AGEO

1 Kamachiq Dario iskay wataña kamachichkaptinmi suqta kaq killapa punta kaq punchawninpi, Diosmanta willakuq* Ageo*+ Jehova Diospa nisqankunata Zorobabelmanwan+ Josueyman willarqa. Zorobabelqa karqa Judata kamachiq Sealtielpa churinmi, Josueyñataqmi karqa sacerdotekunapa* kamachiqnin Jeozadacpa churin.

2 “Angelkunata kamachiq Jehova Diosmi nin: ‘Kay runakunam nichkanku: “Jehova Diospa wasinta* pirqananchikpaq punchawqa manaraqmi chayamunraqchu”’”, nispanku.+

3 Kaqmantam Jehova Diosqa willakuq Ageowan+ willachirqa: 4 “¿Diospa wasinta raqayllataña qawachkaspachu qamkunañataq suma-sumaq wasikunapiraq* yachakuchkankichik*?+ 5 Angelkunata kamachiq Jehova Diosmi nin: ‘Allinta tantiakuspayá ruwaychik. 6 Qamkunaqa achkanpi tarpuspapas aschallatam huñunkichik.+ Mikuspapas manam saksankichikchu. Vinota tomaspapas hinallam vinomanta kankichik. Pachakuspapas manam qunirinkichikchu. Llamkapakuqpas chaskikusqan qullqitam uchku wayqaman churan’”, nispa.

7 “Angelkunata kamachiq Jehova Diosmi nin: ‘Allinta tantiakuspayá ruwaychik’, nispa.

8 Jehova Diosmi nin: ‘Tablakunata aparikuspayá urquman riychik,+ wasiyta ruwamuychik,+ ñuqapaq hina sumaqllaña kaptin hatunchasqa kanaypaq’”, nispa.+

9 “Angelkunata kamachiq Jehova Diosmi nin: ‘Achkanpi chaskiytam qamkunaqa suyarqankichik, ichaqa aschallatam chaskirunkichik. Wasikichikman aparuptikichikpas pukuykuspaymi chinkarachirqani,+ chinkarachirqaniqa kikikichikpa wasikichik suma-sumaq kananpaq tukuyta ruwakuspa wasiytañataq hina raqayllata saqirusqaykichikraykum.+ 10 Chayraykum kasqaykichik lawmanqa mana sullamurqachu, kawsaykunapas manañam qispirqañachu. 11 Mana parachimuptiymi allpaykichikwan urquykichikkunapas chakirqa. Chayraykum trigoykichikpas, vinoykichikpas, aceitekichikpas chaynataq ima tarpukusqaykichikpas mana anchachu karqa. Qamkunapas chaynataq animalnikichikpas ñakarichkankichikmi. Tukuy ima ruwasqaykichikpas yanqam’”, nispa.

12 Sealtielpa+ churin Zorobabel,+ sacerdotekunapa kamachiqnin Jeozadacpa+ churin Josuey hinaspa llaqtapi runakunam uyarirqaku Jehova Diospa nisqantawan Ageopa nisqanta. Ageotaqa Jehova Diosmi kacharqa. Llaqtapi runakunañataqmi Jehova Diosta manchakuyta qallaykurqaku.

13 Jehova Diosmanta willakuq Ageoñataqmi Jehova Diospa nisqanman hina runakunaman willarqa. “Jehova Diosmi nin: ‘Ñuqaqa qamkunawanmi kachkani’”, nispa.+

14 Jehova Diosmi kallpanchaykurqa+ Judata+ kamachiq Sealtielpa churin Zorobabelta, sacerdotekunata kamachiq Jeozadacpa churin Josueyta+ hinaspa llaqtapi runakunata, hinaptinmi rispanku angelkunata kamachiq Jehova Diosninkupa wasinta ruwayta qallaykurqaku.+ 15 Chayqa karqa iskay wataña Dario kamachichkaptinmi suqta kaq killapa 24 punchawninpi.+

2 Qanchis kaq killapa 21 kaq punchawpim Jehova Diosqa willakuqnin* Ageowan+ kaynata willachirqa: 2 “Ama hina kaspayá Judata+ kamachiq Sealtielpa churin Zorobabelta,+ sacerdotekunapa kamachiqnin Jeozadacpa+ churin Josueyta+ chaynataq llaqtapi runakunata niykapamuway: 3 ‘¿Yaqachu qamkuna ukupi pillapas kachkanraq kaypi ñawpaq wasiypa* suma-sumaq kasqanta rikuq?+ ¿Imaynataq kunan kachkan? Ñawpaq kaqmanqa manam imallanpipas rikchakunchu ¿aw?’, nispa.+

4 Jehova Diosmi nin: ‘Amayá manchakuychu Zorobabel, amayá manchakuychu sacerdotekunapa kamachiqnin Jeozadacpa churin Josuey’, nispa.

Jehova Diosmi nin: ‘Kay allpapi yachaq* runakuna, ama manchakuspayá llapallaykichik llamkaychik’, nispa.+

Angelkunata kamachiq Jehova Diosmi nin: ‘Ñuqaqa qamkunawanmi kachkani.+ 5 Yuyariychikyá Egiptomanta lluqsimuptikichik qamkunaman imam nisqayta.+ Atiyniyqa qamkunawanmi kachkan*,+ amayá manchakuychikchu’”, nispa.+

6 “Angelkunata kamachiq Jehova Diosmi nin: ‘Manapas unaymantam kaqmanta cielokunatawan allpa pachata katkatatachisaq*, lamar quchatawan chaki allpatapas katkatatachisaqmi’, nispa.+

7 Angelkunata kamachiq Jehova Diosmi nin: ‘Llapallan nacionkunatam katkatatachisaq. Hinaptinmi nacionkunapa ancha valorniyuq kapuqninkuna kay wasiman yaykunqa.+ Ñuqañataqmi ancha riqsisqata ruwasaq’, nispa.+

8 Angelkunata kamachiq Jehova Diosmi nin: ‘Quripas, qullqipas ñuqapam’, nispa.

9 Angelkunata kamachiq Jehova Diosmi nin: ‘Kay wasiqa ancha riqsisqam kanqa ñawpaq wasimantaqa’, nispa.+

Angelkunata kamachiq Jehova Diosmi nin: ‘Kay allpapi yachaqkunataqa hawkayaypim kawsachisaq’”, nispa.+

10 Kamachiq Dario iskay wataña kamachichkaptinmi, isqun kaq killapa 24 kaq punchawninpi Jehova Diospa willasqankunata Ageo+ nirqa: 11 “Angelkunata kamachiq Jehova Diosmi nin: ‘Ama hina kaspa, sacerdotekunatayá kamachikuymanta kaynata tapuykapuway:+ 12 “Sichu Diospaq sapaqchasqan aychata pipas apachkaptin chay runapa pachan tupaykunman tantaman, mikuyman, vinoman, aceiteman utaq huk mikuykunaman hinaptinqa ¿yaqachu chay haykam tupasqan Diospaq sapaqchasqaña rikurirunman?”’”, nispa.

Sacerdotekunañataqmi nirqaku: “¡Manam!”, nispa.

13 Ageoñataqmi nirqa: “Pipas wañusqata hapiruchkaspan kaykunata llachparuptinqa, ¿imapas llachpasqanqa millakuypaqñachu rikurirun?”, nispa.+

Sacerdotekunañataqmi nirqaku: “Arí, millakuypaqñam rikurirun”, nispa.

14 Ageoñataqmi nirqa: “Jehova Diosmi nin: ‘Chaynam kay llaqtaqa, chaynam kay nacionqa, ñuqapa qayllaypipunim chayna kanku. Chaynallatam imatapas ruwanku, imapas chaypi quwasqankuqa millakuypaqmi’, nispa.

15 ‘Ama hina kaspa, kunanmantayá ichaqa kaymanta allinta tantiaychik: Jehova Diospa wasinta manaraq pirqachkaptinkuqa,+ 16 ¿imataq karqa? Pipas 20 saco kawsayman riqqa chunka sacollatam tariq. Pipas uvas sarusqankuman 50 puyñu vinota apamuq riqqa 20 puyñullatam tariq.+ 17 Tukuy imata ruwasqaykichikraykum rupaq wayrata, unquyta+ hinaspa runtu parata kachaykamurqaykichik. Chaywanpas qamkunaqa manam kutirikamuwarqankichikchu’, Jehova Diosmi chaynata nin.

18 ‘Ama hina kaspayá kunanmantaqa allinta yuyaymanaychik, isqun kaq killapa 24 punchawninpi Jehova Diospa wasinta cimientasqaykichik qipamanqa+ allintayá yuyaymanaychik. 19 ¿Kachkanraqchu churasqaykichik kawsaykuna?+ Uvaskunapas, higoskunapas, granadakunapas, aceitunaskunapas... manaraqmi rurunraqchu ¿aw? Kunanmantaqa bendecisqaykichikmi’”.+

20 Chay killapa hina 24 punchawninpim Ageota Jehova Dios kaqmanta rimapayaspan+ nirqa: 21 “Judata kamachiq Zorobabelta niykamuy: ‘Hanaq pachatawan allpa pachatam taspipasaq.+ 22 Kamachiqkunatam chinkachisaq, nacionkunapi kamachiqkunapa atiynintam chinkachisaq,+ carretatawan carreta apaqkunatam chinkachisaq. Caballokunawan sillakuqninkunapas chinkanqam. Kikinkupuram espadawan wañuchinakunqaku’”, nispa.+

23 “Angelkunata kamachiq Jehova Diosmi nin: ‘Chay punchawqa Sealtielpa+ churin yupaychaqniy Zorobabel,+ qamtam sellana anillota hina ruwasqayki, qamqa kanki ñuqapa akllakusqaymi’, nispam Jehova Dios nin, angelkunata kamachiq Jehova Diosmi chaynata nin”.