AMOS
1 Kayqa Tecoa+ llaqtayuq Amospa* willakusqanmi, payqa karqa ovejata michiqmi. Payqa Israel runakunapaqmi kay willakuyta chaskirqa musquypi hina*. Chayqa karqa Uzias+ Juda nacionta kamachichkaptinmi hinaspa Jeroboanpa+ churin Joas+ Israelpi kamachichkaptinmi chaynataq terremotomanta+ iskay wata ñawpaqtaraqmi. 2 Kaynatam nirqa:
“Sion muqumantam Jehova Diosqa qaparinqa,
Jerusalenmantam qayakunqa.
Oveja michiqkunapa pastonpas llakikuypaqmi kanqa,
Carmelo urqupas chakinqam”, nispa.+
3 “Jehova Diosmi nin:
‘“Damasco llaqta sapa kutilla mana kasukusqanraykum* tantiasqaytaqa ruwasaqpuni,
paykunaqa Galaadtam fierromanta trillanawan trillarurqaku.+
5 Damascopa punku trankanankunatam pakipasaq.+
Bet-edenpi kamachiqtawan Bikat-avenpi yachaqkunatam* chinkachisaq.
Siria runakunatam Kir lawman apasaq”, nispa.+
Jehova Diosmi chayta nin’.
6 Jehova Diosmi nin:
‘“Gaza llaqtapi runakuna+ sapa kutilla mana kasukusqanraykum* tantiasqaytaqa ruwasaqpuni,
paykunaqa apasqanku runakunatam+ Edonman quykurqaku.
7 Gaza+ llaqtapa pirqankunamanmi ninata kacharimusaq,
hinaptinmi torrenkunata rupanqa.
8 Asquelon+ llaqtapi kamachiqtawan Asdod+ llaqtapi yachaqkunatam chinkachisaq.
Ecron+ llaqtamanmi ñakariyta kacharisaq*.
Chinkanqakum puchuq Filistea runakunapas”, nispa.+
Llapallan kamachiq Jehova Diosmi chaynata nin’.
9 Jehova Diosmi nin:
‘Tiro llaqtapi runakuna+ sapa kutilla mana kasukusqanraykum* tantiasqaytaqa ruwasaqpuni,
paykunaqa apasqanku runakunatam Edom llaqtaman quykurqaku.
Paykunaqa manam yuyarirqakuchu wawqintin hina kanankupaq rimasqankutaqa*.+
10 Tiropa hatun pirqankunamanmi ninata kacharimusaq,
hinaptinmi torrenkunata rupanqa’, nispa.+
11 Jehova Diosmi nin:
‘Edom+ llaqtapi runakunapa sapa kutilla mana kasukusqanraykum* tantiasqaytaqa ruwasaqpuni,
payqa wawqintam espadawan qatikacharqa.+
Payqa manam llakipayariyta munarqachu.
Piñakuspanmi mana llakipayarispan hinalla llikipachkan.
Paykunapaqmi piñasqalla kachkan.+
13 Jehova Diosmi nin:
‘“Ammon runakuna sapa kutilla mana kasukusqanraykum*+ tantiasqaytaqa ruwasaqpuni,
paykunaqa allpankuta mirachinankupaqmi Galaad llaqtapi wiksayuq warmikunapa wiksanta llikirurqaku.+
14 Raba llaqtapa pirqankunatam kañasaq,+
hinaptinmi torrenkunata rupanqa.
Peleasqanku punchawpim qapariy uyarikunqa,
chay punchawpim llumpa-llumpay wayra-para kanqa.
15 Kamachiqwan yanapaqninkunapas huklawman apasqam kanqaku”, nispa.+ Jehova Diosmi chaynata nin’.
2 Jehova Diosmi nin:
‘“Moab runakuna sapa kutilla mana kasukusqanraykum*+ tantiasqaytaqa ruwasaqpuni,
payqa Edom llaqtata kamachiqpa tulluntam uchpayanankama kañarurqa.
2 Moabmanmi ninata kacharimusaq,
Keriyot+ llaqtapa torrenkunatam rupanqa.
Chaqwapa chawpinpim Moab wañunqa,
peleanankupaq qapariptinkum Moab wañunqa. Waqrapa waqasqan uyarikuptinmi Moab wañunqa.+
3 Paykunamantam kamachiqta chinkachisaq.
Kamachiqtawan yanapaqninkunatam chinkachisaq”, nispa.+ Jehova Diosmi chaynata nin’.
4 Jehova Diosmi nin:
‘Juda runakuna sapa kutilla mana kasukusqanraykum*+ tantiasqaytaqa ruwasaqpuni,
paykunaqa ñuqa Jehova Diospa kamachikuyniytam qipancharurqaku.
Paykunaqa kamachikuyniytam mana kasukurqakuchu.+
Paykunataqa ñawpaq abuelonkupa llullakunata creesqankum pantayman aparurqa.+
5 Juda allpamanmi ninata kacharimusaq,
Jerusalenpa torrenkunatam rupanqa’, nispa.+
6 Jehova Diosmi nin:
‘Israel runakuna sapa kutilla mana kasukusqanraykum*+ tantiasqaytaqa ruwasaqpuni,
paykunaqa allin ruwaq runatam qullqirayku rantikururqaku*.
Wakchatapas huk paris usutallapaqmi rantikururqaku.+
7 Wakchakunapa umantam allpapi sarupanku.+
Llampu sunqukunapa ñannintam wichqanku.+
Churipas taytanpas huk sipasllawanmi puñukunku,
chaykunawanmi chuya sutiyta pinqayman churanku.
8 Pagayta mana atispanku saqisqanku pachapa+ hawanpim altarkunapa* waqtanpi+ puñukunku.
Taytacha-mamachankupa wasinpi tomasqanku vinopas runakunamanta mañakusqanku qullqiwan rantisqankum’, nispa.
9 ‘Ichaqa ñuqam paykunapa ñawpaqninpi Amorreo runakunata chinkarachirqani,+
cedro sachakuna hinam machu-machu karqa, roble sachakuna hinam mana pakikuq karqa.
Rurunkunatam ñutuparurqani, sapinkunatam takaparurqani.+
10 Ñuqam Egipto allpamanta hurqumurqani,+
40 watapunim chunniqpi purichirqani+
Amorreo runakunapa allpanta hapikunankupaq.
¿Chaynachu icha manachu, yaw Israel llaqta?’, nispa. Jehova Diosmi chaynata nin.
12 ‘Ichaqa ñuqapaq sapaqchasqay runaykunamanmi qamkunaqa vinota tomachirqankichik.+
Ñuqamanta willakuqkunatam nirqankichik: “Ama willakuychu”, nispa.+
13 Maypi kaptikichikpas sarusqaykichikmi,
imaynam trigo cargayuq carretapas imapas sarusqantaqa qalaypaq sarun, chaynam sarusqaykichik.
14 Maynaña kallpaqpas* manam maymanpas ayqiyta atinqachu,+
kallpasapa kaqpas mana kallpayuqmi kanqa,
maynaña allin peleaqpas manam ayqinqachu.
15 Flechaqpas maymi kananpiqa manañam kanqachu,
allin kallpaqpas manam ayqinqachu,
caballopi silladapas manam ayqinqachu.
16 Mana manchakuq soldadopas
qalachallam chay punchawqa ayqikunqa’, nispa.+ Jehova Diosmi chaynata nin”.
3 “Israel runakuna uyariwaychik, qamkunamanta ñuqa Jehova Diospa nisqayta. Israelpi llapallan ayllukuna qamkunatam Egipto allpamanta hurqumurqaykichik:
2 ‘Kay allpa pachapi llapallan ayllukunamantam qamkunallata akllarqaykichik.+
Chayraykum mana allin ruwasqaykichikmanta castigasqaykichik.+
3 ¿Yaqachu iskay runakuna purinmanku tupanankupaq mana ninakuchkaspanku?
4 ¿Yaqachu montepi leon qaparinman hapinanpaq mana imapas kachkaptin?
¿Yaqachu malta leon puñunanpi waqanman imatapas mana hapichkaspan?
5 ¿Yaqachu pichinkucha tuqllawan hapirachikunman pipas tuqllata mana churachkaptin*?
¿Yaqachu tuqlla siqukunman mana imatapas hapichkaspan?
6 Llaqtapi waqrata pukuptinkuqa, ¿manachum runakuna manchakunku?
Llaqtapi imapas karuptinqa, ¿manachu Jehova Dios chaytaqa ruwarun?
7 Llapallan kamachiq Jehova Diosqa manam imatapas ruwanqachu
8 Leon qapariptinqa,+ ¿pitaq mana manchakunmanchu?
Llapallan kamachiq Jehova Dios rimariptinqa, ¿pitaq mana willakunmanchu?’+
9 ‘Asdog llaqtapa torrenkunapa hawanmantayá willakuychik.
Egipto allpapa torrenkunapa hawanmantayá willakuychik.
Niychikyá: “Samariapa urqunkunaraykuyá huñunakuychik.+
Qawaychikyá chawpinpiqa chaqwalla kasqanta.
Qawaychikyá chawpinpi mana allinllata ruwasqankuta.+
10 Paykunaqa manam yachankuchu allin kaqkunata ruwaytaqa, Jehova Diosmi chaynata nin.
Paykunaqa llaqtakunata chinkachispanku tukuy ima apasqankutam palacioman churanku”’, nispa.
11 Chayraykum llapallan kamachiq Jehova Dios nin:
“Chiqniqninmi llaqtata muyurirunqa,+
atiynikitam qichusunki.
Kamachiqpa wasinpi tukuy ima kaqkunatam apakunqaku”, nispa.+
12 Jehova Diosmi nin:
‘Imaynam michiqpas ovejanpa atakankunatawan rinrillantaña leonmanta qichun,
chaynam Israel runakunapas wakillan ayqinqaku.
Kunankamallaqa Samariapim alli-allin puñunapi waqtapachkanku, suma-sumaq tiyanapim tiyachkanku’, nispa.+
13 Uyarispaykichikyá Jacobpa mirayninkunaman willaychik, llapallan kamachiq Jehova Diosmi chaynata nin. Angelkunata kamachiq Diosmi chaynata nin.
14 Israelmanmi mana kasukusqanmanta ñakariyta kacharisaq.+
Betelpi altarkunatapas ñutupasaqmi.+
Altarpa waqrachankunatam kuchusaq, hinaptinmi pampaman wichinqa.+
15 Puquy tiempopi kananku wasitawan usyay tiempopi kananku wasitam tuñichisaq.
Marfilmanta* wasikunam tuñinqa.+
Hatu-hatun* wasikunapas purmanqam”, nispa.+ Jehova Diosmi chaynata nin.
4 “Kaytayá uyariychik Samaria urqukunapi+ Basan law vacakuna,
mana kapuqniyuqkunata pantaykachispa imantapas apakuq warmikuna,+
wakchakunata sarupaq warmikuna,
‘¡imallatapas apamuwayku tomanaykupaq!’ nispa qusankuta niq warmikuna.
2 Llapallan kamachiq Jehova Diosmi chuya kasqanrayku nin:
‘“¡Uyariwaychik! Hamuchkanmi punchaw fierromanta ganchowan aychata warkuchkaq hina paykunata warkunaypaq,
puchuqkunatapas anzuelowanmi warkusaq.
3 Sapakamam tarisqaykichik pirqa kakllunta lluptinkichik,
Harmon lawmanmi qarqusqaykichik”, nispa. Jehova Diosmi chaynata nin’.
4 ‘Betelman hamuspaykichikyá mana allinkunata ruwaychik,+
Guilgalman hamuspaykichikyá, ¡astawanraq mana allinkunata ruwaychik!+
Achikyaqtayá kañana kaqkunata apamuychik,+
kimsa kaq punchawpiñataqyá diezmoykichikkunata* apamuychik.+
5 Tukuy imamanta agradecekusqaykichikraykuyá levadurawan ruwasqa tantata kañaychik.+
¡Kikikichikmanta imapas qusqaykichik ofrendatayá qayaykachakuspa quychik!
Israel runakuna, chaytam qamkunaqa kusikuyllawanña ruwankichik’, llapallan kamachiq Jehova Diosmi chaynata nin.
6 ‘Ñuqapas llapallan llaqtakunapim mikuyta mana qurqanichu,
llapallan wasikunatam mana mikunayuqta saqirurqani,+
chaywanpas qamkunaqa manam ñuqamanqa kutirikamuwarqankichikchu’,+ Jehova Diosmi chaynata nin.
7 ‘Ñuqapas manam parachirqanichu kimsa killaraq kawsaykuna huñunapaq kachkaptinpas.+
Huk llaqtamanmi parachirqani, huk llaqtamanñataqmi mana.
Huklaw allpamanmi parachirqani,
huklaw allpañataqmi mana parachiptiy chakirqa.
8 Iskay-kimsa llaqtamanta runakunam tampi-tampi huklaw llaqtaman yakurayku rirqaku,+
ichaqa hinallam yakunayachikurqaku,
chaywanpas qamkunaqa manam ñuqamanqa kutirikamuwarqankichikchu’,+ Jehova Diosmi chaynata nin.
9 ‘Tarpukusqaykichikkunam rupaywan chakinqa, unquymi hapinqa.+
Qamkunaqa huertaykichiktawan uvasnikichiktam mirarachirqankichik,
ichaqa aqarway urum higosnikichiktawan aceitunasnikichikta tukururqa,+
chaywanpas qamkunaqa manam ñuqamanqa kutirikamuwarqankichikchu’,+ Jehova Diosmi chaynata nin.
10 ‘Egipto runakunata hinam unquywan ñakarichisqaykichik.+
Espadawanmi musukunata wañurachirqani,+ caballonkutam hapikuykurqani.+
Carpaykichikkunapa millakuypaq asnariynintam muskichirqaykichik,+
chaywanpas qamkunaqa manam ñuqamanqa kutirikamuwarqankichikchu’, Jehova Diosmi chaynata nin.
11 ‘Sodomatawan Gomorrata+ hinam qamkunataqa chinkachirqaykichik.
Qamkunaqa karqankichik
ninamanta hurqurusqa yanta hinam,
chaywanpas qamkunaqa manam ñuqamanqa kutirikamuwarqankichikchu’,+ Jehova Diosmi chaynata nin.
12 Israel runakuna, chaytam qamkunawanpas ruwasaq.
Yaw Israel runakuna, chaynata qamkunata ruwanay kasqanraykuyá
ñuqa Diosnikiwan tupanaykichikpaq alistakuchkaychik.
13 ¡Qawariychik! Ñuqam urqukunataqa ruwarqani,+ ñuqam wayrataqa rikurichirqani.+
Ñuqaqa imapas tantiasqaytam runakunaman willani,
ñuqaqa achikyaqtam tutayachini,+
ñuqaqa allpa pachapi muqukunatam sarupani.+
Ñuqapa sutiyqa angelkunata kamachiq Jehova Diosmi”.
5 “Israelpa mirayninkuna uyariychik, aya takita takichkaq hinam kaykunata nisqaykichik.
2 ‘Qariwan manaraq puñuq sipasmi wichiykun, Israelmi wichiykun.
Manam kaqmanta hatariyta atinchu.
Hina kikinpa allpanpim saqirunku.
Manam pipas hatarichiqnin kanchu’.
3 Llapallan kamachiq Jehova Diosmi nin:
‘Llaqtamanta waranqawan peleaq riq runakunam pachakllawanña qipanqa,
pachakwan riq runakunañataqmi chunkallawanña qipanqa.
Chaynam kanqa Israelpa mirayninkunawanpas’, nispa.+
4 Israelpa mirayninkunatam Jehova Dios nin:
‘Maskawaspaykichikqa kawsankichikmi.+
5 Betelmanqa+ amayá riychikchu,
Guilgalmanpas+ amataqyá riychikchu, amataqyá Beer-sebamanpas+ chimpaychikchu.
6 Hinalla kawsanaykichikpaqyá ñuqa Jehova Diosta maskawaychik,+
chaynapi Joseypa mirayninkunata nina hina ama ruparunaypaq.
Beteltapas mana pipa amachay atisqan ama ruparunaypaq.
7 Qamkunaqa allin ruwaytam qatqiyarachinkichik,
allin kaqtapas allpamanmi tallirunkichik.+
8 Ñuqaqa Suchu* sutiyuq lucerokunatam ruwarqani,
Suwapa corralnin* sutiyuq lucerotam ruwarqani,+
ñuqaqa tutayaytam achikyachini,
ñuqaqa punchawtapas tutaykachinim,+
ñuqaqa lamar quchapi yakukunata huñuykuspam allpa pachaman parachimuni...,+
ñuqapa sutiyqa Jehova Diosmi.
9 Ñuqaqa kallpasapakunatam qunqayllamanta wichichisaq,
chaynatam hatun pirqankutapas tuñichisaq.
10 Paykunaqa chiqninkum llaqtapa punkunpi allin kaqta ruwanankupaq niqkunataqa,
chiqninkum mana llullakuqkunataqa.+
11 Qamkunaqa wakchakunatam hikutankichik allpanmanta pagasunaykichikpaq, chayta ruwachkaspaykichikpas tarpukusqanku kawsayninkuwanraqmi qipakunkichik,+
llaqllasqa rumikunawan wasi ruwasqaykichikpiqa+
manañam yachankichikñachu, suma-sumaqllaña uvasnikichikmanta vino ruwasqaykichiktapas
manañam tomankichikñachu.+
12 Ñuqaqa yachanim mana kasukuq kasqaykichikta,
llumpa-llumpay huchallikuq kasqaykichikta.
Qamkunaqa allin ruwaqkunatam imaymanata ñakarichinkichik,
qamkunaqa mana allin ruwaykunata pakanaykichikpaqmi qullqita chaskikunkichik,
wakchakunapaqpas llaqtapa punkunpiqa manam allintachu juzgankichik.+
13 Chayraykum yuyaywan rimaqkunapas chay punchawqa upallalla kanqaku,
chay punchawqa ñakariy punchawmi kanqa.+
14 Hinalla kawsanaykichikpaqyá allin kaqkunata maskaychik,
amayá mana allin kaqkunatachu,+
allin kaqkunata maskaptikichikqa+
nisqaykichikman hinam angelkunata kamachiq Jehova Diosqa qamkunawan kanqa.+
15 Mana allin kaqta chiqnispayá allin kaqta kuyaychik,+
llaqtapa punkunpiqa allin kaqtayá ruwaychik,+
Joseymanta qipaqkuna chayta ruwaptikichikqa angelkunata kamachiq ñuqa Jehova Diosqa
icharaqpas llakipayaykichikman’, nispa.+
16 Chayraykum angelkunata kamachiq Jehova Diosqa nin,
Jehova Diosmi nin: ‘Llaqtapa punkunkunapim ñakakunkichik,
ñankunapim “¡way, way!” ninkichik,
llamkaqkunatam qayankichik llakipi kanankupaq,
waqaspa ganakuqkunatam ninkichik ñakakunankupaq’, nispa.
17 ‘Llapallan uvas chakrakunapim llakikuy kanqa,+
ñuqaqa llaqtayki chawpintam risaq’, Jehova Diosmi chaynata nin.
18 ‘¡Imaynaraq kankichik ñuqa Jehova Diospa piñakuyniy punchaw chayamunantaña munaqkunaqa!+
¿Imataq qamkunapaqqa ñuqa Jehova Diospa piñakuyniy punchawqa?+
Chay punchawqa tutayaymi kanqa achkiy kananmantaqa.+
19 Chay punchawqa kanqa leonmanta ayqichkaspa osowan tuparuy hinam,
wasiman yaykuykuspa pirqaman tawnapakuykuchkaptin culebrapa kachuruynin hinam.
20 ¿Manachu Jehova Diospa piñakuynin punchawqa tutayay kanqa achki kananmantaqa?
¿Manachu chay punchawqa tutay-tutay kanqa kichay-kichay kananmantaqa?
21 Ñuqaqa chiqnispaymi millakuypaqta qawani imapas yupaychasqaykichiktaqa,+
huñunakuspa ima kañasqaykichikpas manam ñuqapaq hinachu.
22 Ima ofrendataña kañapuwasqaykichikpas chaynataq
ima ofrendataña quwasqaykichikpas manam kusichiwanqachu,+
ñuqawan allinlla kanaykichikpaq puqusqa animalkunatapas manam chaskisqaykichikchu.+
23 Amaña takipuwaychikpaschu,
cuerdayuq kaqkunatapas amaña tocapuwaychikchu.+
24 Allin ruwayqa yaku hinayá kallpachun,+
allin kaqqa yaku hinayá mana tipiy kachun.
25 Israelpa mirayninkuna, ¿yaqachu animalkunata nakapuwarqankichik?
Chunniqpi 40 wata kasqaykichikpi, ¿yaqachu ofrendallatapas quwarqankichik?+
26 Kunanmi ichaqa apakunkichikpuni kamachiqnikichik Sakuttawan Kevanta*,
apakunkichikpunim taytacha-mamachaykichikkunata, apakunkichikpunim lucero taytachaykichikpa rantinpi ruwasqaykichikkunata.
27 Ñuqañataqmi Damasco llaqtapa waklawninmanraq apasqaykichik’,+
ñuqam chaynata nini, ñuqapa sutiyqa angelkunata kamachiq Jehova Diosmi”.+
6 “¡Imaynaraq kanqaku kikillankupi hapipakuq Sion muqupi runakuna!
¡Imaynaraq kanqaku Samaria urqupi hawka tarikuqkuna!+
¡Imaynaraq kanqaku ancha riqsisqa llaqtapi munayniyuq runakuna!
¡Imaynaraq kanqaku Israelpa mirayninkunapa hapipakusqan runakuna!
2 Calne llaqtaman rispayá qawaychik.
Chaymantayá riychik hatu-hatun Hamat llaqtaman.+
Chaymantayá riychik Filistea allpapi Gad llaqtaman.
¿Yaqachu paykunaqa kay llaqtakunamanta* aswan allin kanku?
¿Yaqachu allpankuqa qamkunapamanta aswan hatun?
4 Puqusqan carnerokunatawan puqusqan malta torokunata mikukuykuspankum+
marfilmanta+ ruwasqa catrekunapiraq waqtapakunku hinaspa suma-sumaq tiyanakunapiraq tiyakunku.+
5 Arpapa waqasqanman hinam takikunatapas takinku.+
David hinaraqmi tocana kaqkunatapas ruwanku.+
6 Hatun vasokunapim vinotapas tomanku,+
allinnin aceitewanraqmi llusikunkupas.
Paykunaqa manam llakikunkuchu Joseyta tukuy ima pasarusqanmantaqa.+
7 Chayraykum huklawman apasqa kaqkunapa ñawpaqninta huklawman apasqa kanqaku.+
Suma-sumaq tiyanakunapi chutarayaqkunapa kusikuyninmi tukunqa.
8 ‘Llapallan kamachiq Jehova Diospunim nin,+ angelkunata kamachiq Jehova Diosmi nin:
Llaqtatam tukuy imantinta hukpa makinman qusaq.+
9 Huk wasipi chunka runakuna qipaspankupas wañunqakum. 10 Ayllunmi hamuspa sapakamata kañaykunqa. Wasimanta hawaman tullunkunata hurquspanmi wasipi kaqta ninqa: ‘¿Kachkanraqchu pipas?’, nispa. Wasipi kaqñataqmi ninqa: ‘Manañam pipas kanñachu’, nispa. Payñataqmi ninqa: ‘Upallalla kay, manam Jehova Diospa sutinta rimanaykipaq punchawraqchu’”, nispa.
11 Jehova Diosmi kamachikuyta quqqa.+
Payqa hatun wasitam qalaypaqta tuñichinqa.
Uchuy wasichapatapas raqayllantañam saqinqa.+
12 ¿Yaqachu caballokuna qaqanta kallpanman*?
¿Yaqachu pipas torowan qaqapi yapunman?
Qamkunaqa allin ruwaytam venenoyuq qurata hinaña ruwarunkichik.
Allin kaqtapas qatqiyarachinkichikmi.+
13 Yanqa kaqkunawan kusisqa kaspaykichikmi ninkichik:
“¿Manachu atiyniyuqqa kachkanchik kikinchikpa kallpanchikwan?”, nispa.+
14 Israelpa mirayninkuna, chayraykum chiqnisuqnikichik llaqtata qamkunaman kachamusaq.+
Lebo-hamatmanta+ Araba wayqukamam ñakarichisunkichik’”, angelkunata kamachiq Jehova Diosmi chaynata nin.
7 Llapallan kamachiq Jehova Diosmi kayta qawachiwarqa. Qipataña tarpusqanku* chayllaraq wiñachkaptinmi payqa aqarway urukunata rikurirachirqa. Chay qipallaña tarpusqankuqa karqa kamachiqpaq pasto rutuyta tukuruspanku tarpusqankuñam. 2 Chay aqarway urukuna llaqtapi tukuy imata tukuruptinmi nirqani: “Llapallan kamachiq Jehova Dioslláy, ama hina kaspayá pampachaykuy,+ ¿imaynataq Jacobqa kanqa? Qalaypaqñam kachkan”, nispay.+
3 Chaynata niptiymi Jehova Diosqa llakipayarirqa.+ “Manañam kaytaqa ruwasaqñachu” nispanmi Jehova Diosqa nirqa.
4 Llapallan kamachiq Jehova Diosmi kayta qawachiwarqa. Llapallan kamachiq Jehova Diosmi ninata kachaykamurqa. Chay ninam uku-uku yakukunata chakirachirqa. Llaqtapa waqtantapas qalaypaqtam ruparurqa. 5 Chaymi nirqani: “Llapallan kamachiq Jehova Dioslláy, ama hina kaspayá ama chaytaqa ruwaychu,+ ¿imaynataq Jacobqa kanqa? Qalaypaqñam kachkan”, nispay.+
6 Chaynata niptiymi Jehova Diosqa llakipayarirqa.+ “Manañam kaytapas ruwasaqñachu” nispanmi llapallan kamachiq Jehova Diosqa nirqa.
7 Kaytam qawachiwarqa. Jehova Diosmi pirqapa hawanpi sayaykuspan plomadawan qawachkasqa, payqa plomadatam hapichkasqa. 8 Hinaspam Jehova Diosqa niwarqa: “¿Imatam qawachkanki Amos?”, nispa. Ñuqañataqmi nirqani: “Plomadatam”, nispay. Jehova Diosñataqmi niwarqa: “Kay Israel llaqtaypa chawpinmanmi plomadata churasaq. Kunanqa manañam pampachasaqñachu.+ 9 Isaacpa+ yupaychanan muqukunapas mana imayuqmi qipanqa. Israelpa yupaychanan sitiokunapas qalaypaqmi chinkanqa.+ Jeroboanpa wasinpi kaqkunamanmi ñakariyta kacharisaq”, nispa.+
10 Betel+ llaqtapi sacerdote* Amasiasmi, Israel llaqtata kamachiq Jeroboanman+ kay willakuyta apachirqa: “Amosmi qipanchasunaykipaq hatarichkan Israel+ runakunapa chawpinpi. Kay allpapi runakunaqa manañam uyariyta munankuñachu imapas nisqankunataqa.+ 11 Amosqa nichkan ‘Jeroboanqa wañunqam, Israelpas huklawman apasqam kanqa’”, nispanmi.+
12 Amasiasqa Amostam nirqa: “Musquypi hina* qawaq runa, ripukuy, Juda allpaman ayqikuy, chaypiyá imallapipas llamkamuy, chaypiyá willakamuy.+ 13 Ama haykapipas Betelpiqa willakuychu.+ Betelqa kamachiqpa yupaychanan sitiom,+ kay llaqtaqa kamachiqpa wasinmi”, nispa.
14 Amosñataqmi Amasiasta nirqa: “Ñuqaqa manam willakuqchu* karqani, manataqmi willakuqpa churinchu karqanipas. Ñuqaqa oveja michiqllam karqani,+ higoskunamanta nanachikuqllam karqani. 15 Ichaqa ovejata michichkaptiymi Jehova Diosqa qayaramuwarqa. Hinaspam Jehova Diosqa niwarqa: ‘Rispaykiyá Israel runaykunaman willakamuy’, nispa.+ 16 Chaynaqa uyariyá kayta, Jehova Diosmi nisunki: ‘Qanmi ninki: “Ama willakuychu Israelpa+ contranpiqa. Amataqyá willakuychu Isaacpa+ mirayninkunapa contranpiqa”, nispa. 17 Chayraykum Jehova Dios nin: “Warmikim llaqtapi chuchumika* kanqa, qari churikikunawan warmi churikikunam wañunqa. Allpaykitapas waskawan tupuspam rakinakunqaku. Huklaw llaqtapim wañunki, Israel runakunapas huklawman apasqam kanqaku”’”, nispa.+
8 Llapallan kamachiq Jehova Diosmi kayta qawachiwarqa. Usyay tiempopi frutam canastapi kachkasqa. 2 Hinaptinmi pay niwarqa: “¿Imatam qawachkanki Amos?”, nispa. Ñuqañataqmi nirqani: “Canastapi usyay tiempopi frutatam qawachkani”, nispay. Jehova Diosñataqmi niwarqa: “Israel runaykunapa chinkanan punchawmi chayaramun. Kunanqa manañam pampachasaqñachu.+ 3 Llapallan kamachiq Jehova Diosmi nin: ‘Chay punchawqa wasiypi* takisqankupas llaki taki hinañam kanqa,+ kaypi-chaypim wañusqa runakuna wischurayanqa.+ ¡Chunninqam!’, nispa.
4 Kaytayá uyariychik llapa wakchakunata sarupaqkuna,
llaqtapi llampu sunqukunata wañuyman apaqkuna,+
5 qamkunam ninkichik: ‘¿Haykapitaq llullu killa tukunqa kawsaykunata rantikunanchikpaq*?+
¿Haykapitaq samana punchaw* tukunqa kawsaykunata rantikunanchikpaq?+
Rantinanchikpaq tupunanchiktayá hatunyarachisunchik.
Rantikusunñataqyá chani-chaninpi.
Balanzata suwakunapaq hina ruwarusunchik.+
6 Chaynapi mana imayuqkunata qullqiwan rantinanchikpaq.
Wakchakunata huk paris usutawan rantinanchikpaq.+
Chusun trigokunata rantikunapaq’, nispa.
7 Jacobpa hatuntukusqanraykum Jehova Dios nin:+
‘Haykapipas manam qunqasaqchu tukuy ima ruwasqaykichikkunataqa.+
8 Chayraykum llaqtapas katkatatanqa,
llaqtapi yachaqkunapas llakipim kanqaku.+
¿Manachu Nilo mayu hina huqarikunqa?
¿Manachu Egiptopi Nilo mayu hina huqarikunqaraq kutiykunqaraq?’, nispa.+
9 Llapallan kamachiq Jehova Diosmi nin:
‘Chay punchawqa chawpi punchawllatam inti siqaykunqa,
punchawmi kay allpa pachaqa qunqayllamanta tutaykurunqa.+
10 Tukuytam ruwasaq fiestaykichikkunapas llakikuyña kananpaq,+
takikichikpas llaki takiñam kanqa.
Tukuytam ruwasaq wiqawnikichikta qachqa pachawan watakunaykichikpaq hinaspa umaykichikta kachiy-kachiyta rutukunaykichikpaq.
Tukuytam ruwasaq chullalla warmaykichik wañukunmanpas hina llakikuypi kanaykichikpaq,
chaypa tukupayninqa kanqa llumpa-llumpay ñakariy punchawmi’, nispa.
11 Llapallan kamachiq Jehova Diosmi nin:
‘Hamuchkanñam punchaw kay llaqtapi muchuy* kananpaq,
chay muchuyqa kanqa manam mikuymantachu nitaqmi yakumantachu,
chayqa kanqa ñuqa Jehova Diospa nisqaykunata uyariymantam.+
12 Lamar quchapa patanmanta lamar quchapa huknin patankamam tampi-tampi kanqaku,
norte lawmanta intipa qispimunan lawkamam tampi-tampi kanqaku.
Kayman-chaymanmi rinqaku Jehova Diospa nisqanta maskaspanku, ichaqa manam tarinqakuchu.
13 Chay punchawqa qarita manaraq riqsiq kuyayllapaq sipaskunapas desmayanqakum,
musukunapas yakumantam desmayanqaku.
14 “¡Dan+ llaqtapa diosnin kawsasqanraykum!”
“¡Beer-seba+ llaqtaman riq ñanraykum!” nispa
Samariapa+ huchanmanta niqkunaqa wichinqakum,
manam haykapipas hatarinqakuchu’”, nispa.+
9 Jehova Diostam rikurqani+ altarpa hawanpi sayachkaqta. Paymi nirqa: “Pilarkunapa puntanta waqtay, qirunkunam* katkatatanqa. Umankutayá qururuy, ñuqañataqmi llaqtapi puchuqkunata wañuchisaq. Manamá ayqiyta munaqpas ayqinqachu, manamá lluptiyta munaqpas atinqachu.+
2 Wañusqakunapa kasqanpi* pakakunankupaq uchkuta uchkuptinkupas
chaymantam hurqumusaq.
Hanaq pachaman qispiptinkupas
chaymantam uraykachimusaq.
3 Carmelo urqupi pakakuptinkupas
chaypi maskaspaymi chaymanta apamusaq.+
Lamar quchapa ukunpiña ñuqamanta pakakuptinkupas
culebratam kamachisaq paykunata kachumunanpaq.
4 Chiqnisuqnikichik runakunapa allpanman apasqa kaptikichikpas,
chaypim wañuchisqaykichik.+
Allin kaqkunata ruwanaymantaqa mana allinllatam ruwasqaykichik.+
5 Llapallan kamachiqmi, angelkunata kamachiq Jehova Diosmi llaqtata llachpaqqa,
hinaptinmi chay llaqtañataq chullun.+ Llapallan chaypi yachaqkunam* llakipi tarikunqaku.+
Nilo mayu hinam chay llaqta huqarikunqa,
Egiptopi Nilo mayu hinam chay llaqta kutiykunqa.+
6 ‘Kay allpa pachamanta hanaq pachaman ñanta ruwaqmi,
allpa pachapa hawanpi ruwaqmi,
lamar quchapi yakukunata huñuykuspa allpa pachaman parachimuqmi...,+
paypa sutinmi Jehova Dios’.+
7 Jehova Diosmi nin: ‘Israel runakuna, ¿manachu qamkunaqa Cus runakunapa churin hina kankichik ñuqapaqqa?’, nispa.
‘¿Manachu ñuqaqa Egiptomanta Israel runakunata hurqumurqani?+
¿Manachu ñuqaqa Cretamanta Filistea runakunata hurqumurqani?+ ¿Manachu ñuqaqa Kirmanta Siria runakunata hurqumurqani?+
8 Qawaychik, llapallan kamachiq Jehova Diosmi qawachkan huchallapi kaq llaqtata,
payqa kay allpa pachamantam chinkachinqa.+
Ichaqa Jacobpa mirayninkunataqa manam qalaypaqchu chinkachinqa’,+ Jehova Diosmi chaynata nin.
9 ‘Kamachisaqmi, hinaspaymi llapallan llaqtakunamanta Israel llaqtata suysupasaq.+
Harnerowan suysuchkaq hinam suysupasaq.
Manam chulla rumichallapas pampamanqa wichinqachu.
10 Llaqtaypi huchasapakunaqa llapallankum wañunqaku.
“Ñakariy punchawqa manam hichpamunqachu nitaqmi haypamuwasunchu” niqkunaqa wañunqakum’.
11 ‘Chay punchawqa Davidpa+ wichisqan carpantam hatarichisaq.
Kakllunkunatam allichasaq,
raqayninkunatam pirqapasaq.
Ñawpaq watakunapi pirqasqayman hinam pirqasaq+
12 Edompi puchuqkuna paykunapaq kananpaq+
hinaspa llapallan nacionkunamanta sutiywan qayasqa kaqkunapa kananpaq’, kaykunata ruwaq Jehova Diosmi chaynata nin.
13 Jehova Diosmi nin: ‘Hamuchkanmi punchaw
kawsaykuna huñuqta yapuq haypananpaq.
Mugu apaqta uvas saruq haypananpaq.+
14 Huklawman apasqa kaq Israel llaqtaytam kaqmanta kutichimusaq.+
Purmasqa llaqtakunatam kaqmanta hatarichispanku chaypi yachanqaku.+
Uvasniyuq kaspankum vinota tomanqaku.+
Huertayuq kaspankum rurunta mikunqaku’, nispa.+
15 ‘Allpankupim churasaq,
qusqay allpamantaqa manañam haykapipas qarqusqaqa kanqakuñachu’,+
Jehova Diosnikim chaynata nini”.
“Amos” ninanqa: “Llasaq qipi” utaq “qipita apay”, ninanmi.
Utaq: “Revelacionpi”.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Utaq: “Tiyaqkunatam”.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Hebreo rimaypiqa nichkan: “Makiyta churasaq”, nispam.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Utaq: “Pacto ruwasqankutaqa”. Qaway “pacto” niq palabrapa ima ninan kasqanta.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Hebreo rimaypiqa nichkan: “Kimsa kutikama huchallikuchkaspanpas huktawanraq huchallikusqanraykum”, nispam.
Utaq: “Venderqaku”.
Qaway kay palabrapa ima ninan kasqanta.
Utaq: “Profeta”. Qaway kay palabrapa ima ninan kasqanta.
Utaq: “Nazareo kananpaq”. Hebreo rimaypiqa nichkan: “Nazir”, nispam.
Utaq: “Raskiqpas”.
Ichapas kanman: “Tuqllapi llullan mana kachkaptin”, niqpas.
Utaq: “Profetakunaman”.
Utaq: “Pakasqa kaqkunata manaraq willachkaspanqa”.
Kayqa karqa suma-sumaq alaqam.
Ichapas kanman: “Achka”, niqpas.
Utaq: “Chunkamanta hukninta”.
Ichapas kanman: “Mana allinpim rikurinqa”, niqpas.
Hebreo rimaypiqa nichkan: “Kima”, nispam.
Hebreo rimaypiqa nichkan: “Kesil”, nispam.
Kaykunaqa yaqachusmi karqa yupaychasqanku lucero (Saturno).
Yaqachusmi kaypiqa nichkan Juda llaqtamantawan Israel llaqtamanta.
Utaq: “Raskinman”.
Kay tarpusqankuqa karqa enero killapiwan febrero killapim.
Qaway kay palabrapa ima ninan kasqanta.
Utaq: “Revelacionpi”.
Utaq: “Profetachu”.
Utaq: “Qullqipaq piwanpas kakuq”.
Utaq: “Temploypi”.
Utaq: “Vendenanchikpaq”.
Utaq: “Sabado”.
Utaq: “Yarqay”.
Utaq: “Kaspinkunam”.
Hebreo rimaypiqa nichkan: “Seolpi”, nispam. Qaway kay palabrapa ima ninan kasqanta.
Utaq: “Tiyaqkunam”.