LAMENTACIONES
“Lamentaciones” ninanqa: “Llaki taki”, ninanmi.
א [alef*]
1 ¡Imaynamá achkallaña runayuq kachkaspanqa Jerusalen llaqtaqa sapallan qiparun!+
¡Wakin nacionkunamantapas ancha riqsisqa kachkaspanmi viuda hina qiparun!+
¡Wakin llaqtakunamantapas kamachiqpa warmi churin hina kachkaspanmi llumpayta llamkachkan!+
ב [bet]
2 Payqa tukuy tutam hikchuy-hikchuyta waqachkan.+
Llapallan waynankunamantapas manam mayqallanpas sunqunta tiyaykachinanpaqqa kanchu.+
Paywan hukllawakuqkunapas qipancharunmi,+ kunanqa chiqniqninkunañam rikurirun.
ג [guimel]
3 Juda runakunataqa ñakarichispa llamkachikunankupaqmi+ huklawman aparunku.+
Huklaw nacionkunaman apasqa kaspankum chaypi yachanqaku*,+ paykunaqa manam samaykunqakupaschu.
Ñakarichkaptinkum chiqniqninkuna chayaramun.
ד [dalet]
4 Fiestakunaman manaña pipas hamuptinmi Sionman riq ñanpas purmachkan.+
Punkunkunapipas manañam ima runapas kanchu,+ sacerdotenkunapas* llakillawanñam hapichikun.
Sipaskunapas llakisqallañam kachkanku, Jerusalenqa llumpaytam ñakarichkan.
ה [he]
5 Chiqniqninkunapa makinpiñam kachkan, chiqniqninkunaqa hawkañam kakuchkanku.+
Tukuy huchankunaraykum Jehova Diosqa ñakarichichkan.+
Warmachankunatapas chiqniqninmi huklawman apakun.+
ו [waw]
6 Sionpa wawanpa kuyayllapaq kayninpas chinkarunmi.+
Chaypi kaq kamachiqpa yanapaqninkunapas pastota mana tariq luwichukuna hinam kachkanku,
chiqniqninkunapa ñawpaqnintam hukmanyasqallaña richkanku.
ז [zayin]
7 Jerusalenqa llakisqa kasqan punchawkunapim hinaspa mana wasiyuq hina tarikuspanmi
yuyarin ñawpaqpi tukuy ima kapuqninkunata.+
Runankunata chiqniqninkuna pusakuptinmi hinaspa pipas mana yanapaykuqnin kaptinmi+
chiqniqninkunaqa imayna qiparusqanta qawaykuspanku asikurqaku.+
ח [jet]
8 Jerusalenqa llumpaytam huchallikurun.+
Chaymi kunanqa millakuypaqña kachkan.
Ñawpaqta alabaqninkunam kunanqa pinqayninta rikuruspanku mana valeqta hinaña qawanku.+
Qaparkachaspanmi+ payqa pinqakuymanta qipanpakunña.
ט [tet]
9 Walinpas qachachasqam kachkan.
Payqa manam imayna tarikunanpiqa piensayllapas-piensarqachu.+
Imayna qiparusqanqa mancharikuypaqmi kachkan, manam pipas sunqunta tiyaykachiqninqa kanchu.
Jehova Dioslláy, kaynatam ñakarichkani, chiqniwaqniykunam hatuntukuchkan.+
י [yod]
10 Jerusalenpa quri-qullqintam chiqniqninkuna apakun.+
Huklaw nacionniyuq runakuna wasikiman yaykumusqankutam payqa rikurqa,+
runaykikunawan mana hukllawakunanpaq nisqayki nacionkunamá yaykuramurqa.
כ [kaf]
11 Llapallan runakunam llakiwan hapichikuspanku mikuyta maskachkanku.+
Mana wañurunankupaqmi imapas kapuqninkuta mikuyrayku quchkanku.
Jehova Dioslláy, qawariykamullawayá, mana valeq warmi* hinañam kallachkani.
ל [lamed]
12 Ñanninta puriqkuna, ¿manachu imapas qukusunkichik?
¡Qawawaychikyá!
Ñuqa hinaqa manam pipas ñakarirqachu,
ñuqataqa Jehova Diosmi llumpay piñakuyninpi anchata ñakarirachiwan.+
מ [mem]
13 Diosmi altomanta kachaykamun tulluykama yaykuq ninata,+ tulluykunaqa paypa makillanpim kachkan.
Purinaypipas tuqllatam churarun, qipamanmi kutirichiwan.
Saqisqa warmi hinañam kachkani.
Tukuy punchawmi unquni.
נ [nun]
14 Watasqa yugu hinam huchaykunapas kachkan, Diospa watasqanmi kachkan.
Matankayman* yuguta wataruwaptinmi mana kallpayuq kachkani.
Jehova Diosmi chiqniwaqniykunapa makinman churaykuwan, manam ima ruwakuytapas atinichu.+
ס [samekh]
15 Jehova Diosmi qichuruwan kallpasapa runaykunata.+
Achka runakunatam huñuramun musuraq kaq runaykunata wañurachinanpaq.+
Juda runakunatam Jehova Diosqa vinopaq uvas saruna uchkupi saruparun.+
ע [ayin]
16 Tukuy kaykunaraykum hikchuy-hikchuyta waqachkani.+
Sunquyta tiyaykachiqkunawan kallpanchawaqniykunapas ñuqamanta karupim kachkan.
Wawaykunatapas chiqniqniykum mana imayuqta saqirun.
פ [pe]
17 Sionqa yanapaykunankutam munachkan,+ ichaqa manam pipas yanapaykuqnin kanchu.
Jehova Diosmi Jacobta muyuriruq chiqniqninkunata umacharun paypa contranpi rinankupaq.+
Jerusalenqa millakuypaqmi paykunapaqqa rikurirun.+
צ [sade]
18 Jehova Diosqa allin ruwaqmi,+ ñuqam kamachikuyninkunataqa mana kasukurqanichu.+
Llapallan llaqtakuna uyariychik, ñakarisqayta qawaychik.
Musu-sipasniykunatam huklawman aparunku.+
ק [qof]
19 Waynaykunatam qayarqani, ichaqa saqiruwanmi.+
Llaqtapi sacerdoteykunawan punta apaqniykunapas
mikuy maskasqankupim wañurun.+
ר [resh]
20 Jehova Dioslláy, llumpay hukmanyasqam kallachkani.
Sunquymi llumpayta ñakarichkan.
Mana kasukuq kasqayraykum sunquypas tukukuchkan.+
Hawapipas espadawanmi wañuchichkanku,+ wasi ukupipas wañuyllañam kachkan.
ש [shin]
21 Llakillawanña hapichikusqaytam runakuna uyarirun, manam pipas sunquy tiyaykachiqqa kanchu.
Chiqniwaqniykunapas ñakarisqaytaqa yacharunmi.
Qam ñakarichiwasqaykiraykum paykunaqa kusisqallaña kachkanku.+
Ichaqa nisqayki punchawtaqa chayachimunkipunim,+ chay punchawpim paykunapas ñuqa hina kanqaku.+
ת [taw]
22 Imaynam huchaykunarayku ñuqata ñakarichiwarqanki,+
chaynayá paykunatapas mana allin ruwasqankumanta ñakarichiy.
Ñuqaqa llakillawanñam hapichikuchkani, sunquypipas hukmanyasqam tarikuni.
א [alef]
2 ¡Imaynamá Jehova Diosqa piñakuyninwanqa puyuwan hina Sionpa wawantaqa pamparun!
Israelpa sumaq kaynintam hanaq pachamanta chamqamuchkaq hina chinkarachin.+
Piñakuynin punchawpiqa chakinpa sarupakunantaqa manam yuyarqachu.+
ב [bet]
2 Jehova Diosqa mana llakipayarispam Jacobpa wasinkunata tuñirachin.
Piñakuyninpim Juda runakunapa mana yaykuy atinan llaqtankunata tuñirachin.+
Kamachiqtawan yanapaqninkunatam+ pinqayman churarun, mana kaqpaqtam ruwarun.+
ג [guimel]
3 Llumpay piñakuyninpim Israelpa atiyninta chinkarachin.
Chiqniqninkuna hamuptinmi Diosqa mana yanaparqachu.+
Jacobpaqqa muyuriqninta rupaq nina hinam karqa.+
ד [dalet]
4 Chiqniqnin hinam flechananta chutarin, flechaq-flechaqllañam kachkan.+
Allinpaq qawasqanku runakunatam llapanta wañuchirqa.+
Sion runakunapa carpanmanmi+ ninata hina piñakuyninta kachaykamurqa.+
ה [he]
5 Jehova Diosqa chiqniqninkuna hinam rikurirurqa,+
Israeltam chinkarachirqa.
Israelpi torrekunatam tuñirachirqa,
murallayuq llaqtankunatam tuñiparachirqa.
Judapa wawantam astawan llakichirqa hinaspa waqachirqa.
ו [waw]
6 Huertapi hatusta hinam chukllantapas tuñiparachin.+
Fiestankutapas chinkarachinmi.+
Sionpi samana punchawta yuyarisqankutapas Jehova Diosqa qullurachinmi.
Llumpay piñakuyninpiqa manam llakipayanchu kamachiqtapas nitaq sacerdotetapas.+
ז [zayin]
Torrekunapa allin pirqankunatapas chiqniqninkunapa makinmanmi churaykun.+
Fiestapi hinaraqmi Jehova Diospa wasinpipas qaparirqaku.+
ח [jet]
8 Jehova Diosqa Sion llaqtapa murallanta tuñichinanpaqmi tantiarun.+
Tupunan waskatapas mastarirurqam.+
Chinkachinankutaqa manam harkakurqachu.
Hawa lawpiwan uku lawpi murallatapas tuñichinmi,
lliwtamá payqa tuñichin.
ט [tet]
9 Punkunkunapas pampapim chinkarun.+
Trankankunatapas payqa pakiparurqam.
Chaypi kamachiqwan yanapaqninkunapas huklaw nacionkunapiñam kachkanku.+
Manañam ima kamachikuypas kanchu, Diosmanta willakuqkunatapas* Jehova Diosqa manañam musquyninpiqa imatapas ninñachu.+
י [yod]
10 Sion llaqtapa punta apaqninkunapas mana imatapas nispankum pampapi tiyachkanku.+
Paykunaqa umankumanmi allpata machqikuchkanku, qachqa pachayuqmi kachkanku.+
Jerusalenpi kaq sipaskunapas pampakamam kumuykunku.
כ [kaf]
11 Waqaytapas amiruniñam.+
Sunquypipas hukmanyasqam tarikuni.
Llaqtaypa wawan chinkaruptinmi llumpay llakisqallaña kachkani*.+
Llaqtapa plazankunapi warmakunawan wawakuna wañunayaptinmi llakisqallaña kachkani.+
ל [lamed]
12 Warmakunam mamankuta ninku “yarqawachkanmi, yakunayawachkanmi” nispanku.+
Llaqtapa plazankunapi wañunayachkaq runakuna hinam kachkanku.
Mamankupa marqayninpim wañuruchkankuña.
מ [mem]
13 Jerusalen llaqta, ¿imawantaq tupachikiman?
¿Pitaq qam hina ñakarichkan?
Sionpi runakuna, ¿imawantaq tupachikiman sunquykita tiyaykachinaypaq?
Hatun lamar qucha hinam qampa llakikuynikiqa,+ ¿pitaq hampisunkiman?+
נ [nun]
14 Qanmanta willakuqkunapas llullakuspankum musqukusqankuta willasurqanki,+
yanqakunallatamá nisurqanki, paykunaqa pantasqaykitapas manam willasurqankichu, chaynapi huklawman mana apasqa kanaykipaq.+
Aswanqa hinallam llullata hinaspa yanqakunallata willasurqanki.+
ס [samekh]
15 Ñannin pasaqkunapas taqllakuspankum qanmanta asikunku.+
Jerusalenpa wawanta qawaspankum asikunku,+ umankutapas aywisparaqmi ninku:
“¿Kay llaqtamantachu nirqaku ‘suma-sumaqmi, llapallan runakunapa kusikuyninmi’ nispanku?”,
nispa.+
פ [pe]
16 Llapallan chiqnisuqnikikunam qampa contraykipi tukuyta rimarqaku.
Asikuspankum, kirunkutapas kirichichichispankuraqmi ninku: “Paytaqa chinkarachinchikmi.+
Kay punchawtam suyachkarqanchik.+ ¡Kayqaya chayaramun! ¡Kayqaya rikurunchik!”, nispa.+
ע [ayin]
17 Jehova Diosqa nisqanman hinam cumplirqa,+ chaynatamá ruwarqa.+
Ñawpaqmantaraq kamachisqanman hinamá ruwarqa.+
Mana llakipayaspanmi chinkarachin,+ chiqnisuqnikikuna ima pasasusqaykimanta asikunankutam payqa saqirqa.
Chiqnisuqnikikunatam aswan atiyniyuqta ruwarun.
צ [sade]
18 Sion llaqtapa murallan, runakunam tukuy sunqunkuwan Jehova Diosta qayakunku.
Waqaptinkuyá wiqinkupas mayu hina tuta-punchaw kallpachun,
ama samaykuspayá waqachun.
ק [qof]
19 ¡Hatarispayá tukuy tuta waqay!
Yakuta tallichkaq hinayá Jehova Diosman sunqumanta waqa-waqarispa willakuy.
Esquinakunapi yarqaymanta wañunayaq warmaykikunaraykuyá
yanapasunaykipaq mañakuy.+
ר [resh]
20 Jehova Dioslláy, mana llakipayarisqaykitayá qawariy.
¿Hinallachu warmikunaqa sanolla naceq wawankuta mikukunqaku?+
Jehova Dioslláy, ¿wasikipichu sacerdotekunawan qanmanta willakuqkunapas wañuchisqa kanqaku?+
ש [shin]
21 Musukunapawan yuyaqkunapa ayanpas callekunapim chutarayachkan.+
Musu-sipasniykunatapas espadawanmi wañurachinku.+
Piñakuyniki punchawpim wañurachirqanki, mana llakipayaspaykim wañurachirqanki.+
ת [taw]
22 Kusikuy punchawpaq hinaraqmi+ tukuy hinastinmanta mancharichiwaqniyku kaqta huñuramunki.
Jehova Dioslláy, piñakuyniki punchawmantaqa manam pipas ayqirqachu,+
wañuymantaqa manam pipas lluptirqachu. Wachakuspa uywasqaykunatam chiqniwaqniykuna chinkarachin.+
א [alef]
3 Ñuqaqa Diospa piñakuyninpi ñakariyta rikuq runam kani.
2 Paymi qarquruwaspan mana achkipa kanan tutayaypi purichiwan.+
3 Payqa tukuy punchawmi ñakarichiwan, sapa kutim ñakarichiwan.+
ב [bet]
4 Tullunwan-qarallanñam kachkani,
tulluykunapas pakipakurunmi.
5 Venenoyuq qatqi hampiwanmi muyurirachiwan,+ sasachakuykunawanmi inturachiwan.
6 Unay tiempoña wañukuq runata hinam payqa tutayaypi kachiwan.
ג [guimel]
7 Pirqakunapa chawpinpim wichqaruwan mana lluptinaypaq,
broncemanta llasaq cadenakunawanmi wataruwan.+
8 Yanapaykuwananpaq qayakuptiypas payqa manam uyariwanchu.+
9 Purinay ñankunatapas llaqllasqa rumikunawanmi wichqarun,
purinay ñankunatapas huklawmanmi muyurachin.+
ד [dalet]
10 Oso hinaraqmi payqa pawaykamuwananpaq suyawan, pakakuspa suyaq leon hinaraqmi payqa suyawan.+
12 Flechanantapas chutarispanmi ñuqamanpuni qawachimuwan.
ה [he]
13 Flecha churananmanta hurquykuspanmi rurunniypipuni flecharuwan.
14 Llaqtamasiykunapa asikunanñam rikuriruni, sapa punchaw takipayanankuñam rikuriruni.
15 Qatqi kaqkunatam mikurachiwan, ajenjota hinam tomachiwachkan.+
ו [waw]
16 Kiruykunatam payqa aqu rumiwan pakiparun,
manchakuymantam payqa uchpapi quchpachiwan.+
17 Payqa manam hawkayaypiqa kawsachiwanchu, manañam allin kaqkunatapas yuyariniñachu.
18 Chaymi nini: “Ancha riqsisqa kayniymi chinkarun, Jehova Diospipas manañam hapipakuniñachu”, nispa.
ז [zayin]
19 Llakisqa kasqaytawan mana wasiyuq hina tarikusqaytayá yuyariy,+ ajenjotawan venenoyuq qatqi hampitapas yuyariyá.+
20 Qamqa yuyariykuwaspachá yanapaykuwanaykipaq hamunki.+
21 Chaytam sunquypi yuyani, chaymi mana amispay suyasaq.+
ח [jet]
22 Jehova Diosqa imaña kaptinpas kuyakuq kasqanraykum manaqa chinkarunchikchu.+
Payqa haykapipas llakipayarikuqmi.+
23 Paypa llakipayakuq kayninqa sapa achikyaytam musuq,+ payqa haykapipas yanapakuqmi.+
24 Ñuqam nirqani: “Jehova Diosqa herenciay hinam,+ chaymi mana amispay suyallasaq”, nispa.+
ט [tet]
25 Paypi hapipakuqkunataqa Jehova Diosqa yanapaykunmi,+ mana amispa maskaqninkunataqa yanapaykunmi.+
26 Jehova Dios salvaykuwananchikta+ mana amispa suyayqa allinpunim.+
27 Runapaqqa ancha allinmi musullaraq kachkaspan yuguta apayninqa.+
י [yod]
28 Payqa sapallanyá upallalla tiyachun yuguta hawanman Dios churanankama.+
29 Pampakamaraqyá simintapas chayachichun,+ icharaqpas llakipayasqa kanman.+
30 Laqichuqninmanyá uyantapas qawachichun, aminankamayá tukuyta nichikuchun.
כ [kaf]
31 Jehova Diosqa manam wiñaypaqchu saqiruwasun.+
32 Pita ñakarichispanpas imaña kaptinpas kuyakuq kasqanraykum llakipayanqa.+
33 Payqa manam munanchu runakuna ñakarichiytaqa nitaq llakichiytaqa.+
ל [lamed]
34 Payqa manam munanchu kay allpa pachapi presochasqa kaqkuna sarutyasqa hina kanankutaqa.+
35 Hanaq pacha Diosqa manam munanchu allin ruwaq runata paypa qayllanpi mana kaqpaqta hina hapinankutaqa.+
36 Jehova Diosqa manam munanchu
pipa quejantapas paypa munasqanman hina mana allichaptinkuqa.
מ [mem]
37 Ñuqa Jehova Dios mana kamachichkaptiyqa, ¿pitaq imatapas ninman? ¿Pitaq imatapas ruwanman?
38 Hanaq pachapi Diosqa allin kaqkunallatam riman,
manam mana allin kaqkunataqa rimanchu.
39 ¿Yaqachu pipas huchanman hina ñakarispan imatapas ninman?+
נ [nun]
40 Imayna kawsakusqanchikta allinta qawarikuspayá+ Jehova Diosman kutirikusun.+
41 Hanaq pachapi Diospa yanapakuyninta sunqumanta mañakuspayá nisunchik:+
42 “Mana kasukuspam huchallikuruniku,+ qamqa manam pampachaykuwarqankikuchu.+
ס [samekh]
43 Piñakuynikipim qanman asuykunaykutapas mana munankichu.+
Maskawaspaykikum mana llakipayarispa wañurachiwankiku.+
44 Mañakusqaykutapas mana uyarinaykipaqmi puyuwan hina harkarachinki.+
45 Llapa runakunapa qayllanpim wischusqanku qupata hinaña ruwaruwankiku”, nispa.
פ [pe]
46 Llapallan chiqniwaqniykum ñuqaykupa contraykupi tukuyta niwanku.+
47 Manchakuywanmi kachkaniku, tuqllamanmi wichiykuniku,+ pasaypaq mana imayuqmi qiparuniku.+
48 Llaqtaypa imayna qiparusqanta qawaspaymi hikchuy-hikchuyta waqachkani.+
ע [ayin]
51 Llaqtaypa wawankunata ima pasasqanwanmi waqachkani.+
צ [sade]
52 Yanqamantam chiqniwaqniykunapas pichinkuta hina hapiruwan.
53 Rumiwan chamqapawaspankum uchkupi wañurachiwanku.
54 Umaykamaraq yaku pampaykuwaptinmi nirqani: “Wañukusaqñam”, nispay.
ק [qof]
55 Jehova Dioslláy, uku-uku uchkumantam sutikipi qayakamullarqani.+
56 Uyariykullawayá, allinlla kanaypaqwan yanapaykuwanaykipaq qayakamusqaytayá uyariykullaway.
57 Qayakamusqay punchawmi qamqa asuykamuwaspayki niwarqanki: “Ama manchakuychu”, nispa.
ר [resh]
58 Jehova Dioslláy, sasachakuypi tarikuptiymi yanapaykuwarqanki, mana wañurunaypaqmi yanapaykuwarqanki.+
59 Jehova Dioslláy, qamqa rikurqankim mana allin ruwawasqankuta. Imam ruwawasqankuman hinayá paykunatapas ruway.+
60 Mana allinta ruwawanankupaq tantiaykuspa imam ruwawasqankutaqa rikurqankim.
ש [sin utaq shin]
61 Jehova Dioslláy, mana allinta ruwawanankupaq tantiaykuspa ñuqapa contraypi tukuy ima nisqankutapas uyarirqankim.+
62 Chiqniqniykuna ñuqamanta tukuy punchaw upallallamanta tukuy ima nisqankutapas uyarirqankim.
63 ¡Qawariyá! ¡Tiyaspapas sayaspapas takipayawaspankum asikunku!
ת [taw]
64 Jehova Dioslláy, qamqa imam ruwasqankuman hinam paykunataqa ruwanki.
65 Qamqa sunqunkutam rumiyachinki, chaynatam paykunataqa ñakanki.
66 Jehova Dioslláy, piñakuynikipim paykunataqa maskaspayki kay allpa pachamanta chinkachinki.
א [alef]
4 ¡Imaynamá quriqa mana llipipipinchu!+ ¡Imaynamá chuyay-chuyay quriqa mana llipipipinchu!
¡Imaynamá Diospa wasinpi kaq rumikunaqa+ esquinakunapiqa wischurayachkan!+
ב [bet]
2 Sionpa kuyayllapaq wawankunaqa chuyay-chuyay quri hinam valorasqa karqaku,
¡kunanqa allpa manka hinam kachkan,
allpa manka ruwaqpa makinpi hinam kachkan!
ג [guimel]
3 Atuqkunapas uñankunataqa ñuñunmi,
runaykunam ichaqa chunniqpi yachaq avestruzkuna hina+ mana llakipayakuq rikurirunku.+
ד [dalet]
4 Ñuñuq wawapa qallunpas yakumantam laqakurun.
Warmakuna mikuyta mañakuptinkupas+ manam pipas quykunchu.+
ה [he]
5 Allinllanta mikuqkunapas yarqaymantam callekunapi chutarayachkanku.+
Puka pachawan pachakuqkunapas+ kunanqa uchpapim qupitachkanku.
ו [waw]
6 Sodoma llaqtata huchanmanta castigasqaymantaqa astawanmi llaqtaypa wawantaqa castigasaq.+
Sodomaqa mana pipa yanapasqanmi chinkachisqa karqa.+
ז [zayin]
7 Ñuqapaq sapaqchasqa* runakunaqa+ ritimantapas aswan yuraqmi karqa, lechemantapas aswan yuraq-yuraqmi karqa.
Coral alaqa rumimantapas aswan rosadoraqmi karqaku, suma-sumaq azul alaqa* rumimantapas aswan llipipipiqraqmi karqaku.
ח [jet]
8 Kunanqa yana mankamantapas aswan yanaraqmi kachkanku,
callekunapipas mana riqsipañam purichkanku.
Chakisqa qiru* hinam tullunwan-qarallanña kachkanku.+
ט [tet]
9 Yarqaymanta wañunamantaqa espadawan wañuymi aswan allinqa,+
yarqaymanta wañuqkunaqa tarpukuyninku mana qispiptinmi ñakarispa yarqaymanta wañunku.
י [yod]
10 Llakipayakuqllaña warmikunapas kikinkupa wawankutam yanukurunku.+
Jerusalen llaqta chinkaptinmi paykunaqa wawankuta mikurqaku.+
כ [kaf]
11 Jehova Diosqa piñakururqam,
llumpay piñakuynintam kachaykamurqa.+
Sionpa maymi kanantapas ninawanmi kañaykun.+
ל [lamed]
12 Nacionkunapi kamachiqkunapas chaynataq runankunapas manam piensarqakuchu
Jerusalen llaqtapa punkunkunata chiqniqnin runakuna yaykumunantaqa.+
מ [mem]
13 Chayqa pasakurqa Diosmanta willakuqkunapa* huchanpim hinaspa sacerdotenkunapa huchanpim.+
Paykunapa huchanpim allin ruwaq runakuna wañurqa.+
נ [nun]
14 Paykunaqa callekunapim ñawsa runakuna hina tamsaykacharqaku.+
Paykunaqa yawarllañam kachkanku,+
chaymi pachankupas mana llachpana kachkan.
ס [samekh]
15 Llapa runakunam ninku:
“¡Kaymanta asuwaychik! ¡Qamkunaqa millakuypaqñam kachkankichik! ¡Kaymanta asuychik! ¡Asuriychik! ¡Amayá llachpawaykuchu!”, nispa.
Paykunaqa mana wasiyuq qiparuspankum muspaypi hina purichkanku.
Nacionkunapi runakunapas kaynatam ninku: “Paykunaqa manam ñuqaykuwanqa yachanmanchu.+
פ [pe]
16 Jehova Diosmi paykunataqa chiqirachin,+
Diosqa manañam paykunataqa qawarinqañachu.
Runakunaqa sacerdotekunatapas+ hinaspa punta apaqkunatapas+ manam respetankuchu nitaq llakipayankuchu”, nispa.
ע [ayin]
17 Ñawiykupas nanay-nanayraqmi kachkan yanapaykuwanankupaq yanqa qayakusqaykurayku.+
Yanqam huklaw nacionpa yanapakuynintapas maskasqaniku.+
צ [sade]
18 Ñuqaykuqa paykunapa ñawillanpim karqaniku,+ manañam plazaykupipas purirqanikuñachu.
Wañunayku punchawmi hichpaykamuchkanña, chinkanayku punchawmi kayllapiña kachkan, chayaramunmá chay punchawqa.
ק [qof]
19 Qatikachawaqniykuqa ankakunamantapas aswan utqaymanraqmi hayparamuwanku.+
Urqukunapim qatikachawarqaku, chunniqpi pakakuspam hapiruwanku.
ר [resh]
20 Jehova Diospa akllasqan runam,+ kawsachiwaqniykum paykunapa uchku ruwasqanman preso hina wichiykun.+
Paymantam niq kaniku: “Paypa nanachikusqanmi huklaw nacionkunapi yachasunchik”, nispa.
ש [shin]
21 Edompa wawan,+ kusikuymantayá pawaykachay, qamqa Uz allpapim yachachkanki.
Ichaqa qanmanpas tomanayki vasom chayamusunki,+ hinaptinmi sinkaruspa qalalla kanki.+
ת [taw]
22 Sionpa wawan, huchaykirayku ñakarinayki punchawqa tukurunñam.
Manañam kaqmantaqa huklawmanqa apasqachu kanki.+
Edompa wawan, qamtam ichaqa huchaykikunarayku castigasunki.
Huchaykikunam lliwpa yachasqan kanqa.+
5 Jehova Dioslláy, ima pasaruwasqankutayá yuyariy.
Pinqaypi kasqaykutayá qawarimuy.+
2 Kapuwaqniykutam huklaw runakuna apakunku, wasiykutapas huklaw runakunam hapikuykunku.+
3 Mana taytayuqmi qiparuniku, mamaykupas viudañam qiparun*.+
4 Yakuykuta tomanaykupaqpas rantinaykum,+ kikiykupa yantaykutapas rantinaykum.
5 Qatikachawaqniykupas kunkamantam hapiruwachkankuña.
Pisipasqam kachkaniku, manam samarinaykutapas saqiwankuchu.+
6 Egiptopa yanapakuynintawan+ Asiriapa yanapakuynintam+ maskaniku mikunaykupaqpas.
7 Huchallikuruq ñawpaq abueloykuqa manañam kanñachu, paykunapa huchanraykum ñuqaykuña ñakarichkaniku.
8 Sirvienteykupa makinpiñam kunanqa kachkaniku, manam pipas paykunapa makinmantaqa hurquykuwankuchu.
9 Chunniqpi espadawan wañurachiwananku kachkaptinpas mikunaykupaq kaqtam maskarqaniku.+
10 Yarqaymanta ñakariptiykum aychaykupas horno hinaña ruparirqa.+
11 Sionpim qusayuq warmikunata abusarurqaku. Juda nacionpa llaqtankunapi qariwan manaraq puñuq sipaskunatapas abusarurqakum.+
12 Kamachiqpa yanapaqninkunatapas makimantam warkururqaku,+ punta apaqkunatapas manam respetarqakuchu.+
13 Musukunam maraytawan tunawta apanku. Warmakunapas llasaq yantata apaspam urmanku.
14 Punta apaqkunapas manañam llaqtapa punkunpiqa kankuñachu.+ Musukunapas manañam imatapas tocankuchu.+
15 Sunquykupi kusikuyniykupas chinkarunmi, tusunaykumantaqa llakillapiñam kachkaniku.+
16 Umaykupi coronaykupas wichirunmi. ¡Imaynaraq kasaqku, huchallikurunikum!
17 Chaymi sunquykupipas hukmanyasqallaña tarikuniku,+
chaykunaraykum ñawiykupas tutayarun,+
18 Sion muqu chunnirusqanraykum chayna kachkani,+ chaypiqa atuqkunallañam purikuchkan.
19 Jehova Dioslláy, qanmi ichaqa kamachinaykipi wiñaypaq tiyanki.
Kamachikuynikiqa wiña-wiñaypaqmi kanqa.+
20 ¿Imanasqamá pasaypaq qunqaruwankiku? ¿Imanasqamá una-unayñaqa saqiruwankiku?+
21 Jehova Dioslláy, qanman kutirimunaykupaq yanapawaptikikuqa kutirimusaqkum.+
Ñawpaq tiempopi hina kawsakunaykupaqyá yanapaykullawayku.+
22 Qanmi ichaqa pasaypaq qipancharuwankiku.
Ñuqaykupaqmi hinalla piñasqa kachkanki.+
Kay capitulomanta 4 kaq capitulokamam hebreo rimayninkuman hina rakinasqa llaki takikuna kachkan.
Utaq: “Tiyanqaku”.
Qaway kay palabrapa ima ninan kasqanta.
Kaypiqa Jerusalenmantam rimachkan.
Utaq: “Nucayman”.
Qaway kay palabrapa ima ninan kasqanta.
Utaq: “Profetakunatapas”. Qaway kay palabrapa ima ninan kasqanta.
Hebreo rimaypiqa nichkan: “Kichpanniykunata allpaman aqturuni”, nispam.
Ichapas kanman: “Barbechasqa chakrata hinam saqiruwan”, niqpas.
Utaq: “Nazareo”. Hebreo rimaypiqa nichkan: “Nazir”, nispam.
Utaq: “Zafiro”.
Utaq: “Kaspi”.
Utaq: “Profetakunapa”.
Hebreo rimaypiqa nichkan: “Mamaykupas viudakuna hinañam qiparun”, nispam.