NEHEMIAS

1 Hacaliaspa churin ñuqa Nehemiasmi*+ Artajerjes 20 wataña kamachichkaptin paypa wasinpi Susa llaqtapi+ kachkarqani, chayqa karqa kislev* sutiyuq killapim. 2 Hinaptinmi Juda allpamanta chayaramurqa wawqiy Hanani+ wakin runakunapiwan. Paykunatam tapurqani kutiq Juda runakunamantawan+ Jerusalen imayna kasqanmanta. 3 Chaymi paykunañataq willawarqa: “Llaqtapi runakunaqa llumpay sasachakuypim hinaspa pinqaypim kallachkanku.+ Llaqtapa murallankunapas tuñisqallañam kakuchkan,+ punkunkunapas kañasqam kachkan”, nispa.+

4 Chaynata willaykuwaptinmi tiyaykuspay waqarqani. Chaymantapas achka punchawmi ayunaspay+ llakiwan Diosta mañakurqani. 5 Kaynatam nirqani: “Llapallanpa respetanan ancha atiyniyuq hanaq pachapi kaq Jehova Diosllayku, qamqa rimasqaykiman* hina ruwaqmi kanki, hinaspapas kuyasuqnikikunatawan kamachikuynikikuna kasukuqkunatam imaña kaptinpas yanapaykunki.+ 6 Ama hina kaspaykiyá mañakusqayta uyariykullaway. Israel runaykikunapaqmi tuta-punchaw mañakamuyki.+ Riqsikunikum Israel runakunapas chaynataq aylluykupas huchallikurusqaykuta.+ 7 Ñuqaykuqa qamta qipanchaspaykum+ Moisesman qusqayki kamachikuynikikunatapas chaynataq tantiasqaykikunatapas mana kasukurqanikuchu.+

8 Amayá qunqaruychu yupaychaqniki Moisesman nisqaykitaqa, paytam nirqanki: ‘Qipanchawaptikichikqa huklawkunamanmi chiqirachisqaykichik.+ 9 Kasukuspa ñuqaman kutirikamuptikichikmi ichaqa maypiña kaptikichikpas huñumusqaykichik,+ hinaspaymi kutichimusqaykichik sutiy riqsichisqa kananpaq akllasqay llaqtaman’, nispa.+ 10 Taytalláy, Israelpa mirayninkunaqa runaykikunam kallaniku. Qanmi atiynikiwan hurqumuwarqankiku.+ 11 Jehova Dioslláy, mañakusqaytayá uyariykullaway. Uyariykuytaqyá sunqumanta kasukuq runaykikunapa mañakusqantapas. Kunanyá yanapaykullaway kamachiq Artajerjes llakipayaykuwananpaq”, nispa.+

Chay punchawkunapiqa kamachiqman vinota haywaqmi karqani.+

2 20 wataña+ Artajerjes+ kamachichkaptinmi vinota aparamurqaku, chayqa karqa nisan killapim. Chay vinotam kamachiqman haywarqani.+ Chay kutipim llumpay llakisqa kachkarqani, chayna llakisqataqa manamá kamachiqqa haykapipas qawawarqachu. 2 Chaymi niwarqa: “Llakisqatam qawayki, ¿imanantaq? Manam unquchkankichu, ¿imanasqataq llakisqa kachkanki?”, nispa. Hinaptinmi llumpayta mancharikurqani.

3 Chaymantam kamachiqta nirqani: “¡Kamachiqlláy unaytayá kawsakuy! Ñawpaq abueloykunapa pampakusqan llaqtam tuñisqallaña kachkan, punkunkunapas kañasqam kachkan, chaymi ñuqaqa llakisqa kachkani”, nispa.+ 4 Kamachiqñataqmi niwarqa: “¿Imatataq munachkanki?”, nispa. Chaynata niykuwaptinmi hanaq pacha Diosta chaylla mañakurqani.+ 5 Hinaspaymi kamachiqta nirqani: “Kuyawaspaykiqa, ama hina kaspayá Juda llaqtaman rinaypaq kachaykullaway, chaynapi ñawpaq abueloykunapa pampakusqan llaqtata hatarichimunaypaq”, nispa.+ 6 Hinaptinmi kamachiqqa waqtanpi warmin tiyachkaptin niwarqa: “¿Haykapitaq kutimunki?”, nispa. Haykapi kutimunayta niykuptiymi+ “riruyá” niwarqa.+

7 Kamachiqtaqa nirqanitaqmi: “Kamachiqlláy, Eufrates mayupa inti siqaykunan+ lawpi kamachiqkunamanyá cartakunata apachiway, chaynapi Juda llaqtakama hawkalla chayanaypaq. 8 Cartataqa apachiwaytaqyá sachaykikunata cuidaq Asafmanpas qirukunata quwananpaq. Chaywanmi ruwachisaq soldadokunapa wasinpa punkunta*,+ llaqtapa murallankunata+ hinaspa yachanay* wasita”, nispa. Kuyakuq Dios yanapawaptinmi+ kamachiq Artajerjesqa cartakunata quwarqa.+

9 Chaymantam chayarurqani Eufrates mayupa inti siqaykunan lawpi kamachiqkunaman, hinaspaymi kamachiqpa cartakuna apachiwasqanta qurqani. Artajerjes kamachiptintaqmi ñuqawan rirqaku soldadokunapa kamachiqninkunapas chaynataq caballopi silladakunapas. 10 Chaymi Bet-horon llaqtayuq Sanbalatwan+ kamachiypi yanapakuq Ammon+ kasta Tobias+ piñakururqaku, paykunaqa manam munarqakuchu Israel runakunata yanapanankutaqa.

11 Chaymantam Jerusalen llaqtaman chayarurqaniku. Kimsa punchawmantam 12 wakin qarikunapiwan tuta hatariruspayku lluqsirqaniku. Manam pimanpas willarqanichu Dios kallpanchawaptin Jerusalen llaqtarayku ima ruwanaymantaqa. Sillakusqay asnollatam pusarqaniku. 13 Chay tutam wayquman rina punkunta lluqsispay+ pasarqani Hatun culebra sutiyuq pukyupa chimpanta.+ Chaymantam chayarurqani qupa wischuna punkuman. Hinaspaymi Jerusalenpa tuñisqa pirqankunatawan kañasqa punkunkunata qawarqani.+ 14 Chaymantam pukyuman rina punkunta+ rispay chayarurqani kamachiqpa ruwachisqan pozoman. Ichaqa sillakusqay asnom chayninta mana pasayta atirqachu. 15 Hina chay tutallam wayqunta rirqani,+ hinaspaymi pirqata qawamurqani. Chaymantam kutikamurqani wayquman rina punkunta.

16 Jerusalenpi kamachiqkunaqa+ manam yacharqakuchu chay tuta mayman risqaytapas nitaq ima ruwasqaytapas. Manamá imam ruwanaytaqa willarqaniraqchu Juda runakunamanpas, sacerdotekunamanpas*, ancha riqsisqa runakunamanpas, kamachiqkunamanpas nitaq wakin llamkaqkunamanpas. 17 Chaymantam paykunata nirqani: “Qawachkankichikmi Jerusalenpa pirqankuna tuñisqallaña kasqantaqa, punkunkunapas kañasqallaña kasqantaqa. Chaynaqa, pirqakunatayá hatarichisun pinqaypi manaña kananchikpaq”, nispa. 18 Paykunamanqa willarqanitaqmi kuyakuq Dios yanapawasqanmantapas+ chaynataq kamachiqpa ima nimuwasqantapas.+ Chaynata niptiymi paykunañataq nirqaku: “¡Pirqasunchikyá!”, nispanku. Chaynatam kallpanchanakurqaku pirqanankupaq.+

19 Chaytam yacharurqaku Bet-horon llaqtayuq Sanbalat, Ammon+ kasta Tobias+ hinaspa Arabia+ lawmanta Guesem. Hinaspankum mana kaqpaqta hina qawawaspanku asikuspa+ niwarqaku: “¿Imatataq ruwachkankichik? Kamachiq Artajerjestam mana kasukuchkankichikchu”, nispa.+ 20 Ñuqañataqmi paykunata nirqani: “Hanaq pacha Dios yanapawaptinkum+ kay pirqataqa hatarichisaqku. Qamkunataqa manam imapas qukusunkichikchu Jerusalen llaqtaqa, manataqmi kay llaqtayuqchu kankichikpas”, nispay.+

3 Sacerdotekunapa kamachiqnin Eliasibmi+ sacerdotemasinkunapiwan ovejakunapa yaykunan punkuta allicharqaku,+ hinaspam Diospaq sapaqchaspanku+ punkuta churarqaku. Sapaqcharqakutaqmi ovejakunapa yaykunan punkumanta pirqatapas Mea torrekama+ hinaspa Hananel torrekama.+ 2 Qatiqnin pirqatañataqmi Jerico llaqtayuq+ runakuna hatarichirqaku. Qatiqnintañataqmi Imripa churin Zacur pirqarqa.

3 Hasenaapa churinkunañataqmi allicharqaku Challwa sutiyuq punkuta.+ Hinaspankum churarqaku punkunta,+ cerrojonkunata hinaspa punkupa trankanta. 4 Qatiqnin pirqatam hatarichirqa Uriyapa churin Meremot.+ Uriyaqa karqa Hakozpa churinmi. Qatiqnin pirqatañataqmi hatarichirqa Berekiaspa churin Mesulam.+ Berekiasqa karqa Mesezabelpa churinmi. Qatiqnin pirqatañataqmi hatarichirqa Banapa churin Sadoc. 5 Qatiqnin pirqatañataqmi Tekoa llaqtayuqkuna+ hatarichirqaku. Paykunamanta ancha riqsisqa runakunam ichaqa hatuntukuqllaña karqaku, chaymi llamkaypi kamachiqkunata mana kasukuyta munarqakuchu.

6 Paseapa churin Joiadawan Besodeyapa churin Mesulamñataqmi allicharqaku Mawka llaqta sutiyuq punkuta.+ Hinaspankum churarqaku punkunta, cerrojonkunata hinaspa punkupa trankanta. 7 Gabaon+ llaqtayuq Melatias hinaspa Mizpa llaqtapa+ hichpan Meronot lawmanta Jadonñataqmi hatarichirqa qatiqnin pirqata. Paykunaqa karqaku Eufrates mayupa inti siqaykunan lawpi kamachiqpa runankunam.+ 8 Harayapa churin Uzielñataqmi hatarichirqa qatiqnin pirqata, Uzielqa karqa quri-qullqimanta imapas ruwaqmi. Hananiasñataqmi hatarichirqa qatiqnin pirqata, payqa karqa perfumekunata ruwaqmi. Paykunam Jerusalen llaqtapa pampanta rumikunawan churarqaku rakta pirqakama.+ 9 Hurpa churin Refayañataqmi hatarichirqa qatiqnin pirqata. Refayaqa karqa Jerusalen llaqtapa partenpi kamachiqmi. 10 Harumafpa churin Jedayañataqmi hatarichirqa qatiqnin pirqata, chayqa karqa wasinpa chimpanpim. Hasabneyapa churin Hatusñataqmi hatarichirqa qatiqnin pirqata.

11 Harimpa+ churin Malkiyawan Pahat-moabpa+ churin Hasubñataqmi hatarichirqaku qatiqnin pirqata chaynataq Hornokuna sutiyuq torreta.+ 12 Qatiqnin pirqatañataqmi hatarichirqa Haloespa churin Salum warmi churinkunapiwan. Salumqa karqa Jerusalen llaqtapa partenpi kamachiqmi.

13 Wayquman rina punkutañataqmi+ allicharqaku Hanunwan Zanoa+ llaqtayuq runa, hinaspankum churarqaku punkunta, cerrojonkunata hinaspa punkupa trankanta. Hatarichirqakutaqmi 445 metro* pirqatapas qupa wischuna punkukama.+ 14 Chay punkutañataqmi allichachirqa Recabpa churin Malkiya, hinaspam churarqa punkunta, cerrojonkunata chaynataq punku trankanankuta. Recabqa karqa Bet-hakerem llaqtapa+ kamachiqninmi.

15 Colozepa churin Salunmi allicharqa pukyuman rina punkuta.+ Qatanta churaspanmi hinarqa punkunta, cerrojonkunata hinaspa punkupa trankanta. Allicharqataqmi pozoman riq yarqapa pirqantapas,+ chayqa karqa Kamachiqpa huertanwan sutichasqa huertapa hichpanpim.+ Allicharqaqa Davidpa llaqtan sutiyuq llaqtamanta+ uraykamuq gradaskamam.+ Salunqa karqa Mizpa+ llaqtapa kamachiqninmi.

16 Azbucpa churin Nehemiasmi karqa Bet-zur llaqtapa+ partenta kamachiq. Paymi qatiqnin pirqata allicharqa Davidpa+ pampakusqanpa chimpanmanta pozokama+ hinaspa soldadokunapa kanan wasikama.

17 Leviy ayllukunañataqmi Banipa churin Reum kamachiptin qatiqnin pirqata allicharqaku. Hasabiasñataqmi llaqtanpa sutinpi allicharqa qatiqnin pirqata, payqa karqa Keila+ llaqtapa partenta kamachiqmi. 18 Paykunapa llaqtamasinkunañataqmi allicharqaku qatiqnin pirqata. Paykunapa kamachiqninmi karqa Henadadpa churin Bavai. Bavaiqa karqa Keila llaqtapa partenta kamachiqmi.

19 Qatiqnintañataqmi allicharqa Jesuapa+ churin Ezer. Paymi allicharqa peleanapaq kaqkunata waqaychana wasipa chimpan pirqa takyachiqta. Ezerqa karqa Mizpa llaqtata kamachiqmi.+

20 Zabaipa churin Barucñataqmi+ kallpanchakuspan allicharqa qatiqnin pirqata. Allicharqaqa pirqa takyachiqmanta Eliasibpa+ wasinman yaykunakamam. Eliasibqa karqa sacerdotekunapa kamachiqninmi.

21 Qatiqnin pirqatañataqmi allicharqa Meremot.+ Allicharqaqa Eliasibpa wasinman yaykunamanta wasinpa cantonkamam. Meremotqa karqa Uriyapa churinmi, Uriyañataqmi karqa Hakozpa churin.

22 Qatiqnin pirqatañataqmi allicharqaku Jordan+ mayu lawpi yachaq* sacerdotekuna. 23 Qatiqnin pirqatañataqmi allicharqaku Benjaminwan Hasub, chay pirqaqa karqa wasinpa chimpanpim. Azariasñataqmi allicharqa wasinpa hichpanpi pirqata. Payqa karqa Maaseyapa churinmi, Maaseyañataqmi karqa Ananiapa churin. 24 Qatiqnin pirqatañataqmi allicharqa Henadadpa churin Binui. Allicharqaqa Azariaspa wasinmanta pirqa takyachiqkamam+ hinaspa esquinakamam.

25 Qatiqnin pirqatañataqmi allicharqa Uzaipa churin Palal. Allicharqaqa pirqata takyachiq pirqapa chimpantam hinaspa kamachiqpa wasinmanta lluqsinapi torrepa chimpantam,+ chay pirqaqa karqa Guardia sutiyuq patiopim.+ Qatiqnin pirqatañataqmi allicharqa Parospa+ churin Pedaya.

26 Qatiqnin pirqatañataqmi allicharqa Ofelpi+ yachaq Diospa wasinpi* yanapakuqkuna*,+ paykunam pirqarqaku Yakuwan sutichasqa punkupa chimpankama.+ Allicharqakutaqmi torretapas.

27 Hatun torrepa chimpanmanta Ofel muqupa murallankamañataqmi allicharqaku Tekoa llaqtayuq+ runakuna.

28 Caballokunapa yaykunan punkupa+ hanaynintam allicharqaku sacerdotekuna. Sapakamam wasinkupa chimpanta allicharqaku.

29 Imerpa churin Sadocñataqmi+ allicharqa wasinpa chimpan pirqata.

Secaniaspa churin Semayañataqmi qatiqnin pirqata allicharqa, payqa karqa intipa qispimunan lawpi punkuta cuidaqmi.+

30 Qatiqnin pirqatañataqmi allicharqa Selemiaspa churin Hananiaswan Hanun. Hanunqa karqa Zalafpa suqta kaq churinmi.

Berekiaspa churin Mesulamñataqmi+ allicharqa wasinpa chimpan pirqata.

31 Qatiqnin pirqatañataqmi allicharqa Malkiya. Allicharqaqa Diospa wasinpi yanapakuqkunapa yachasqankamam, negociantekunapa yachasqankamam.+ Chayqa karqa Cuidaqkunapa punkunpa chimpanmanta qallaykuspa esquinapi cuartokamam. Malkiyaqa quri-qullqimanta tukuy ima ruwaqmi karqa.

32 Quri-qullqimanta tukuy ima ruwaqkunawan negociantekunañataqmi allicharqaku esquinapi cuartomanta qallaykuspa ovejakunapa yaykunan punkukama.+

4 Jerusalen llaqtapa murallanta allichasqaykumantam Sanbalat+ yacharurqa, hinaspam llumpayta piñakurqa, chaymantañataqmi ñuqaykumanta burlakurqa. 2 Llaqtamasinkunapa hinaspa Samaria soldadokunapa qayllanpim burlakuspan nirqa: “¿Imatataq kay katkatillu Juda runakuna ruwachkanku? ¿Pirqata yapamanta hatarichispankuchu animalkunata Diosninkupaq kañanqaku? ¿Yaqachu huk punchawllapi tukurunqaku? ¿Yaqachu waknaña allpa ukumanta kañasqa rumikunata hurquspa pirqarunqaku?”, nispa.+

3 Ammon+ kastamanta Tobiasñataqmi+ nirqa: “Pirqasqankuqa atuq qispiykuptillanpas tuñirunqach”, nispa.

4 Chaymi Diosta mañakurqani: “Diosllayku, ñuqaykumantam burlakuchkanku.+ Mana allinkuna niwasqankutaqa kikinkumanyá kutichiy.+ Paykunataqa chiqniqnin runakunayá llaqtankuman presota apakuchun. 5 Amayá huchankutaqa pampachaychu.+ Paykunaqa kamiwankum”, nispay.

6 Ñuqaykuqa pirqataqa hinallam hatarichirqaniku. Chaymi pirqaqa chawpikamaña karqa. Tukuy sunquykuwanmi llapallayku llamkarqaniku.

7 Ichaqa Jerusalen llaqtapa pirqanta hatarichisqaykutawan allichasqaykuta yacharuspankum llumpayta piñakurqaku Sanbalat, Tobias,+ Arabia+ runakuna, Ammon runakuna hinaspa Asdod runakuna.+ 8 Hinaspam rimarqaku peleaq hamunankupaq. 9 Hinaptinmi ñuqaykuqa Diosta mañakurqaniku, hinaspam tuta-punchaw llaqta cuidaqkunata churarqaniku.

10 Chaywanpas wakin Juda runakunam nirqaku: “Llamkaqkunaqa qalaypaqñam pisiparunku. Manam kaychikan pirqa hatarichiytaqa atisunchu”, nispa.

11 Chaymantapas chiqniwaqniyku runakunam nirqaku: “Mana pipa yachasqallanta yaykuspam wañurachisunchik. Chaynapim llamkasqankuta saqirunqaku”, nispa.

12 Ichaqa paykunapa hichpanpi yachaq* aylluykum hamuspanku sapa kuti niwaqku: “Hamuspankus wañurachiwasun”, nispa.

13 Chaymi tuñisqa pirqakunapi runakunata ayllun-ayllun churarqani. Paykunaqa espadayuqkama, lanzayuqkama hinaspa flechayuqkamam karqaku. 14 Mancharisqallaña kasqankuta qawaspaymi llapallan runakunatawan kamachiqkunata+ nirqani: “Amayá manchakuychikchu.+ Yuyariychik tukuy atiyniyuq hinaspa llapallanpa manchakunan Jehova Diosta.+ Peleaychikyá aylluykichikrayku, churikichikrayku, warmikichikrayku, wasikichikrayku”, nispa.

15 Chiqniwaqniykupa ima ruway munasqantam yacharurqaniku. Paykunapa rimasqantam Dios yanqacharurqa, chayta yacharuspankum kutikurqaku. Hinaptinmi kaqmanta llamkarqaniku. 16 Ichaqa chay punchawmantapacham wakin runaykuna llamkarqaku,+ wakinkunañataqmi karqaku lanzayuq, harkachikunayuq, flechayuq hinaspa qasqu harkachikunayuq. Kamachiqkunañataqmi+ Juda runakunata yanaparqaku. 17 Juda runakunaqa pirqatam hatarichichkarqaku. Imatapas apaqkunaqa huknin makillankuwanmi llamkarqaku, huknin makinkuwanñataqmi lanzankuta hapirqaku. 18 Pirqaqkunapas wiqawninkupi espadayuqkamam llamkarqaku. Waqrata pukuqñataqmi+ waqtaypi karqa.

19 Hinaptinmi llapallan runakunatawan kamachiqkunata nirqani: “Pirqananchikqa hatunsum kakuchkan, ñuqanchikñataqmi karupikama churasqa pirqachkanchik. 20 Chaynaqa, waqrapa waqasqanta uyarispaykichikmi ñuqaykupa kasqaykuman hamunkichik. Diosmi ñuqanchiktaqa yanapawasun”, nispa.+

21 Wakiqniykum achikyasqanmanta tutaykunankama llamkarqaniku, wakiqniykuñataqmi lanzayuqkama karqaniku. 22 Chaymantam runakunata nirqani: “Jerusalen ukupiyá tutaqa kaychik yanapaqnikichikwan kuska. Tutanmi llaqtata cuidankichik, punchawñataqmi llamkankichik”, nispa. 23 Manam pachaykutaqa chustukurqanikuchu ñuqapas, aylluykunapas, yanapaqniykunapas+ nitaq llaqta cuidaqkunapas. Chaymantapas sapakamam alliq* makiykupi lanzayuqkama karqaniku.

5 Chay punchawkunapim warmintinkama quejakurqaku ayllumasinkumanta.+ 2 Wakinmi nirqaku: “Ñuqaykupas chaynataq churi-wawaykupas achkallañam kaniku. Chaymi mana wañurunaykupaq kawsaykunata maskanayku”, nispa. 3 Wakinñataqmi nirqaku: “Manam anchachu kawsayniyku. Chaymi kawsaykunata quwanankupaq quchkaniku chakraykuta, uvas huertaykuta hinaspa wasiykuta”, nispa. 4 Wakinpas nirqakum: “Kamachiqpa mañakusqanta qunaykupaqmi chakraykutawan uvas huertaykuta prendapi quykuniku.+ 5 Ñuqaykuqa ayllullanmi kaniku. Churiykupas paykunapa churinku hinallam. Chaywanpas churiykutam qunayku kanqa serviqnin kananpaq. Wakin warmi churiykupas paykunapa makinpiñam.+ Ichaqa manam imayna kutichimuytapas atinikuchu, chakraykupas chaynataq uvas huertaykupas hukpa makinpiña kasqanrayku”, nispa.   

6 Llakisqa kasqankuta uyarispaymi llumpayta piñakurqani. 7 Chaykunapi yuyaymanaspaymi kamachiqkunatawan ancha riqsisqa runakunata nirqani: “Qamkunaqa ayllullaykichikmantam mirayniyuqta mañachkankichik”, nispa.+

Chaymanta rimanaykupaqmi llapallan runakunata huñururqani. 8 Hinaspam nirqani: “Ñuqaykuqa tukuytam ruwarqaniku Juda ayllunchikkunata kutichimunaykupaq. Paykunaqa huklaw nacionkunaman rantikusqam* karqaku. ¿Qamkunañataqchu ayllunchikta+ rantikurunkichik ñuqayku kutichimunaykupaq?”, nispa. Chaymi paykunaqa mana imatapas rimarirqakuchu. 9 Chaymantapas nirqaniraqmi: “Chay ruwasqaykichikqa manam allinchu. Qamkunaqa Diosta manchakuspam kawsanaykichik,+ chaynapi chiqniwaqninchik runakuna ama burlakuwananchikpaq. 10 Ñuqapas, wawqiykunapas chaynataq yanapawaqniykunapas qullqitawan kawsaykunatam quchkaniku, ichaqa manañam miraynintaqa quwanqakuñachu. Chaynatayá qamkunapas ruwaychik.+ 11 Kunanyá kutichipuychik chakrankuta,+ uvas huertankuta, aceitunas huertankuta hinaspa wasinkuta. Kutichipuychiktaqyá qullqimanta, kawsaymanta, vinomanta chaynataq aceitemanta miraynin mañasqaykichiktapas”, nispa.

12 Paykunañataqmi nirqaku: “Nisqaykiman hinam llapanta kutichipusaqku. Manataqmi miraynintaqa mañakusaqkuñachu”, nispa. Chaymi sacerdotekunata qayarqani, hinaptinmi nisqankuta kasukunankupaq Diospa sutinpi rimachirqani. 13 Chaymantapas pachayta taspispaymi nirqani: “Pipas Diospa sutinpi rimasqanman hina mana ruwaptinqa Diosyá kaynata taspichun. Hinaspapas wasintawan kapuqnintayá qichuchun”, nispa. Chaynata niptiymi llapallan runakuna nirqaku: “¡Chaynayá kachun*!”, nispa. Chaymantam Jehova Dios hatunchayta qallaykurqaku hinaspam nisqankuman hina ruwarqaku.

14 Persia nacionta kamachiq Artajerjesmi+ Juda allpapi kamachinaypaq churawarqa.+ Churawarqaqa 20 wataña+ kamachisqanmanta 32 wata+ kamachisqankamam. Ichaqa chay 12 wata kamachispayqa manam ñuqapaqpas nitaq aylluykunapaqpas mikuytaqa mañakurqanichu quwananku kachkaptinpas.+ 15 Ñawpaqta kamachiqkunam ichaqa runakunamantapas sapa punchaw mañaqku yaqa parte kilo* qullqita mikuypaqwan vinopaq. Paykunapa yanapaqninkunapas runakunatam ñakarichirqaku. Ñuqam ichaqa Diosta manchakuspay+ mana chaytaqa ruwarqanichu.+

16 Ñuqaqa pirqa ruwaypipas yanapakurqanim. Llapallan yanapaqniykunapas yanapakurqakum. Chaywanpas manam ima chakratapas rantirqanikuchu.+ 17 Ñuqawantaqmi mikuqku 150 Juda runakunawan kamachiqkunapas chaynataq huk nacionmanta hamuq runakunapas. 18 Ñuqam sapa punchaw nakachiq kani huk torota, suqta ovejata hinaspa alton pawaqkunata. Sapa chunka punchawmantataqmi vinotapas achkanpi apachimuq kani. Chaywanpas, manam ñuqaqa imatapas runakunamantaqa mañakurqanichu. Mañakuspayqa imapas ruwayninkutachá astawanraq sasachachkayman karqa. 19 Chaymantam Diosta mañakuspay nirqani: “Dios taytalláy, amayá qunqaruychu llapa runakunapaq imapas allinkuna ruwasqaytaqa”, nispa.+

6 Pirqata kaqmanta hatarichisqaymantawan+ lliw uchkunkunata tapachisqaymantam yacharurqaku Sanbalat, Tobias+ chaynataq Arabia+ lawmanta Guesenwan chiqniwaqniyku wakin runakuna. Punkukunataqa manaraqmi churachirqaniraqchu.+ 2 Sanbalatwan Guesemqa cartatam apachimuwarqa: “Ono sutiyuq pampapi kaq llaqtachaman hamuy rimananchikpaq”, nispanku.+ Paykunaqa mana allinta ruwawanankupaqmi qayachimuwarqaku. 3 Chaymi willakuqkunawan willachimurqani: “Imaynamá qamkunawan rimanayraykuqa kay llamkayniyta saqiruyman. Manam hamuymanchu”, nispa. 4 Hina chaynallatam tawa kutikama willachimuwarqa. Ñuqapas nisqayta hinallam willachirqani.

5 Chaywanpas, kaqmantam Sanbalatqa yanapaqninta kachamuwarqa hina chay willakuyllawan. Paywantaqmi apachimuwasqa kicharayachkaq cartata. 6 Chay cartapim nisqa: “Qamsi Juda ayllukunapiwan kamachiq Artajerjespa contranpi churakunaykichikpaq hatarichkankichik.+ Chaytaqsi pirqatapas kaqmanta hatarichichkankichik, hinaspataqsi paykunata kamachiqtukuchkanki. Chaynatam Guesempas+ hinaspa llapallan runakunapas rimachkanku. 7 Chaymantapas, ‘¡Nehemiasmi Juda runakunapa kamachiqnin!’ nispataqsi Jerusalen llaqtapi kaq runakunaman willachimunki. Yanqataq kamachiq Artajerjesman chayta willaykunmanku. Chaynaqa hamuyá rimananchikpaq”, nispa.

8 Hinaptinmi Sanbalatman willachimurqani: “Chay nisqaykiqa llullam. Qanmi chaykunataqa rimachkanki”, nispay. 9 Chiqniwaqniykuqa manchachiwanankupaqmi nirqaku: “Pisiparuspankum pirqaytapas mana tukunqakuchu”, nispa.+ Ichaqa Diosta mañakuspaymi nirqani: “Diosnilláy, kallpanchaykullawayá”, nispay.+

10 Chaymantam Semayaman rirqani wasinpi wichqasqa kachkaptin. Semayaqa karqa Delayapa churinmi. Delayañataqmi karqa Meetabelpa churin. Chaypim Semayaqa niwarqa: “Wañuchisunaykipaqmi tutallan hamunqaku. Chayraykuyá Diospa wasinman* rispanchik chaypi wichqakaramusunchik”, nispan. 11 Ñuqañataqmi nirqani: “¿Kamachiq kachkaspaychu ayqiyman? Hinaspapas, ¿yaqachu kawsaymanraq Diospa wasinman yaykuruspay?+ ¡Manapunim yaykuymanchu!”, nispay. 12 Chaymantam yacharurqani Semayapa willawasqanqa mana Diospa nisqankuna kasqanta. Tobiaswan Sanbalatmi+ Semayamanqa pagarusqaku mana allinkunata rimananpaq. 13 Paykunam pagarusqaku manchachiwananpaq hinaspa huchallichiwananpaq. Chaynapi ñuqamanta mana allinkunata rimaspanku pinqayman churawanankupaq.

14 Chaymi Diosta mañakurqani: “Diosnilláy, Tobiaspawan+ Sanbalatpa ruwawasqantaqa amayá qunqaychu. Noadias sutiyuq willakuq warmipa manchachiwasqantawan wakin willakuqkunapa* manchachiwasqantaqa amataqyá qunqaychu”, nispa.

15 Pirqa ruwaytam tukururqaniku elul killapa 25 punchawninpi. Qispirachirqanikuqa 52 punchawllapim.

16 Chay ruwasqaykuta yacharuspankum chiqniwaqniyku runakuna hinaspa muyuriqniykupi yachaq* runakuna pinqaypi tarikurqaku.+ Chaymi chayraq cuentata qukurqaku Diosniykupa yanapakuyninwan qispirachisqaykuta. 17 Chay punchawkunapim Juda allpapi ancha riqsisqa runakuna+ Tobiaswan cartata apachinakurqaku. 18 Chaynataqa ruwarqaku Juda runakuna kasukunankupaq Tobiasta nisqankuraykum. Tobiasqa karqa Secaniaspa masanmi, Secaniasñataqmi karqa Arapa churin.+ Tobiaspa churin Jeoananñataqmi casarakururqa Mesulampa+ warmi churinwan. Mesulamqa karqa Berekiaspa churinmi. 19 Chaymantapas, Tobiasmantaqa allinllatañam willawaqku. Ñuqapa ima nisqaytañataqmi payman willaqku. Chaymi manchachiwananpaq cartakunata apachimuwaq.+

7 Pirqa ruwayta tukuruptillaykum+ punkunkunata churachirqani.+ Hinaspaymi churarqani punku cuidaqkunata,+ takiqkunata+ hinaspa Leviy aylluta+ yanapakunankupaq. 2 Chaymantam Jerusalenpi kamachinankupaq churarqani wawqiy Hananita+ hinaspa Hananiasta. Hananiasqa karqa soldadokunapa kanan wasipi kamachiqmi.+ Payqa wakinkunamantapas Diosta aswan kasukuqmi karqa,+ hinaspapas confianza runapaqmi hapiqku. 3 Chaymantam paykunata nirqani: “Jerusalen llaqtapa punkunkunataqa inti qispimuytañam kichachinkichik. Tutaykuqtañataqmi sumaqta wichqachinkichik. Jerusalenpi yachaqkunamantam* cuidanankupaq wakinta churankichik maymi kanankupi, wakintañataq wasinkupa chimpanpi”, nispa. 4 Llaqtaqa hatunmi karqa, chaypi kaq runakunam ichaqa aschalla karqa.+ Wasikunapas manaraqmi ruwasqachu karqa.

5 Chaymantam Dios kallpanchawarqa, hinaptinmi huñurqani ancha riqsisqa runakunata, kamachiqkunata hinaspa llapallan runakunata. Chaynapi ima ayllumanta kasqankuman hina listasqa kanankupaq.+ Listapitaqmi tarirurqani punta kutimuqkunapa sutintapas. Chaypim kayna qillqasqa kasqa:

6 “Babilonia nacionta kamachiq Nabucodonosormi+ Juda runakunata presocharuspan nacionninman pusakurqa.+ Chaymantam paykunaqa llaqtankuman kutimurqaku.+ 7 Kutimurqakuqa Zorobabelwan,+ Jesuawan,+ Nehemiaswan, Azariaswan, Raamiaswan, Naamaniwan, Mardoqueowan, Bilsanwan, Misperetwan, Bigvaiwan, Neunwan chaynataq Baanawanmi.

Kutimuq Israel qarikunapa hayka kasqanmi kaykuna:+ 8 Parospa mirayninmantam karqa 2.172 qarikuna. 9 Sefatiaspa mirayninmantam karqa 372 qarikuna. 10 Arapa mirayninmantam+ karqa 652 qarikuna. 11 Paat-moabpa+ churin Jesuapamantawan Joabpa+ mirayninmantam karqa 2.818 qarikuna. 12 Elampa mirayninmantam+ karqa 1.254 qarikuna. 13 Zatupa mirayninmantam karqa 845 qarikuna. 14 Zacaipa mirayninmantam karqa 760 qarikuna. 15 Binuipa mirayninmantam karqa 648 qarikuna. 16 Bebaipa mirayninmantam karqa 628 qarikuna. 17 Azgadpa mirayninmantam karqa 2.322 qarikuna. 18 Adonicampa mirayninmantam karqa 667 qarikuna. 19 Bigvaipa mirayninmantam karqa 2.067 qarikuna. 20 Adinpa mirayninmantam karqa 655 qarikuna. 21 Aterpa mirayninmantam karqa 98 qarikuna. Paykunam karqaku Ezequiaspa mirayninkuna. 22 Hasumpa mirayninmantam karqa 328 qarikuna. 23 Bezaipa mirayninmantam karqa 324 qarikuna. 24 Harifpa mirayninmantam karqa 112 qarikuna. 25 Gabaon+ llaqtayuqkunañataqmi karqa 95 qarikuna. 26 Belen hinaspa Netofa llaqtayuqkunam karqaku 188 qarikuna. 27 Anatot llaqtayuqkunam+ karqaku 128 qarikuna. 28 Bet-azmavet llaqtayuqkunam karqaku 42 qarikuna. 29 Kiryat-jearim,+ Kefira hinaspa Beerot+ llaqtayuqkunam karqaku 743 qarikuna. 30 Rama hinaspa Gueba+ llaqtayuqkunam karqaku 621 qarikuna. 31 Micmas+ llaqtayuqkunam karqaku 122 qarikuna. 32 Betel+ hinaspa Hai+ llaqtayuqkunam karqaku 123 qarikuna. 33 Huklawpi kaq Nebo llaqtayuqkunam karqa 52 qarikuna. 34 Huknin Elampa mirayninmantam karqa 1.254 qarikuna. 35 Harim llaqtayuqkunam karqaku 320 qarikuna. 36 Jerico llaqtayuqkunam karqaku 345 qarikuna. 37 Lod, Hadid hinaspa Ono+ llaqtayuqkunam karqaku 721 qarikuna. 38 Senaa llaqtayuqkunam karqaku 3.930 qarikuna.

39 Sacerdotekunañataqmi+ karqa kaykuna: Jedayapa mirayninmantam karqa 973 qarikuna. Paykunam karqaku Jesuapa ayllunmanta. 40 Imerpa mirayninmantam karqa 1.052 qarikuna. 41 Pasjurpa mirayninmantam+ karqa 1.247 qarikuna. 42 Harimpa+ mirayninmantam karqa 1.017 qarikuna.

43 Leviy ayllumantañataqmi+ karqa 74 qarikuna. Paykunam karqaku Cadmielpa+ ayllunmanta Jesuapa mirayninkuna. Cadmielpa ayllunkunaqa karqa Hodevapa mirayninkunam. 44 Takiqkunam+ karqa Asafpa+ mirayninmanta 148 qarikuna. 45 Punku cuidaqkunam+ karqa 138 qarikuna. Paykunam karqaku: Salumpa mirayninkuna, Aterpa mirayninkuna, Talmonpa mirayninkuna, Akubpa+ mirayninkuna, Hatitapa mirayninkuna hinaspa Sobaipa mirayninkuna.

46 Diospa wasinpi* yanapakuqkunañataqmi*+ karqa: Ziapa mirayninkuna, Hasufapa mirayninkuna, Tabaotpa mirayninkuna, 47 Kerospa mirayninkuna, Siapa mirayninkuna, Padonpa mirayninkuna, 48 Lebanapa mirayninkuna, Hagabapa mirayninkuna, Salmaipa mirayninkuna, 49 Hananpa mirayninkuna, Guidelpa mirayninkuna, Gaarpa mirayninkuna, 50 Reayapa mirayninkuna, Rezinpa mirayninkuna, Nekodapa mirayninkuna, 51 Gazampa mirayninkuna, Uzapa mirayninkuna, Paseapa mirayninkuna, 52 Besaipa mirayninkuna, Meunimpa mirayninkuna, Nefusesimpa mirayninkuna, 53 Bacbucpa mirayninkuna, Hacufapa mirayninkuna, Harurpa mirayninkuna, 54 Bazlitpa mirayninkuna, Meidapa mirayninkuna, Harsapa mirayninkuna, 55 Barcospa mirayninkuna, Sisarapa mirayninkuna, Temaapa mirayninkuna, 56 Neziaspa mirayninkuna hinaspa Hatifapa mirayninkuna.

57 Salomonpa serviqninkunapa mirayninmantañataqmi karqa:+ Sotaipa mirayninkuna, Soferetpa mirayninkuna, Peridapa mirayninkuna, 58 Jaalapa mirayninkuna, Darkonpa mirayninkuna, Guidelpa mirayninkuna, 59 Sefatiaspa mirayninkuna, Hatilpa mirayninkuna, Pokeret-hazebaimpa mirayninkuna, Amonpa mirayninkuna. 60 Diospa wasinpi yanapakuqkunawan+ Salomonpa serviqninkunapa mirayninkunam karqa 392.

61 Kutimurqakutaqmi Tel-mela, Tel-harsa, Kerub, Adon hinaspa Imer llaqtakunamantapas. Manam allintaqa yachakurqachu Israelpa mirayninmanta kasqankuqa. Paykunaqa karqa:+ 62 Delayapa mirayninkunam, Tobiaspa mirayninkunam hinaspa Nekodapa mirayninkunam. Llapallankum karqaku 642. 63 Karqataqmi sacerdotekunapa mirayninkunapas. Paykunam karqaku: Habayapa mirayninkuna, Hakozpa+ mirayninkuna, Barzilaipa+ mirayninkuna. Barzilaiqa suedronpa sutintam aparqa, Galaad llaqtayuq Barzilaipa warmi churinwan casarakusqanrayku. 64 Paykunam ñawpaq abuelonkupa sutinta listapi maskarqaku, ichaqa manam tarirqakuchu. Chaymi sacerdotekunapa ruwayninta ruwaytaqa mana atirqakuchu.+ 65 Llaqtata kamachiqmi*+ nirqa Diospaq sapaqchasqa kaqkunataqa ama mikunankupaq.+ Manam mikunankuchu karqa Urimtawan Tumimta* servichikuspa Diosta sacerdote tapunankama.+

66 Llapallankum karqaku 42.360 runakuna.+ 67 Sirvientekunawan sirvientakunaqa+ manam yupasqachu karqa. Paykunam karqaku 7.337 runakuna, manataqmi yupasqachu karqa 245 takiq warmikunawan qarikunapas.+ 68 Chay kutimuq runakunapam karqa 736 caballonku, 245 mulanku, 69 435 camellonku hinaspa 6.720 asnonku.

70 Ayllunkupi wakin kamachiqkunaqa Diospa wasinta kaqmanta hatarichinankupaqmi kikinkumanta tukuyta qurqaku.+ Llaqta kamachiqpas qurqam dracma* sutiyuq qurimanta 1.000 qullqita, 50 tazonkunata hinaspa 530 pachakunata. Chayqa karqa sacerdotekunapa pachanmi.+ 71 Ayllunkupi kamachiqkunapa qusqankum karqa dracma sutiyuq qurimanta 20.000 qullqi hinaspa 1.254 kilo* qullqi. 72 Wakin runakunapa qusqankuñataqmi karqa dracma sutiyuq qurimanta 20.000 qullqi hinaspa 1.140 kilo* qullqi. Qurqakutaqmi 67 pachakunatapas sacerdotekunapaq.

73 Sacerdotekuna, Leviy ayllukuna, punku cuidaqkuna, takiqkuna,+ wakin runakuna, Diospa wasinpi yanapakuqkuna hinaspa wakin Israel runakunam llaqtankuman rirqaku chaypi yachanankupaq.+ Qanchis kaq killapaqqa+ sapakama llaqtankupiñam karqaku”, nispa.+

8 Llapallan runakunam huñunakururqaku Yaku sutiyuq punkupa chimpanpi.+ Hinaspankum qillqaq Esdrasta+ nirqaku Moisespa qillqasqan kamachikuykunata apamunanpaq.+ Chay kamachikuykunataqa Jehova Diosmi Israel runakunaman qurqa.+ 2 Chaynapim qanchis kaq killapa punta kaq punchawninpi+ sacerdote Esdrasqa chay qillqata apamurqa. Chay huñunakuypim karqaku qarikuna, warmikuna hinaspa yuyayniyuq warmachakuna.+ 3 Esdrasqa chay punkupa chimpanpim llapallanku uyarinankupaq kamachikuykunata leerqa.+ Achikyasqanmanta chawpi punchawkamam leerqa. Llapallankumá sumaqta uyarirqaku.+ 4 Chay huñunakuypaqmi tablakunamanta ruwarurqaku alto patata, chaypi sayaykuspanmi Esdrasqa leerqa. Alliqninpim* sayarqa Matitias, Sema, Anaya, Urias, Hilkias hinaspa Maaseya. Ichuqninpiñataqmi* sayarqa Pedaya, Misael, Malkiya,+ Hasum, Has-badana, Zacarias hinaspa Mesulam.

5 Esdrasqa llapallan runakuna qawachkaptinmi kamachikuykunamanta rimaq librota kichaykurqa. Hinaptinmi llapallan runakuna sayarirqaku. 6 Chaymantam Esdrasqa tukuy atiyniyuq Jehova Diosta hatuncharqa. Llapallan runakunañataqmi nirqaku: “¡Chaynayá kachun*! ¡Chaynayá kachun!”, nispanku.+ Chaynata nispankum makinkuta huqarirqaku. Chaymantañataqmi Jehova Diosta hatunchanankupaq qunquranpa pampakama kumuykurqaku. 7 Leviy ayllumanta Jesua, Bani, Serebias,+ Jamin, Acub, Sabetai, Hodias, Maaseya, Kelita, Azarias, Jozabad,+ Hanan hinaspa Pelayam llapallan runakunaman Diospa kamachikuyninkunamanta willarqaku.+ 8 Diospa kamachikuyninkunamantaqa hinallam leerqaku llapallan runakuna uyarinankupaq. Entiendechirqakutaqmi ima ninan kasqantapas.+

9 Kamachikuykunata leeptinkum llapallan runakuna waqarqaku. Chaymi ñuqa kamachiq* Nehemias, qillqaq Esdras+ hinaspa yachachiq Leviy ayllukuna nirqaniku: “Amayá waqaychikchu nitaq llakikuychikchu. Kunanqa Jehova Diospaq sapaqchasqa punchawmi”, nispa.+ 10 Ñuqa Nehemiasñataqmi nirqani: “Rispaykichikyá allinnin mikuykunata mikumuychik hinaspa miski vinota tomamuychik. Hinaspayá mana mikuyniyuqkunamanpas apachiychik.+ Kunanqa Diospaq sapaqchasqa punchawmi. Ama llakikuychikchu, Jehova Diosmi kusikuyta qususpaykichik kallpanchasunkichik”, nispa. 11 Leviy ayllukunañataqmi llapallan runakunata nirqaku: “Amayá waqaychikchu nitaq llakikuychikchu. Kunanqa Diospaq sapaqchasqa punchawmi”, nispa. 12 Chaynapim llapallan runakunaqa Diospa kamachikuyninkunamanta allinta yacharuspanku kusisqallaña+ pasakurqaku mikuq hinaspa hukkunaman mikuykunata apachiq.+

13 Paqarintin punchawmi ayllunkupi kamachiqkuna, sacerdotekuna hinaspa Leviy ayllukuna Esdraswan huñunakururqaku, chaynapi Diospa kamachikuyninkunamanta astawan yachanankupaq. 14 Chaypim yacharurqaku qanchis kaq killapiqa ramadakunallapi qanchis punchaw yachanankupaq* kamachikuyta, chay kamachikuytaqa Jehova Diosmi Moiseswan qillqachirqa.+ 15 Chaypitaqmi yacharurqaku llapallan llaqtakunapiwan Jerusalenpi willakamunankupaq.+ Willachimurqakum: “Qillqasqa kamachikuypa nisqanman hinayá ramadakunata ruwanaykichikpaq urqukunaman rispaykichik apamuychik aceitunaspa, pinopa, mirtopa, palmerapa hinaspa huk sachakunapa llaqisapa* kallmanta”, nispa.

16 Hinaptinmi runakunaqa lluqsispanku kallmakunata apamurqaku. Hinaspankum ramadakunata ruwarqaku wasinkupa hawanpi, pationkupi hinaspa Diospa wasinpa pationkunapi,+ Yaku punkupawan+ Efrain punkupa kasqan plazapi.+ 17 Chaynapimá Jerusalenman kutimuqkunaqa ramadakunata ruwaspanku chaypi yacharqaku. Chaynataqa manam ruwarqakuchu Nunpa churin Josueypa punchawninmantaraq,+ chaymi kusisqallaña karqaku.+ 18 Chaytaqa qanchis punchawmi ruwarqaku, hinaspam Diospa kamachikuyninkunamanta rimaq libro leesqankuta sapa punchaw uyarirqaku.+ Qatiqnin punchawñataqmi kamachikuypa nisqanman hina mana qunqanapaq huñunakuy apakurqa.+

9 Qanchis kaq killapa 24 punchawninpim Israel runakuna huñunakururqaku. Ayunaspanku hinaspa qachqa pachawan churakuspankum allpawan umankuman tallikurqaku.+ 2 Hinaspankum huklaw llaqtayuqkunamanta rakikurqaku.+ Chaymantam sayaykuspanku huchankutawan ñawpaq taytankupa huchanta willakurqaku.+ 3 Chaypim Jehova Diospa kamachikuyninkunamanta rimaq librota kimsa hora leerqaku.+ Kimsa horataqmi huchankumantapas Jehova Diosman willakurqaku hinaspam qunqurakurqaku.

4 Leviy ayllukunapa tablamanta ruwasqanku patamanmi qispirqaku+ Jesua, Bani, Cadmiel, Sebanias, Buni, Serebias,+ Bani hinaspa Kenani. Hinaspankum Jehova Diosta qayakurqaku. 5 Chaymantam Leviy ayllumanta Jesua, Cadmiel, Bani, Hasabneya, Serebias, Hodias, Sebanias hinaspa Petayas nirqaku: “Hatarispaykichikyá wiña-wiñaypaq kawsaq Jehova Diosta hatunchaychik”, nispa.+ Chaymantam nirqaku: “Diosllayku, sutikiyá tukuy imamantapas hatunchasqa kachun.

6 Qamllam kanki Jehova Diosqa.+ Qanmi hanaq pachatawan chaypi tukuy imatapas unancharqanki. Qamtaqmi unancharqanki allpa pachatapas chaynataq lamar quchatapas chaypi tukuy ima kaqkunatawan. Qanmi lliwta kawsachinki. Qamtam llapallan hanaq pachapi kaqkunapas yupaychasunki. 7 Jehova Diosllayku, qanmanta huk Diosqa manam kanchu. Qanmi akllaspayki Abranta+ Caldea lawpi Ur llaqtamanta+ hurqumurqanki. Hinaspaykim Abrahanwan suticharqanki.+ 8 Qanmi allin sunquyuq kasqanta qawaykuspayki+ contratota* ruwarqanki paymanwan mirayninkunaman sumaq allpata qunaykipaq.+ Chay allpam karqa Canaan, Het, Amorreo, Perizita, Jebus hinaspa Guirgas runakunapa. Allin ruwaq kasqaykiraykum nisqaykiman hina cumplirqanki.

9 Egipto nacionpi ñawpaq abueloykupa ñakarisqankutam qawarqanki,+ uyarirqankitaqmi Puka lamar quchapa patanpi kaspanku qayakamususqaykitapas. 10 Qamqa yacharqankim runaykikunata ñakarichisqankuta.+ Chaymi Egipto nacionpi kamachiqta*, runankunata hinaspa lliw llaqtamasinkunata manchakuypaq kaqkunawan ñakarichirqanki.+ Chaynata ruwaspaykim riqsichikurqanki. Chayna riqsisqamá kunankamapas kanki.+ 11 Lamar quchata rakispaykim runaykikunata chaki pampanta pasachirqanki.+ Paykunata qatiqkunatañataqmi yakuman rumita chuqachkaq hinaraq wischuykurqanki.+ 12 Runaykikunataqa punchawmi pusarqanki sayanpa puyuwan, tutanñataqmi sayanpa ninawan. Chaynatam mayninta rinankupaq achkirqanki.+ 13 Chaymantapas, Sinai urqumanmi+ uraykamurqanki, hanaq pachamantam paykunata rimapayamurqanki.+ Hinaspaykim qurqanki allinninkupaq kamachikuynikikunata.+ 14 Kamachirqankitaqmi sapaqchasqayki punchawpi samanankupaqpas.+ Yupaychasuqniki Moiseswanmi kamachikuynikikunata qurqanki. 15 Yarqaymanta kaptinkum hanaq pachamanta chayachimuspayki mikuyta qurqanki.+ Yakumanta kaptinkuñataqmi hatun rumimanta yakuta hurqupurqanki.+ Nirqankitaqmi qunayki allpaman yaykuspanku chaypi yachanankupaqpas*.

16 Ñawpaq abueloykum ichaqa hatuntukuspanku+ kamachikuynikikunatapas mana kasukurqakuchu.+ 17 Paykunapaq tukuy imapas ruwasqaykita qunqaruspankum mana kasukuq rikurirurqaku.+ Rumi sunquyaruspankum Egipto nacionman kutikunankupaq kamachiqninkuta akllarurqaku.+ Chaywanpas qamqa manam paykunataqa qipancharqankichu. Qamqa kanki pampachakuq, llakipayakuq, imaña kaptinpas ancha kuyakuq+ hinaspa mana chaylla piñakuruq Diosmi.+ 18 Paykunaqa malta torota ruwakuruspankum nirqaku: ‘Kaymi Egipto nacionmanta hurqumuwaqninchik Diosninchikqa’, nispanku.+ Chayta ruwasqankuwanmi qipanchasurqanki. 19 Chaywanpas kuyaspaykim chunniqpi kachkaptinku hinalla yanaparqanki.+ Hinallataqmi punchawpas sayanpa puyuwan pusarqanki, tutanñataqmi sayanpa ninawan achkirqanki mayninta rinankupaq.+ 20 Chaymantapas, allin yuyayniyuq kanankupaqmi yanaparqanki.+ Hinallamá “maná” sutiyuq mikuytapas qurqanki+ chaynataq yakutapas.+ 21 40 watam ñawpaq abueloykumanqa chunniqpi mikuchirqanki.+ Manam imamantapas usuchirqankichu. Manam pachankupas mawkayarqachu+ nitaqmi chakinkupas punkirqachu.

22 Paykunamanmi qurqanki Hesbon+ lawta kamachiq Seonpa+ munaychakusqan allpata+ hinaspa Basan lawta kamachiq Ogpa+ munaychakusqan allpata. 23 Churinkutapas lucerokunata hinañam mirachirqanki.+ Hinaspañataqmi ñawpaq abuelonkuman qunaykipaq nisqayki allpaman pusarqanki.+ 24 Chaynapimá paykunaqa chay allpapi yacharqaku.+ Chay Canaan allpapi+ yachaq runakunatam kamachiqninkunatawan paykunapa makinman churaykurqanki. 25 Paykunaqa hapikuykurqakutaqmi murallasqa llaqtakunatapas+ chaynataq tukuy imapa qispinan chakrakunatapas.+ Hapikuykurqakutaqmá tukuy imayuq wasikunatapas, ruwasqanku pozokunatapas, uvas huertakunatapas, aceitunas huertakunatapas+ chaynataq ruruyuq tukuy rikchaq sachakunapa kanan chakrakunatapas. Chaynapim paykunaqa tukuy ima qusqaykita saksanankukama mikuspanku puqurqaku.

26 Chaywanpas paykunaqa qipanchasuspaykim kamachikuynikikunatapas mana kasukurqakuchu.+ Qanman kutirikamunankupaq rimapayaqninku qanmanta willakuqnikikunatapas* wañurachirqakum. Chaynata ruwaspankum piñachisurqanki.+ 27 Chaymi chiqniqninku runakunapa makinpi saqiykurqanki,+ hinaptinmi paykuna ñakarichirqaku.+ Chayna sasachakuypi tarikuspanku qayakamusuptikim qamñataq uyariykurqanki. Llakipayakuq kasqaykiraykum paykunata yanapananpaq runaykikunata kacharqanki.+

28 Chaywanpas paykunaqa kaqmantam huchallikurqaku.+ Hinaptinmi chiqniqninkupa makinpi saqiykuptiki paykunaqa ñakarichirqaku.+ Chaynapi tarikuspankum yanapaykunaykipaq kaqmanta qayakamusurqanki,+ hinaptinmi qamqa llakipayakuq kasqaykirayku uyariykurqanki.+ 29 Diosllayku, qanman kutirikamuspa kamachikuynikikunata kasukunankupaqmi willachirqanki. Paykunam ichaqa kamachikuynikikunata mana kasukuspanku huchallikurqaku.+ Rumi sunqu kaspankum qipanchasurqanki. Kamachikuynikikunata kasukuq runakunam ichaqa kawsanku.+ 30 Achka watam paykunawanqa mana chaylla piñakuruq karqanki.+ Willachirqankitaqmi qanmanta willakuq runaykikunawanpas. Paykunam ichaqa mana kasukurqakuchu. Chayraykum qamqa chay allpapi yachaq runakunapa makinpi saqirqanki.+ 31 Qamqa ancha llakipayakuq hinaspa kuyakuq kasqaykiraykum+ paykunataqa mana chinkarachirqankichu+ nitaq qunqarurqankichu.

32 Diosllayku, qamqa kanki llapallanpa manchakunan tukuy atiyniyuq Diosmi. Qamqa rimasqaykitapas* cumpliqmi kanki, imaña kaptinpas ancha kuyakuqmi kanki.+ Amayá qunqaruychu Asiria nacionta kamachiqkunapa+ punchawninmanta kunankama ñakarisqaykutaqa. Ñakarirqakumá kamachiqniykupas,+ sacerdotekunapas,+ qanmanta willakuqkunapas,+ ñawpaq abueloykupas chaynataq llapallan runakunapas. 33 Mana allinkunata ruwasqaykuraykum ñakarinaykuta saqirqanki, qamqa nisqaykiman hinam imatapas ruwanki.+ 34 Qusqayki kamachikuykunataqa manam kasukurqakuchu kamachiqniykupas, sacerdotekunapas, qanmanta willakuqkunapas chaynataq ñawpaq abueloykupas. 35 Paykunaqa kamachispankum tukuy ima qusqaykiwan kusisqa karqaku, hinaspapas tukuy imapa qispinan hatun allpapim yacharqaku. Chayna kachkaspankupas manam yupaychasurqankichu+ nitaqmi mana allin ruwasqankutapas saqirqakuchu. 36 Diosnillayku, kunanqa hukkunapa munaychakusqanmi kachkaniku.+ Chaynamá kachkaniku ñawpaq abueloykuman qusqayki allpapi. Paykunamanmi kay allpata qurqanki tarpuspanku mikunankupaq. 37 Ichaqa kamachiqkunam mikuchkanku. Huchallikusqaykuraykum paykunapa makinpi saqiwarqankiku.+ Paykunam ñuqaykuwanpas chaynataq animalniykuwanpas munasqankuta ruwachkanku. Llumpaytam ñakarichkaniku.

38 Chayraykum llapallayku tantiaruniku qamllata kasukunaykupaq.+ Chayta qillqaspaykum sellorachiniku kamachiqniykuwan, Leviy ayllumanta kaqkunawan hinaspa sacerdotekunawan”, nispa.+

10 Diosta kasukunankupaq qillqasqankupi selloqkunam karqaku:+

9 Leviy ayllumanta kaqkunañataqmi karqaku: Azaniaspa churin Jesua, Henadadpa miraynin Binui, Cadmiel,+ 10 ayllunku Sebanias, Hodias, Kelita, Pelaya, Hanan, 11 Mica, Reob, Hasabias, 12 Zacur, Serebias,+ Sebanias, 13 Hodias, Bani hinaspa Beninu.

14 Llaqta kamachiqkunañataqmi karqaku: Paros, Paat-moab,+ Elam, Zatu, Bani, 15 Buni, Azgad, Bebai, 16 Adonias, Bigvai, Adin, 17 Ater, Ezequias, Azur, 18 Hodias, Hasum, Bezai, 19 Harif, Anatot, Nebai, 20 Magpias, Mesulam, Hezir, 21 Mesezabel, Sadoc, Jadua, 22 Pelatias, Hanan, Anaya, 23 Hosea, Hananias, Hasub, 24 Haloes, Pila, Sobek, 25 Reum, Hasabna, Maaseya, 26 Aiya, Hanan, Anan, 27 Maluc, Harim hinaspa Baana.

28 Ayllunkuman hukllawakuqkunañataqmi karqaku: Sacerdotekuna, Leviy ayllukuna, punku cuidaqkuna, takiqkuna, Diospa wasinpi* yanapakuqkuna*, yuyayniyuq warmakuna, Diospa kamachikuyninkunata kasukunankupaq+ huklaw nacionniyuqkunamanta rakikuqkuna, paykunapa warminku hinaspa churinku. 29 Paykunamá ayllunkuman hukllawakuspanku nirqaku Moisespa chaskisqan kamachikuyta mana kasukuspankuqa ñakasqa kanankumanta. Nirqakutaqmi Jehova Diospa llapallan kamachikuyninkunata kasukunankupaqpas. Paykunam nirqaku: 30 “Churi-wawaykutaqa manam casarachisaqkuchu huklaw llaqtayuq runakunapa churi-wawankuwanqa.+

31 Samana punchawpi* utaq sapaqchasqa ima punchawpas+ kawsayninkuta utaq imankutapas rantikuq* hamuptinkuqa manam rantisaqkuchu.+ Sapa qanchis watataqmi chakraykutapas samachisaqku.+ Manañataqmi imapas manusqaykutaqa mañasaqkuñachu.+

32 Chaymantapas, sapa watam qusaqku qullqita* Diospa wasinpaq,+ 33 Diospaq sapaqchasqa tantapaq*,+ kawsaymanta qusqayku ofrendata+ Diospaq kañanankupaq, samana punchawpi+ hinaspa llullu killapi+ animalta kañanankupaq, hatun huñunakuykunapaq,+ Diospaq sapaqchasqa kaqkunapaq, Israel runakunapa huchanmanta kañanankupaq+ hinaspa Diospa wasinpi tukuy imata ruwanankupaq.

34 Chaymantapas, sapa wata ima killapi Diospa wasinpaq yantata apanapaqmi kamachikuypa nisqanman hina tuparachinakuniku. Tuparachinakunikuqa sacerdotekunawan chaynataq Leviy ayllumanta kaqkunawanmi. Chaynapi Jehova Diospa altarninpi* tukuy imata kañanankupaq.+ 35 Sapa watataqmi Jehova Diospa wasinman apasaqku kawsaykunapa hinaspa frutakunapa punta ruruntapas.+ 36 Kamachikuyman hinataqmi apasaqku churiykumanta hinaspa vacaykumantawan ovejaykumanta punta naceqtapas.+ Lliwtam apasaqku Diospa wasinpi sacerdotekunaman.+ 37 Diosninchikpa wasinpi imapas churana cuartokunamanñataqmi+ apasaqku chayllaraq ruwasqa chamra kutata,+ imapas quy munasqaykuta, lliw sachakunapa rurunta,+ chayllaraq lluqsiq vinota hinaspa aceiteta.+ Chaytaqa sacerdotekunam chaskinqaku. Leviy ayllukunamanñataqmi apasaqku tarpusqaykumanta+ diezmota*. Paykunam kanku lliw llaqtakunapi diezmo qusqankuta chaskiqkuna.

38 Aaronpa mirayninmanta kaq sacerdote qawachkaptinmi Leviy ayllumanta kaqkunaqa diezmo qusqankuta chaskinqaku. Chay chaskisqankumantam Leviy ayllukunaqa chunkamanta hukta qunqaku Diosninchikpa wasinpi+ churana cuartokunapi churanankupaq. 39 Israel runakunawan Leviy ayllukunapa lliw churinkum Diospa wasinpi cuartokunaman apananku kawsaykunata,+ chayllaraq lluqsiq vinota hinaspa aceiteta.+ Chaypim kachkanku sacerdotekuna, punku cuidaqkuna hinaspa takiqkuna. Chaypitaqmi kachkan serviciokunapas. Manam Diosninchikpa wasintaqa saqisaqkuchu”, nispa.+

11 Israelpi ancha riqsisqa runakunaqa Jerusalenpim yacharqaku*.+ Sapa chunka ayllumanta huk ayllu Jerusalen* llaqtaman rinankupaqmi sortearqaku.+ Isqun ayllukunañataqmi qiparqaku wakin llaqtakunapi yachanankupaq. 2 Wakin runakunañataqmi Jerusalen llaqtapi yachanankupaq kikinkumanta riyta munarqaku. Chaymi paykunata Dios bendecinanpaq mañakurqaku.

3 Juda lawpi kaq wakin llaqtakunapim yacharqaku wakin Israel runakuna, sacerdotekuna, Leviy ayllukuna, Diospa wasinpi* yanapakuqkuna*+ hinaspa kamachiq Salomonpa+ serviqninkunapa mirayninkuna. Juda runakunapa kamachiqninkunaqa Jerusalenpim yacharqaku.+

4 Jerusalenpitaqmi yacharqaku wakin Juda ayllukunawan Benjamin ayllukunapas. Juda ayllumantam karqa Ataya. Atayam karqa Uziaspa churin, Uziasñataqmi karqa Zacariaspa churin, Zacariasñataqmi karqa Amariaspa churin, Amariasñataqmi karqa Sefatiaspa churin, Sefatiasñataqmi karqa Maalalelpa churin, Maalalelñataqmi karqa Perezpa miraynin.+ 5 Juda ayllumantataqmi karqa Maaseyapas. Maaseyam karqa Barucpa churin, Barucñataqmi karqa Colozepa churin, Colozeñataqmi karqa Hazayapa churin, Hazayañataqmi karqa Adayapa churin, Adayañataqmi karqa Joyaribpa churin, Joyaribñataqmi karqa Zacariaspa churin, Zacariasñataqmi karqa Selapa miraynin. 6 Jerusalenpi yachaq Perezpa mirayninkunam karqaku 468 runakuna. Paykunaqa karqaku mana manchakuq runakunam.

7 Benjamin ayllumantam karqa Salu. Salum+ karqa Mesulampa churin, Mesulamñataqmi karqa Joedpa churin, Joedñataqmi karqa Pedayapa churin, Pedayañataqmi karqa Kolayapa churin, Kolayañataqmi karqa Maaseyapa churin, Maseyañataqmi karqa Itielpa churin, Itielñataqmi karqa Jesayaspa churin. 8 Karqataqmi Gabaipas chaynataq Salaipas. Llapallankum karqaku 928. 9 Paykunatam kamachirqa Zicripa churin Joel. Payman qatiq kamachiqñataqmi karqa Hasenuapa churin Juda.

10 Sacerdotekunamanta Jerusalenpi yachaqkunam karqa Joyaribpa churin Jedaya, Jakin+ hinaspa 11 Seraya. Serayam karqa Hilkiaspa churin, Hilkiasñataqmi karqa Mesulampa churin, Mesulamñataqmi karqa Sadocpa churin, Sadocñataqmi karqa Merayotpa churin, Merayotñataqmi karqa Aitubpa+ churin. Aitubqa karqa Diospa wasinpi kamachiqmi. 12 Karqataqmi Jedayapa, Jakinpa hinaspa Serayapa ayllunkupas, paykunam Diospa wasinpi yanapakurqaku. Llapallankum karqaku 822. Sacerdotetaqmi karqa Adayapas. Adayam karqa Jeroampa churin, Jeroamñataqmi karqa Pelaliaspa churin, Pelaliasñataqmi karqa Amzipa churin, Amziñataqmi karqa Zacariaspa churin, Zacariasñataqmi karqa Pasjurpa+ churin, Pasjurñataqmi karqa Malkiyapa churin. 13 Karqataqmi Adayapa ayllunkunapas, paykunaqa karqaku ayllunkupi kamachiqkunam. Llapankum karqaku 242. Sacerdotetaqmi karqa Amasaipas. Amasaimi karqa Azarelpa churin, Azarelñataqmi karqa Azaipa churin, Azaiñataqmi karqa Mesilemotpa churin, Mesilemotñataqmi karqa Imerpa churin. 14 Karqataqmi Amasaipa ayllunkunapas, paykunaqa karqaku mana manchakuq kallpasapa qarikunam. Llapankum karqaku 128. Paykunapa kamachiqninmi karqa ancha riqsisqa ayllumanta Zabdiel.

15 Leviy ayllumantañataqmi karqa Semaya.+ Semayam karqa Hasubpa churin, Hasubñataqmi karqa Azrikampa churin, Azrikamñataqmi karqa Hasabiaspa churin, Hasabiasñataqmi karqa Bunipa churin. 16 Karqataqmi Leviy ayllukunapa kamachiqnin Sabetaiwan+ Jozabadpas.+ Paykunam karqaku Diospa wasinmanta hawa lawpi imapas ruwaymanta cuentallikuqkuna. 17 Karqataqmi Mataniaspas.+ Mataniasmi karqa Miqueaspa churin, Miqueasñataqmi karqa Zabdipa churin, Zabdiñataqmi karqa Asafpa+ churin. Mataniasqa karqa takiqkunata yachachiqmi. Paykunam mañakuy hora Diospaq takiqku.+ Karqataqmi Bacbuquiaspas. Paypas karqa takiq ayllunkunata kamachiqmi. Karqataqmi Abdapas. Abdam karqa Samuapa churin, Samuañataqmi karqa Galalpa churin, Galalñataqmi karqa Jedutunpa churin.+ 18 Jerusalen llaqtapi yachaq Leviy ayllukunam karqaku 284.

19 Punku cuidaqkunañataqmi karqa Acub, Talmon+ hinaspa ayllunkuna. Llapankum karqaku 172.

20 Juda lawpi kaq wakin llaqtakunapim yacharqaku wakin Israel runakuna, sacerdotekuna hinaspa Leviy ayllukuna. 21 Diospa wasinpi yanapakuqkunañataqmi+ yacharqaku Ofel muqupi.+ Paykunatam kamachirqa Ziawan Guispa.

22 Jerusalen llaqtapi Leviy ayllukunatam kamachirqa Uzi. Uzim karqa Banipa churin, Baniñataqmi karqa Hasabiaspa churin, Hasabiasñataqmi karqa Mataniaspa+ churin, Mataniasñataqmi karqa Micapa churin, Micañataqmi karqa Asafpa miraynin. Asafpa mirayninkunaqa karqaku takiqkunam. Uziqa karqa Diospa wasinpi llamkaqkunapa kamachiqninmi. 23 Kamachiqpa nisqanman hinam takiqkunaqa+ sapa punchaw imapas pisipuqninkuta chaskikuqku. 24 Mesezabelpa churin Petayasñataqmi karqa kamachiqpa yanapaqnin. Mesezabelqa karqa Judapa churin Zerapa mirayninmi.

25 Juda ayllumanta wakin runakunam yacharqaku Kiryat-arba,+ Dibon hinaspa Jecabzeel+ llaqtakunapi llaqtachankunapiwan. 26 Yacharqakutaqmi Jesua, Molada,+ Bet-pelet,+ 27 Hazar-sual+ hinaspa Beer-seba llaqtakunapipas llaqtachankunapiwan. 28 Ziclag+ hinaspa Mecona llaqtakunapipas llaqtachankunapiwan. 29 En-rimon,+ Zora,+ Jarmut, 30 Zanoa,+ Adulam hinaspa Azeka+ llaqtakunapipas llaqtachankunapiwan chaynataq Lakis+ llaqtapipas chakrankunapiwan. Paykunaqa yacharqaku Beer-seba lawmanta Hinon wayqukamam.+

31 Benjamin ayllukunañataqmi yacharqaku Gueba,+ Mikmas, Aya hinaspa Betel+ llaqtakunapi llaqtachankunapiwan. 32 Yacharqakutaqmi Anatot,+ Nob,+ Anania, 33 Hazor, Rama,+ Guitaim, 34 Hadid, Zeboim, Nebalat, 35 Lod hinaspa Ono+ sutiyuq llaqtakunapipas. Ono llaqtapi* yachaqkunaqa karqa tukuy ima ruwaqkunam. 36 Juda ayllupa allpanpi Leviy ayllumanta kaqkunaqa wakiqninkum Benjamin ayllupa allpanpi yacharqaku.

12 Sacerdotekuna chaynataq Leviy ayllukunam Sealtielpa+ churin Zorobabelwan+ hinaspa Jesuawan+ kutimurqaku. Paykunam karqaku: Seraya, Jeremias, Esdras, 2 Amarias, Maluc, Hatus, 3 Secanias, Reum, Meremot, 4 Ido, Guinetoi, Abias, 5 Mijamin, Madias, Bilga, 6 Semaya, Joyarib, Jedaya, 7 Salu, Amoc, Hilkias hinaspa Jedaya. Paykunam karqaku Jesuapa tiemponpi sacerdotekunapa ayllunpi kamachiqkuna.

8 Leviy ayllumantañataqmi karqaku: Jesua, Binui, Cadmiel,+ Serebias, Juda hinaspa Matanias.+ Mataniasqa ayllunkunapiwanmi takiqkunata yanaparqa Diosta hatunchaypi. 9 Ayllunku Bacbuquiaswan Uniñataqmi karqaku paykunapa chimpanpi Diospa wasinta* cuidaqkuna. 10 Jesuam karqa Joiaquimpa taytan, Joyakimñataqmi karqa Eliasibpa+ taytan, Eliasibñataqmi karqa Joiadapa+ taytan, 11 Joiadañataqmi karqa Jonatanpa taytan, Jonatanñataqmi karqa Jaduapa taytan.

12 Joiaquim kamachichkaptinmi ayllunkupi kamachiq sacerdotekuna karqa: Serayapa+ ayllunmanta Meraya, Jeremiaspa ayllunmanta Hananias, 13 Esdraspa+ ayllunmanta Mesulam, Amariaspa ayllunmanta Jeoanan, 14 Malukipa ayllunmanta Jonatan, Sebaniaspa ayllunmanta Josey, 15 Harimpa+ ayllunmanta Adna, Merayotpa ayllunmanta Helkai, 16 Idopa ayllunmanta Zacarias, Guinetonpa ayllunmanta Mesulam, 17 Abiaspa+ ayllunmanta Zicri, Miniaminpa ayllunmanta [?*], Moadiaspa ayllunmanta Piltai, 18 Bilgapa+ ayllunmanta Samua, Semayapa ayllunmanta Jeonatan, 19 Joyaribpa ayllunmanta Matenai, Jedayapa+ ayllunmanta Uzi, 20 Salaipa ayllunmanta Kalai, Amocpa ayllunmanta Eber, 21 Hilkiaspa ayllunmanta Hasabias hinaspa Jedayapa ayllunmanta Natanael.

22 Leviy ayllukunapi kamachiqkunawan sacerdotekunam listapiqa karqaku Eliasibpa, Joiadapa, Joananpa hinaspa Jaduapa+ punchawninmanta Persia nacionta Dariopa kamachisqan punchawkama.

23 Ayllunkupi kamachiq Leviy ayllukunam listapi qillqasqa karqaku imapas pasasqanmanta rimaq libropi. Listapiqa karqaku Eliasibpa churin Joananpa punchawninkamam. 24 Leviy ayllupi kamachiqkunam karqaku: Hasabias, Serebias hinaspa Cadmielpa+ churin Jesua.+ Paykunata cuidaq ayllunkuñataqmi chimpankupi karqaku Davidpa+ kamachisqanman hina Diospa tukuy ima ruwasqanmanta riqsikuspanku hinaspa hatunchaspanku. 25 Diospa wasinpa* punkunpi sayaqkunam karqaku Matanias,+ Bacbuquias, Abdias, Mesulam, Talmon hinaspa Acub.+ Chaypi sayaykuspankum imapas waqaychananku cuartota cuidarqaku.+ 26 Chaytam ruwarqaku Joiaquimpa, kamachiq Nehemiaspa chaynataq sacerdote* Esdraspa+ tiemponpi. Joiaquimqa karqa Jesuapa+ churinmi, Jesuañataqmi karqa Jozadacpa churin.

27 Jerusalen llaqtapa murallanta Diospaq sapaqchanankupaqmi Leviy ayllukunata maymantapas pusamurqaku. Pusamurqakuqa platillokunawan, cuerdayuq kaqkunawan hinaspa arpakunawan kusisqa takispanku Diosta agradecekunankupaqmi.+ 28 Allin yachachisqa takiqkunam huñunakamurqaku Jordan lawmanta, Jerusalen llaqtapa muyuriqninkunamanta, Netofa runakunapa yachasqanku* lawmanta,+ 29 Bet-guilgal llaqtamanta,+ Gueba lawmanta+ hinaspa Azmavet+ llaqtamanta. Chay llaqtakunamantaqa hamurqaku kikinku hatarichispanku chaypi yachasqankuraykum. 30 Sacerdotekunawan Leviy ayllukunaqa chuyanchakurqakum. Chuyancharqakutaqmi wakin runakunatapas,+ punkukunatapas+ chaynataq pirqatapas.+

31 Chaymantam Judapi kamachiqkunata ñuqa Nehemias nirqani pirqapa hawanman qispinankupaq. Takiqkunatapas iskaymanmi rakirurqani Diospa tukuy ima ruwasqanmanta agradecekustin pirqa hawanta rinankupaq. Paykunapa qipantañataqmi rirqaku achkallaña runakuna. Wakin takiqkunam rirqa alliq* lawman qupa wischuna punku lawman.+ 32 Paykunapa qipantañataqmi rirqa Hosaya hinaspa Juda runakunapa wakin kamachiqninku. 33 Rirqataqmi Azariaspas, Esdraspas, Mesulampas, 34 Judapas, Benjaminpas, Semayapas hinaspa Jeremiaspas. 35 Paykunawantaqmi rirqa sacerdotekunapas cornetillayuqkama.+ Hukninmi karqa Zacarias. Zacariasmi karqa Jonatanpa churin, Jonatanñataqmi karqa Semayapa churin, Semayañataqmi karqa Mataniaspa churin, Mataniasñataqmi karqa Micayapa churin, Micayañataqmi karqa Zacurpa churin, Zacurñataqmi karqa Asafpa churin.+ 36 Rirqataqmi sacerdote Semayapas, Azarelpas, Milalaipas, Guilalaipas, Maaipas, Natanaelpas, Judapas hinaspa Hananipas. Paykunaqa Davidpa+ ruwasqan tocanayuqkamam rirqaku. Paykunapa ñawpaqnintañataqmi rirqa Esdras.+ 37 Pukyuman rina punkumantam+ hinalla rirqaku Davidpa llaqtan sutiyuq llaqtapi+ gradaspa hawanta.+ Chaymantam hinalla rirqaku Yaku sutiyuq punkukama.+ Chayqa karqa intipa qispimunan lawpim.

38 Wakin takiqkunañataqmi Diosta agradecekusqankurayku takistin rirqaku ichuq* lawman pirqapa hawanta. Ñuqa Nehemiasñataqmi rirqani paykunapa qipanta wakin runakunapiwan. Takiqkunaqa Hornokuna sutiyuq torrenta+ hinaspa rakta pirqantam rirqaku.+ 39 Efrain punkuta+ pasaruspankum rirqaku Mawka llaqta punkunta,+ Challwa sutiyuq punkunta,+ Hananel torrenta+ chaynataq Mea torrenta. Chaymantam rirqaku ovejakunapa yaykunan punkunta.+ Hinaspankum sayarurqaku Guardia sutiyuq punkupi.

40 Chaymantam iskayman rakinasqa takiqkunaqa sayarurqaku Diospa wasinpa kasqanpi. Sayarurqanitaqmi ñuqapas chaynataq ñuqawan kaq kamachiqkunapas. 41 Sayarurqakutaqmi sacerdote Eliakimpas, Maaseyapas, Miniaminpas, Micayapas, Elionaipas, Zacariaspas chaynataq Hananiaspas. Paykunaqa cornetillayuqkamam karqaku. 42 Sayarurqakutaqmi Maaseyapas, Semayapas, Eleazarpas, Uzipas, Jeoananpas, Malkiyapas, Elampas chaynataq Ezerpas. Takiqkunaqa Izrayas takichiptinmi kallpawan takirqaku.

43 Chay punchawmi achkallaña ofrendakunata kañaspanku kusisqallaña karqaku. Warmikunawan wawakunapas ancha kusisqam karqaku.+ Chayna kusisqallañaqa karqaku Dios yanapaptinmi. Jerusalenpi kusisqallaña kasqankuqa karukamaraqmi uyarikurqa.+

44 Chay punchawmi sunqumanta qusqankuta,+ imapas punta kaqta apasqankuta+ hinaspa diezmota*+ churana cuartokunamanta cuentallikuqkunata akllarqaku.+ Chay cuartokunapim churarqaku kamachikuyman hina+ sacerdotekunamanwan Leviy ayllukunaman+ qunankupaq kaqkunata. Judapi llapallan runakunam kusisqallaña karqaku sacerdotekunawan Leviy ayllukuna yanapakusqankurayku. 45 Takiqkunawan punku cuidaqkunaqa Davidpa hinaspa churin Salomonpa yachachisqanman hinam imam ruwanankuta ruwarqaku. Chaynatataqmi ruwarqaku sacerdotekunawan Leviy ayllukunapas. Diosta yupaychaspankum chuyanchana kaqkunatapas ruwarqaku. 46 Davidpa hinaspa Asafpa tiemponpipas karqam Diosta hatunchaspanku tukuy ima ruwasqanmanta agradecekunankupaq takiqkunata yachachiqkunaqa.+ 47 Zorobabelpa+ hinaspa Nehemiaspa tiemponpiqa llapallan Israel runakunam takiqkunaman+ hinaspa punku cuidaqkunaman+ quqku sapa punchaw imam qunankuta. Qurqakutaqmi Leviy ayllukunamanpas tupaqninkuta.+ Leviy ayllukunañataqmi qurqaku Aaronpa mirayninkunaman imam tupaqninkuta.

13 Llapallan runakuna huñunasqa kachkaptinmi Moisespa chaskisqan librota leerqaku.+ Chay libropim tarirurqaku Ammon runakunawan Moab+ runakuna chaynataq Diosta yupaychaqkuna manapuni hukllawakunankupaq nisqanta.+ 2 Ñawpaqtam chay runakunaqa Israel runakunamanqa mana mikuytapas nitaq yakutapas qurqakuchu, aswanqa Balaanmanmi pagarurqaku paykunata ñakananpaq.+ Diosmi ichaqa ñakananmantaqa bendeciykurqa.+ 3 Kamachikuykunata uyariruspankum Israel runakunaqa huklaw llaqtayuqkunata lliw rakirurqaku.+

4 Chaymanta ñawpaqtaraqmi, Diospa wasinpi* imapas churana+ kaqkunamanta nanachikurqa sacerdote Eliasib,+ payqa karqa Tobiaspa+ ayllunmi. 5 Eliasibmi quykurqa hatun cuartota Tobiasman. Chaypim ñawpaqta churaqku kawsaykunata, sachapa miski asnaq wiqinta* hinaspa serviciokunata. Churaqkutaqmi diezmotapas* kawsaykunamanta, chayllaraq lluqsiq vinomanta chaynataq aceitemanta+ qusqankutapas. Chaykunam karqa Leviy ayllukunapaq,+ takiqkunapaq hinaspa punku cuidaqkunapaq. Chaypitaqmi churaqku sacerdotekunapaq qusqankutapas.+

6 Chay punchawkunapiqa manam Jerusalen llaqtapichu karqani. Babilonia nacionta 32 wataña+ Artajerjes+ kamachichkaptinmi paypa kasqanman kutikurqani. Chaymanta qipatam kamachiqta nirqani Jerusalenman hamunaypaq. 7 Jerusalenman chayaramuspaymi yacharurqani Eliasibpa+ mana allin ruwasqanta. Payqa Diospa wasinpa pationpi cuartotam Tobiasman+ quykusqa. 8 Chayta qawaykuspaymi llumpayta piñakururqani, hinaspaymi Tobiaspa tukuy imanta hawaman wischururqani. 9 Chaymantam kamachirqani tukuy ima churana cuartokunata chuyanchanankupaq. Hinaspaymi kaqmanta churarqani Diospa wasinpi serviciokunata,+ kawsaykunamanta ofrendata hinaspa sachapa miski asnaq wiqinta.+

10 Yacharurqanitaqmi Leviy ayllukunaman+ tupaqninkuta mana qusqankumantapas.+ Chayraykum Leviy ayllukunawan takiqkunaqa llaqtankuman kutikusqaku.+ 11 Chaymi kamachiqkunata qaqchaspay+ nirqani: “¿Imanasqataq Diospa wasin kayna kananta saqirqankichik?”, nispay.+ Hinaspaymi llaqtankuman kutikuq Leviy ayllukunata qayachispay imam ruwayninkuman kaqmanta churarqani. 12 Chaymantapas, llapallan Juda runakunam chay cuartokunapi churanankupaq qurqaku diezmota+ kawsaykunamanta, chayllaraq lluqsiq vinomanta hinaspa aceitemanta.+ 13 Chaymantam cuartokunamanta nanachikunanpaq churarqani confianza runakunata. Paykunam karqaku sacerdote Selemias, qillqaq Sadoc, Pedaya hinaspa yanapaqninku Hanan. Hananqa karqa Zacurpa churinmi, Zacurñataqmi karqa Mataniaspa churin. Paykunam Leviy ayllunkuman imam tupaqninkuta sapakamaman quqku.

14 Chaymantam Diosta mañakurqani: “Diosnilláy, tukuy ima ruwasqaytaqa amayá qunqaruychu.+ Imaña kaptinpas qamta kuyaspay wasikipaqwan chaypi llamkanankupaq tukuy ima ruwasqaytaqa amayá qunqaruychu”, nispay.+

15 Chay punchawkunapim Juda runakunata rikurqani samana punchawpi*+ uvasninku sarusqankuta hinaspa kawsayninkuta huñuspanku asnowan apamusqankuta. Rikurqanitaqmi samana punchawpi Jerusalenman vinota, uvasta, higosta chaynataq tukuy imata apamusqankutapas. Chaymi samana punchawpi+ rantikusqankumanta* qaqcharqani. 16 Jerusalenpi yachaq* Tiro runakunapas samana punchawpim challwakunata hinaspa tukuy imata apamuqku rantikunankupaq.+ 17 Chaymi Judapi kamachiqkunata qaqchaspay nirqani: “¿Imanasqataq qamkunaqa samana punchawpi mana samankichikchu? Kay ruwasqaykichikwanqa huchallikuchkankichikmi. 18 Chaynam ñawpaq abuelonchikkunapas karqaku, chayraykum Diosninchikqa kay tukuy sasachakuykunata apamuwarqanchik. ¿Chaychu qamkunaqa samana punchawpi mana samaspaykichik astawanraq Diosninchikta piñachiyta munachkankichik?”, nispay.+

19 Chaymi kamachirqani inti siqaykusqanmanta utaq samana punchaw manaraq qallarichkaptin punkukunata wichqanankupaq. Wichqasqaqa kanan karqa samana punchaw tukunankamam. Wakin yanapaqniykunatañataqmi punkupi churarqani rantikuqkunata chay punchaw ama yaykuchimunankupaq. 20 Chayraykum samana punchawpi rantikunankupaq imatapas apamuqkunaqa tukuy tuta hawapi karqaku. Chaynaqa karqaku manam huk kutillapichu. 21 Chaymi paykunata qaqcharqani: “¿Imatam ruwankichik kay pirqapa qipanpi? Kaqmanta tariruspayqa qarqurusqaykichikmi”, nispay. Chaymantapacham samana punchawpiqa manaña hamurqakuchu.

22 Chaymantapas, Leviy ayllukunatam nirqani sapa kuti chuyanchakunankupaq hinaspa punkukunata cuidaq hamunankupaq, chaynapi samana punchaw Diospaq sapaqchasqa kananpaq.+ Chaymantam Diosta mañakurqani: “Diosnilláy, tukuy kaykuna ruwasqaytapas amayá qunqaychu. Imaña kaptinpas ancha kuyakuq kasqaykiraykuyá llakipayariykullaway”, nispay.+

23 Chay punchawkunapitaqmi wakin Juda runakuna Asdod+ warmikunawan, Ammon warmikunawan hinaspa Moab+ warmikunawan casarakurusqaku.+ 24 Paykunapa wakin warmankum rimaqku Asdod runakunapa rimayninta, wakin warmankuñataqmi huklaw llaqtayuqkunapa rimayninta. Manam mayqanninkupas Juda runakunapa rimaynintaqa rimaqkuchu. 25 Chaymi Juda runakunata qaqchaspay ñakarqani. Wakintaqa maqaspaymi+ chukchankunatapas chutarqani. Hinaspaymi Diospa sutinpi rimachispay nirqani: “Amam churi-wawaykichiktaqa paykunapa churi-wawankuwanqa casarachinkichikchu. Amataqmi qamkunapas paykunawanqa casarakunkichikchu.+ 26 Israel nacionta kamachiq Salomonpas chaynata ruwaspam huchallikururqa. Pay hina kamachiqqa manam mayqan nacionpipas karqachu.+ Paytaqa Diosmi kuyaspan+ Israel nacionta kamachinanpaq churarqa. Chaywanpas huklaw llaqtayuq warminkunam huchallirachirqa.+ 27 ¡Imaynamá qamkunaqa kay mana allintaqa ruwarunkichik! Huklaw llaqtayuq warmikunawan casarakuruspaykichikmi Diosninchikta qipancharunkichik”, nispa.+

28 Joiadapa+ huknin churinmi Bet-horon llaqtayuq Sanbalatpa+ warmi churinwan casarakurusqa, paytam qarqururqani. Joiadapa taytan Eliasibqa+ karqa sacerdotekunapa kamachiqninmi.

29 Chaymantam Diosta mañakurqani: “Diosnilláy, amayá qunqaruychu paykunapa mana allin ruwasqankutaqa. Paykunaqa sacerdotekunatam pinqayman churarunku. Hinaspapas Leviy+ ayllukuna sacerdote kanankupaq contrato* ruwasqaykitam mana kasukunkuchu”, nispa.+

30 Ñuqam huklaw llaqtayuqkunamanta runakunata sapaqcharqani. Ñuqataqmi sacerdotekunatawan Leviy ayllukunatapas imam ruwayninkuman churarqani.+ 31 Kamachirqanitaqmi tupachisqayman hina yantata+ hinaspa imapapas punta rurunta apamunankupaq.

Hinaspaymi Diosta mañakurqani: “Diosnilláy, amayá qunqarullawaychu”, nispay.+