SOFONIAS
1 Juda nacionta Amonpa+ churin Josias+ kamachichkaptinmi, Sofoniasta* Jehova Dios rimapayarqa. Sofoniasqa karqa Cusipa churinmi, Cusiñataqmi karqa Guedaliaspa churin, Guedaliasñataqmi karqa Amariaspa churin, Amariasñataqmi karqa Ezequiaspa churin.
2 Jehova Diosmi nin: “Kay allpa pachapi tukuy imatam qalaypaq chinkachisaq”, nispa.+
3 Jehova Diosmi nin: “Runakunatawan animalkunatam qalaypaq chinkachisaq.
Alton pawaqkunatawan lamar quchapi challwakunatam qalaypaq chinkachisaq.+
Imapas harkakuq kaqkunatawan* mana allin ruwaqkunatam qalaypaq chinkachisaq.+
Kay allpa pachapi runakunatam qalaypaq chinkachisaq”, nispa.
4 “Judatam castigasaq.
Jerusalenpi yachaqkunatapas* castigasaqmi.
Chaymantaqa Baal taytachamanta puchuqkunatam qalaypaq chinkachisaq.+
Taytacha-mamachakunapa sacerdotenkunatam* chinkachisaq, chinkachisaqtaqmi sutintapas.+
5 Wasinkupa hawanpi qunqurakuykuspa hanaq pachapi kaqkunata yupaychaqkunatam chinkachisaq.+
Qunqurakuykuspanku ‘nisqayman hinam ruwasaq’ nispa Jehova Diosta nichkaspanku,+
Malcamtapas ‘nisqayman hinam ruwasaq’ nispa niqkunatam chinkachisaq.+
6 Jehova Diosmanta karunchakuqkunatam+ chinkachisaq.
Jehova Diosta mana maskaqkunatawan payta mana tapukuqkunatam chinkachisaq”.+
7 Upallallayá kaychik llapallan kamachiq Jehova Diospa qayllanpiqa. Jehova Diospa punchawninqa kayllapiñam kachkan.+
Jehova Diosmi animalkunata wañuchichkaq hina paykunata wañuchinqa. Qayasqan runakunatam chuyancharun.
8 “Animalkunata wañuchichkaq hina ñuqa Jehova Dios wañuchinay punchawpim kamachiqta yanapaqkunaman ñakariyta kacharisaq.
Kamachiqpa churinkunamanwan+ huklaw llaqtayuqkunapa pachanwan pachasqa kaqkunamanmi ñakariyta kacharisaq.
9 Pataman* llapallan qispiqkunamanmi chay punchawqa ñakariyta kacharisaq.
Maqanakuyllawan hinaspa mana allinllawan patronninpa wasinta huntachiqkunamanmi ñakariyta kacharisaq.
10 Chay punchawqa challwa sutiyuq punkumanta qayakusqankum uyarikunqa.+
Llaqtapi musuq wasikunapa kasqanmanta qaparkachasqankum uyarikunqa.+
Muqukunapi qaparisqankum uyarikunqa,
Jehova Diosmi chaynata nin.
11 Mactes llaqtapi* yachaqkuna llakikuymantayá qaparkachaychik.
Negociantekunam llapallanku wañurunku.
Qullqita pesaqkunam llapallanku chinkarunku.
12 Chay punchawkunapim Jerusalenta mecherowan suma-sumaqta qawasaq.
Imayna kawsasqankuwan kusikuspa hawka kakuqkunamanmi ñakariyta kacharisaq.
‘Jehova Diosqa manam allin kaqtaqa ruwanqachu, manataqmi mana allin kaqtapas ruwanqachu’+ nispa sunqunkupi niqkunatam castigasaq.
13 Tukuy ima kapuqninkutapas hukkunam apakunqaku, wasinkutapas tuñichinqakum.+
Wasikunatam ruwanqaku, ichaqa chaypiqa manam yachanqakuchu.
Uvas huertayuqmi kanqaku, ichaqa manam vinotaqa tomanqakuchu.+
14 ¡Jehova Diospa piñakuynin punchawqa kayllapiñam kachkan!+
¡Kayllapiñam kachkan, chayaykamuchkanñam!+
Jehova Diospa piñakuynin punchawqa manchakuypaqmi kanqa.+
Chay punchawqa soldadokunapas qaparkachanqakum.+
15 Chay punchawqa llumpa-llumpay piñakuymi kanqa.+
Chay punchawqa ñakariywan llakikuymi kanqa.+
Chay punchawqa llumpa-llumpay param hinaspa llumpa-llumpay wayram kanqa.
Chay punchawqa tutayaywan yanayayllam kanqa.+
Chay punchawqa puyullañam kanqa, yanay-yanayllañam kanqa.+
16 Chay punchawqa murallayuq llaqtakunamanwan
esquinapi hatun torrekunaman yaykunankupaqmi+ waqrata pukunqaku, peleanankupaqmi qayaykachakunqaku.+
17 Runakuna hukmanyasqa kanankupaqmi tukuyta ruwasaq.
Hinaptinmi paykunaqa ñawsa hina purinqaku,+
paykunaqa Jehova Diosta mana kasukuspam huchallikurqaku.+
Yawarninkupas ñutu allpa hinam pampapi kanqa.
Chunchulninkupas wanu* hinam pampapi kanqa.+
18 Qurinkupas qullqinkupas Jehova Diospa piñakuynin punchawpi wañuymantaqa manam librayta atinqachu.+
Llumpa-llumpay piñakuyninmi kay allpa pachata nina hina rupanqa,+
payqa kay allpa pachapi llapallan runakunatam qalaypaq chinkachinqa”.+
2 Nisqankuna manaraq cumplikuchkaptinyá,
wayrapa apasqan paja hina chay punchaw manaraq chayamuchkaptinyá,
Jehova Diospa llumpa-llumpay piñakuynin qamkunaman manaraq wichiykamuchkaptinyá,+
Jehova Diospa piñakuynin punchaw qamkunaman manaraq chayaramuchkaptinyá
Kay allpa pachapi llapallan llampu sunqukuna, kamachikuyninkunata kasukuqkuna, Diostayá maskaychik.
Allin ruwaq kanaykichikpaqyá kallpanchakuychik, llampu sunqu kanaykichikpaqyá kallpanchakuychik.
Icharaqpas Jehova Diospa piñakuynin punchawpi pakaykusqa kawaqchik.+
4 Gaza llaqtaqa qalaypaqmi chunninqa,
Asquelonpas mana imayuqmi qipanqa,+
Asdodpas chawpi punchawpim qarqusqa kanqa,
Ecronpas chinkanqam.+
5 “¡Imaynaraq kanqaku lamar quchapa patanpi yachaq* Kerit runakunapa nacionninqa!+
Ruwasqaykichikkuna mana allin kasqantam Jehova Diosqa nichkan.
Filistea runakunapa yachanan Canaan allpatam chunnichisaq,
manam chulla runallapas puchunqachu.
6 Lamar quchapa patanpi allpakunapas pastopa kanan allpakunañam kanqa,
michiqkunapaqmi pozokuna kanqa, ovejapaqmi rumimanta corralkuna kanqa.
7 Chaylawqa Judapa mirayninmanta puchuqkunapaqmi kanqa.+
Chaypim mikunqaku.
Inti siqaykuytam Asquelonpa wasinkunapi waqtapanqaku.
Jehova Diosninkuqa paykunatam waqaychanqa,
huklawman apasqa kaqkunatam kutichimunqa”.+
8 “Uyarirunim Moab+ runakunapa asikuwasqanta, uyarirunim Ammon+ runakunapa tukuy ima niwasqanta,
paykunaqa runaykunamantam asikurqaku, allpanta qichunankupaqmi hatuntukuspanku tukuyta nirqaku.+
9 Ñuqaqa Israel runakunapa Diosninmi kani, angelkunata kamachiq ñuqa Jehova Diosmi nini,
ñuqapa kawsakusqayqa chiqapmi, chaynam chiqaptapuni Moabqa kanqa Sodoma+ hina,
Ammon runakunapas Gomorra+ hina kanqa,
itanakunapa kananmi kanqa, kachipa kanan uchkum kanqa, mana imapa kanan allpam wiñaypaq kanqa.+
Runaykunamanta puchuqkunam tukuy imankutapas apakunqaku,
runaykunamanta puchuqkunam allpankutapas hapikuykunqaku.
10 Hatuntukuq kasqankuraykum chayta chaskikunqaku,+
paykunaqa hatuntukuspankum asikurqaku angelkunata kamachiq Jehova Diospa runankunamanta.
11 Jehova Diosqa manchakuypaqmi paykunapaq kanqa.
Kay allpa pachapi runapa llapallan yupaychasqan kaqkunatam tukunqa,
nacionkunapi llapallan islakunam paypa ñawpaqninpi qunqurakunqa,+
sapakamam maymi kasqankupi qunqurakunqaku.
12 Etiopia llaqtapi runakuna qamkunatapas espadaywanmi wañuchisqaykichik.+
13 Payqa norte lawman makinta haywarispanmi Asiriata chinkachinqa.
Ninivetapas mana imayuqtam saqinqa,+ mana imapa kanan chaki chunniqta hinam saqinqa.
14 Paypa chawpinpim ataquntin animalkuna puñunqa, tukuy rikchaq purun animalkunam puñunqa.
Pelicanowan kichka wasa animalkunam pilarninkunapa puntanpi tutan puñunqa.
Ventanankunapim taki uyarikunqa.
Yaykunanku sitiopas tuñisqam kanqa.
Payqa cedro qirukunatapas* qawakuchkaqtam saqirunqa.
15 Kayqa hatuntukuq llaqtam, kikinpi hapipakuspam hawka tiyakurqa,
sunqunpim nikuq: ‘Manam pipas ñuqa hinaqa kanchu, manataqmi pipas ñuqamanta aswan allinqa kanchu’, nispa.
¡Kunanmi ichaqa manchakuypaq rikurirun!
¡Purun animalkunapa kananñam rikurirun!
Haykam chayninta puriqkunam takata qawachispanku asikunqaku”.+
3 ¡Imaynataq kanqa mana kasukuq llaqtaqa, millakuypaq llaqtaqa, runakunata ñakarichiq llaqtaqa!+
2 Ima nisqankutapas+ manam kasukurqachu, rimapayasqankutapas+ manam uyarikurqachu.
Jehova Diospiqa manam hapipakurqachu,+ manataqmi paymanqa asuykurqachu.+
3 Paypa chawpinpiqa kamachiqta yanapaqkunapas piña leon hinam kanku.+
Juezninkupas tutallan imatapas hapiq atuq hinam kanku.
Manam chulla tullullatapas saqinkuchu paqarintin kachkapanankupaqqa.
4 Willakuqkunapas* simisapallañam, qipanchakuqllañam kanku.+
Sacerdotekunapas Diospaq kaqtam millakuypaqta ruwanku.+
Paykunaqa kamachikuytam yanqachanku.+
5 Jehova Diosqa paypa chawpinpiqa allin kaqkunallatam ruwan,+ payqa manam mana allin kaqtaqa ruwanchu.
Imaynam paqarintinqa achikyanpuni,
chaynam sapa achikyaqta tantiasqankunata riqsichin.+
Chaywanpas mana allin ruwaqqa manam pinqakunchu.+
6 “Nacionkunatam chinkachirqani, muyuriqninpi torrenkunapas mana imayuqmi qiparqa.
Ñanninkunatapas mana pipas purinanpaq hinam ruwarurqani.
Llaqtakunapas raqayllanñam qiparqa, manam pipas qiparqachu, manam chulla runallapas qiparqachu.+
7 Ñuqam nirqani: ‘Kunanqa manchakuwankiñam, rimapayasqaytapas uyarikunkiñam’, nispay.+
Chaywanpas paykunaqa mana allin kaqkunatam astawanraq ruwayta munarqaku.+
Ñuqaqa tantiachkani nacionkunata huñuruytam, llaqtakunata huñuruytam,
chaynapi paykunaman piñakuyniyta kachaykunaypaq.+
Llumpa-llumpay piñakuyniymi kay allpa pachata nina hina rupanqa.+
9 Chaymantañataqmi llapallan llaqtakunaman yachachisaq chuya rimayniyuqña kanankupaq.
Chaynapi llapallanku Jehova Diosta sutinmanta qayakunankupaq.
Llapallanku huk sunqulla yupaychanankupaq’, nispa.+
10 Etiopia lawpi mayukunamanta qayakuwaqniy kaqkunam,
kaypi-chaypi chiqisqa runaykunam regalota apamuwanqaku.+
11 Chay punchawqa mana kasuwanaykipaq tukuy imata ruwasqaykimantapas
manam pinqaypichu churasqayki.+
Chay punchawqa hatuntukuqkunatam chinkachisaq.
Chaymantaqa manañam haykapipas hatuntukunkiñachu sapaqchasqay urquypiqa.+
12 Saqisaqqa mana hatuntukuq runakunatawan llampu sunqu runakunallatam,+
paykunaqa Jehova Diospa sutinpim pakakunqaku.
13 Israelmanta puchuqkunaqa+ manañam mana allin ruwaytaqa ruwanqakuñachu,+
manañam llullakunataqa rimanqakuñachu, qallunkupas manañam pitapas pantachinqañachu.
Mikuruspankum hawka waqtapakunqaku, manañam pipas manchachinqañachu”.+
14 ¡Sion muqupa wawan, kusikuymantayá qapariy!
¡Israel, kusikuymantayá qapariy!+
¡Jerusalenpa wawan kusikuyá, sunqumantayá kusikuy!+
15 Jehova Diosqa manañam ruwasunkiñachu imam ruway munasusqaykitaqa.+
Chiqnisuqnikitapas karuncharunmi.+
Israelta kamachiq Jehova Diosmi qampa chawpikipi kachkan.+
Manañam haykapipas manchakunkiñachu ñakariytaqa.+
16 Chay punchawpim Jerusalen uyarinqa:
“Sion muqu, amayá manchakuychu,+
amayá hukmanyaychu.
17 Jehova Diosnikim qanwan kachkan.+
Kallpasapa soldado hinam payqa yanapasunki.
Qanmantam kusikunqa, kusisqallañam kanqa.+
Kuyakuq kasqanraykum upallalla qipakunqa.
Qanmantam kusisqallaña kanqa, kusikuymantam qaparinqa.
18 Hatun huñunakuykunaman mana hamusqankurayku llakisqa kaqkunatam huñumusaq.+
Qanmanta karupi kaptinkum paykunata burlakurqaku.+
19 Uyariway, chay punchawpiqa ñakarichisuqnikikunatam tukuyta ruwasaq.+
Wiqruq* runakunatam yanapasaq.+
Kaypi-chaypi chiqisqa kaqkunatam huñusaq.+
Paykunata hatunchanankupaqmi tukuyta ruwasaq.
Pinqayman churasqa kasqanku sitiokunapim paykunataqa ancha riqsisqata ruwasaq.
20 Chay punchawkunapiqa tukuytam ruwasaq qamkuna kutimunaykichikpaq.
Ñuqaqa tukuytam ruwasaq ancha riqsisqa kanaykipaq.
Tukuytam ruwasaq huklawman apasqa runaykikunata qanman kutichimuptiy kay allpa pachapi llapallan llaqtakuna hatunchasunaykipaq”,+ niqta.
Jehova Diosmi chaynata nin.+
“Sofonias” ninanqa: “Jehova Diosmi pakaykun (waqaychan)”, ninanmi.
Kaypiqa nichkan taytacha-mamachakunapaq imatapas ruwasqankumantawan chaypaq kaqkunamantam.
Utaq: “Tiyaqkunatapas”.
Qaway kay palabrapa ima ninan kasqanta.
Ichapas karqa kamachiqpa tiyanan pata.
Kayqa yaqachusmi karqa Jerusalenpa hichpan Challwa sutiyuq punku.
Utaq: “Animalpa ispaynin”.
Utaq: “Tiyaq”.
Utaq: “Tablakunatapas”.
Utaq: “Profetakunapas”. Qaway kay palabrapa ima ninan kasqanta.
Utaq: “Tiyasqan”.
Ichapas kanman: “Imapas ruwasqanta qawaqnin hina”, niqpas.
Utaq: “Wistuq”.