ 3 Sacerdotem quwanan chay animalpa wira chupanta, llika wiranta+ 4 hinaspa iskaynin rurunninta lliw wirantinta. Kichpanninpi* kaq wirantapas rurunninkunatawan kuskatam quwanan.+ 5 Tukuy chaytam sacerdoteqa qusnichinan altarpi, chayqa ñuqa Jehova Diospaq kañapuwasqanku hinam kanan.+ Chayqa pantarusqankurayku qusqanku ofrendam. 6 Chaytaqa mikunanku sacerdotekunamanta lliw qarikunam,+ mikunankuqa ñuqapaq sapaqchasqa lawpim. Chayqa ñuqapaq sapaqchasqam.+ 7 Chaynallatam ruwananku hucharayku quwasqanku animalwan hinaspa pantarusqankurayku quwasqanku animalwanpas. Chay animalpa aychanqa quwaqniy sacerdotepaqmi kanan, payqa runapa huchan pampachasqa kananpaqmi yanapakun.+

8 Kañapuwanankupaq animalta quptinkuqa sacerdotepaqñam qaranqa kanan,+ chaynaqa kanan pay kañapuwasqanraykum.

9 Kawsaykunamanta qusqanku ofrenda hornopi ruwasqa, mankapi ruwasqa utaq latapi ruwasqa kaptinqa,+ quwaqniy sacerdotepaqmi kanqa.+ 10 Aceitewan chapusqa kaptin+ utaq chakilla+ kaptinmi ichaqa Aaronpa lliw qari churinkunapaq kanqa. Sapakamam chaynallata chaskinanku’, nispa.

11 Chaymantapas niyá: ‘Pipas ñuqa Jehova Dioswan hawkalla kasqanrayku ima ofrendatapas quwaspanqa,+ 12 quwanmanmi aceitewan chapusqa mana levadurawan ruwasqa uchkuyuq ruyru tantata, aceitewan llusisqa mana levadurawan ruwasqa llaspalla tantata hinaspa aceitewan chapusqa harinamanta uchkuyuq ruyru tantata. Chaykunataqa agradecekusqanraykum ñuqaman quwanan.+ 13 Quwanantaqmi levadurawan ruwasqa uchkuyuq ruyru tantatapas, chaytaqa quwanan ñuqawan hawkalla kasqanrayku agradecekuspa quwasqantawan kuskatam. 14 Chay qusqanku tantakunamantam sapakamamanta hukta ñuqa Jehova Diospaq rakinan. Chayqa kanqa ñuqawan hawkalla kasqankurayku quwasqanku animalpa yawarnin challaqpaqmi.+ 15 Ñuqawan hawkalla kasqankurayku agradecekuspa quwasqanku animalpa aychantaqa chay punchawllam mikunanku. Manam paqarintinpaqqa imatapas puchunankuchu.+

16 Pipas ñuqapaq imatapas ruwananpaq nisqanrayku+ utaq kikinmanta quyta munasqanrayku animalta ñuqapaq quspanqa,+ chay punchawmi aychanta mikunan. Puchuruptinqa paqarintinpas mikunmanraqmi. 17 Minchantinñataqmi quwasqanku animalpa lliw puchuq aychantaqa kañanan.+ 18 Minchantin mikuruptinmi ichaqa chay qusqanqa mana chaskisqachu kanqa. Manamá chaskisqachu kanqa ñuqawan hawkalla kasqanrayku quwasqan ofrendaqa. Chay quwasqanqa millakuypaqñam rikurirun, chaymi chay mikuruqqa huchanman hina sasachakuypi kanqa.+ 19 Millakuypaq* kaqman tuparuq aychataqa amam mikunkichikchu, chayna aychaqa kañasqam kanan. Mikunapaq aychataqa mikunanku imamantapas chuya kaqkunallam.

20 Pipas mana chuya kachkaspan quwasqan animalta mikuruspanqa wañuchisqam kanan, chay animalqa ñuqa Jehova Dioswan hawkalla kasqanrayku quwasqan ofrendam.+ 21 Pipas Diospaq millakuypaq kaqta llachparuspan quwasqan animalta mikuruspanqa wañuchisqam kanan, chay animalqariki ñuqa Jehova Dioswan hawkalla kasqanrayku quwasqan ofrendam. Chay llachpasqanqa kanmanmi runapa millakuypaq kaqnin+ utaq mana llachpana animalpas,+ kanmantaqmi imapas millakuypaq qacha kaqpas’”, nispa.+

22 Jehova Diosqa hinallam Moisesta nirqa: 23 “Israelpa mirayninkunatayá niy: ‘Amam mikunkichikchu toropa, malta carneropa nitaq cabrapa wirantaqa.+ 24 Amataqmi mikunkichikchu wañusqa animalpa utaq purun animalpa wañuchisqan animalpa wirantapas, ichaqa servichikuwaqchikmi imapipas.+ 25 Pipas kañapuwananpaq qusqan animalpa wiranta mikuruspanqa wañuchisqam kanan, chay wiraqa ñuqa Jehova Diosman quwasqan wiram.

26 Maypiña kaspaykichikpas amataqmi mikunkichikchu alton pawaq animalpa yawarnintaqa nitaq ima animalpa yawarnintapas.+ 27 Pipas yawarta mikuruqqa wañuchisqam kanan’”, nispa.+

28 Jehova Diosqa Moisestaqa nirqataqmi: 29 “Israelpa mirayninkunatayá niy: ‘Pipapas ñuqa Jehova Dioswan hawkalla kasqanrayku ofrenda qusqanmanta wakinmi ñuqa Jehova Diospaq kanan.+ 30 Quwasqan animalpa wirantawan+ qasquntam makinpi apamunan ñuqa Jehova Diospaq kañasqa kananpaq. Hinaptinmi ñawpaqman qipaman kuyuchispa+ ñuqa Jehova Diospaq qunan. 31 Hinaspanmi sacerdoteqa altarpi wiranta qusnichinan,+ qasqunñataqmi Aaronpaq hinaspa churinkunapaq kanqa.+

32 Ñuqawan hawkalla kasqanrayku animalta quwaqniyqa sacerdotemanmi animalpa alliq* piernanta qunan, chayqa ñuqapaq sapaqchasqam.+ 33 Quwasqanku animalpa yawarninta hinaspa wiranta quwaqniy Aaronpa churinpaqmi kanan animalpa alliq piernanqa.+ 34 Israelpa mirayninkunapa kuyuchispa quwasqanku animalpa qasqunñataqmi ñuqapaq kanan, ñuqapaqtaqmi kanan sapaqchasqa piernanpas. Ñuqañataqmi qusaq Aaronman hinaspa churinkunaman. Chayqa Israelpa mirayninkunapaq una-unaypaq kamachikuymi.+

35 Ñuqa Jehova Diospaq kañapuwanankupaq quwasqankumanta wakinmi sacerdote Aaronpaq hinaspa churinkunapaq kanan, chayqa kanan ñuqa Jehova Diospaq sacerdoteykuna kanankupaq akllasqa kasqanku punchawpim.+ 36 Chay punchawpim ñuqa Jehova Dios paykunaman qusaq Israelpa mirayninkuna quwasqankumanta.+ Chayqa Israelpa mirayninkunapaqmi una-unaypaq kamachikuy’”, nispa.

37 Chaynatam ruwananku karqa Diospaq kañananku animal qusqankuwan,+ kawsaykunamanta ofrendata Diospaq qusqankuwan,+ hucharayku hinaspa pantarusqankurayku ofrendata Diospaq animal qusqankuwan,+ sacerdote kanankupaq akllasqa kaspa ofrenda qusqankuwan+ hinaspa Dioswan hawkalla kasqankurayku ofrenda qusqankuwanpas.+ 38 Chaynatam Jehova Diosqa Moisesta kamachirqa Sinai urqupi,+ chayqa karqa Israelpa mirayninkuna Jehova Diosman imatapas qunankupaq kamachisqa kasqanku punchawpim.+

8 Jehova Diosqa hinallam Moisesta nirqa: 2 “Pusamuy Aaronta hinaspa churinkunata,+ apamuy pachankuta+ hinaspa miski asnaq aceiteta,+ pusamuytaq hucharayku qusqaykichik torota hinaspa iskay carnerota, apamuytaq canastapi kaq mana levadurawan ruwasqa tantakunatapas.+ 3 Hinaspapas qayachimuy llapallan runakunata carpaypa ñawpaqninman huñunakamunankupaq”, nispa.

4 Chaymi Moisesqa Jehova Diospa kamachisqanman hina ruwarqa. Israelpa mirayninkunañataqmi Diospa carpanpa ñawpaqninman huñunakamurqaku. 5 Hinaptinmi Moisesqa runakunata nirqa: “Jehova Diospa kamachisqantam qayllaykichikpi ruwasaq”, nispa. 6 Hinaspanmi Moisesqa Aaronta hinaspa churinkunata qayachispan bañachirqa.+ 7 Chaymantam Aaronta pachachirqa makituyuq pachawan,+ wiqaw watanawan,+ mana makituyuq pachawan+ hinaspa mandilwan,+ hinaspapas mandilpa* wiqaw watananwanmi tiquta watarqa.+ 8 Chaymantapas pecherata+ churaspanmi chayman hinarqa Urim hinaspa Tumim*+ sutiyuq rumichakunata. 9 Umantapas wankuykurqam sumaq uma wankunawan,+ hinaspam chayman churarqa qurimanta llipipipiq llaspalla suytu tablachata hina*.+ Chaynatam Moisesqa pachachirqa Jehova Diospa kamachisqanman hina.

10 Chaymantam Moisesqa Diospa carpanman tukuy imantinman miski asnaq aceiteta tallispan+ Diospaq sapaqcharqa. 11 Chaymantapas Diospaq altartam qanchis kutikama aceitewan challarqa, aceitewanqa challarqataqmi altarpi serviciokunamanpas, lavatoriomanpas chaynataq tiyananmanpas. Chaynatam Diospaq sapaqcharqa. 12 Sapaqcharqataqmi Aarontapas as aceiteta umanman tallispan.+

13 Chaymantam Moisesqa Aaronpa churinkunata pachachirqa makituyuq pachawan hinaspa wiqaw watanawan, wankurqataqmi umantapas sumaq uma wankunawan.+ Chaynatam Moisesqa pachachirqa Jehova Diospa kamachisqanman hina.

14 Chaymantam Moisesqa pusachimurqa hucharayku qusqanku torota. Hinaptinmi Aaronwan churinkunaqa chay toropa umanman makinkuta churarqaku.+ 15 Moisesñataqmi torota nakaspan yawarninwan altarpa waqrankunata llusirqa,+ hinaspam chuyancharqa. Puchuq yawartañataqmi altarpa sikinman tallirqa, chaynapi Diospaq altar sapaqchasqa kaptin huchankumanta pampachasqa kanankupaq. 16 Chaymantam hurqurqa chay toropa chunchulninpi kaq lliw wiranta, kichpanninpi* kaq wiranta hinaspa iskaynin rurunninta lliw wirantinta. Hinaspam Moisesqa altarpi lliwta qusnichirqa.+ 17 Toropa qarantam ichaqa aychantawan hinaspa akantawan kuskata karuman apachispan kañachimurqa.+ Chaytaqa ruwarqa Jehova Diospa kamachisqanman hinam.

18 Chaymantam Moisesqa pusachimurqa Diospaq kañana carnerota. Hinaptinmi Aaronwan churinkunaqa chay carneropa umanman makinkuta churarqaku.+ 19 Moisesñataqmi carnerota nakaspan yawarninwan challarqa altarpa muyuriq waqtanta. 20 Carnerotañataqmi taksa-taksallata kuchurqa. Hinaspanmi kañaspa qusnichirqa umanta, chay taksa-taksalla kuchusqanta hinaspa rurunninkunapi kaq wiranta. 21 Chaymantam Moisesqa carneropa chunchulninkunata hinaspa atakankunata mayllarqa, hinaspanmi altarpi lliwta kañarqa. Chay animal kañasqanqa Jehova Diospaqmi miskillataña asnarirqa. Chaytaqa kañarqa Jehova Diospa kamachisqanman hinam.

22 Chaymantam Moisesqa pusachimurqa huknin carnerota, chay carneroqa karqa sacerdotekuna akllasqa kanankupaqmi.+ Hinaptinmi Aaronwan churinkunaqa carneropa umanman makinkuta churarqaku.+ 23 Moisesñataqmi carnerota nakaruspan yawarninwan llusirqa Aaronpa alliq* rinrinpa uray patanta, alliq makinpa maman dedonta hinaspa alliq chakinpa maman dedonta. 24 Yawarwanqa llusirqataqmi Aaronpa churinkunapa alliq rinrinpa uray patantapas, alliq makinpa maman dedontapas chaynataq alliq chakinpa maman dedontapas. Puchuq yawarwanñataqmi Moisesqa challarqa altarpa muyuriq waqtanta.+

25 Moisesqa hurqurqataqmi carneropa alliq piernanta, wira chupanta, chunchulninpi kaq lliw wiranta, kichpanninpi wiranta hinaspa iskaynin rurunninta wirantinta.+ 26 Chaymantapas canastamantam hurqurqa mana levadurawan ruwasqa uchkuyuq ruyru tantata,+ aceitewan chapusqa uchkuyuq ruyru tantata+ hinaspa llaspa tantata. Chay tantakunaqa Jehova Diospaq qusqankum karqa. Chay tantakunatam churarqa alliq piernapa hinaspa wirakunapa hawanman. 27 Tukuy chaykunatam churarqa Aaronpa hinaspa churinkunapa makinman, hinaptinmi paykunañataq Jehova Diospaq ñawpaqman qipaman kuyuchirqaku. 28 Chaymantam Moisesqa chaskiykuspan altarpa hawanpi qusnichirqa. Chayqa sacerdote hina akllasqa kanankupaqmi karqa, hinaspapas miskillataña asnariqmi karqa. Chayqa Jehova Diospaq kañasqanmi karqa.

29 Chaymantapas, Moisesqa nakasqan carneropa qasquntam Jehova Diospaq kuyuchirqa ñawpaqman qipaman.+ Sacerdote kanankupaq qusqanku carneropa qasqunqa Moisespaqmi karqa, chayqa Jehova Diospa kamachisqanman hinam karqa.+

30 Hinaspapas miski asnaq aceitewan+ hinaspa altarpi kaq yawarwanmi challarqa Aaronman, churinkunaman hinaspa pachankuman. Chaynatam Aaronta, churinkunata+ hinaspa pachankuta Diospaq sapaqcharqa.+

31 Chaymantam Moisesqa Aaronta hinaspa churinkunata nirqa: “Diospa carpanpa ñawpaqninpiyá aychata yanuychik,+ hinaspayá chaypi mikuychik canastapi kaq tantatawan kuskata. Diosmi niwarqa: ‘Aaronwan churinkunam mikunqaku’, nispa.+ 32 Puchuq aychatawan puchuq tantatañataqmi kañankichik.+ 33 Amam Diospa carpanpa ñawpaqninmantaqa asurinkichikchu qanchis punchawpuni, hinallapim kanaykichik sacerdote kanaykichikpaq punchawkuna tukunankama. Qanchis punchawmantam sacerdotekunaña kankichik.+ 34 Chaynata ruwanapaqmi Jehova Dios kamachiwarqa, chaynapi huchaykichikmanta pampachasqa kanaykichikpaq.+ 35 Qamkunaqa Diospa carpanpa ñawpaqninpim tuta-punchaw kankichik qanchis punchawpuni,+ hinaspam Jehova Diospa kamachisqankunata kasukunkichik mana wañunaykichikpaq.+ Chayna kananpaqmi Diosqa kamachiwarqa”, nispa.

36 Chaynatam Aaronwan churinkunaqa ruwarqaku Moisesta Jehova Dios kamachisqanman hina.

9 Chaymantam Moisesqa pusaq kaq punchawpi+ qayachirqa Aaronta, churinkunata hinaspa Israelpa mirayninkunapi kaq punta apaqkunata. 2 Hinaspam Moisesqa Aaronta nirqa: “Hucharayku qunaykipaq pusamuy allinnin kaq sano malta torota,+ pusamuytaq allinnin kaq sano carnerotapas Diospaq kañanaykipaq. Chayqa Jehova Diospaqmi kanqa. 3 Israelpa miraynin runakunatañataqmi ninki: ‘Hucharayku qunaykichikpaq pusamuychik huk watayuq chivota, pusamuychiktaq Diospaq kañanaykichikpaq huk watayuq torotawan huk watayuq carnerotapas. Chaykunaqa allinnin kaq sano animalkunam kanan. 4 Pusamuychiktaq torotawan carnerota Dioswan hawkalla kasqaykichikrayku+ Jehova Diospaq ofrendata qunaykichikpaq. Apamuychiktaqyá kawsaykunamanta ofrendatapas+ aceitewan chapusqata, kunanmi Jehova Dios qamkunaman rikurisunkichik’”, nispa.+

5 Chaymi Moisespa kamachisqanman hina tukuy chaykunata Diospa carpanpa ñawpaqninman aparqaku. Chaymantam Israelpa lliw mirayninkuna Jehova Diospa kasqanman asuykuspanku chaypi sayarqaku. 6 Hinaptinmi Moisesqa nirqa: “Jehova Diospa chay kamachisqantam ruwanaykichik Jehova Diospa kanchaynin rikurisunaykichikpaq”, nispa.+ 7 Chaymantam Moisesqa Aaronta nirqa: “Altarman asuykuspayá Diosman quy hucharayku animalta+ hinaspa kañanapaq animalta, chaynapi qampas hinaspa wasikipi kaqkunapas huchaykichikmanta pampachasqa kanaykichikpaq.+ Jehova Diospa kamachisqanman hinataqmi qunayki Israelpa mirayninkunapa qusqanku animaltapas,+ chaynapi huchankumanta pampachasqa kanankupaq”, nispa.+

8 Chaymi Aaronqa altarman chaylla asuykuspa huchanrayku qusqan malta torota nakarqa.+ 9 Churinkunañataqmi toropa yawarninta haywaykurqaku,+ hinaptinmi Aaronqa dedonta yawarman hinaykuspan altarpa waqrankunata llusirqa, wakintañataqmi altarpa sikinman tallirqa.+ 10 Chaymantam altarpi qusnichirqa huchanrayku qusqan animalpa wiranta, rurunninkunata hinaspa kichpanninpi* kaq wiranta. Chaytaqa ruwarqa Moisesta Jehova Dios kamachisqanman hinam.+ 11 Aychantawan qarantañataqmi samasqankumanta karupi kañamurqa.+

12 Chaymantam Aaronqa Diospaq kañana carnerota nakarqa. Churinkunañataqmi yawarninta haywarqaku, hinaptinmi Aaronqa altarpa muyuriq waqtanta challarqa.+ 13 Churinkunaqa haywarqakutaqmi taksa-taksalla kuchusqa aychatapas chaynataq umantapas, hinaptinmi Aaronqa altarpi qusnichirqa. 14 Chaymantapas chunchulninkunatawan atakankunatam mayllarqa, hinaspam altarpi qusnichirqa kañasqan animalpa hawanpi.

15 Chaymantam Aaronqa Israelpa mirayninkunapa apamusqanku animalta Diosman qurqa. Puntatam hucharayku qusqanku chivota nakarqa, chaytaqa hucharayku qusqan malta torota hinam qurqa. 16 Chaymantapas Diosmanmi kañana animalta qurqa, hinaspam sapa kuti ruwasqanman hina ruwarqa.+

17 Chaymantapas Aaronqa qurqam kawsaykunamanta ofrendata.+ Chay qusqanmantam huk aptiyta qusnichirqa altarpi, chaytaqa ruwarqa inti qispimuyta kañasqanpa hawanpim.+

18 Chaymantañataqmi torotawan carnerota nakarqa, chayqa karqa Israelpa mirayninkuna Dioswan hawkalla kasqankurayku qusqanku ofrendam. Churinkunañataqmi yawarninta haywarqaku, hinaptinmi Aaronqa altarpa muyuriq waqtanta challarqa.+ 19 Chaymantam toropa wirankunata,+ carneropa wira chupanta, llika wiranta, rurunninkunata hinaspa kichpanninpi kaq wiranta huñurqaku.+ 20 Hinaspam Aaronpa churinkunaqa chay wirakunata churarqaku nakasqa animalkunapa qasqunpa hawanman. Hinaptinmi Aaronqa altarpi chay wirakunata qusnichirqa.+ 21 Chay animalkunapa qasquntawan alliq* piernantañataqmi Aaronqa Jehova Diospaq ñawpaqman qipaman kuyuchirqa, chaytaqa Moisespa nisqanman hinam ruwarqa.+

22 Chaynatam Aaronqa Diosman qurqa hucharayku animalta, kañana animalta hinaspa Dioswan hawkalla kasqankurayku animalta. Chaymantam makinta huqarispan Israelpa mirayninkunata bendecirqa,+ hinaspam altarmanta asurikurqa. 23 Chaymantañataqmi Moiseswan Aaronqa Diospa carpanman yaykurqaku, hinaspam lluqsimuspanku Israelpa mirayninkunata bendecirqaku.+

Hinaptinmi Jehova Diospa kanchaynin llapallankuman rikuriykurqa.+ 24 Jehova Diosñataqmi altarman ninata kachaykamurqa,+ hinaptinmi kañana animalta hinaspa wirakunata nina ruparurqa. Chayta qawaspam Israelpa mirayninkunaqa mancharikuspa qaparirqaku, hinaspam qunqurakuspa pampakama kumuykurqaku.+

10 Chaymantam Aaronpa churin Nadabwan Abiuqa+ sansa apanankuman sansata hinarqaku, hinaspam inciensota*+ hinaykuspa Jehova Diospaq quntichirqaku mana kamachisqa kachkaspankupas.+ Diosqa manamá chayta ruwanankupaqqa kamachirqachu. 2 Chaymi Jehova Diosqa paykunaman ninata kachaykamurqa,+ hinaptinmi nina ruparuptin Jehova Diospa qayllanpi wañururqaku.+ 3 Chaymi Moisesqa Aaronta nirqa: “Jehova Diosqa nirqam: ‘¡Ñuqaman asuykamuwaqkunaqa chuya kasqaytam yachananku, ñuqaqa Israelpa mirayninkunapa qayllanpim hatunchasqa kasaq!’”, nispa.+ Chaymi Aaronqa upallalla karqa.

4 Chaymantam Moisesqa qayachirqa Misaelta hinaspa Elizafanta, paykunaqa Aaronpa tion Uzielpa churinkunam karqa.+ Hinaspam nirqa: “Wañukuq aylluykichiktayá hurquychik Diospa carpanpa ñawpaqninmanta, hinaspayá samasqanchikmanta karuman apaychik”, nispa. 5 Paykunañataqmi wañuqkunata aparqaku makituyuq hinaspa mana makituyuq pachantinta, aparqakuqa Moisespa nisqanman hinam.

6 Chaymantapas Moisesqa Aaronta hinaspa Aaronpa churin Eleazartawan Itamartam nirqa: “Chukchaykichikqa sumaq rutusqa hinaspa sumaq ñachqasqam kanan, pachaykichiktapas amam llikikunkichikchu.+ Chaynapi mana wañurunaykichikpaq hinaspa Diospas Israelpa mirayninkunapaq ama piñakunanpaq. Israelpa mirayninkunam waqanqaku ninawan Jehova Diospa wañuchisqan chay runakunamantaqa. 7 Amataqyá Diospa carpanpa ñawpaqninmantaqa asuriychikchu, manachayqa wañurunkichikmi. Qamkunataqa Jehova Diosmi sapaqchasurqankichik miski asnaq aceitewan”, nispa.+ Hinaptinmi paykunaqa Moisespa nisqanta kasukurqaku.

8 Chaymantam Jehova Diosqa Aaronta nirqa: 9 “Amam qampas nitaq churikikunapas carpayman rispaykichikqa vinotaqa nitaq ima sinkachikuqtapas tomankichikchu,+ upyaruspaykichikqa wañunkichikmi. Chayqa miraynikichikkunapaqpas una-unaypaq kamachikuymi. 10 Kasukuspaqa yachankichikmi imam ñuqapaq sapaqchasqa utaq mana sapaqchasqa kasqanta chaynataq imam allin utaq mana allin kasqanta.+ 11 Hinaspapas atinkichikmi Moisesman ñuqa Jehova Diospa kamachisqaykunata Israelpa mirayninkunaman yachachiyta”, nispa.+

12 Moisesñataqmi Aaronta hinaspa churin Eleazartawan Itamarta nirqa: “Jehova Diospaq kañasqaykichimantayá kawsaykunamanta qusqanku ofrendamanta wakinta mikuychik, mikunaykichikqa mana levadurawan ruwasqa tantata hinam. Diospaq sapaqchasqa kasqanraykum+ chaytaqa mikunaykichik altarpa waqtanpi.+ 13 Jehova Diospaq kañasqaykichik kasqanraykum mikunaykichik Diospaq sapaqchasqa lawpi,+ chaytaqa kimsaykichikmi mikunaykichik. Chaytam Dios kamachiwarqa. 14 Chaymantapas kuyuchispa qusqaykichik animalpa qasquntawan sapaqchasqa piernantam mikunkichik+ qari hinaspa warmi churikichikkunawan.+ Chay aychaqa Dioswan hawkalla kasqankurayku Israelpa mirayninkunapa qususqaykichikmi. 15 Paykunapa apamusqanku sapaqchasqa animalpa piernanqa, qasqunqa hinaspa kañana wirakunaqa Jehova Diospaqmi ñawpaqman qipaman kuyuchisqa kanan. Chay qasqunwan piernanqa qamkunapaqmi kanqa, chaynam kanqa miraynikichikkunapaqpas+ Jehova Diospa kamachisqanman hina”, nispa.

16 Chaymantam Moisesqa maskarqa hucharayku kañanapaq qusqanku chivomanta puchuqta,+ hinaptinmi chivotaqa lliwta kañarusqaku. Chaymi Aaronpa churin Eleazarta hinaspa Itamarta piñakuspan nirqa: 17 “¿Imanasqataq hucharayku qusqaykichik chivopa aychanta mana mikurqankichikchu Diospaq sapaqchasqa lawpiqa? Chayqa Diospaq sapaqchasqam karqa.+ ¿Manachu chaytaqa qusurqankichik Israelpa mirayninkunapa huchan pampachasqa kananpaq Jehova Diospaq kañanaykichikpaq? 18 Manamá yawarnintapas Diospa carpanmanqa aparqankichikchu.+ Chaytaqa Diospa kamachisqanman hinam Diospaq sapaqchasqa lawpi mikuwaqchik karqa”, nispa. 19 Aaronñataqmi Moisesta nirqa: “Arí taytáy, churiykunam Jehova Diospaq qurqaku hucharayku animalta hinaspa kañana animalta,+ ichaqa chayna ruwasqankumantaqa ñuqam huchayuq kani. Chaywanpas hucharayku qusqanku ofrendamanta kunan mikuruptiyqa, ¿allinchu Jehova Diospaq kanman karqa?”, nispa. 20 Chaynata Aaron niptinmi Moisespa sunqunqa chayraq tiyaykurqa.

11 Chaymantam Jehova Diosqa Moisestawan Aaronta nirqa: 2 “Israelpa mirayninkunatayá niychik: ‘Allpapi kawsaq llapallan animalkunamantam mikuwaqchik+ 3 pallqa atakayuq* animalkunata hinaspa kutirpaq* animalkunata.

4 Ichaqa kanmi mana mikunaykichik pallqa atakayuq utaq kutirpaq animalkuna. Amam mikunkichikchu camellotaqa, camelloqa kutirpaspanpas manam pallqa atakayuqchu.+ 5 Amam mikunkichikchu purun quwitaqa*,+ purun quwiqa kutirpaspanpas manam pallqa atakayuqchu. 6 Amam mikunkichikchu purun conejotaqa*, purun conejoqa kutirpaspanpas manam pallqa atakayuqchu. 7 Amataqmi mikunkichikchu kuchitapas,+ kuchiqa pallqa atakayuq kaspanpas mana kutirpaqmi. 8 Amam mayqinninpa aychantapas mikunkichikchu nitaq wañuruptinpas llachpankichikchu. Chaykunataqa manam mikunaykichikchu.+

9 Yakupi kawsaqkunamantaqa mikuwaqchikmi mayupi utaq lamar quchapi llika raprayuq hinaspa qachqa qarayuq challwakunata.+ 10 Ichaqa millakuypaqmi qamkunapaq kanqa mana llika raprayuq hinaspa mana qachqa qarayuq kaqkunaqa, ichapas kanman lamar quchapi utaq mayupipas achkanpi puriq utaq sapallan puriqpas. 11 Chaykunaqa millakuypaqmi qamkunapaqqa kanan, amam imantapas mikunkichikchu,+ wañuruptinpas millakunaykichikmi. 12 Yakupi kawsaq llapallan mana llika raprayuq hinaspa mana qachqa qarayuq challwakunaqa millakuypaqmi qamkunapaqqa kanan.

13 Kanmi mana mikunaykichikpaq kaq alton pawaqkunapas. Millakuypaq kasqankuraykum mana mikunaykichikchu ankata,+ challwa mikuq ankata, yana ullachkuta*,+ 14 qarwa wamanta*, yana wamankunata, 15 tukuy rikchaq cuervokunata, 16 avestruzta, chusiqta, wachwata*, huk rikchaq wamankunata, 17 pakpakata, lamar quchapi cuervota, taksa tukuta, 18 qucha patota*, pelicanota, ullachkuta*, 19 cigüeñata, tukuy rikchaq garzakunata, akaklluta* hinaspa masuta. 20 Chaymantapas achkanpi puriq raprayuq hinaspa tawa chakiyuq llapallan urukunam millakuypaq qamkunapaq kanan.

21 Achkanpi puriq hinaspa tawa chakiyuq urukunamantaqa pawatyaq urukunatam mikuwaqchik. Chay urukunapa qipa chakinqa hatunkunam pawatyanankupaq. 22 Mikuwaqchikmi astakuq aqarway urukunata, mikuna aqarwayta,+ chillikuta hinaspa pinki-pinkita. 23 Chaykuna kaqlla achkanpi puriq hinaspa tawa chakiyuq huk urukunaqa millakuypaqmi qamkunapaq kanan. 24 Chayna urukunata mikuruspaqa mana asuykunam* rikurirunkichik, wañusqata llachparuspapas mana asuykunam kankichik inti siqaykuykama.+ 25 Pipas chay wañusqa urukunata huqariqqa pachantam taqsakunan,+ hinaspapas inti siqaykuykamam mana asuykuna kanan.

26 Chaymantapas pallqa atakayuq kachkaspanpas mana kutirpaq animalqa mana mikunam qamkunapaq kanqa. Chayna animal llachpaqqa mana asuykunam kanan.+ 27 Manam mikunaykichikchu tawa atakayuq sillusapa animalkunataqa. Chay animalkuna wañuruptin llachpaqqa mana asuykunam kanan inti siqaykuykama. 28 Pipas chayna animalkunata marqaqqa pachantapas taqsakunanmi,+ hinaspapas mana asuykunam kanan inti siqaykuykama.+ Chay animalkunataqa manam mikunaykichikchu.

29 Chaymantapas achkanpi puriq animalkunamantaqa amam mikunkichichu mana peloyuq ratata*, ukuchata,+ tukuy rikchaq lagartokunata, 30 sukullukuyta*, hatun lagartota, yakupi kaq sukullukuy kaqllata*, lagartijata hinaspa camaleonta. 31 Achkanpi puriq chay animalkunaqa mana mikunam qamkunapaqqa kanan.+ Wañuruptin chayna animalta llachpaqpas mana asuykunam kanan inti siqaykuykama.+

32 Chay animalkuna wañuruspa imamanpas wichiykuptinqa qachañam kanqa. Ichapas wichiykunman kullumanta mayqan serviciomanpas, pachamanpas, qaramanpas utaq costal ruwana mantadamanpas. Sapa kuti servichikunaykichik kaqkunaman wichiykuptinqa yakumanmi hinanaykichik, hinaptinmi inti siqaykuykama mana servichikuna kanqa. Chaymantañam servichikuwaqchik. 33 Allpamanta ruwasqa puyñuman chay wañusqa animalkuna wichiykuptinqa lliwtam pakinaykichik, ukunpi imapas kaqñataqmi qachaña kanqa.+ 34 Chay puyñupi kaq yaku imapas mikuna kaqta nuyuruptinqa qachañam kanqa, vinopas utaq aqapas chaypi kaspaqa qachañam kanqa. 35 Chay wañusqa animalkuna imamanpas wichiykuptinqa qachañam kanqa. Ichapas wichiykunman tullpaman utaq hornoman, hinaptinqa taqmasqam kanan. Qachaña kasqanraykum manaña servichikunaykichikchu. 36 Pukyupi hinaspa yaku wisinaykichik uchkupi yakutam ichaqa hinalla servichikuwaqchik, chayman wichiykuq wañusqa animalta llachparuqmi ichaqa mana asuykuna kanan. 37 Chay wañusqa animalkuna tarpuna muguman wichiykuptinpas tarpuwaqchikmi, 38 nuyusqaña muguman chay wañusqa animalpa imanpas wichiykuptinmi ichaqa chay mugutaqa manaña servichikunaykichikchu.

39 Chaymantapas, pipas mikunapaq kaq animalta wañusqata llachparuqqa mana asuykunam kanan inti siqaykuykama.+ 40 Chay wañusqa animalpa imantapas mikuqqa utaq chay animalta apakuqqa pachantam taqsanan, hinaspapas mana asuykunam kanan inti siqaykuykama.+ 41 Achkanpi puriq purun animalkuna hinaspa urukunaqa millakuypaqmi,+ chaymi mana mikunaykichikchu. 42 Amam mikunkichikchu qasqunpa puriq animalkunataqa, amataqmi mikunkichikchu achkanpi puriq tawa chakiyuq purun animalkunatapas nitaq achka chakiyuq urukunatapas. Chaykunaqa millakuypaqmi.+ 43 Amayá millakuypaqqa kaychikchu chay animalkuna mikurusqaykichikraykuqa.+ 44 Ñuqaqa Jehova Diosnikichikmi kani,+ chaymi chuya kanaykichik+ ñuqapas chuya kasqayrayku.+ Chaymi ñuqapaqqa mana millakuypaqqa kanaykichikchu achkanpi puriq urukunata mikurusqaykichikraykuqa. 45 Ñuqaqa Diosnikichik kasqayta yachanaykichikpaq Egiptomanta hurqumusuqnikichik Jehova Diosnikichikmi kani,+ chaymi chuya kanaykichik+ ñuqapas chuya kasqayrayku.+

46 Chaykunam tawa chakiyuq animalkunamanta kamachikuykuna, chaynataq yakupi kaqkunamanta hinaspa achkanpi puriq animalkunamanta kamachikuykunapas. 47 Chaynapim yachankichik imam allin utaq mana allin kasqanta, chaynataq imam mikunapaq utaq mana mikunapaq kasqantapas’”, nispa.+

12 Jehova Diosqa hinallam Moisesta nirqa: 2 “Israelpa mirayninkunatayá niy: ‘Warmi wiksayakuruspan qari wawata wachakuruspanqa qanchis punchawmi mana asuykuna* kanqa killanwanpas unquchkanman hina.+ 3 Pusaq kaq punchawpiñataqmi wawanta qari kayninpa qarachanta kuchuspan señalachinan.+ 4 Mamanqa 33 punchawtawanmi yawarninrayku mana asuykuna kanqa. Imapas ñuqapaq sapaqchasqataqa manam llachpananchu, nitaqmi carpaymanqa asuykunanchu mana asuykuna kasqan punchawkuna tukunankama.

5 Warmi wawata wachakuruspanñataqmi 14 punchaw mana asuykuna kanqa killanwanpas unquchkanman hina. Mamanqa 66 punchawtawanmi yawarninrayku mana asuykuna kanqa. 6 Chaymantam qari utaq warmi wawanrayku mana asuykuna kasqan punchawkuna tukuruptin animalta qunan. Chay animaltaqa carpay punkuman pusaspanmi sacerdoteman qunan. Ñuqapaq kañasqa kananpaqmi qunan yaqa watayuq carnerota,+ hucharaykuñataqmi qunan mallqu palomata utaq kullkuta. 7 Hinaptinmi sacerdoteqa lliwta ñuqa Jehova Diosman quwanan. Chaynapim warmiqa huchamanta pampachasqa kanqa, hinaspapas asuykunapaqñam* kanqa. Kayqa qari wawata utaq warmi wawata wachakuq warmikunapaq kamachisqaymi. 8 Ñuqaman quwananpaq carneron mana kaptinqa iskay kullkuta utaq iskay mallqu palomatam apamunan,+ huknintam quwanan hucharayku, huknintañataqmi quwanan kañasqa kananpaq. Hinaptinmi sacerdotepa quwasqanwan huchan pampachasqa kanqa, hinaspapas chuyanchasqañam kanqa’”, nispa.

13 Jehova Diosqa Moisestawan Aarontam hinalla rimapayaspan nirqa: 2 “Pi runapapas cuerponpi lepra* unquy+ hina punkiy utaq herida utaq aycha qaran pukayaruptinqa, sacerdote Aaronman utaq churinkunamanmi pusananku.+ 3 Hinaptinmi sacerdoteqa ima kasqanta qawanan. Chay runapa aycha qaran qiyayaruptinqa hinaspa pelonpas yuraqyaruptinqa lepra unquymi. Chayna kaptinqa sacerdotem ninan chay runaqa mana asuykunapaq kasqanta. 4 Ichaqa mana qiyayaptin chaynataq pelonpas mana yuraqyaptin aycha qarallan yuraqyaruptinqa, sacerdotem qanchis punchaw chay runata wichqanan.+ 5 Qanchis punchawmantañataqmi imayna kasqanta kaqmanta qawanan. Sichu aychanpi chay yuraq mana miraspan hinallapi sayaruptinqa, sacerdotem qanchis punchawtawanraq sapaqchanan.

6 Qanchis kaq punchawpiñataqmi huk kutitawan qawanan. Sichu aychanpi chay yuraq mana miraspan chinkaruptinqa, sacerdotem ninan asuykunapaqña kasqanta.+ Chaynaqa kanqa heridalla kasqanraykum. Chaynapim chay runaqa pachanta taqsakuspan allinña kanqa. 7 Chay nisqankumanta qipaman chay runapa heridan mana chinkaspan astawan miraruptinqa, kaqmantam sacerdoteman kutinan. 8 Hinaptinmi payqa imayna kasqanta kaqmanta qawanan. Sichu heridan astawan miraruptinqa, sacerdotem ninan manaña asuykunapaq kasqanta. Chaynaqa kanan lepra unquyña kasqanraykum.+

9 Lepra unquy runapi rikuriruptinqa sacerdotemanmi pusananku, 10 payñataqmi ima kasqanta sumaqta qawanan.+ Sichu punkisqa aycha qaranpi yuraq kaptinqa, pelonpas yuraq kaptinqa hinaspa qiyayasqanpi llullu aycha rikukuptinqa,+ 11 sacerdotem ninan mana asuykunapaq kasqanta. Chaytaqa ninan mana sanoyaq lepra unquywan kasqanraykum. Manañam wichqananchu+ lepra unquyniyuq kasqanrayku. 12 Ichaqa sacerdotepa qawasqanman hina chay lepra unquy umanmanta chakinkama tukuruptinqa, 13 sacerdotem imayna kasqanta sumaqta qawanan. Umanmanta chakinkama tukurusqanta qawaspanmi ninan asuykunapaqña kasqanta. Lliw cuerpon yuraq kaptinqa chay runaqa allinyarunñam. 14 Chaywanpas llullu aychan kaqmanta rikukuptinqa mana asuykunapaqñam kanqa. 15 Chaymi sacerdoteqa llullu aychanta qawaykuspan ninan manaña asuykunapaq kasqanta.+ Runapa chay llullu aychan rikukuptinqa lepra unquymi.+ 16 Sichu chay llullu aychan kaqmanta yuraqyaruptinqa sacerdotemanmi rinan. 17 Hinaptinmi sacerdoteqa imayna kasqanta sumaqta qawanan.+ Sichu chay rikukuq llullu aychan yuraqyaruptinqa sacerdotem ninan allinyarusqantaña.

18 Pipapas cuerponpi chupu rikuriruspan chinkarunman 19 hinaspa hina chayllapi punkiruspa qiya rikuriruptinqa utaq aycha qaranpi pukaniraq rikuriruptinqa, sacerdotemanmi rinan. 20 Hinaptinmi sacerdoteqa ima kasqanta sumaqta qawanan.+ Aychanman chayaruptinqa hinaspa pelonpas yuraqyaruptinqa ninanmi mana asuykunapaq kasqanta. Chayqa lepra unquymi. 21 Ichaqa chay chupu chinkananpaq hina kaptinqa, pelonpas mana yuraqyaptinqa chaynataq aychanmanpas mana chayaptinqa, sacerdotem qanchis punchaw chay runata wichqanan.+ 22 Sutillata miraruptinmi ichaqa sacerdote ninan mana asuykunapaq kasqanta. Chaynam kanan lepra unquy kasqanrayku. 23 Ichaqa, aychanpi chay pukaniraq mana miraspa hinalla kaptinqa chupupa punkisqallanmi chayqa. Chayna kaptinqa sacerdotem ninan allinyarusqantaña.+

24 Pipas kañakuruptin aychan pukaniraq rikuriruptinqa utaq puslluruptinqa, 25 sacerdotem ima kasqanta sumaqta qawanan. Sichu chay pukaniraq aychanpi kaq pelon yuraqyaruptinqa hinaspa llullu aychan rikukuptinqa lepra unquymi chayqa. Lepra kaptinqa sacerdotem ninan chay runaqa mana asuykunaña kasqanta. 26 Ichaqa chay pukaniraq aychanpi kaq pelon mana yuraq kaptinqa chaynataq llullu aychanpas mana rikukuptinqa, sacerdotem qanchis punchaw chay runata wichqanan.+ 27 Qanchis kaq punchawpiñataqmi huktawan imayna kasqanta qawanan. Sichu aychanpi kaq pukaniraq miraruptinqa, sacerdotem ninan mana asuykunapaq kasqanta. Chaynaqa kanan lepra unquy kasqanraykum. 28 Ichaqa aychanpi kaq pukaniraq heridalla kasqanrayku chinkayta qallaykuptinqa, sacerdotem ninan allinyarusqantaña.

29 Qaripa utaq warmipa umanpi utaq kakichunpi isu rikuriruptinqa, 30 sacerdotem ima kasqanta sumaqta qawanan.+ Chay isu unquy aychankama chayaptinqa hinaspa chukchanpas utaq barbanpas qilluyaspa asllayaptinqa, sacerdotem ninan mana asuykunapaq kasqanta. Chay uma qaranpi utaq kakichunpi kaq isuqa lepra unquyñam. 31 Ichaqa aychanman mana chayaptinqa hinaspa chaypi mana yana chukcha kaptinqa utaq barbanpas mana yana kaptinqa, sacerdotem qanchis punchaw chay runataqa wichqanan.+ 32 Qanchis kaq punchawpiñataqmi imayna kasqanta kaqmanta qawanan. Sichu chay isu mana miraptinqa, chukchanpas utaq barbanpas mana qilluyaptinqa chaynataq aychanmanpas mana chayaptinqa, 33 chay unquq runam chukchanta kachiy-kachiyta rutukunan utaq barbanta qatqakunan*, ichaqa manam isupa kasqantaqa imanananchu. Hinaptinmi sacerdoteqa qanchis punchaw chay runata wichqanan.

34 Qanchis kaq punchawpiñataqmi sacerdoteqa kaqmanta qawanan isupa kasqanta. Sichu uma qaranpi utaq barbanpi kaq isu mana miraptinqa chaynataq aychanmanpas mana chayaptinqa, allinyarusqantañam ninan. Chaynapim pachanta taqsanan, hinaspam allinña kanqa. 35 Chayna kachkaptin kaqmanta isu rikuriruspan miraruptinqa, 36 sacerdotem imayna kasqanta sumaqta qawanan. Isu miraruptinqa manañam qawananchu chukchan utaq barban qilluyarusqantaqa. Chay runaqa mana asuykunapaqñam. 37 Sichu sumaqta qawaspan yacharunqa isu mana mirasqanta hinaspa yana chukchaña utaq yana peloña wiñasqanta hinaptinqa, manañam isuqa kanñachu. Chayna kaptinqa sacerdotem ninan allinyarusqantaña.+

38 Qaripa utaq warmipa aychanpi yuraq siqsipakuy rikuriruptinqa, 39 sacerdotem ima kasqanta sumaqta qawanan.+ Sichu aycha qaranpi rikuriq siqsipakuy uqiniraq kaptinqa allinyananpaq hinañam kachkan. Chayna kaptinqa allinñam kanqa.

40 Chaymantapas, pi runapapas chukchan wichiruptin uman paqlayaruptinqa asuykuwaqchikmi. 41 Urkunpi* chukchan wichirusqanrayku paqlayaruptinpas asuykuwaqchikmi. 42 Sichu paqlayasqa umanpi utaq urkunpi pukaniraq heridapi lepra unquy rikuriruptinqa, 43 sacerdotem sumaqta qawanan. Sichu chay pukaniraq herida paqlayasqa umanpi utaq urkunpi lepra hina kaptinqa, 44 sacerdotem ninan mana asuykunapaq kasqanta umanpi unquy kasqanrayku. 45 Leprawan unquq runaqa llikipasqa pachawanmi churakunan, hinaspapas qisa umam purinan. Chaymantañataqmi siminta ima latapawanpas tapakuspan qaparispa ninan: ‘¡Mana asuykunam kallani, mana asuykunam kallani!’, nispa. 46 Chayna runaqa lepra unquynin chinkanankamam mana asuykunapaq kanan, hinaspapas samasqaykichikmanta karupim yachanan*.+

47 Sichu lepra unquy hina quqara rikurinqa millwamanta utaq linaza qaytumanta pachapi, 48 awapa allwinpi utaq mininpi, qarapi utaq qaramanta ima ruwasqapipas, 49 chay quqara qilluniraq verde utaq pukaniraq rikurinqa pachapi, awapi, qarapi utaq qaramanta imapas ruwasqapi hinaptinqa lepra unquymi chayqa. Chaytaqa sacerdotemanmi apanan. 50 Hinaptinmi payñataq ima kasqanta sumaqta qawanan, hinaspam imapas chay quqarayuq kaqta qanchis punchaw huklawman churanan.+ 51 Qanchis kaq punchawpiñataqmi imayna kasqanta sumaqta qawanan. Sichu mirarunqa pachapi, awapa allwinpi utaq mininpi chaynataq servichikuna ima qarapipas hinaptinqa, ratakuq lepra unquymi chayqa. Chaykunaqa manam allinñachu.+ 52 Chaymi ratakuq lepra unquy kasqanrayku kañanan linaza qaytumanta pachata utaq millwa qaytumanta pachata chaynataq qaramanta imapas ruwasqata. Chayqa kañasqam kanan.

53 Sichu sacerdote imayna kasqanta qawaptin, chay ratakuq lepra unquy mana miranmanchu pachapi, awapa allwinpi utaq mininpi, qaramanta imapas ruwasqapi hinaptinqa, 54 sacerdotem taqsachinan, hinaspam qanchis punchaw huklawman churanan. 55 Chaymantam suma-sumaqta taqsaruptinku sacerdoteqa kaqmanta qawanan. Sichu chay quqara hinalla kaptinqa, mana miraptinpas chaykunaqa manam allinñachu. Chayqa kañasqam kanan hawanpas utaq ukunpas unquypa tukusqan kasqanrayku.

56 Ichaqa sacerdotem imayna kasqanta qawanan, sichu chay quqara suma-sumaq mayllasqa kasqanrayku chinkayta qallaykuptinqa, quqarapa kasqantam llikchinan pachamanta utaq qaramanta. 57 Imataña ruwaptinkupas huklawkunapiña miraruptinqa pachaña kaptinpas, awapa allwinña utaq mininña kaptinpas chaynataq qaramanta imaña kaptinpas lliwmi kañasqa kanan.+ 58 Sichu quqara chinkarunqa taqsasqa pachamanta utaq qaramanta imapas ruwasqapi hinaptinqa, huktawanmi taqsanan allinña kananpaq.

59 Tukuy chaykunam lepra unquymanta kamachikuykuna millwamanta utaq linazamanta pachapi kaptinpas, awapa allwinpi utaq mininpi kaptinpas hinaspa qaramanta imapas ruwasqapi kaptinpas. Chaynatam yachankichik servichikunaykichikpaq allin utaq mana allin kasqanta”, nispa.

14 Jehova Diosqa Moisestam hinalla nirqa: 2 “Kaykunatam ruwanan leprawan unquq runa chuyanchakunanpaq*: Allinyasqan punchawmi sacerdoteman pusasqa kanan,+ 3 sacerdoteqa samasqaykichikmanta hawaman rispanmi qawanan unquynin imayna kasqanta. Lepra unquynin chinkaruptinqa, 4 ninanmi chuyanchasqa kananpaq iskay pichinkuchakunata apamunanpaq. Ninantaqmi cedro kaspita, puka qaytuta hinaspa challanapaq qurata* apamunanpaqpas.+ 5 Chaymantapas sacerdotem ninan huknin pichinkuchata wañuchinanpaq, wañuchispanqa allpa mankapi kaq pukyu yakumanmi yawarninta sutuchinan. 6 Chaymantam wañuchisqan pichinkuchapa yakuyuq yawarninman challpunan huknin pichinkuchata, cedro kaspita, puka qaytuta hinaspa challanapaq qurata. 7 Hinaspanmi yawarniyuq yakuwan qanchiskama challanan lepramanta allinyaq runata, hinaspam ninan allinyarusqantaña. Chay kawsaq pichinkuchatañataqmi karuman apaspan kacharimunan.+

8 Lepramanta allinyaq runaqa pachantam taqsakunan, chukchantapas kachiy-kachiytam rutukunan, hinaspam cuerponpi lliw pelontapas qatqakuspan* bañakunan. Chaynapim asuykunapaqña* kanqa. Chayñam maymi samasqaykichikman kutimunan, ichaqa qanchis punchawmi carpanmanqa manaraq yaykunanchu. 9 Qanchis kaq punchawpiñataqmi kaqmanta chukchanta kachiy-kachiyta rutukunan hinaspa barbantawan cejasninta qatqakunan. Chaymantam pachanta taqsakuspa bañakunan, chaynapim asuykunapaqña kanqa.

10 Pusaq kaq punchawpiñataqmi pusamunan allinnin kaq sano iskay malta carnerota hinaspa yaqa watayuq ovejata.+ Kawsaykunamanta ofrendatañataqmi apamunan aceitewan chapusqa kimsa kilo parten* harinata+ hinaspa huk vaso* aceiteta.+ 11 Chuyanchakuq runata asuykunapaqña kasqanta sacerdote ninanpaqmi ñuqa Jehova Dios qawachkaptiy chay runata pusamunan carpay punkuman, apamunantaqmi ñuqaman quwanantapas. 12 Chaymantam sacerdote quwanan huknin malta carnerota hinaspa huk vaso aceiteta, chay malta carneroqa kanan chuyanchakuq runapa pantarusqanraykum.+ Chaykunataqa ñuqa Jehova Diosmanmi ñawpaqman qipaman kuyuchispa quwanan.+ 13 Chaymantam malta carnerotaqa nakanan ñuqapaq sapaqchasqa lawpi, chaypim nakanku hucharayku animalta hinaspa kañapuwanankupaq animalta.+ Hucharayku ofrenda qusqan hinam pantarusqanrayku qusqan ofrendapas sacerdotepaq kanan.+ Chayqa ñuqapaq sapaqchasqam.+

14 Chaymantam pantarusqanrayku chay nakasqan carneropa yawarninwan llusinqa chuyanchakuq runapa alliq* rinrinpa uray patanta, alliq makinpa maman dedonta hinaspa alliq chakinpa maman dedonta. 15 Chaymantapas sacerdoteqa ichuq* makinpa pampanmanmi as aceiteta tallinan.+ 16 Hinaspanmi chay aceiteman alliq makinpa dedonta chapuykuspan qanchis kutikama ñuqa Jehova Diospa qayllaypi challanan. 17 Chaymantam chay maki pampanpi puchuq aceitewan llusinan chuyanchakuq runapa alliq rinrinpa uray patanta, alliq makinpa maman dedonta hinaspa alliq chakinpa maman dedonta. Chaytaqa llusinan pantarusqanrayku yawar llusisqanpa hawanmanmi. 18 Chaymantam maki pampanpi puchuq aceiteta sutuchinan chuyanchakuq runapa umanman, chaykuna ruwasqanwanmi chay runapa huchan pampachasqa kanqa, chaytaqa ruwanan ñuqa Jehova Diospa qayllaypim.+

19 Sacerdoteqa hucharayku runapa qusqan animaltam nakanan,+ hinaspam huchan pampachasqa kananpaq yanapanan. Chaymantam ñuqapaq kañana animalta nakanan, 20 hinaspam kawsaykunamanta qusqantawan kuskata altarpi kañanan.+ Chaynatam chuyanchakuq runapa huchan pampachasqa kananpaq yanapanan,+ hinaptinmi chay runaqa asuykunapaqña kanqa.+

21 Chuyanchakuq runa wakcha kaspanñataqmi pantarusqanrayku qunan malta carnerota, chaytaqa qunan ñawpaqman qipaman kuyuchisqa kananpaqmi, chaynapim huchanmanta pampachasqa kanqa. Qunantaqmi huk vaso aceitetapas chaynataq aceitewan chapusqa iskay kilo* harinatapas, chay harinaqa kanan kawsaykunamanta quwasqan ofrendam. 22 Qunantaqmi atisqanman hina iskay kullkutapas utaq iskay mallqu palomatapas. Hukninmi kanan hucharayku nakasqa kananpaq, hukninñataqmi ñuqapaq kañasqa kananpaq.+ 23 Pusaq kaq punchawpiñataqmi+ sacerdoteman carpaypa ñawpaqninman lliwta apanan, chaytaqa ñuqa Jehova Diospaqmi apamunan. Chaynapim chuyanchakuq runaqa asuykunapaqña kanqa.+

24 Hinaptinmi sacerdoteqa chay runapa pantarusqanrayku qusqan malta carnerota+ aceitetawan kuskata ñawpaqman qipaman kuyuchinan, chaytaqa ruwanan ñuqa Jehova Diospa qayllaypim.+ 25 Hinaspanmi pantarusqanrayku chay qusqan malta carnerotaqa nakanan, hinaspam wakin yawarninwan llusinan chuyanchakuq runapa alliq rinrinpa uray patanta, alliq makinpa maman dedonta hinaspa alliq chakinpa maman dedonta.+ 26 Chaymantam as aceiteta ichuq makinpa pampanman tallinan.+ 27 Hinaspanmi chay aceiteman alliq makinpa dedonta chapunan, hinaspañataqmi Jehova Diospaq challanan qanchis kutikama. 28 Chaymantam chay maki pampanpi puchuq aceitewan llusinan chuyanchakuq runapa alliq rinrinpa uray patanta, alliq makinpa maman dedonta hinaspa alliq chakinpa maman dedonta. Chaytaqa llusinan pantarusqanrayku yawar llusisqanpa hawanmanmi. 29 Chaymantam maki pampanpi puchuq chay aceiteta sutuchinan chuyanchakuq runapa umanman, chaykuna ruwasqanwanmi chay runapa huchan pampachasqa kanqa, chaytaqa ruwanan ñuqa Jehova Diospa qayllaypim.

30 Chaymantam payqa atisqanman hina quwanan huknin mallqu palomata utaq huknin kullkuta.+ 31 Mayqintapas chay alton pawaqkunamantam huchanrayku hukta quwanan, huknintañataqmi quwanan kawsaykunamanta ofrenda qusqantawan kuskata ñuqapaq kañasqa kananpaq.+ Chaykuna ruwasqanwanmi chay runapa huchan pampachasqa kanqa, chaytaqa ruwanan ñuqa Jehova Diospa qayllaypim.+

32 Chaykunam lepra unquyniyuq wakcha runapaq kamachikuykuna, chaynapi asuykunapaqña kananpaq”, nispa.

33 Chaymantam Jehova Diosqa Moisestawan Aaronta nirqa: 34 “Qunay Canaan allpaman+ chayaruptikichik wasikichikpi quqara hina lepra unquy rikurinanta saqiptiyqa,+ 35 wasiyuqmi sacerdoteman rispa ninan: ‘Wasiypim quqara hina unquy rikurirun’, nispa. 36 Hinaptinmi sacerdoteqa quqarasqata qawaq manaraq yaykuchkaspan ninan wasimanta tukuy imata hurqunanpaq, mana hurquptinñataqmi ninan mana llachpanapaq kasqanta. Chayñam wasi ukumanqa qawaq yaykunan. 37 Chaypim quqarasqa imayna kasqanta qawanan, sichu wasipa pirqanpi quqarasqa qilluniraq verde utaq pukaniraq kaptinqa hinaspa pirqa ukuman yaykuptinqa, 38 wasimanta lluqsiruspanmi chay wasita qanchis punchaw wichqanan.+

39 Qanchis kaq punchawpiñataqmi sacerdote imayna kasqanta qawanan. Sichu wasipa pirqanpi kaq quqara astawan miraruptinqa, 40 quqarasqa rumikunata hurqunankupaqmi kamachinan. Chay rumikunataqa yachasqaykichikmanta* karumanmi wischunanku, wischunankuqa millakuypaq* kaqkunata wischunankumanmi. 41 Chaymantapas kamachinanmi wasi ukun estucasqankuta hurqunankupaq hinaspa yachasqaykichikmanta karuman wischunankupaq, chaytaqa wischunanku millakuypaq kaqkunata wischunankumanmi. 42 Chaymantam wischuchisqan rumikunapa rantinpi huk rumikunata churachinan, hinaspam wasipa pirqantapas estucachinan.

43 Quqarasqa rumita hinaspa pirqa estucasqankuta wischuptinkupas musuqmanta estucaptinku quqara kaqmanta rikuriruptinqa, 44 sacerdotem wasiman yaykuspa sumaqta qawanan. Sichu chay quqara astawan miraruptinqa ratakuq lepra unquymi chayqa,+ chay wasipiqa manañam pipas yachananchu. 45 Chay wasitaqa taqmachinanmi, hinaspam ruminkunata, qirunkunata, estucasqankuta hinaspa allpankunata yachasqaykichikmanta karuman wischuchinan, wischuchinanqa millakuypaq kaqkunata wischunankumanmi.+ 46 Ichaqa, chay wasi wichqasqa kachkaptin+ pipas yaykuruqqa inti siqaykuykamam mana asuykuna* kanan.+ 47 Pipas chayna wasipi puñuqqa hinaspa mikuqqa pachantam taqsanan.

48 Sichu kaqmanta estucasqanku wasipi quqara mana miraspa chinkaruptinqa, sacerdotem ninan chay wasiqa yachanapaqña kasqanta. 49 Chay wasi chuyanchasqa kananpaqqa qunanmi iskay pichinkuchakunata, qunantaqmi cedro kaspita, puka qaytuta hinaspa challanapaq qurata.+ 50 Chaymantam sacerdoteqa wañuchinan huknin pichinkuchata pukyu yakuyuq allpa mankapa hawanpi. 51 Chaymantam huknin pichinkuchata, cedro kaspita, puka qaytuta hinaspa challanapaq qurata wañuchisqan pichinkuchapa yakuyuq yawarninman lliwta chapunan. Hinaspanmi yawarniyuq yakuwan qanchiskama challanan wasi lawman.+ 52 Chay wasitam chuyanchanan wañuchisqan pichinkuchapa yawarninwan, pukyu yakuwan, kawsaq huknin pichinkuchawan, cedro kaspiwan, challanapaq qurawan hinaspa puka qaytuwan. 53 Chaymantam kawsaq pichinkuchata kacharimunan yachasqaykichikmanta karupi. Chaynapim chay wasiqa yachanapaqña kanqa.

54 Tukuy chay kamachikuykunam imapipas rikuriq lepra unquymanta, uma qarapi utaq kakichupi isumanta,+ 55 wasipi+ utaq pachapi lepra unquymanta,+ 56 punkiymanta, heridamanta utaq aycha qara pukayaymanta.+ 57 Chaynapi allin utaq mana allin kasqanta yachanaykichikpaq.+ Tukuy chaykunam lepra unquymanta kamachikuy”, nispa.+

15 Jehova Diosqa Moisestawan Aaronta hinalla rimapayaspanmi nirqa: 2 “Israelpa miraynin runakunatayá niychik: ‘Pi qaripas qari kayninmanta qiya kaqlla lluqsiqwan unquspanqa mana asuykunam* kanan.+ 3 Chay runaqa mana asuykunam kanan qari kayninmanta qiya kaqlla lluqsisqanrayku, mana asuykunataqmi kanan qari kayninpa ukunpi chay qiya kaqlla harkaruptin mana ispakuyta atispanpas.

4 Qari kayninmanta qiya kaqlla lluqsichkaptin ima camapipas puñuruptinqa utaq imapipas tiyaruptinqa mana llachpanam chayqa kanqa. 5 Pipas chay camata llachparuspanqa pachantam taqsakunan hinaspa bañakunan, hinaspapas inti siqaykuykamam mana asuykuna kanan.+ 6 Chaymantapas mana llachpana chay tiyanapi pipas tiyaruspanqa pachantam taqsanan hinaspa bañakunan, hinaspapas inti siqaykuykamam mana asuykuna kanan. 7 Chaymantapas qari kayninmanta qiya kaqlla lluqsiqwan unquq runata pipas llachparuqqa, pachantam taqsanan hinaspa bañakunan, hinaspapas inti siqaykuykamam mana asuykuna kanan. 8 Pipas qari kayninmanta qiya kaqlla lluqsiqwan unquchkaspan pimanpas tuqaykuptinqa, chay tuqaykusqan runam pachanta taqsakunan hinaspa bañakunan, hinaspapas inti siqaykuykamam mana asuykuna kanan. 9 Qari kayninmanta qiya kaqlla lluqsiqwan unquq runapa sillakusqan monturaqa mana llachpanam kanan. 10 Chay runapa imapas tiyasqanta pipas llachparuqqa mana asuykunam kanan inti siqaykuykama. Chayna mana llachpanata pipas apaqqa pachantam taqsanan hinaspa bañakunan, hinaspapas inti siqaykuykamam mana asuykuna kanan. 11 Qari kayninmanta qiya kaqlla lluqsiqwan+ unquq runa makinta mana mayllakuspan pitapas llachparuptinqa, chay llachpasqan runam pachanta taqsanan hinaspa bañakunan, hinaspapas inti siqaykuykamam mana asuykuna kanan. 12 Qari kayninmanta qiya kaqlla lluqsiqwan unquq runa allpa mankata llachparuptinqa chay mankam pakipasqa kanan, imapas kullumanta ruwasqa kaqñataqmi sumaq mayllasqa kanan.+

13 Qari kayninmanta qiya kaqlla manaña lluqsimuptinqa hinaspa allinyaruptinqa, qanchis punchawmantam chuyanchakunan. Chaymantañam pachanta taqsanan hinaspa kallpaq pukyu yakuwan bañakunan, chayñam chuyanchasqa kanqa.+ 14 Pusaq kaq punchawpiñataqmi iskay kullkuta utaq iskay mallqu palomata apamunan.+ Chaytaqa ñuqa Jehova Diospaqmi apamunan carpaypa ñawpaqninman, hinaspam sacerdoteman qunan. 15 Hinaptinmi payqa hukninta chay unquq runapa huchanrayku wañuchinan, huknintañataqmi kañanan. Chaynatam sacerdoteqa chay unquq runapa huchan pampachasqa kananpaq yanapanan, chaytaqa ñuqa Jehova Diospa qayllaypim ruwanan.

16 Chaymantapas pi qaripapas qari kayninmanta mugun* kikillanmanta lluqsimuptinqa suma-sumaqtam bañakunan, hinaspapas inti siqaykuykamam mana asuykuna kanan.+ 17 Taqsananmi qari kayninmanta lluqsimuqwan qachachasqa pachata utaq qaramanta ima kaqtapas, hinaptinmi chay taqsasqanqa mana llachpana kanan inti siqaykuykama.

18 Pipas warminwan puñuptin qari kayninmanta mugun lluqsiptinqa iskayninkum sumaqta bañakunanku, hinaspapas inti siqaykuykamam mana asuykuna kanqaku.+

19 Chaynataqmi warmipas killanwan unquspanqa qanchis punchaw mana asuykuna kanqa.+ Pipas llachpaykuqqa inti siqaykuykamam mana asuykuna kanqa.+ 20 Killanwan kachkaspan imapipas siriykuptinqa mana llachpanam chay siriykusqanqa kanqa, mana llachpanataqmi kanqa ima tiyasqanpas.+ 21 Pipas killanwan unquq warmipa camanta llachpaqqa pachanta taqsakuspam bañakunan, hinaspapas inti siqaykuykamam mana asuykuna kanqa. 22 Killanwan unquq warmipa imapas tiyasqanta pipas llachpaqqa pachanta taqsakuspam bañakunan, hinaspapas inti siqaykuykamam mana asuykuna kanqa. 23 Killanwan unquq warmipa camanta utaq imapas tiyasqanta pipas llachpaqqa, inti siqaykuykamam mana asuykuna kanqa.+ 24 Pi qaripas chay unquq warmiwan puñuruspan yawarninwan chapukuqqa+ qanchis punchawmi mana asuykuna kanqa, chay qaripa puñusqan camapas mana llachpanam kanqa.

25 Sichu pi warmipapas killanwan unqusqan punchaw tukuruptin hinallaraq yawarnin hamuptinqa,+ sapa punchawmi mana asuykuna kanan killanwanpas kachkanman hina. 26 Yawarnin hamuchkaptin ima camapipas puñuruptinqa utaq imapipas tiyaruptinqa mana llachpanam chayqa kanan,+ chaynam kanan killanwanpas unquchkanman hina. 27 Pipas chaykuna llachpaqqa mana asuykunam kanqa. Chaymi pachanta taqsakuspan bañakunan, hinaspapas inti siqaykuykamam mana asuykuna kanqa.+

28 Yawarnin manaña hamuptinqa qanchis punchawtaraqmi suyanan, chaymantañam chuyanchasqa kanqa.+ 29 Pusaq kaq punchawpiñataqmi iskay kullkuta utaq iskay mallqu palomata apamunan.+ Chaytaqa apamunan carpaypa ñawpaqninmanmi, hinaspam sacerdoteman qunan.+ 30 Hinaptinmi payqa hukninta chay unquq warmipa huchanrayku wañuchinan, huknintañataqmi kañanan. Chaynatam sacerdoteqa yawarninwan unquq warmipa huchan pampachasqa kananpaq yanapanan, chaytaqa ñuqa Jehova Diospa qayllaypim ruwanan.+

31 Chaykunata ruwaspaykichikmi Israelpa mirayninkunata tukuy millakuypaq kaqkunamanta karunchanaykichik, chaynapi chawpikichikpi kaq carpayman rispanku mana wañurunankupaq.+

32 Tukuy chay kamachikuykunam qari kayninmanta qiya kaqlla lluqsiq qaripaq, mugun lluqsisqanrayku mana asuykuna kaq qaripaq,+ 33 killanwan unquq warmipaq,+ cuerponmanta lluqsiqwan unquq qaripaq utaq warmipaq hinaspa mana asuykuna kaq warmiwan puñuruq qaripaq’”, nispa.+

16 Aaronpa iskaynin churinkunaqa Jehova Diospa kamachisqanman hina mana ruwarusqankuraykum wañururqaku. Chaymanta qipatam Jehova Diosqa Moisesta rimapayarqa.+ 2 Chaymi Jehova Diosqa Moisesta nirqa: “Wawqiki Aarontayá niy rakiq hatun cortinapa chimpanpi baulniypa kasqan Chuyay-chuyay sutiyuq cuartoman+ sapa kuti ama yaykunanpaq. Chayta ruwaspanqa wañurunqam,+ ñuqam baulniypa tapanpa+ hawanpi puyupi rikurisaq.+

3 Manaraq Chuyay-chuyay sutiyuq cuartoman yaykuchkaspanmi Aaronqa apamunan malta torota hinaspa carnerota. Chay malta toroqa kanan hucharayku quwananpaq ofrendam,+ carneroñataqmi kanan kañapuwananpaq.+ 4 Chaymantapas bañakuruspanmi+ churakunan makituyuq pachawan, ukun pachanwan,+ wiqaw watanawan+ hinaspa sumaq uma wankunawan.+ Chaykunaqa linaza llañu qaytumanta ruwasqam+ hinaspa ñuqapaq sapaqchasqam.+

5 Chaymantapas Aaronqa chaskinanmi Israelpa mirayninkunapa+ qusqan iskay chivochakunata hinaspa huk carnerota. Chay iskay chivochakunaqa kanan hucharayku quwananpaqmi, carneroñataqmi kanan kañapuwananpaq.

6 Aaronqa huchanrayku torotam quwanan, chaytaqa quwanan kikinpa hinaspa ayllunpa huchan pampachasqa kananpaqmi.+

7 Chaymantam Aaronqa pusamunan iskaynin chivochakunata ñuqa Jehova Diospaq carpaypa ñawpaqninman. 8 Chaypim Aaronqa iskaynin chivochakunata sorteanqa huknin Jehova Diospaq kananpaq hukninñataq chunniqman pusasqa kaspa chinkananpaq*. 9 Chaymantam Aaronqa ñuqa Jehova Diospaq chivocha tupawasqanta+ quwanan hinaspa hucharayku nakanan. 10 Huknin chivochatañataqmi ñuqa Jehova Diospaq asuykachimunan huchaykichik pampachasqa kananpaq, chaymantam chay chivochaqa chinkananpaq chunniqman pusasqa kanan.+

11 Chaymantam Aaronqa torota quwanqa paypa hinaspa ayllunpa huchan pampachasqa kananpaq. Hinaspam nakanan huchanrayku quwasqan chay torota.+

12 Chaymantañataqmi ñuqa Jehova Dios qawachkaptiy rawrachkaq sansata+ altarmanta apamunqa sansa apanapi,+ apamunqataqmi iskay aptiy inciensotapas*.+ Chaykunataqa apamuwanan rakinaq hatun cortinapa qipanmanmi.+ 13 Hinaspanmi ñuqa Jehova Diospaq sansaman tallinan inciensota,+ chaynapi inciensopa qusniynin baulniypa tapanta+ pampaykuptin mana wañurunanpaq.

14 Chaymantam baulniypa ñawpaqninpi toropa yawarninta+ dedonwan sutuchinan qanchis kutikama.+

15 Chaymantañataqmi Israelpa mirayninkunapa hucharayku qusqan chivochata nakanan,+ hinaspam yawarninta apanan rakinaq hatun cortinapa qipanman.+ Chaypim toropa yawarninta+ hina sutuchinan qanchis kutikama baulniypa ñawpaqninpi.

16 Aaronqa Chuyay-chuyay sutiyuq cuartotam chuyanchanan Israelpa mirayninkunapa mana allinkuna ruwasqankurayku, mana kasukusqankurayku hinaspa huchankurayku.+ Chaymantapas Aaronqa carpaytam chuyanchanan, carpayqa kachkan huchasapa runakunapa chawpinpim.

17 Huchata pampachanaypaq Chuyay-chuyay sutiyuq cuartoman Aaron yaykuptinqa manam pipas kananchu carpaypiqa Aaron lluqsimunankama. Aaronqa yaykunan paypa, ayllunpa hinaspa Israelpa lliw mirayninkunapa huchanku pampachasqa kananpaqmi.+

18 Chaymantam Aaronqa rinan ñuqa Jehova Diospa carpaypa ñawpaqninpi kaq altarman.+ Chay altarpa waqrankunamanmi Aaronqa llusinan toropa hinaspa chivochapa yawarninta, chaynapi huchanmanta pampachasqa kananpaq. 19 Chaymantapas chay altarmanmi dedonwan yawarta sutuchinan qanchis kutikama. Chaynatam Israelpa mirayninkunapa huchanmanta chay altarta chuyanchanqa.

20 Chaymantapas Aaronqa Chuyay-chuyay sutiyuq cuartota, carpayta hinaspa altarta chuyancharuspanmi+ quwanan huknin kawsaq chivochata.+ 21 Hinaspanmi chay kawsaq chivochapa umanman iskaynin makinta churanan, hinaspam rimanan Israelpa mirayninkunapa mana allinkuna ruwasqankumanta, mana kasukusqankumanta hinaspa huchankumanta. Chay huchakunaqa chivochapa umanpipas kachkanman hinam kanqa.+ Chaymantam karu-karuman pusachinan akllasqa runawan. 22 Chay chivocham Israelpa mirayninkunapa lliw huchanta apanqa+ karu-karu chunniqman,+ chayta apananpaqmi chivochata akllasqa runawan pusachinan.+

23 Chaymantam Aaronqa carpayman yaykunan, hinaspam Chuyay-chuyay sutiyuq cuartoman yaykusqan linazamanta ruwasqa pachanta hurqukuspa saqinan. 24 Hinaspanmi carpaypa punkunpi bañakuspa+ pachakunan.+ Chaymantam altarman rispan paypa qusqan hinaspa Israelpa mirayninkunapa qusqan animalta kañanan,+ hinaptinmi paypa hinaspa Israelpa mirayninkunapa huchan pampachasqa kanqa.+ 25 Chaymantapas hucharayku quwasqan animalkunapa wirantam altarpi kañapuwanan.

26 Chinkananpaq karu-karuman chivochata pusaq runañataqmi+ pachanta taqsakuspa bañakunan, hinaspañam samasqaykichikmanqa yaykumunqa.

27 Chaymantapas toropa hinaspa huknin chivochapa qaranta, aychanta chaynataq akantaqa samasqaykichikmanta karupim kañanaykichik. Chay animalkunapa yawarninqa Chuyay-chuyay sutiyuq cuartomanmi apasqaña karqa huchaykichik pampachasqa kananpaq.+ 28 Chaykuna kañamuq runañataqmi pachanta taqsanan hinaspa bañakunan, hinaspañam samasqaykichikmanqa yaykumunan.

29 Kaytam una-unaypaq kamachikichik: Qanchis kaq killapa chunka punchawninpim huchasapa kasqaykichikmanta llakisqallaña* kanaykichik, hinaspapas manam llamkanaykichikchu.+ Chay kamachikuyqa qamkunapaq hinaspa qamkunawan yachaq* huklaw llaqtayuqkunapaqwanmi. 30 Chay punchawmi huchaykichikmanta pampachasqa kankichik,+ hinaptinmi ñuqa Jehova Diospaq chuya kankichik.+ 31 Chay punchawqa samana punchaw* kasqanraykum mana llamkanaykichikchu, aswanqa huchasapa kasqaykichikraykum llakisqa kanaykichik.+ Chayqa una-unaypaq kamachikuymi.

32 Taytanpa rantinpi+ sacerdote kananpaq akllasqa runaqa+ hucha pampachanaypaqmi yanapakunqa, chaypaqmi pachakunan linaza llañu qaytumanta pachawan+ hinaspa ñuqapaq sapaqchasqa pachakunawan.+ 33 Paymi chuyanchanan Chuyay-chuyay sutiyuq cuartota,+ carpayta+ hinaspa altarta.+ Chaymantapas animalta quwaspanmi yanapakunan sacerdotekunapa hinaspa runakunapa huchan pampachanaypaq.+ 34 Chaynatam Israelpa mirayninkunapa huchanta pampachanaypaq watapi huk kutita yanapakunqa. Chayqa una-unaypaq kamachikuymi”, nispa.+

Hinaptinmi Aaronqa Moisesta Jehova Dios kamachisqanman hina ruwarqa.

17 Jehova Diosqa Moisestaqa nirqataqmi: 2 “Aaronta, churinkunata hinaspa Israelpa mirayninkunatayá niy: ‘Jehova Diosmi kamachiwaspanchik nin:

3 “Manam pipas torotaqa, malta carnerotaqa nitaq cabrataqa nakananchu samasqaykichikpiqa nitaq huklawpipas. 4 Aswanqa ñuqa Jehova Diospa carpaypa ñawpaqninmanmi pusamunan ñuqa Jehova Diosman quwananpaq. Samasqaykichikpi utaq huklawpipas animalta nakaspaqa huchayuqmi kanqa. Yawarta huklawpi usuchisqanraykum wañuchisqa kanqa. 5 Chaynataqa kamachini huklawpi animalta nakanankumantaqa ñuqa Jehova Diospa carpaypa ñawpaqninman apamunankupaqmi, apamunankuqa sacerdoteman qunankupaqmi. Hinaptinmi ñuqa Jehova Dioswan hawkalla kasqaykichikrayku sacerdoteqa chay animalta quwanqa.+ 6 Hinaspanmi ñuqa Jehova Diospa carpaypa ñawpaqninpi kaq altarman yawarninta challanan, wirantañataqmi ñuqa Jehova Diospaq miskillataña qusnichinan.+ 7 Chaynapim manaña pipas animalkunataqa nakapunqachu cabrakunaman rikchakuq demoniokunapaqqa,+ chayta yupaychaspankum hukwan-hukwan kakuq hina kachkanku.+ Tukuy chay kamachikuykunaqa una-unaypaqmi qamkunapaq hinaspa miraynikichikkunapaq”’, nispa.

8 Chaymantapas ninaykim: ‘Israelpa miraynin kaspapas utaq qamkunawan yachaq* huklaw llaqtayuq kaspapas animaltaqa munasqan lawpiqa manam nakananchu nitaq kañananchu, 9 aswanqa ñuqa Jehova Diospaqmi carpaypa ñawpaqninman pusamunan. Chayta mana ruwaqqa wañuchisqam kanqa.+

10 Israelpa miraynin kaqpas utaq qamkunawan yachaq huklaw llaqtayuq kaqpas ima yawartapas mikuruptinqa,+ paypaq piñakuspaymi wañurachisaq. 11 Runawan animalqa yawarwanmi kawsan.+ Yawarqa kanan huchaykichik pampachasqa kananpaqmi, chaytam altarpi quwanaykichikpaq kamachirqani.+ Quwanaykichik animalqa yawarwanmi kawsan, chaymi yawarllawan huchaykichikmantaqa pampachasqa kankichik.+ 12 Chaymi Israelpa mirayninkunataqa nirqani: “Amam yawartaqa mikunkichikchu,+ amataqmi mikunqakuchu qamkunawan yachaq huklaw llaqtayuqkunapas”, nispa.+

13 Israelpa mirayninpas utaq qamkunawan yachaq huklaw llaqtayuqpas mikunapaq kaq purun animalta wañuchispanqa, yawarnintam pampaman sutuchispa allpawan pampanan.+ 14 Runawan animalqa yawarwanmi kawsan. Ñuqaqa Israelpa mirayninkunataqa nirqaniñam: “Amam imapa yawarnintapas mikunkichikchu yawarwan kawsasqanrayku. Pipas yawarta mikuqqa wañuchisqam kanan”, nispa.+ 15 Israelpa mirayninpas utaq huklaw llaqtayuqpas wañusqa animalta utaq purun animalpa wañuchisqanta mikuruspaqa,+ pachanta taqsakuspam bañakunan, hinaspapas inti siqaykuykamam mana asuykuna* kanan.+ Chaymantañam chuyanchasqa kanqa. 16 Mana pachankuta taqsakuptinkuqa hinaspa mana bañakuptinkuqa huchankuman hinam sasachakuypi kanqaku’”, nispa.+

18 Jehova Diosqa hinallam Moisesta nirqa: 2 “Israelpa mirayninkunatayá niy: ‘Ñuqam Jehova Diosnikichik kani.+ 3 Amam ñawpaqta yachasqaykichik* Egipto nacionpi runakuna hinaqa kankichikchu, amataqmi qunay Canaan allpapi runakunapa imayna kawsasqankutaqa qatipakunkichikchu nitaq ima ruwasqankutapas ruwankichikchu.+ 4 Ñuqapa kamachisqaytam kasukunkichik hinaspapas yachachisqayman hinam kawsakunkichik,+ ñuqaqa Jehova Diosnikichikmi kani. 5 Ñuqapa nisqaykunatawan kamachisqaykunataqa kasukunkichikmi, chaykunata kasukuqqa hinallam kawsakunqa.+ Ñuqaqa Jehova Diosmi kani.

6 Chaymantapas amam ayllullaykichikwanqa kakunkichikchu.+ Ñuqaqa Jehova Diosmi kani. 7 Amam taytallaykiwanqa kakunkichu, amataqmi mamallaykiwanqa kakunkichu. Payqariki mamaykim, amam paywanqa kakunkichu.

8 Amam taytaykipa yapakusqan warminwanqa kakunkichu,+ paywan kakuspaqa taytaykitam pinqayman churawaq.

9 Amam panillaykiwanqa kakunkichu, amataqmi kakunkichu taytaykipa sapaq warmi churinwanqa nitaq mamaykipa warmi wawanwanpas.+

10 Amam warmi willkaykiwanqa mayqinwanpas kakunkichu, manachayqa pinqaypim kawaq.

11 Amam taytaykipa warmi churinwanqa kakunkichu, payqa taytaykimanta panikim.

12 Amam taytaykipa paninwanqa kakunkichu, payqa taytaykimanta tiaykim.+

13 Amam mamaykipa ñañanwanqa kakunkichu, payqa mamaykimanta tiaykim.

14 Amam taytaykipa wawqinpa warminwanqa kakunkichu, payqa tiaykim. Tiaykiwan kakuspaqa tioykitam pinqayman churawaq.+

15 Amam llumchuynikiwanqa kakunkichu,+ payqa churikipa warminmi. Amam paywanqa kakunkichu.

16 Amam wawqikipa warminwanqa kakunkichu,+ manachayqa wawqikitam pinqayman churawaq.

17 Amam pi warmiwanpas warmi wawantinwanqa kakunkichu.+ Amataqmi casarakunkichu entenadaykipa warmi wawanwanqa nitaq entenadoykipa warmi churinwanpas. Chayqa llumpay millakuypaqmi ayllullayki kasqankurayku.

18 Amam warmiki kawsachkaptinraqqa warmikipa ñañanwanqa casarakunkichu nitaq kakunkichu, manachayqa chiqninakunmankum.+

19 Amam killanwan unquchkaq warmiwanqa kakunkichu, payqa killanwan unqusqanraykum mana asuykuna* kachkan.+

20 Amam runamasikipa warminwanqa kakunkichu, manachayqa millakuypaqmi kawaq.+

21 Amam Molek sutiyuq taytachamanqa churikikunataqa qunkichu*.+ Chayta ruwaspaqa ñuqapa sutiytam pinqayman churawaq.+ Ñuqaqa Jehova Diosmi kani.

22 Amam qarimasillaykiwanqa kakunkichu.+ Chay ruwayqa millakuypaqmi.

23 Amam pi qaripas animalwanqa kakunqachu, chayqa llumpay millakuypaqmi. Amataqmi pi warmipas animalwanqa kakunqachu,+ chayqa llumpay millakuypaqmi.

24 Amayá tukuy chaykunata ruwaspaqa millakuypaqqa* kaychikchu. Chaykunata ruwaspam millakuypaq rikurirunku qunay allpapi yachaq runakuna.+ 25 Chayraykum allpaqa mana allinña ñuqapaqqa rikurirun, chaymi huchankurayku chaypi yachaq runakunataqa chay allpamanta qarqusaq.+ 26 Qamkunaqa lliw nisqaykunata hinaspa kamachisqaykunatam kasukunaykichik.+ Qamkunapas chaynataq qamkunawan yachaq huklaw llaqtayuqkunapas chay runakunapa millakuypaq ruwasqankutaqa amam ruwankichikchu.+ 27 Tukuy chay mana allinkunatam qunay allpapi yachaq runakunaqa ruwachkanku,+ chayraykum allpaqa qachachasqa kachkan. 28 Chay runakunapa ruwasqanta mana qatipakuspaykichikqa manam paykuna hina qarqusqachu kankichik. 29 Pipas chay mana allinkunata ruwaspanqa wañuchisqam kanqa. 30 Qamkunaqa lliw kamachisqaytam kasukunaykichik, amamá qatipakunkichikchu chaypi yachaq runakunapa ruwasqankutaqa+ chaynapi millakuypaq mana kanaykichikpaq. Ñuqaqa Jehova Diosnikichikmi kani’”, nispa.

19 Jehova Diosqa Moisestaqa nirqataqmi: 2 “Israelpa llapallan mirayninkunatayá niy: ‘Chuyam kanaykichik ñuqa Jehova Diosnikichikpas chuya kasqayrayku.+

3 Qamkunaqa tayta-mamaykichiktam kuyaspa kasukunaykichik,+ kasukunaykichiktaqmi samana punchawpaq* kamachisqaytapas.+ Ñuqaqa Jehova Diosnikichikmi kani. 4 Amam taytacha-mamachakunataqa yupaychankichikchu,+ amataqmi ninawan chulluchispaqa taytachakunataqa ruwankichikchu.+ Ñuqam Jehova Diosnikichikqa kani.

5 Ñuqa Jehova Dioswan hawkalla kasqaykichikrayku animalta quwaspaykichikqa+ ñuqawan kuyachikunaykichikpaq hinam quwanaykichik.+ 6 Hinaspam aychantaqa chay punchawlla mikunaykichik, puchuruptinqa paqarintinpas mikuwaqchikraqmi. Minchantinpaq puchuruptinñataqmi lliwta kañanaykichik.+ 7 Minchantintaqa amañam chay aychataqa mikunkichikchu millakuypaq kasqanrayku, chay quwasqaykichiktaqa manam chaskisqaykichikchu. 8 Pipas chay aychata mikuruqqa wañuchisqam kanqa ñuqa Jehova Diospaq sapaqchasqa kaqwan mana allinta ruwarusqanrayku.

9 Tarpusqaykichikta cosechaspaqa amam patankamaqa ruturunkichikchu, nitaqmi ususqantapas pallapankichikchu.+ 10 Amataqmi uvaspa puchuntaqa maskapankichikchu nitaq wichisqantapas pallapankichikchu. Chaytaqa saqinaykichikmi wakchakunapaq*+ hinaspa qamkunawan yachaq* huklaw llaqtayuqkunapaq. Ñuqa Jehova Diosqa qamkunapa Diosnikichikmi kani.

11 Amam suwakunkichikchu,+ amam pitapas pantachinkichikchu,+ amataqmi llullakunkichikchu. 12 Amam sutiypiqa yanqakunataqa rimankichikchu+ sutiyta pinqayman ama churanaykichikpaq. Ñuqaqa Jehova Diosmi kani. 13 Amam runamasikichikpa imantapas llullakuspaqa hapikuykunkichikchu nitaq suwankichikchu.+ Llamkapakusuqnikichik runamanpas chay punchawllam llamkasqanmantaqa quykapunkichik.+

14 Mana uyariq runamasikichiktaqa amam ñakankichikchu, amataqmi ñawsa runamasikichik urmarunanpaqqa imatapas purinanpiqa churankichikchu,+ ñuqa Diostam manchakuwanaykichik.+ Ñuqaqa Jehova Diosmi kani.

15 Pipa sasachakuynintapas allichaspaykichikqa allintam allichanaykichik. Amam wakchamanpas nitaq apumanpas sayapakunkichikchu,+ imatapas allichaspaqa allintam ruwanaykichik.

16 Amam runamasikichiktaqa yanqamantaqa tumpankichikchu.+ Amataqmi imatapas ruwankichikchu runamasikichik wañurunanpaqqa*.+ Ñuqaqa Jehova Diosmi kani.

17 Amam sunqullaykichikpipas runamasikichiktaqa chiqninkichikchu.+ Runamasikichik pantaruptinqa rimapayaykunaykichikmi ama qamkunapas huchayuq kanaykichikpaq.+

18 Runamasikichik mana allinta ruwasuptikichikqa amam qamkunapas mana allintaqa ruwankichikchu,+ nitaqmi piñasqallañaqa kankichikchu, runamasikichiktaqa kikikichikta hinam kuyanaykichik.+ Ñuqaqa Jehova Diosmi kani.

19 Lliw kamachisqaykunataqa kasukunaykichikmi. Amam iskay rikchaq animalnikichiktaqa chichukunanpaqqa tupachinkichikchu, amataqmi chakraykichikpipas iskay rikchaq mugutaqa kuskataqa tarpunkichikchu,+ hinaspapas amam pachakunkichikchu iskay rikchaq qaytuwan ruwasqa pachawanqa.+

20 Sichu rimapayasqaña warmiwan huk runa puñuruptinqa, iskayninkum castigasqa kananku warmi manaraq rantisqa chaynataq patronninpa manaraq kacharisqan kasqanrayku. Ichaqa manam wañuchisqachu kananku chay warmi manaraq patronninpa kacharisqan kasqanrayku. 21 Chay qarim pantarusqanrayku ñuqa Jehova Diosman quwanan huk carnerota,+ chaytaqa carpaypa ñawpaqninmanmi apamunan. 22 Sacerdoteñataqmi ñuqa Jehova Diosman quwanan chay runapa pantarusqanrayku qusqan carnerota, hinaptinmi chay runapa huchanqa pampachasqa kanqa.

23 Qunay allpaman chayaruspa tarpusqaykichik sachapa ruruntaqa kimsa watam mana mikunaykichikchu, chay sachapa ruruntaqa manam pallanaykichikchu mana mikunapaq kasqanrayku. 24 Tawa kaq watapiñataqmi ñuqapaq sapaqchasqa kanqa, hinaptinmi kusikuyllawanña ñuqa Jehova Diosman quwankichik.+ 25 Pichqa kaq watapiñam sachapa ruruntaqa mikunkichik. Chayta kasukuptikichikqa astawanmi rurupusunkichik. Ñuqaqa Jehova Diosnikichikmi kani.

26 Amam imatapas yawarniyuqtaqa mikunkichikchu.+

Amam qawaqkunamanqa rinkichikchu, nitaqmi layqataqa ruwankichikchu.+

27 Amam chukchaykichiktaqa* kachiy-kachiytaqa rutukunkichikchu, nitaqmi barbaykichikpa puntantapas hukmanpataqa kaptakunkichikchu.+

28 Wañukuqmantaqa* amam cuerpoykichiktaqa kuchukunkichikchu,+ nitaqmi mana chinkaq marcakunatapas ruwakunkichikchu. Ñuqaqa Jehova Diosmi kani.

29 Amam warmi churikichiktaqa chuchumika* kananpaqqa kamachinkichikchu,+ chayta ruwaspaqa pinqaymanmi churawaqchik. Hinaspapas chuchumikakuna miraruptinmi mana allinkuna munapayaqllaña kawaqchik.+

30 Samana punchawpaq* kamachisqaytaqa kasukunaykichikmi,+ kasukunaykichiktaqmi carpaypaq tukuy ima kamachisqaytapas. Ñuqaqa Jehova Diosmi kani.

31 Amam qayaqkunamanqa nitaq qawaqkunamanqa rinkichikchu,+ chayta ruwaspaqa millakuypaqmi kankichik. Ñuqaqa Jehova Diosnikichikmi kani.

32 Yuyaqkunapa ñawpaqninpiqa respetasqaykichikraykum sayarinaykichik,+ paykunataqa kuyanaykichikmi hinaspapas kasukunaykichikmi,+ chaynataqmi ñuqa Diostapas manchakuwanaykichik.+ Ñuqaqa Jehova Diosmi kani.

33 Amam qamkunawan yachaq huklaw llaqtayuq runataqa ñakarichinkichikchu.+ 34 Paykunaqa llaqtamasikichik hinam kanan, kikikichikta hinataqmi kuyanaykichikpas.+ Qamkunapas Egipto nacionpim yachapakuqkuna karqankichik.+ Ñuqaqa Jehova Diosnikichikmi kani.

35 Imatapas qunakuspaykichikqa ama suwakuspam imam kaqta tupunaykichik, pesanaykichik hinaspa yupanaykichik.+ 36 Balanzaykichikpas imam kaqtam pesanan, balanzaykichikpi rumichapas imam kaq llasaqmi kanan. Kawsayta, vinota utaq aceiteta tupunaykichikpas imam kaq tupuqmi kanan.+ Ñuqaqa Egipto nacionmanta hurqumusuqnikichik Jehova Diosnikichikmi kani. 37 Lliw nisqaykunata hinaspa kamachisqaykunatayá kasukuychik.+ Ñuqaqa Jehova Diosmi kani’”, nispa.

20 Jehova Diosqa Moisestam hinalla nirqa: 2 “Israelpa mirayninkunatayá niy: ‘Qamkunamanta pipas utaq qamkunawan yachaq* huklaw llaqtayuq runakunapas churinkunata Molek sutiyuq taytachaman quspanqa, wañuchisqam kanqa.+ Llaqtamasinkunam wañunankama rumiwan chuqapananku. 3 Molek taytachaman churinkunata qusqanraykum ñuqaqa chay runapaq piñakuspay wañurachisaq. Chayta ruwaspanqa chuya sutiyta hinaspa carpaytapas pinqaymanmi churan.+ 4 Pipas Molek taytachaman churin utaq wawan quqta llaqtamasinkuna rikuchkaspanku mana wañuchiptinkuqa,+ 5 ñuqam chay runapaq hinaspa ayllunpaq piñakusaq.+ Wañuchisaqmi chay runata chaynataq paywan kuska chuchumika* hina Molek taytachata yupaychaspa huchallikuqkunatapas.

6 Pipas layqa ruwaqkunaman utaq qawaqkunaman+ rispa ñuqata qipanchawaqniytaqa piñakuspaymi wañurachisaq.+

7 Qamkunaqa ñuqapaq sapaqchasqa chuya runaykunam kanaykichik+ Jehova Diosnikichik kasqayrayku. 8 Lliw kamachisqaykunatam kasukunaykichik.+ Ñuqaqa sapaqchaqnikichik Jehova Diosmi kani.+

9 Pipas taytanta utaq mamanta ñakaqqa wañuchisqam kanan.+ Taytanta utaq mamanta ñakasqanrayku wañunanpaqqa kikillanmi huchayuq.

10 Pipas runamasinpa warminwan puñuruspanqa wañuchisqam kanan, iskayninkum wañuchisqa kananku.+ 11 Pipas taytanpa warminwan puñuruspanqa taytantam pinqayman churan,+ iskayninkum wañuchisqa kananku, kikillankum huchayuq kanku wañunankupaqqa. 12 Pipas llumchuyninwan puñuruqqa iskayninkum wañuchisqa kananku, kikillankum huchayuq kanku wañunankupaqqa.+ Chay ruwasqankuqa mana ruwana llumpay millakuypaqmi.

13 Pi qaripas qarimasillanwan kakuqqa iskayninkum wañuchisqa kananku, kikillankum huchayuq kanku wañunankupaqqa. Chay ruwasqankuqa mana ruwana llumpay millakuypaqmi.+

14 Pipas huk warmiwan mamantinwan kakuqqa millakuypaqta ruwarusqanraykum+ kañasqa kanan paypas hinaspa chay warmikunapas.+ Chaytaqa ruwanaykichik mana allinkunata chinkachinaykichikpaqmi.

15 Pi qaripas animalwan kakuqqa wañuchisqam kanan, chay animaltapas wañuchinaykichikmi.+ 16 Pi warmipas animalwan kakuqqa wañuchisqam kanan,+ chay animaltapas wañuchinaykichikmi. Chay ruwaqkunaqa kikillankum huchayuq kanku wañunankupaqqa.

17 Pipas mamanmanta paninwan utaq taytanmanta paninwan kakuqqa, millakuypaq kaqtam ruwarun.+ Chaymi llapallaykichikpa qayllaykichikpi iskayninku wañuchisqa kananku. Payqa paninta pinqayman churasqanraykum huchayuq.

18 Pi qaripas killanwan unquq warmiwan kakuqqa wañuchisqam kanan, wañuchisqataqmi kanan warmipas, wañuchisqaqa kananku warmipa yawarninta mana kaqpaqpas hapisqankuraykum.+

19 Amam pipas taytanpa paninwanqa nitaq mamanpa ñañanwanqa kakunqachu, chayta ruwaspaqa tiantam pinqayman churanman.+ Hinaspapas iskayninkum huchankuman hina sasachakuypi kanqaku. 20 Pipas tionpa warminwan puñuqqa tiontam pinqayman churan,+ chayta ruwaspanqa chay warmiwan kuskam wañuchisqa kanan manaraq churin kachkaptin. 21 Pipas wawqinpa warminwan casarakuspanqa mana allinta ruwasqanraykum wawqinta pinqayman churachkan.+ Chayta ruwaspanqa chay warmiwan kuskam wañuchisqa kanan manaraq churin kachkaptin.

22 Lliw nisqaykunata hinaspa kamachisqaykunatam+ kasukunaykichik,+ kasukuptikichikqa manam qarqusqaykichikchu qusqay allpamantaqa.+ 23 Amam chaypi yachaq runakunapa imayna kawsasqankutaqa qatipakunkichikchu,+ chay runakunaqa tukuy chay mana allinkunata ruwaspankum millakuypaqña ñuqapaqqa kachkanku.+ 24 Chaymi nirqaykichik: “Ñuqam qamkunaman chaypi kaq allpakunata qusqaykichik, chay allpakunaqa tukuy imapa kanan allpam*.+ Ñuqaqa wakin llaqtakunamanta akllaqnikichik Jehova Diosmi kani”, nispa.+ 25 Qamkunaqa sumaqtam yachanaykichik ima animal mikunapaq utaq mana mikunapaq kasqanta.+ Amamá qachachakunkichikchu mana mikuna animalkunata mikuruspaqa alton pawaqña utaq qasqunpa puriqña kaptinpas.+ 26 Qamkunaqa chuyam kanaykichik ñuqa Jehova Diospas chuya kasqayrayku.+ Ñuqapaq kanaykichikpaqmi wakin llaqtakunamanta akllarqaykichik.+

27 Pi qaripas utaq pi warmipas layqa ruwaq kaspanqa utaq qawaq kaspanqa wañuchisqam kanan. Llapaykichikmi rumiwan chuqapaspa wañuchinaykichik,+ chaykunata ruwasqankuraykum kikillanku huchayuq kanku wañunankupaqqa’”, nispa.

21 Jehova Diosqa Moisestaqa nirqataqmi: “Sacerdote Aaronpa churinkunatayá niy: ‘Amam qamkunaqa asuykunkichikchu llaqtamasikichik wañukuptinqa, manachayqa qachachasqa hinam* kawaqchik.+ 2 Ichaqa asuykuwaqchikmi tayta-mamaykichik, churikichik utaq wawqikichik wañukuptinqa. 3 Asuykuwaqchiktaqmi manaraq qariwan puñuq utaq manaraq casarasqa kuyay panikichik wañukuptinpas. Chaywanpas paykunaman asuykuspaykichikqa qachachasqa hinam kankichik. 4 Amam asuykunkichikchu llaqtamasikichikpa warmin wañukuptinpas, chaynapi qachachasqa hina mana kanaykichikpaq. 5 Amam chukchaykichiktaqa kachiy-kachiytaqa rutukunkichikchu+ nitaq barbaykichiktapas qatqakunkichikchu*, amataqmi cuerpoykichiktaqa kuchukunkichikchu.+ 6 Ñuqa Diosnikichikpaqqa chuyam kanaykichik,+ amam sutiytaqa pinqaymanqa churankichikchu.+ Qamkunam ñuqa Jehova Diosman imakunatapas kañaspa quwaqniyqa kankichik, quwasqaykichikqa mikuy hinam. Chaymi qamkunaqa chuya kanaykichik.+ 7 Amam casarakunkichikchu chuchumika* warmiwanqa,+ abusasqa warmiwanqa nitaq qusanwan rakinakuruq warmiwanpas.+ Qamkunaqa ñuqa Diosnikichikpaqmi chuya kankichik’, nispa. 8 Israelpa mirayninkunatapas ninaykitaqmi: ‘Qamkunapaqpas sacerdotekunaqa chuyam kanan,+ paykunaqa ñuqaman quwasqaykichiktam mikuyta hina quwanku. Chaynaqa kanan ñuqa Jehova Dios chuya kasqayraykum,+ ñuqam qamkunataqa ñuqapaq sapaqcharqaykichik’, nispa.

9 Chaymantapas Aaronpa churinkunataqa ninkim: ‘Sacerdotepa warmi churin chuchumika kaspanqa taytantam pinqayman churan. Chaymi warmi churinqa kañasqa kanan.+

10 Sacerdotekunata kamachiqñataqmi pipas wañukuptinqa chukchan ñachqasqalla kanan, manataqmi pachantapas llikinanchu.+ Payqa miski asnaq aceiteta umanman talliptinkum akllasqa karqa,+ akllasqataqmi karqa paypaq pachawan pachakunanpaqpas.+ 11 Chay kamachiqqa manam pi wañukuqmanpas* asuykunanchu+ tayta-mamanña kaptinpas, chaynapi qachachasqa hina mana kanankupaq. 12 Manataqmi carpaymantaqa lluqsinanchu, nitaqmi carpaytaqa pinqaymanqa churananchu.+ Payqa umanman aceiteta tallispa ñuqapaq sapaqchasqa kaqmi.+ Ñuqaqa Jehova Diosmi kani.

13 Sacerdotekunata kamachiqqa casarakunan manaraq qariwan puñuq warmiwanmi.+ 14 Hinaspapas llaqtamasin warmillawanmi casarakunan. Manam casarakunanchu viudawanqa, qusanwan rakinasqa warmiwanqa, abusasqa warmiwanqa nitaq chuchumika warmiwanqa. 15 Chaynapi mirayninta ama pinqayman churananpaq.+ Ñuqaqa sapaqchaqnikichik Jehova Diosmi kani’”, nispa.

16 Jehova Diosqa Moisestaqa nirqataqmi: 17 “Aarontayá niy: ‘Mayqan churikipas utaq miraynikipas unquspanqa utaq imanpas mana allin kaptinqa manam imatapas quwananpaqqa asuykamuwananchu. 18 Manamá pipas asuykamuwananchu ñawsaqa, wiqruqa*, mana allin uyayuqqa, chulla makiyuqqa utaq chulla chakiyuqqa, 19 makin utaq chakin pakisqaqa, 20 muqu wasayuqqa, taksachallaqa*, mana allin qawakuqqa, siqsipakuyniyuqqa, pusllusqa hina aychayuqqa nitaq qari kayninta imanakuruqpas.+ 21 Aaronpa mirayninmanta pipas mana allin kachkaspanqa manam asuykamuwananchu ñuqa Jehova Diospaq imatapas kañapuwananpaqqa. Imanpas mana allin kasqanraykum mana imatapas kañapuwananchu. 22 Ichaqa mikunmanmi ñuqapaq quwasqankumantaqa, mikunmantaqmi ñuqallapaq sapaqchasqa quwasqankumantapas.+ 23 Chayta mikuspanpas carpaypi hatun cortinapa kasqanmanqa manam asuykunanchu+ imanpas mana allin kasqanrayku, manataqmi asuykunanchu altarmanpas.+ Amam carpaytaqa pinqaymanqa churananchu.+ Ñuqaqa Jehova Diosmi kani, qamkunataqa ñuqam sapaqcharqaykichik’”, nispa.+

24 Chaymi Moisesqa chaynata willarqa Aaronman, churinkunaman hinaspa Israelpa mirayninkunaman.

22 Jehova Diosqa kaqmantam Moisesta nirqa: 2 “Aaronwan churinkunaqa amam munasqankutaqa ruwanqakuchu Israelpa mirayninkunapa sapaqchaspa imapas quwasqankuwanqa, chaynapi sutiyta pinqayman ama churanankupaq.+ Ñuqaqa Jehova Diosmi kani. 3 Paykunatayá niy: ‘Pipas miraynikichikmanta mana asuykuna* kachkaspanqa, manam asuykunanchu ñuqa Jehova Diospaq Israelpa mirayninkunapa qusqankumanqa. Asuykuqqa wañuchisqam kanqa.+ Ñuqaqa Jehova Diosmi kani. 4 Aaronpa mirayninkunamanta pipas lepra unquywan+ unquspanqa utaq qari kayninmanta qiya kaqlla lluqsiptinqa,+ amam Israelpa mirayninkunapa ñuqapaq qusqankutaqa mikunankuchu chuyanchasqa* kanankama.+ Manataqmi mikunmanchu wañusqa runata llachparuqta llachparuqpas,+ qari kayninmanta mugun* kikillanmanta lluqsiptinpas,+ 5 mana mikuna achkanpi puriq urukunata llachparuqpas+ utaq mana asuykuna runata llachparuqpas.+ 6 Tukuy chaykunata pipas llachparuqqa inti siqaykuykamam mana asuykuna kanan, hinaspapas bañakunankamam mana mikunanchu imapas quwasqankutaqa.+ 7 Inti siqaykuytam ichaqa chuyaña kasqanrayku mikunman quwasqankumanta mikuytaqa.+ 8 Chaymantapas manam mikunanchu wañusqa animaltaqa nitaq purun animalpa wañuchisqan animaltapas, mikuruspanqa mana asuykunam kanqa.+ Ñuqaqa Jehova Diosmi kani.

9 Aaronwan churinkunaqa kamachisqaytam kasukunanku, mana kasukuspaqa wañurunmankum. Ñuqaqa sapaqchaqnikichik Jehova Diosmi kani.

10 Pipas sacerdotepa mana ayllun kaspanqa manam mikunanchu ñuqapaq sapaqchaspa quwasqankumantaqa.+ Manataqmi mikunanchu samachisqanku huklaw llaqtayuq runakunapas nitaq llamkapakuqnin runakunapas. 11 Ichaqa mikunmanmi rantisqan serviqninqa hinaspa wasinpi naceq serviqninqa.+ 12 Sichu sacerdotepa warmi churin huk aylluwan casarakuruspanqa, manañam mikunanchu ñuqapaq sapaqchaspa quwasqankumantaqa. 13 Sichu sacerdotepa warmi churin manaraq wawayuq kachkaspan viudayaruspanqa utaq qusanwan rakinakuruspanqa, taytanpa wasinman kutispanmi quwasqankumantaqa sipas kayninpi hina taytanwan kuska mikunman.+ Ichaqa manam pipas mikunanchu sacerdotepa ayllun mana kaspanqa.

14 Sichu pi runapas ñuqaman quwasqankumanta kaqta pantaruspan mikuruspanqa, sacerdotemanmi apanqa huk chaynata. Hinaspapas apasqanmantam pichqamanta huknintawanraq yapanan.+ 15 Sacerdotekunaqa manam pinqaymanqa churanankuchu Israelpa mirayninkunapa quwasqankutaqa, chayqa ñuqa Jehova Diospaqmi.+ 16 Chayta ruwaspankuqa ñuqaman quwasqankuta pipas mikuruptinmi Israelpa mirayninkuna huchayuq kanmanku. Ñuqaqa sapaqchaqnikichik Jehova Diosmi kani’”, nispa.

17 Jehova Diosqa Moisestam hinalla nirqa: 18 “Aaronta, churinkunata hinaspa Israelpa mirayninkunatayá niy: ‘Pipas ñuqa Jehova Diospaq imatapas ruwananpaq nisqanrayku utaq kikinmanta quy munasqanrayku kañasqa kananpaq animalta quwaspanqa,+ Israelpa miraynin kaspapas utaq huklaw llaqtayuq kaspapas, 19 ñuqawan kuyachikunanpaqqa apamunmanmi allinnin kaq sano+ torota, malta carnerota utaq chivota. 20 Amam mana allin hinaspa unquq animaltaqa+ apamunanchu, chayna kaptinqa manam chaskisaqchu.

21 Pipas ñuqa Jehova Diospaq imatapas ruwananpaq nisqanrayku utaq kikinmanta quy munasqanrayku animalta quwaspanqa, ñuqawan kuyachikunanpaqmi apamunan allinnin kaq sano torota, carnerota utaq chivota. Chayqa ñuqawan hawkalla kasqanrayku quwasqan ofrendam.+ 22 Chay quwasqan animalqa manam ñawsaqa, chakin pakisqaqa, kuchusqaqa, tiktiyuqqa, heridayuqqa, nitaq pusllusqa hina aychayuqqa kananchu. Manam chayna animaltaqa ñuqa Jehova Diospaqqa apamunanchu, manataqmi altarpipas kañanankuchu ñuqa Jehova Diospaqqa. 23 Kikinmanta quy munasqanku kaptinqa apamunmankum chulla makiyuq utaq chulla chakiyuq torota utaq ovejatapas. Imatapas ñuqa Diospaq ruwanankupaq nisqankurayku chaynata apamuptinkum ichaqa mana chaskisaqchu. 24 Manam ñuqa Jehova Diospaqqa ima animaltapas apamunankuchu runtun takasqataqa, kapasqataqa nitaq imanasqatapas. Chayna animalkunataqa amam quwanqakuchu qusqay allpapiqa. 25 Amam chayna animaltaqa chaskinkichikchu huklaw llaqtayuq runa mikuyta hina ñuqapaq apamuptinqa. Chayna animalkunataqa manam chaskisaqchu mana allin kasqanrayku’”, nispa.

26 Jehova Diosqa kaqmantam Moisesta nirqa: 27 “Vacapa, ovejapa utaq cabrapa naceq uñanqa qanchis punchawmi mamanwan kuska kanan,+ pusaq punchawmantam ichaqa allinña kanqa ñuqa Jehova Diospaq kañasqa kananpaq. 28 Amam chay punchawllaqa vacatawan ovejataqa uñantintaqa nakankichikchu.+

29 Agradecekuspa imapas ñuqa Jehova Diosman quwasqaykichikqa+ ñuqawan kuyachikunaykichikpaq hinam kanan. 30 Chaymantapas hina chay punchawllam quwasqaykichikmantaqa mikunaykichik, amam paqarintinkamaqa imatapas puchunkichikchu.+ Ñuqaqa Jehova Diosmi kani.

31 Ñuqapa kamachisqaykunataqa kasukunaykichikmi.+ Ñuqaqa Jehova Diosmi kani. 32 Amam chuya sutiytaqa pinqaymanqa churankichikchu,+ chaynapi llapallaykichikpa hatunchasqan kanaypaq.+ Ñuqaqa sapaqchaqnikichik Jehova Diosmi kani,+ 33 ñuqaqa Diosnikichik kasqayta yachanaykichikpaq Egiptomanta hurqumusuqnikichikmi kani.+ Ñuqaqa Jehova Diosmi kani”, nispa.

23 Jehova Diosqa hinallam Moisesta nirqa: 2 “Israelpa mirayninkunatayá niy: ‘Ñuqa Jehova Diospaq sapaqchasqa hatun huñunakuykunata+ ruwanaykichikpaqmi runakunata huñunkichik.+

3 Suqta punchaw llamkaspam qanchis kaq punchawpi samankichik ñuqapaq sapaqchasqa samana punchaw* kasqanrayku,+ hinaspam chay punchaw ñuqata yupaychawanaykichikpaq huñunakunkichik. Maypiña kaspapas amam chay punchawqa imapipas llamkankichikchu ñuqa Jehova Diospaq sapaqchasqa samana punchaw kasqanrayku.+

4 Ñuqa Jehova Diospaq hatun huñunakuykunapaq akllasqa punchawkunatam yuyarinaykichik. 5 Punta kaq killapa 14 punchawninpim+ ñuqa Jehova Diospaq pascua punchawta yuyarinkichik,+ chaytaqa yuyarinkichik inti siqaykuymantam.

6 Hina chay killapa 15 punchawninpiñataqmi yuyarinkichik mana levadurawan tanta ruwana punchawta,+ chay punchawqa ñuqa Jehova Diospaq punchawmi. Qanchis punchawpunim mikunkichik mana levadurawan ruwasqa tantata.+ 7 Punta kaq punchawpim ñuqata yupaychawanaykichikpaq hatun huñunakuyta ruwankichik.+ Manam chay punchawqa imapipas llamkanaykichikchu. 8 Aswanqa ñuqa Jehova Diosman quwasqaykichiktam sapa punchaw qanchisnintin punchaw kañapuwankichik. Qanchis kaq punchawpiñataqmi ñuqata yupaychawanaykichikpaq hatun huñunakuyta ruwankichik. Chay punchawqa amam imapipas llamkankichikchu’”, nispa.

9 Jehova Diosqa Moisestaqa nirqataqmi: 10 “Israelpa mirayninkunatayá niy: ‘Qunay allpaman chayaruspaqa, tarpukusqaykichikta cosecharuspam punta kaq rurunmanta+ huk gamillata apankichik sacerdoteman.+ 11 Payñataqmi samana punchaw pasayta ñawpaqman qipaman ñuqa Jehova Diospaq kuyuchinqa, chaytaqa ruwanqa ñuqawan kuyachikunaykichikpaqmi. 12 Gamillata ñawpaqman qipaman kuyuchisqanku punchawmi allinnin kaq yaqa watayuq sano malta carnerota quwankichik, chay carneroqa ñuqa Jehova Diospaqmi kañasqa kanqa. 13 Chaywan kuskatam quwankichik kawsaykunamanta kaq aceitewan chapusqa iskay kilo* harinata, chayta ñuqa Jehova Diospaq kañasqaykichikqa miskillataña asnariqmi. Chaywan kuskatataqmi quwankichik yaqa huk litro* vinotapas. 14 Ñuqaman quwanaykichik kaqta apamuwanaykichikkamam ama mikunkichikchu tantataqa, kawsay harwisqataqa nitaq chayraq cosechasqaykichik kawsaytapas. Kay kamachisqayqa una-unaypaqmi kanqa llapallan miraynikichikkunapaqwan maypiña yachaptikichikpas*.

15 Gamilla apasqaykichik samana punchawpa qatiqnin punchawmantam yupankichik qanchis samana punchawta.+ Yupasqaykichik qanchis semanakunaqa qanchis punchawniyuqmi kanan. 16 Hinaptinmi qanchis kaq samana punchawpa qatiqnin punchawkamaqa 50 punchaw kanqa,+ chayñam kawsaymanta punta kaq ruruntaqa ñuqa Jehova Diospaq apamunkichik.+ 17 Maymi yachasqaykichikmantam apamuwankichik iskay tantata ñawpaqman qipaman kuyuchispa quwanankupaq. Chay tantataqa hornopim ruwankichik, ruwankichikqa levadurawanmi tawa mati masnin harinamanta.+ Chayqa kawsaykunamanta ñuqa Jehova Diosman quwasqaykichik punta kaq rurum.+ 18 Chay tantakunatawan kuskatataqmi quwankichik huk watayuq allinnin kaq sano qanchis malta carnerokunata, huk malta torota hinaspa iskay carnerokunata.+ Chaykunataqa ñuqa Jehova Diospaqmi kañankichik kawsaykunamanta ofrendatawan kuskata, hinaspapas chayta kañaspaykichikqa vinotapas tallinkichikmi. Chaykuna kañasqaykichikqa ñuqa Jehova Diospaqmi miskillataña asnarinqa. 19 Quwankichiktaqmi huk chivochatawan huk watayuq iskay malta carnerokunatapas. Chivochaqa kanqa hucharayku ofrendam,+ chay iskay carnerokunañataqmi kanqa ñuqawan hawkalla kasqaykichikrayku ofrenda.+ 20 Sacerdotem chay iskay carnerokunata ñuqa Jehova Diospaq kuyuchinqa ñawpaqman qipaman, kuyuchinqaqa quwasqaykichik punta kaq rurumanta tantatawan kuskatam. Ñuqa Jehova Diospaq sapaqchaspa quwasqaykichikqa sacerdotepaqmi kanqa.+ 21 Chay punchawpitaqmi ñuqata yupaychawanaykichikpaq hatun huñunakuyta ruwankichik.+ Chay punchawqa amam imapipas llamkankichikchu. Kay kamachisqayqa una-unaypaqmi kanqa llapallan miraynikichikkunapaqwan maypiña yachaptikichikpas.

22 Tarpusqaykichikta rutuspaykichikqa amam patanpi kaqkunatawanqa ruturunkichikchu, nitaqmi ususqantapas pallapankichikchu.+ Chaytaqa saqinaykichikmi wakchakunapaq+ hinaspa qamkunawan yachaq huklaw llaqtayuqkunapaq*.+ Ñuqa Jehova Diosqa qamkunapa Diosnikichikmi kani’”, nispa.

23 Jehova Diosqa Moisestaqa nirqataqmi: 24 “Israelpa mirayninkunatayá niy: ‘Qanchis kaq killapa punta kaq punchawninpim samankichik, chay punchawqa mana qunqanapaq kananpaqmi cornetillata+ pukuspa ñuqata yupaychawanaykichikpaq hatun huñunakuyta ruwankichik. 25 Chay punchawqa amam imapipas llamkankichikchu, aswanqa ñuqa Jehova Diospaq kaqtam kañapuwanaykichik’”, nispa.

26 Jehova Diosqa Moisestaqa nirqataqmi: 27 “Qanchis kaq killapa chunka kaq punchawninqa huchaykichikmanta pampachasqa kanaykichik punchawmi.+ Chay punchawmi ñuqata yupaychawanaykichikpaq hatun huñunakuyta ruwankichik, hinaspam huchasapa kasqaykichikmanta llakisqallaña* kanaykichik,+ hinaspapas animalkunatam ñuqa Jehova Diospaq kañapuwanaykichik. 28 Chay punchawqa amam llamkankichikchu huchaykichikmanta pampachasqa kanaykichik punchaw kasqanrayku,+ chaypaqmi chay punchawqa ñuqa Jehova Diospaq animalkuna kañasqa kanqa. 29 Chay punchawpi pipas mana llakisqa kaqqa* wañuchisqam kanqa.+ 30 Ñuqaqa wañuchisaqmi chay punchawpi pipas mana kasukuspan llamkaqtaqa. 31 Amam chay punchawqa imapipas llamkankichikchu. Kay kamachisqayqa una-unaypaqmi kanqa llapallan miraynikichikkunapaqwan maypiña yachaptikichikpas. 32 Chay punchawqa samanaykichik punchawmi. Chaypaqqa chay killapa isqun kaq punchawpim huchasapa kasqaykichikmanta llakisqallaña kanaykichik,+ chay punchawmi inti siqaykuymanta paqarintin inti siqaykuykama samanaykichik”, nispa.

33 Jehova Diosqa hinallam Moisesta nirqa: 34 “Israelpa mirayninkunatayá niy: ‘Qanchis kaq killapa 15 kaq punchawninpim ramadakuna* ruway hatun punchaw* qallarinqa, chayqa qanchis punchawmi ñuqa Jehova Diospaq kusikunapaq hatun punchaw kanqa.+ 35 Punta kaq punchawpim ñuqata yupaychawanaykichikpaq hatun huñunakuyta ruwankichik, chay punchawqa amam imapipas llamkankichikchu. 36 Qanchis punchawpunim ñuqa Jehova Diospaq kaqta kañapuwankichik. Pusaq kaq punchawpiñataqmi ñuqata yupaychawanaykichikpaq hatun huñunakuyta ruwankichik,+ hinaspapas ñuqa Jehova Diospaq kaqtam kañapuwankichik. Chay huñunakuyqa mana qunqanapaqmi, chay punchawqa amam imapipas llamkankichikchu.

37 Chaynatam ñuqa Jehova Diospaq hatun huñunakuykunata ruwankichik,+ hinaspam chay huñunakuykunapi ñuqa Jehova Diospaq kañankichik animalkunata+ hinaspa kawsaykunamanta ofrenda qusqankuta,+ chaymantaqmi vinotapas tallinkichik.+ Tukuy chaytaqa tupasqan punchawman hinam ruwankichik. 38 Chaykunata quwaspaykichikpas ñuqa Jehova Diosmanqa hinallam quwanaykichik sapa semana samana punchawpi+ apamuwanaykichikta, ñuqapaq imapas quwanaykichik kaqkunata,+ imatapas ruwanaykichikpaq nisqaykichikrayku quwanaykichikta+ hinaspa kikikichikmanta quway munasqaykichiktapas.+ Tukuy chaykunataqa ñuqa Jehova Diosmanmi quwanaykichik. 39 Chaymantapas cosecha huñuyta tukuruspaykichikmi ñuqa Jehova Diospaq qanchis punchawpuni hatun huñunakuyta ruwankichik,+ chayqa qanchis kaq killapa 15 kaq punchawninpim qallarinan. Punta kaq punchawpi hinaspa pusaq kaq punchawpim samankichik.+ 40 Chaymantapas punta kaq punchawpim huñunkichik allinnin sachakunapa rurunkunata, palmerapa llaqinkunata*,+ kallmasapa sachakunapa kallmankunata hinaspa wayqukunapi wiñaq alamo sutiyuq sachapa kallmankunata. Hinaspam qanchis punchawpuni ñuqa Jehova Diospaq kusisqallaña kankichik.+ 41 Kay hatun huñunakuytaqa ñuqa Jehova Diospaqmi qanchis kaq killapi yuyarinaykichik, watapim qanchis punchawpuni yuyarinaykichik.+ Tukuy chaytam una-unaypaq kamachikichik qamkunapaq hinaspa miraynikichikkunapaq. 42 Qanchis punchawpunim Israelpa lliw mirayninkuna ramadakunapi yachankichik,+ 43 chaynapim qipa wiñaykuna yachanqaku+ Egiptomanta qamkunata hurqumuptiy ramadakunapi yachasqaykichikta.+ Ñuqaqa Jehova Diosnikichikmi kani’”, nispa.

44 Chaynatam Moisesqa Israelpa mirayninkunaman willarqa Jehova Diospa kamachisqan hatun punchawkunamanta*.

24 Jehova Diosqa kaqmantam Moisesta nirqa: 2 “Israelpa mirayninkunatayá kamachiy aceitunasmanta hurqusqa aceiteta* apamunankupaq, chaytaqa apamunanku achki hinalla ratananpaqmi.+ 3 Aaronmi carpapi kaq achki hinalla ratananpaq qawanan, chay achkiqa ñuqa Jehova Diospaqmi tukuy tuta hinalla ratanan, chay achkiqa ratanan baulniyta rakiq hatun cortinapa ñawpaqninpim. Kayqa una-unaypaq kamachikuymi kanqa qamkunapaq hinaspa miraynikichikkunapaqpas. 4 Aaronmi ñuqa Jehova Diospaq qurimanta candelabropa mecheronkuna allinlla kananpaq qawanan.+

5 Chaymantam harinamanta ruwanki uchkuyuq 12 ruyru tantata, sapa tantatam ruwanki iskay kilo* harinawan. 6 Hinaspam chay tantata patananki suqtatakama qurimanta mesapi,+ chaytaqa patananki ñuqa Jehova Diospaqmi. 7 Chay sapa patanasqa tantapa hawanmanñataqmi churanki sachapa miski asnaq wiqinta*,+ hinaspam chay miski asnaqta tantapa rantinpi ñuqa Jehova Diospaq kañapuwanki. 8 Hinaspapas sapa samana punchawmi* chay tantakunataqa ñuqa Jehova Diospaq churanki.+ Chayqa qamkunawan una-unaypaq contrato* ruwasqaymi. 9 Chay tantakunaqa Aaronpaqwan churinkunapaqmi kanqa,+ chaytam mikunqaku ñuqapaq sapaqchasqa lawpi.+ Chay tantakunaqa ñuqa Jehova Diospaq kañapuwasqaykichikmanta chuyay-chuyay kaqmi, hinaspapas sacerdotepaqmi. Chayqa una-unaypaq kamachikuymi”, nispa.

10 Israelpa mirayninmanta kaq huk warmipam karqa qari wawan, chay warmipa qusanñataqmi karqa Egipto nacionniyuq.+ Chay warmipa wawanmi samasqankupi Israelpa miraynin runawan maqanakuyta qallaykurqaku. 11 Hinaptinmi chayna maqanakuchkaptinku chay runaqa Diospa sutinmanta mana allinkunata rimayta qallaykurqa, hinaspapas Diostam ñakayta qallaykurqa.+ Chaymi chay runataqa Moisesman pusarqaku.+ Chay runapa mamanpa sutinmi karqa Selomit, abuelonpa sutinñataqmi karqa Dibri. Abuelonqa karqa Dan ayllumantam. 12 Hinaptinmi chay runataqa wichqarurqaku Jehova Diospa ima nisqan yachakunankama.+

13 Chaymantam Jehova Diosqa Moisesta nirqa: 14 “Ñakawaqniy runatayá samasqaykichikmanta hawaman hurquy, hinaptinmi chay runapa rimasqanta lliw uyariqninkuna makinkuta chay runapa umanman churananku. Chaymantañataqmi lliw runakuna rumiwan chuqapananku.+ 15 Israelpa mirayninkunataqa ninkitaqmi: ‘Pipas ñuqa Diosta ñakawaqniyqa rimasqanman hinam wañunan. 16 Ñuqa Jehova Diospa sutiymanta mana allinta rimaqqa wañunanpunim.+ Llapallaykichikmi qamkuna kasta kaptinpas utaq qamkunawan yachaq* huklaw llaqtayuq kaptinpas rumiwan chuqapaspa wañuchinaykichik, chayna wañuchisqamá kanan sutiymanta mana allinta rimasqanrayku.

17 Pipas runamasinta wañuchiqqa kikinpas wañuchisqam kanan.+ 18 Pipas hukpa uywa animalninta wañurachiqqa huk chaynatam sayachipunan. 19 Pipas runamasinta imanaruqtaqa kikintapas ruwasqanta hinam ruwanaykichik.+ 20 Runamasinpa tullunta pipas pakiruptinqa paypatapas pakinaykichikmi, kirunta wichirachiptinqa paypatapas wichichinaykichikmi, ñawinta imanaruptinpas chaynallatam kikintapas ruwanaykichik.+ 21 Pipas hukpa animalninta wañurachispanqa huk chaynatam sayachipunan,+ chaynataqmi runata wañurachispanqa kikinpas wañuchisqa kanan.+

22 Chay kamachikuyqa hina chaynallam kanqa qamkunapaqpas hinaspa qamkunawan yachaq huklaw llaqtayuqkunapaqpas.+ Ñuqaqa Jehova Diosnikichikmi kani’”, nispa.

23 Chaymantam Moisesqa Israelpa mirayninkunaman chaykunata willarqa, hinaptinmi paykunaqa Diosta ñakaq runata maymi kasqankumanta hawaman hurqurqaku, hinaspam rumiwan chuqaparurqaku.+ Chaynatam Israelpa mirayninkunaqa Moisesta Jehova Diospa kamachisqanman hina ruwarqaku.

25 Jehova Diosqa Sinai urqupim kaqmanta Moisesta nirqa: 2 “Israelpa mirayninkunatayá niy: ‘Qunay allpaman chayaruspaykichikqa+ ñuqa Jehova Diospa kamachisqayman hinam chay allpata samachinkichik.+ 3 Suqta watam chakraykichikpi tarpunkichik, uvasnikichikpa kallmankunata rawmankichik hinaspa cosechaykichikta huñunkichik.+ 4 Qanchis kaq watapim ichaqa allpaykichikta watapuni ñuqa Jehova Diospa kamachisqayman hina samachinkichik. Amam chay wataqa tarpukunkichikchu nitaq uvasnikichikpa kallmantapas rawmankichikchu. 5 Amataqmi cosechasqaykichikmanta ususqankuna wiñamuqtapas cosechankichikchu, nitaqmi kallman mana rawmasqa uvasnikichikpa ruruntapas pallankichikchu. Chay qanchis kaq watapiqa watantinmi allpaykichikqa samanan. 6 Chayna kaptinpas kikillanmanta wiñaqkunataqa mikuwaqchikmi, mikunmantaqmi serviqnikichikkunapas, llamkapakusuqnikichik runakunapas hinaspa qamkunawan yachaq* huklaw llaqtayuqkunapas. 7 Mikunmankutaqmi llaqtaykichikpi kaq uywa animalkunapas hinaspa purun animalkunapas. Kikillanmanta wiñaqtaqa lliwtam mikuwaqchik.

8 Chaymantapas 49 watakuna kananpaqmi qanchis samana watakunata yupankichik. 9 Chaymantam qanchis kaq killapa chunka kaq punchawninpi waqrata kallpawan pukunkichik, pukunkichikqa lliw yachasqaykichik allpapi uyarinankupaqmi. Chay punchawqa huchaykichikmanta pampachasqa kanaykichik punchawmi.+ 10 Ñuqapaqmi sapaqchankichik 50 kaq watata, hinaspam chay wataqa llapallanman willakunkichik hukpa makinpi kaqkuna kacharisqa kanankumanta.+ Kusikunapaq wata kasqanraykum sapakama chakraykichikta kutichikunkichik hinaspa aylluykichikmanpas kutikunkichik.+ 11 Chay 50 kaq wataqa llapallaykichikpaqmi kusikunaykichik wata kanqa. Chay wataqa amam tarpunkichikchu, amataqmi cosechasqaykichikmanta ususqankuna wiñamuqtapas cosechankichikchu nitaq kallman mana rawmasqa uvasnikichiktapas pallankichikchu.+ 12 Chay wataqa ñuqapaq sapaqchasqa kusikunapaq watam. Chay wataqa kikillanmanta imapas wiñamuqllatam mikunkichik.+

13 Chay kusikunapaq watapiqa sapakamam chakraykichikta kutichikunkichik.+ 14 Imatapas rantispaqa utaq imatapas rantikuspaqa* amam suwakunkichikchu.+ 15 Chakrata rantiqpas hinaspa rantikuqpas yupanankum kusikunapaq watamanta hayka wata pasasqanta chaynataq hayka wataraq cosecha qispinantapas.+ 16 Achka wataraq cosecha qispinanpaq kaptinqa chayman hinam rantikunan, as watallaña cosecha qispinanpaq kaptinñataqmi as qullqillapiña rantikunan. 17 Imatapas rantinakuspaykichikqa amam runamasikichikmantaqa llumpaytaqa mañankichikchu,+ aswanqa ñuqa Diosnikichiktam manchakuwanaykichik.+ Ñuqaqa Jehova Diosnikichikmi kani.+ 18 Lliw kamachisqaykunata hinaspa nisqaykunata kasukuspaykichikqa hawkallam kawsakunkichik.+ 19 Tarpusqaykichikpas allintam qispinqa,+ hinaptinmi saksanaykichikkama mikuspa hawkalla kawsakunkichik.+

20 Ichapas ninkichik: “¿Imatataq mikusaqku qanchis kaq watapi imatapas mana tarpuspaykuqa nitaq cosechaspaykuqa?”, nispa.+ 21 Ichaqa amayá llakikuychikchu. Ñuqa yanapaptiymi suqta kaq watapi kimsa watapaq kamaqta cosechankichik.+ 22 Chaymi pusaq kaq watapiña tarpukunkichik, hinaspam isqun kaq watapi cosecha chayamunankama suqta kaq watapi huñusqaykichiktaraq mikunkichik.

23 Qamkunaqa huklaw llaqtayuq hina yachapakuqllam kankichik.+ Chaymi allpataqa mana pipas wiñaypaqqa rantikunanchu+ ñuqapa kasqanrayku.+ 24 Qunay allpapi yachaspaykichikqa rantinakusqaykichik allpataqa kutichinakunaykichikmi.

25 Sichu llaqtamasikichik wakchayaruspan allpanta rantikuruptinqa, hichpa ayllunmi rantinan.+ 26 Sichu allpan rantiq mana kaptinqa atinmanmi wakchayaruq runaqa qullqiyuq rikuriruspan 27 allpan rantiytaqa. Chaypaqqa rantikusqanmanta hayka wataña pasasqantam yupanan, hinaspam hayka valorniyuq kasqanman hina rantiqnin runamanta rantinan.+

28 Rantinanpaq qullqin mana kaptinñataqmi rantiqnin runapa makinpi allpanqa kusikunapaq wata chayamunankama kanan.+ Chay watapiñam allpanqa kaqmanta kikinpa kanqa.+

29 Chaymantapas sichu pipas murallasqa llaqtapi kaq wasinta rantikuruspanqa, atinmanraqmi kaqmanta rantiytaqa+ punta kaq wata manaraq tukuchkaptin. 30 Chay watapi kaqmanta rantiyta mana atiptinmi ichaqa, rantiq runapaqña chay wasiqa kanqa. Kusikunapaq wata chayamuptinpas manañam chay wasitaqa kutichipunqañachu. 31 Mana murallayuq llaqtapi kaq wasim ichaqa kusikunapaq watapi kutichisqa kanqa. Chay wasiqa chakra hinam kutichisqa kanan.

32 Leviy ayllumanta kaqkunam ichaqa llaqtankupi wasinkutaqa+ ima watapipas rantispa kutichikunmanku. 33 Rantiyta mana atiptinkuqa kusikunapaq watapim wasinqa kaqmanta kikinpa kanqa.+ Chay llaqtankupi wasinkuqa Leviy ayllumanta kaqkunallapam.+ 34 Chaymantapas llaqtankupa muyuriqninpi pastoyuq allpankutaqa+ manam rantikunankuchu, chayqa Leviy ayllumanta kaqkunallapam.

35 Sichu hichpaykichikpi yachaq llaqtamasikichik wakchayaruspa sasachakuypi tarikuptinqa, qamkunawan yachaq huklaw llaqtayuqta hinam yanapaykunkichik.+ 36 Amam paymantaqa mirayniyuqtaqa imatapas mañankichikchu,+ chaynapi imanmantapas ama usunanpaq. Ñuqa Diosnikichiktam manchakuwanaykichik.+ 37 Amam qullqikichiktaqa qunkichikchu mirayniyuqta mañanaykichikraykuqa,+ amataqmi mikuynikichiktapas qunkichikchu yapayuqta kutichipisunaykichikraykuqa. 38 Ñuqaqa Jehova Diosnikichikmi kani, ñuqaqa Diosnikichik kasqayta yachanaykichikpaq Canaan allpata qunaypaq+ Egiptomanta hurqumusuqnikichikmi kani.+

39 Pi llaqtamasikichikpas wakchayarusqanrayku kikinta rantinaykichikpaq hamusuptikichikqa,+ amam ñakarichispaykichikqa llamkachikunaykichikchu.+ 40 Aswanqa llamkapakusuqnikichik hina utaq qamkunawan yachaq runa hinam paypas kanqa.+ Chaynam kusikunapaq wata chayamunankama kanqa. 41 Chay wata chayaramuptinmi ichaqa paypas hinaspa churinkunapas ayllunman kutikunqa, hinaspapas ñawpaq abuelonkunapa kaq allpanmi chay watapi kaqmanta kikinpa kanqa.+ 42 Paykunaqa Egiptomanta hurqumusqay serviqniykunam kanku.+ Paykunaqa manam pipapas serviqnin runakuna hinachu rantikusqa kananku. 43 Amam ñakarichinkichikchu,+ ñuqa Diosnikichiktam manchakuwanaykichik.+ 44 Qamkunapa serviqnikichikqa kanan huklaw nacionniyuq runallam, chayna runallatam serviqnikichik kananpaqqa rantinaykichik. 45 Qamkunapa serviqnikichik kananpaqqa rantiwaqchiktaqmi qamkunawan yachaq huklaw llaqtayuq runakunapa churinkutapas+ chaynataq llaqtaykichikpi naceq mirayninkutapas. Paykunallam qamkunapa serviqnikichikqa kanan. 46 Chaymi wañuruptikichikpas churikichikkunapa serviqninraq hinalla kanqaku. Paykunam qamkunapa llamkapusuqnikichik hina kanqa. Amam Israelpa miraynin runamasikichiktaqa ñakarichinkichikchu.+

47 Qamkunawan yachaq huklaw llaqtayuq runa apuyaruptin wakchayaruq llaqtamasikichikñataq kikinta rantikunanpaq rinman, hinaptin huklaw llaqtayuq runa utaq chay runapa ayllun rantiruptinqa, 48 hinallaraqmi chay wakcha runapa pi ayllunpas utaq llaqtamasinpas rantiytaqa atinman.+ 49 Tionpas, tionpa churinpas utaq pi hichpa ayllunpas rantiytaqa atinmanmi.

Apuyaruspanqa hina kikinpas rantiqninman qullqita quykuspanmi pasakunman.+ 50 Chaypaqqa quykunan haykapi rantisqa kasqanman hina hinaspa kusikunapaq wata chayamunankama hayka wataraq faltasqanman hinam,+ chaynapim qusqan qullqiqa hayka wata servisqanman hina kanqa.+ Hayka watakuna servisqanpa chaninqa kanan llamkapakuq runaman sapa punchaw hayka pagasqankuman hinam.+ 51 Sichu kusikuna watapaq achka watakunaraq kaptinqa, chayman hinam qullqinta kutichipunqa rantiqnin runaman. 52 Kusikuna watapaq as watakunallaña kaptinpas chayman hinam qullqinta kutichipunqa rantiqnin runaman. 53 Chay runaqa rantiqnin runapaqmi watan-watan llamkapakuq runa hina llamkanan, amam ñakarichinantaqa saqinkichikchu.+ 54 Mana kikin rantikuyta atiptinmi ichaqa kusikunapaq watapiña churinkunapiwan kacharisqa kanqa.+

55 Israelpa mirayninkunaqa Egiptomanta hurqumusqay serviqniykunam kanku.+ Ñuqaqa Jehova Diosnikichikmi kani’”, nispa.

26 Chaymantapas Diosqa Israelpa mirayninkunaman ninanpaqmi Moisesta nirqa: “Maymi yachasqaykichikpiqa* amam taytacha-mamachataqa ruwankichikchu,+ amataqmi yupaychanaykichikpaqqa+ sayachinkichikchu suytu rumitaqa nitaq llaqllasqa rumitapas.+ Ñuqaqa Jehova Diosnikichikmi kani. 2 Chaymantapas kasukunaykichikmi samana punchawpaq* kamachisqaytaqa, kasukunaykichiktaqmi carpaypaq tukuy ima kamachisqaytapas. Ñuqaqa Jehova Diosmi kani.

3 Ñuqapa kamachisqaykunata hinaspa lliw nisqaykunata hinalla kasukuptikichikqa,+ 4 tiempollanpim parachimusaq,+ hinaptinmi kawsaykuna qispinqa+ hinaspa sachakunapas rurunqa. 5 Trigotapas utaq cebadatapas cosechankichik uvas pallayta qallarinaykichikkamam, uvastapas pallankichik tarpuyta qallarinaykichikkamam. Saksanaykichikkamam imatapas mikunkichik, hinaspapas hawkam kawsakunkichik.+ 6 Ñuqa yanapaptiymi hawkalla kawsakunkichik,+ hinaspapas mana manchakuspam hawka puñukunkichik.+ Manchakuypaq purun animalkunapas manam kanqachu, manataqmi pipas wañuchisunaykichikpaqqa hamunqachu. 7 Aswanqa qamkunam chiqnisuqnikichikta qatikachankichik, hinaspam wañuchinkichik. 8 Qamkunamanta pichqallam qatikachanqa 100 runakunata, 100 runakunañataqmi qatikachanqa 10.000 runakunata, chaynapim chiqnisuqnikichik runakunaqa wañuchisqa kanqaku.+

9 Ñuqawan kuyachikuptikichikqa yanapasqaykichikmi achka churi-wawayuq kanaykichikpaq chaynataq achka mirayniyuq kanaykichikpaq.+ Chaynatam qamkunawan contrato* ruwasqayman hina ruwasaq.+ 10 Taqikichikpi wata kawsay manaraq tukuchkaptinmi, musuq kawsayta taqiman churanaykichikpaq wata kawsayta hurqunaykichik. 11 Chaymantapas carpaytam yachasqaykichikpa chawpinpi churasaq,+ hinaspapas manam saqisqaykichikchu. 12 Ñuqam qamkunapa Diosnikichik kasaq,+ ñuqam qamkunata yanapasqaykichik, qamkunañataqmi runaykuna kankichik.+ 13 Ñuqaqa Jehova Diosnikichikmi kani. Ñuqam hurqumurqaykichik Egipto nacionpi runakunapa makinpi kasqaykichikmanta, yuguykichikta pakichkaq hinam chaytaqa ruwarqani manaña pipapas serviqnin kanaykichikpaq.

14 Chaywanpas nisqaykunata mana uyariptikichikqa, kamachisqaykunata mana kasukuptikichikqa,+ 15 kamachikuyniykunata mana kaqpaqpas hapiptikichikqa,+ tantiasqaykunata wischupakuptikichikqa hinaspa contrato ruwasqanchikman hina mana ruwaptikichikqa+ 16 ñuqam rikurichisaq sasachakuykunata, wañuchikuq unquyta* hinaspa llumpay rupapakuyta. Chaykunawanmi antallataña qawakunkichik hinaspa iquyankichik. Tarpusqaykichikpas yanqapaqmi kanqa chiqnisuqnikichik runakuna apakuptin.+ 17 Qamkunata manaña yanapaptiymi chiqnisuqnikichikpas munasqanta ruwasunkichik,+ hinaptinmi mana pipa qatisqan kachkaspaykichik ayqikunkichik.+

18 Chaywanpas hinalla mana kasukuspaykichikqa qanchis kuti chaynatawanraqmi huchaykichikman hina ñakarinkichik. 19 Rumi sunqu kaynikichiktam chinkachisaq, manañam parachimusaqchu*,+ kawsaytapas manañam wiñachisaqchu*. 20 Llamkasqaykichikpas yanqapaqmi kanqa, tarpusqaykichikqa manam qispinqachu,+ manataqmi sachakunapas rurunqachu.

21 Chaywanpas ñuqata qipanchawaspa mana kasukuspaykichikqa qanchis kuti chaynatawanraqmi huchaykichikman hina ñakarinkichik. 22 Manchakuypaq purun animalkunatam kachaykamusaq,+ hinaptinmi churi-wawaykichikta hinaspa uywa animalnikichikta mikunqa.+ Chaynapim qamkunaqa asllaña kankichik, hinaptinmi ñannikichikpas chunninqa.+

23 Chaywanpas allinnikichikpaq nisqaykunata+ mana kasukuspa hinalla qipanchawaptikichikqa, 24 ñuqapas qamkunatam qipanchasqaykichik, hinaspam kikiypuni qanchis kuti chaynatawanraq huchaykichikman hina ñakarichisqaykichik. 25 Chiqnisuqnikichik runakunatam espadayuqtakama kachamusaq contrato ruwasqanchikman hina mana kasukusqaykichikrayku.+ Llaqtaykichikpi pakakuptikichikpas unquytam rikurichisaq,+ hinaspapas chiqnisuqnikichik runakunapa makinman churasqam kankichik.+ 26 Tanta ruwanaykichikpaq imaykichikpas* tukuptinmi+ chunka warmikuna chulla hornollapiña tantata ruwanqaku, hinaspam llasayninman hina asninkalla rakinakunqaku.+ Ichaqa chayta mikuspapas manam saksankichikchu.+

27 Chaywanpas allinnikichikpaq tukuy chay nisqaykunata mana kasukuspa hinalla qipanchawaptikichikqa, 28 ñuqapas qamkunatam aswanraq qipanchasqaykichik,+ hinaspam kikiypuni qanchis kuti chaynatawanraq huchaykichikman hina ñakarichisqaykichik. 29 Hinaptinmi wañusqa churikichikkunataña mikunkichik.+ 30 Ñuqañataqmi chinkachisaq taytachakuna yupaychanaykichik patakunata+ hinaspa taytachakunapaq incienso kañanaykichik altarkunata. Chaymantapas ayaykichiktam millakuypaq* taytachaykichikkunatawan+ kuskata muntusaq, hinaspam qamkunata millakuspay karunchakusaq.+ 31 Ñuqaqa chinkachisaqtaqmi llaqtaykichiktapas+ hinaspa maymi yupaychanaykichik altarkunatapas, manataqmi chaskisaqchu imapas miski asnaq kañapuwasqaykichiktaqa. 32 Ñuqam yachasqaykichik llaqtaykichikta chunnichisaq,+ hinaptinmi chiqnisuqnikichik runakunapas manchakuywan qawanqaku.+ 33 Ñuqaqa tukuy hinastinmanmi chiqichisqaykichik,+ hinaspam chiqnisuqnikichik runakunata espadayuqtakama kachamusaq.+ Hinaptinmi allpaykichikpas hinaspa llaqtaykichikpas chunnispan purmanqa.+

34 Chiqnisuqnikichik runakunapa allpanpi kanaykichikkamam allpaykichikqa chunnispan unayta samanqa. Chay tiempoqa mana samachisqaykichikraykum allpaykichikqa samanqa.+ 35 Chay allpapiraq yachaspaykichik samana watakunapi mana samachisqaykichikmantam chay allpaqa purmasqan watakunapi samanqa.

36 Chiqnisuqnikichikpa allpanpi puchuqkunapa+ sunqunmanmi manchakuyllataña churasaq. Paykunaqa sachapa llaqin* wichimuptinpas manchakuymantam lluptinqaku, lluptinqakuqa wañuchiqninkumanta lluptichkanmankupas hinam. Hinaspankum mana pi qatichkaptillan urmanqaku.+ 37 Mana pi qatichkaptinpas lluptispankum kikinkupura tanqanakuspa urmachinakunqaku. Manam chiqniqnin runakunata kutiriytaqa atinqakuchu.+ 38 Chiqnisuqnikichik runakunapa allpanpim wañunkichik hinaspa chinkankichik.+ 39 Huchaykichikman hinam qamkunamanta puchuqkunaqa chiqnisuqnikichik runakunapa allpanpi ismunkichik.+ Taytaykichikpa huchanpim qamkunaqa ismunkichik.+ 40 Chaynapiñam riqsikunkichik qamkunapas+ chaynataq taytaykichikpas mana allin ruwasqaykichikta hinaspa huchayuq kasqaykichikta. Hinaspapas riqsikunkichikmi ñuqata qipanchawaspa huchayuq kasqaykichikta.+ 41 Chaypaqqa ñuqapas qamkunata qipanchaspaymi+ chiqnisuqnikichik runakunapa allpanpi saqisqaykichikña.+

Chaynaqa kanqa rumi sunqu kasqaykichikmanta wanakunaykichikpaqmi+ hinaspa imapas ruwasqaykichikman hina ñakarinaykichikpaqmi. 42 Hinaptinmi ñuqaqa yuyarisaq Jacobwan,+ Isaacwan+ hinaspa Abrahanwan+ contrato ruwasqayta chaynataq paykunaman qunay allpata. 43 Chay qunay allpapi manaña kaptikichikmi mana samachisqaykichikmanta chay allpaqa chunnisqanrayku samanqa.+ Chaykamam qamkunañataq ñakarinkichik kamachisqaykunata wischupakuspa mana kasukusqaykichikrayku.+ 44 Tukuy chayta ruwaspa chiqnisuqnikichik runakunapa allpanpiña kaptikichikpas ñuqaqa manam pasaypaqqa saqisqaykichikchu,+ nitaqmi pasaypaqta chinkanaykichikkamaqa chiqnisqaykichikchu. Chayta ruwaspayqa manañachá contrato ruwasqanchikman hinañachu ruwachkayman.+ Ñuqaqariki Jehova Diosnikichikmi kani. 45 Miraynikichikpa allinninpaqmi yuyarisaq qamkunawan contrato ruwasqayta,+ ñuqaqa Diosnikichik kanaypaqmi Egipto nacionmanta hurqumurqaykichik huklaw nacionniyuq runakunapa rikusqanta.+ Ñuqaqa Jehova Diosmi kani”, nispa.

46 Tukuy chaytam Jehova Diosqa Sinai urqupi Moisesman willarqa, willarqaqa Israelpa mirayninkunapaq tantiasqanta hinaspa kamachisqantam.+

27 Jehova Diosqa hinallam Moisesta nirqa: 2 “Israelpa mirayninkunatayá niy: ‘Sichu pipas ñuqa Jehova Diospaq runapa valorninta quwananpaq nispanqa,+ 3 medio kilo masnin* qullqitam qunan 20 watayuqmanta 60 watayuqkama kaq qarikunamanta, chay qusqan qullqiqa llasanan carpaypi tantiasqa llasayman hinam. 4 Warmimantañataqmi qunan 342 gramo* qullqita. 5 Pichqa watanmanta 20 watankama qarimantam qunan 228 gramo* qullqita, warmimantañataqmi qunan 114 gramo* qullqita. 6 Huk killayuqmanta pichqa watankama qarimantam qunan 57 gramo* qullqita, warmimantañataqmi qunan 34 gramo* qullqita.

7 60 watanmanta hanaymanñataqmi qarimanta qunan 171 gramo* qullqita, warmimantañataqmi qunan 114 gramo* qullqita. 8 Pipas runapa hayka chanin kasqanta wakcha kasqanrayku mana quyta atispanqa, sacerdotemanmi rinan, hinaptinmi payña tantianqa hayka qullqi qunanta.+ Chaytaqa tantianqa wakcha runapa quy atisqanman hinam.+

9 Chaymantapas ñuqa Jehova Diosman quwanaykichikpaq nisqaykichik animalqa ñuqa Jehova Diospaqmi sapaqchasqa kanan. 10 Amam chay animalpa rantinpiqa huktaqa quwankichikchu allin utaq mana allin kaptinpas. Rantinpi hukta quwaptikichikñataqmi punta quwasqaykichikpiwan ñuqapaq sapaqchasqa kanqa. 11 Mana mikuna hinaspa mana kañapuwanaykichik kaq animalta+ ñuqa Jehova Diospaq sapaqchaspaykichikqa, sacerdotemanmi pusankichik. 12 Payñataqmi allin utaq mana allin kasqanman hina hayka qullqipaq kasqanta tantianan. Hinaptinmi chay tantiasqanman hinaña kanqa. 13 Ichaqa, pipas quwananpaq nisqan animalta rantiyta munaspanqa quwananmi valorninta, hinaspam yapanan hayka qullqi quwasqanman pichqamanta huknintaraq.+

14 Chaymantapas pipas sapaqchasqan wasinta ñuqa Jehova Diosman quwaptinqa, sacerdotem allin utaq mana allin kasqanman hina tantianan wasipa chanin hayka kasqanta. Hinaptinmi chay tantiasqanman hina kanqa.+ 15 Ichaqa, quwasqan wasita rantiyta munaspanqa quwananmi chay wasipa chaninta, hinaspam yapanan hayka qullqi quwasqanman pichqamanta hukninta. Hinaptinmi chay wasiqa kaqmanta paypa kanqa.

16 Chaymantapas pipas sapaqchasqan chakrata ñuqa Jehova Diosman quwaptinqa, chaninmi tantiasqa kanqa tarpunanku mugu hayka yaykusqanman hina. Chaypaqqa huk saco* cebada mugum medio kilo masnin* qullqipaq kanan. 17 Kusikunapaq watapi* sapaqchaspa quwayta munaptinpas chaninqa kanqa hina chaynallam.+ 18 Kusikunapaq wata pasaytaña sapaqchaspa quwayta munaptinqa, sacerdotem tantianqa huknin kusikunapaq watakama hayka chanin kasqanta, hinaptinmi chaninqa asllaña kanqa.+ 19 Ñuqapaq sapaqchasqan allpata rantiyta munaspanñataqmi quwanan chay allpapa chaninta, hinaspam yapanan hayka qullqi quwasqanman pichqamanta hukninta. Hinaptinmi chay allpanqa kaqmanta paypa kanqa. 20 Ichaqa allpanta mana rantispan huk runamanña rantikuruptinqa manañam kaqmanta rantiytaqa atinmanñachu. 21 Kusikunapaq wata chayamuptinñataqmi chay allpaqa ñuqa Jehova Diospaq sapaqchasqa kanqa, chaynapim sacerdotekunapaqña kanqa.+

22 Chaymantapas huk runamanta rantisqan chakrata ñuqa Jehova Diospaq sapaqchaptinqa,+ 23 chaninmi tantiasqa kanan kusikunapaq watakama hayka wataraq faltasqanman hina. Chaytaqa sacerdotem tantianan, hinaptinmi chay punchawlla hayka tantiasqanta qunan.+ Chay qusqanqa ñuqa Jehova Diospaq sapaqchasqam. 24 Kusikunapaq wata chayamuptinñataqmi chay chakraqa rantikamuqnin runapaqña kaqmanta kanqa, chaynam kanan rantikamuqnin runapa kasqanrayku.+

25 Imapas rantinakusqaykichik qullqiqa llasanan carpaypi tantiasqa llasayman hinam. Chay carpaypi kaq llasayqa kanan 11 masnin gramom*.

26 Chaymantapas punta naceq animalnikichiktaqa manañam sapaqchanaykichikchu ñuqa Jehova Diospaqña kasqanrayku.+ Punta naceq toroqa utaq carneroqa ñuqa Jehova Diospam.+ 27 Mana mikuna animalta ñuqapaq sapaqcharuspan kaqmanta paypaq rantiyta munaspanqa quwananmi chaypa chaninta, hinaspam yapanan hayka qullqi quwasqanman pichqamanta hukninta.+ Mana rantiptinñataqmi hayka chanin kasqanman hina rantikusqa kanqa.

28 Chaymantapas ñuqa Jehova Diospaq imapas sapaqchasqaykichiktaqa manam rantiwaqchikchu nitaq rantikuwaqchikchu runaña, animalña utaq allpaña kaptinpas. Ñuqa Jehova Diospaqña kananpaq imapas quwasqaykichikqa chuyay-chuyaymi kanan.+ 29 Chayraykum pitapas wañuchisqa utaq chinkachisqa kananpaq sapaqchasqa kaqtaqa manaña michakuwaqchikchu,+ payqa wañuchisqam kanan.+

30 Chaymantapas allpapi wiñaqkunamanta chunkamanta hukninta*+ qusqaykichikqa ñuqa Jehova Diospaqmi kanqa, chaynam kanan kawsaykunamanta utaq sachapa rurunkunamanta. Chaykunaqa ñuqa Jehova Diospaq sapaqchasqam. 31 Chunkamanta huknin qusqaykichikta imatapas rantiyta munaspaykichikqa quwanaykichikmi chaypa chaninta, hinaspam yapanaykichik hayka qullqi quwasqaykichikman pichqamanta hukninta. 32 Chaymantapas sapa chunka vacakunamanta, ovejakunamanta hinaspa cabrakunamantam hukninta quwanaykichik. Chaypaqqa michiqmi tawnanta haywarispan ukun pasaqta yupaspa sapaqchanan. Chay sapaqchasqan animalkunaqa ñuqa Jehova Diospaqmi kanqa. 33 Amam animal quwasqaykichiktaqa allin utaq mana allin kasqantaqa qawankichikchu, nitaqmi chay animalpa rantinpiqa huktaqa quwankichikchu. Quwayta munaptikichikqa chay animalpas punta quwasqaykichik animalwan kuskam ñuqapaq sapaqchasqa kanqa.+ Manañam rantiytaqa atiwaqchikchu’”, nispa.

34 Jehova Diosqa tukuy chaytam Sinai urqupi Moisesman willarqa Israelpa mirayninkunata kamachinanpaq.+