ZACARIAS
1 Kamachiq Dario+ iskay wata kamachichkaptinmi pusaq kaq killapi, Jehova Dios paymanta willakuq* Zacariasta*+ rimapayarqa. Zacariasqa karqa Berekiaspa churinmi, Berekiasñataqmi karqa Idopa churin. 2 “Jehova Diosmi llumpa-llumpayta piñakurqa taytaykichikkunawan.+
3 Nimuy: ‘Angelkunata kamachiq Jehova Diosmi nin: “‘Ñuqaman kutirikamuwaychik, ñuqaman kutirikamuwaptikichikqa ñuqapas qamkunamanmi kutirikamusaq’+ nispam angelkunata kamachiq Jehova Dios nin. Angelkunata kamachiq Jehova Diosmi chaynata nin”’.
4 ‘Amayá taytaykichikkuna hinaqa kaychikchu, taytaykichikkunamanqa Diosmanta willakuqkunam ñawpaqtaraq nirqaku: “Angelkunata kamachiq Jehova Diosmi nin: ‘Ama hina kaspa, saqiychik mana allin ñanpi purisqaykichiktawan mana allinkuna ruwasqaykichiktaqa’”’, nispa.+
Jehova Diosmi nin: ‘Paykunam ichaqa mana kasukurqakuchu, manam uyariwarqakuchu’, nispa.+
5 ‘¿Maytaq chay taytaykichikkunaqa? ¿Ñuqamanta willakuqkunapas wiñaypaqchu karqaku? 6 Ñuqamanta willakuq yupaychaqniykunaman nisqaykunawan kamachisqaykunam ichaqa taytaykichikkunata hayparurqa, ¿chaynachu icha manachu?’+ Chaymi paykunaqa ñuqaman kutirikamuwaspanku nirqaku: ‘Angelkunata kamachiq Jehova Diosqa imayna kawsasqanchikmanwan imayna ruwasqanchikman hinam ruwawarqanchik, payqa ñawpaqmantaraq tantiasqanman hinam ruwarqa’”, nispa.+
7 Kamachiq Dario+ iskay wataña kamachichkaptinmi, 11 kaq Sebat* killapa 24 kaq punchawninpi Jehova Dios paymanta willakuq Zacariasta rimapayarqa. Zacariasqa karqa Berekiaspa churinmi, Berekiasñataqmi karqa Idopa churin. 8 “Tutam musquypi hina* qawarqani. Puka caballopi sillasqam runa kachkasqa, wayqupim mirto sachakunapa chawpinpi hawkalla sayachkasqa. Qipanpiñataqmi kachkasqa puka caballo, alasan caballo hinaspa yuraq caballo”.
9 Chaymi nirqani: “Taytáy, ¿pikunataq paykunaqa?”, nispay.
Ñuqawan rimaq angelñataqmi niwarqa: “Qawachisqaykiyá pikuna kasqankuta”, nispa.
10 Hinaptinmi chay mirto sachakunapa chawpinpi sayaq nirqa: “Paykunaqa kanku Jehova Diospa kachamusqankunam, paykunam kay allpata qawanqaku”, nispa. 11 Paykunañataqmi mirto sachakunapa chawpinpi sayaq Jehova Diospa angelninta nirqaku: “Kay allpataqa qawaramunikuñam, kay allpaqa allinllam kachkasqa, hawkallam kachkasqa”, nispa.+
12 Jehova Diospa angelninñataqmi nirqa: “Angelkunata kamachiq Jehova Dioslláy, ¿haykapikamataq mana llakipayankichu Jerusalenta? ¿Haykapikamataq mana llakipayankichu Judapi kaq llaqtakunata?+ Paykunawanqa 70 watañam piñasqa kachkanki”, nispa.+
13 Ñuqawan rimaq angeltam sunqunta tiyaykachinanpaq hina Jehova Dios kuyakuywan rimapayamurqa. 14 Hinaptinmi ñuqawan rimaq angelñataq niwarqa: “Willakuy: ‘Angelkunata kamachiq Jehova Diosmi nin: “Jerusalentawan Sion muquta kuyasqayraykum paykunata mana imapas pasananpaq tukuy imata ruwasaq.+ 15 Ancha-ancha piñasqam kachkani hawka kawsakuq nacionkunapaq,+ paykunaqa mana llumpay piñasqa kachkaptiymi+ astawan ñakariykunata rikurichirqaku”’, nispa.+
16 Chayraykum Jehova Diosqa nin: ‘“Jerusalentaqa kaqmantam llakipayasaq,+ wasiytapas chaypim ruwanqaku.+ Jerusalentaqa tupuna waskawanmi tupunqaku”, nispa.+ Angelkunata kamachiq Jehova Diosmi chaynata nin’, nispa.
17 Kaytapas willakuytaqyá: ‘Angelkunata kamachiq Jehova Diosmi nin: “Llaqtaykunapiqa kaqmantam allin kaqkuna kanqa. Jehova Diospas kaqmantam Sionpa+ sunqunta tiyaykachinqa, kaqmantam Jerusalenta akllanqa”’”, nispa.+
18 Hinaptinmi qawarispay tawa waqrakunata rikururqani.+ 19 Chaymi ñuqawan rimaq angelta nirqani: “¿Imataq wak waqrakunaqa?”, nispay. Payñataqmi niwarqa: “Kay waqrakunaqa Judata,+ Israelta+ hinaspa Jerusalenta+ kayman-chayman chiqirachiq waqrakunam”, nispa.
20 Chaymantam Jehova Diosqa qawachiwarqa tukuy imawan suma-sumaq kaqkunata ruwaq tawa runakunata. 21 Hinaptinmi nirqani: “¿Ima ruwaqtaq paykunaqa hamunqaku?”, nispay.
Payñataqmi niwarqa: “Waqrakunam Judata kayman-chayman chiqirachirqa umanta pipas mana huqariyta atinankama. Chaymi kay tukuy imawan suma-sumaq kaqkunata ruwaq runakunaqa hamunqa paykunata manchachinanpaq hinaspa Juda runakunata kayman-chayman chiqichinankupaq waqrankuta huqariq nacionkunapa waqranta pakipananpaq”, nispa.
2 Qawarispaymi rikururqani tupuna waskata makinpi apachkaq runata.+ 2 Chaymi nirqani: “¿Maytataq richkanki?”, nispay.
Payñataqmi niwarqa: “Jerusalenta tupuqmi, chaynapi largontapas anchontapas yachanaypaq”, nispa.+
3 Ñuqawan rimaq angel pasakuptinmi huk angelñataq taripaykamurqa. 4 Hinaspam nirqa: “Utqaylla kallpaspayki* wak musuman niykamuy: ‘“Mana murallayuq llaqtapi hinam Jerusalenpiqa achkallay-achka runa yachanqa*,+ achka-achka animalkunam kanqa.+ 5 Jehova Diosmi nin, paykunapaqmi linwachkaq muralla nina hina kasaq.+ Paykuna ukupim kancharisaq”’”, nispa.+
6 Jehova Diosmi nin: “¡Yawkuna! ¡Yawkuna! Ayqikamuychik chay norte law allpamanta”, nispa.+
Jehova Diosmi nin: “Ñuqaqa tukuy hinastinmanmi* chiqirachirqaykichik”, nispa.+
7 “¡Sionpi runakuna ayqikamuychik! Babiloniapi yachaq runakuna ayqikamuychik.+ 8 Angelkunata kamachiq Jehova Diosmi hatunchasqa kasqanmanta qipata kachawarqa tukuy imaykichikta apakuq nacionkunaman.+ Paymi nichkan: ‘Pipas qamkunata llachpaykuqqa ñawi ruruytam tuqpichkan.+ 9 Kunanqa paykunamanmi makiyta churasaq. Llaqtamanta tukuy ima apakusqanku hinam runankunapaq kanqaku’, nispa.+ Hinaptinmi qamkunaqa yachankichik angelkunata kamachiq Jehova Dios kachamuwasqanta.
10 Sionpa+ wawan, kusikuymantayá qapariy. Ñuqaqa chayaykamuchkaniñam,+ qamkunawanmi kasaq,+ Jehova Diosmi chaynata nin. 11 Chay punchawpiqa achkallay-achka nacionkunam Jehova Diosman hukllawakunqaku,+ paykunaqa runaykunañam kanqaku. Ñuqañataqmi paykunawan kasaq”. Hinaptinmi yachanki angelkunata kamachiq Jehova Dios kachamuwasqanta. 12 Jehova Diosmi chuya allpapi herencianta hina Juda nacionta hapikunqa. Kaqmantam Jerusalenta akllanqa.+ 13 Llapallan runakunayá Jehova Diospa qayllanpiqa upallalla kachunku. Payqa maymi kasqanmantam, chuyay-chuyay sitiomantam tukuy imata ruwachkan.
3 Sacerdotekunapa* kamachiqnin Josueytam+ qawachiwarqa, payqa kachkasqa Jehova Diospa angelninpa ñawpaqninpim, alliqninpiñataqmi satanas+ sayachkasqa paypa contranpi. 2 Hinaptinmi Jehova Diospa angelnin satanasta nirqa: “¡Jehova Diosyá qaqchasunki satanas!+ ¡Arí, Jehova Diosyá qaqchasunki, Jerusalenta akllaqyá qaqchasunki!+ ¿Manachu kay runaqa ninamanta hurqusqa yanta hina?”, nispa.
3 Josueyqa qachallaña pachayuqmi angelpa ñawpaqninpi sayachkasqa. 4 Angelñataqmi paypa ñawpaqninpi kaqkunata nirqa: “Chay qacha pachanta chustuychik”, nispa. Chaymantam payta nirqa: “Qawariy, pantasqaykikunatam qanmanta hurquruni, kunanqa allin pachawanñam churakunki”, nispa.+
5 Chaymi nirqani: “Sumaq taqsasqa uma wankuna telawanyá umanta wankiychik”, nispay.+ Hinaptinmi taqsasqa sumaq telawan umanta wankirqaku, sumaq pachawanmi pachachirqaku, Jehova Diospa angelninñataqmi hichpanpi sayachkarqa. 6 Hinaptinmi Jehova Diospa angelnin Josueyta nirqa: 7 “Angelkunata kamachiq Jehova Diosmi nin: ‘Ñanniykunapi purispaykiqa hinaspa imam ruwanaykikunata ñawpaqniypi allinta ruwaspaykiqa wasiypim juez kanki+ chaynataq patioykunata cuidaqmi kanki. Chaymantapas kaypi sayaqkunapa chawpinmanmi pitapas mana nispalla yaykunki.
8 Sacerdotekunapa kamachiqnin Josuey, ama hina kaspa uyariykuway, ñawpaqnikipi tiyaqkunapas uyarichunkuyá, kay runakunaqa kachkan hamuq punchawkunapi imakuna kananmanta yachanaykichikpaqmi. ¡Uyariwaychik, ikllipa*+ sutiyuq yupaychawaqniytam pusamusaq!+ 9 ¡Qawaychik, Josueypa ñawpaqninpi rumi churasqayta! Kay rumillapim kachkan qanchis ñawikuna, kay rumipa hawanpim qillqasaq, huk punchawllapim kay allpapa huchanta apakusaq,+ angelkunata kamachiq Jehova Diosmi chaynata nin’, nispa.
10 Angelkunata kamachiq Jehova Diosmi nin: ‘Chay punchawqa sapakamam llaqtamasikichikta qayaykuspa uvasnikichikpa sikinpi hinaspa higosnikichikpa sikinpi tiyankichik’”, nispa.+
4 Ñuqawan rimaq angelmi kutiramuspan puñuqta rikchachichkaq hina rikcharichiwarqa. 2 Chaymantam niwarqa: “¿Imatam rikuchkanki?”, nispa.
Ñuqañataqmi nirqani: “Hawanpi matiyuq qurimanta+ candelabrotam rikuchkani, chay candelabroqa qanchis mecheroyuqmi kachkan.+ Arí, qanchismi chay mecherokunaqa kachkan, qanchisnintin mecheromanmi matimanta suquschakuna hina yaykuchkan. 3 Waqtankunapiñataqmi kachkan iskay aceitunas sachakuna,+ hukninmi kachkan alliqninpi*, hukninñataqmi kachkan ichuqninpi*”, nispay.
4 Chaymantañataqmi ñuqawan rimaq angelta nirqani: “¿Imakunawantaq kaykunaqa tupan taytáy?” nispay. 5 Ñuqawan rimaq angelñataqmi niwarqa: “¿Manachu yachanki kaykuna imakunawan tupasqanta?”, nispa.
Ñuqañataqmi nirqani: “Manam taytáy”, nispay.
6 Payñataqmi niwarqa: “Kayqa Zorobabelpaq Jehova Diospa nisqanmi. Angelkunata kamachiq Jehova Diosmi nin: ‘“Manam soldadokunawanchu, manataqmi kallpanwanchu,+ aswanqa atiyniywanmi”, nispa.+ 7 Hatun urqu, ¿pitaq qamqa kanki? Zorobabelpa+ ñawpaqninpiqa pampayankim.+ Payñataqmi puchuq rumita hurqunqa, hinaspam qaparinqa: “¡Ima sumaqmi kayqa! ¡Ima sumaqmi kayqa!”’”, nispan.
8 Jehova Diosqa kaqmanta rimapayawaspam niwarqa: 9 “Zorobabelmi kay wasipa pirqankunata tiyachirqa,+ hina paytaqmi tukunqapas.+ Hinaptinmi yachanki angelkunata kamachiq Jehova Dios qamkunaman kachamuwasqanta. 10 ¿Kachkanchu pillapas qallarisqanku punchawpi mana kaqpaqta hina qawaq?+ Paykunaqa kusikunqakum Zorobabelpa makinpi plomadata qawaspanku. Kaykunaqa qanchisninmi Jehova Diospa ñawinkuna, kaykunaqa llapallan allpa pachatam qawachkanku”, nispa.+
11 Hinaptinmi nirqani: “¿Imakunawantaq tupan wak candelabropa alliqninpi hinaspa ichuqninpi iskay aceitunas sachakunaqa?”, nispay.+ 12 Kaqmantam nirqani: “¿Imawantaq tupan aceitunas sachakunapa aptay kallmankunaqa*? Chay kallmakunamantam qurimanta iskay tubontakama qillu aceite sutuchkan”, nispay.
13 Payñataqmi niwarqa: “Manachu yachanki imakunawan tupasqanta?”, nispa.
Ñuqañataqmi nirqani: “Manam taytáy”, nispay.
14 Payñataqmi niwarqa: “Llapallan kamachiq taytapa waqtanpi sayaq iskay akllasqakunam kaykunaqa”, nispa.+
5 Kaqmanta qawarispaymi rikururqani, pawachkaq wankukuq qillqata. 2 Hinaptinmi niwarqa: “¿Imatam rikuchkanki?”, nispa.
Ñuqañataqmi nirqani: “Pawachkaq wankukuq qillqatam rikuchkani, largonmi kasqa yaqa isqun metro*, anchonñataqmi kasqa tawa metro masnin*”, nispay.
3 Chaymantam niwarqa: “Mastarikuchkanqa qillqapa kaylaw waqtanpi suwakuyqa+ mana allin kasqanmanta nichkaptin suwakuqkunata mana imanasqankuraykum, qillqapa waklaw waqtanpi yanqa rimayñataqmi+ mana allin kasqanmanta nichkaptinpas yanqa rimaqkunata mana imanasqankurayku. 4 ‘Ñuqam kachamurqani, suwakuqpa wasinmanmi yaykunqa, sutiypi yanqa rimaqpa wasinmanmi yaykunqa. Hinaspam chay wasipi qipakuspan tablankunatawan ruminkunata tukunqa, angelkunata kamachiq Jehova Diosmi chaynata nin’”, nispa.
5 Chaymantam ñuqawan rimaq angelqa asuykamuwaspa niwarqa: “Ama hina kaspa qawariy, ¿imataq wak rikurimuchkan?”, nispa.
6 Ñuqañataqmi nirqani: “¿Imataq wakqa?”, nispay.
Payñataqmi niwarqa: “Wak rikurimuqqa tupunanku* canastam”, nispa. Chaymantapas niwarqaraqmi: “Kayqa allpantinpi paykunapa imayna kasqankum”, nispa. 7 Rikurqanitaqmi titimanta ruyru tapanta kichasqantapas. Hinaptinmi chay canastapa ukunpiqa warmi tiyachkasqa. 8 Angelmi nirqa: “Kay warmiqa mana allin kaqwanmi tupan”, nispa. Chaymantam chay warmitaqa canasta ukuman kaqmanta ñitipaykurqa, hinaspam chay canastata kallpawan taparurqa titimanta tapanwan.
9 Chaymantam qawarispay rikururqani wayrapa huqarisqan iskay warmikuna pawachkaqta. Cigüeñapa hinam raprankupas kasqa. Hinaspam chay canastata huqariruspa pawarqaku. 10 Chaymi ñuqawan rimaq angelta nirqani: “¿Maymantaq apachkanku wak canastata?”, nispay.
11 Payñataqmi niwarqa: “Sinar*+ allpamanmi, chaypim warmipa wasinta ruwanqaku. Wasita qispirachiptinkum payqa chaypi yachanqa*, maymi kananpim kanqa”, nispa.
6 Huktawan qawarispaymi rikururqani urqukunapa chawpinmanta tawa carretakuna kallpamuchkaqta*, urqukunaqa kasqa broncemantam. 2 Punta kaq carretapa caballonkunam kasqa pukakama, iskay kaq carretapa caballonkunañataqmi kasqa yanakama.+ 3 Kimsa kaq carretapa caballonkunañataqmi kasqa yuraqkama, tawa kaq carretapa caballonkunañataqmi kasqa murukunawan allqakuna.+
4 Hinaptinmi ñuqawan rimaq angelta nirqani: “¿Imakunawantaq kaykunaqa tupan taytáy?”, nispay.
5 Angelñataqmi niwarqa: “Kaykunaqa tupan hanaq pachamanta uraykamuq tawa espiritukunawanmi,+ paykunaqa uraykaramunku llapallan kamachiq taytapa ñawpaqninpi kasqankumantam.+ 6 Wak* yanakama caballoyuqmi norte law allpaman rinqa,+ yuraqkama caballoyuqñataqmi lamar quchapa waklawninman rinqa, murukama caballoyuqñataqmi sur law allpaman rinqa. 7 Wak allqa caballokunapas hikutakuchkan allpa pachaman kallpaq rinankupaqmi”, nispa. Chaymantam niykurqa: “Kallpaychik, allpa pachata muyuramuychik”, nispa. Hinaptinmi allpa pachata muyuq rirqaku.
8 Hinaptinmi payqa qayaykuwaspan niwarqa: “Qawariy, norte law allpaman riqkunaqa Jehova Diospa piñakuynintam norte law allpapi hawkayaykachinku”, nispa.
9 Kaqmantam Jehova Diosqa rimapayawaspan niwarqa: 10 “Heldaipa, Tobiyapa hinaspa Jedayapa huklaw llaqtapi kachkaspanku apamusqanku kaqkunata hapispaykim chay punchawqa Sofoniaspa churin Josiaspa wasinman yaykunki kay Babiloniamanta hamuqkunawan kuska. 11 Qurita, qullqita hapiykuspam coronata ruwanki, hinaspam sacerdote Jeozadacpa churin Josueypa+ umanman churanki. 12 Hinaspam ninki:
‘Angelkunata kamachiq Jehova Diosmi nin: “Kayqaya kaypi kachkan ikllipawan* sutichasqa runaqa.+ Maymi kasqanpi ikllispam payqa Jehova Diospa wasinta* ruwanqa.+ 13 Paymi Jehova Diospa wasinta ruwanqa, paymi hatunchasqa kanqa. Kamachinanpaq tiyananpi tiyaykuspam kamachinqa, hina kamachinanpaq tiyananpim sacerdote kanqa,+ iskaynintam allintapuni ruwanqa. 14 Coronañataqmi hina Jehova Diospa wasinpi qipanqa Helemta, Tobiyata, Jedayata+ hinaspa Sofoniaspa churin Henta yuyarinankupaq. 15 Karupi kaqkunapas hamunqakum Jehova Diospa wasinta ruwaypi yanapakunankupaq”, nispa. Hinaptinmi yachankichik angelkunata kamachiq Jehova Dios qamkunaman kachamuwasqanta. Chayqa pasakunqa Jehova Diosnikichikpa nisqankunata kasukuptillaykichikmi’”, nispa.
7 Kamachiq Dario tawa wata kamachichkaptinmi, isqun kaq kislev* killapi, tawa kaq punchawpi, Jehova Dios paymanta willakuq Zacariasta+ rimapayarqa. 2 Betel runakunam Sarezertawan Reguem-melecta runankunatawan kacharqaku Jehova Diospa llakipayakuyninta mañakamunankupaq. 3 Hina chay risqankupim angelkunata kamachiq Jehova Diospa wasinpi* sacerdotekunatawan willakuqkunata* nimunanku karqa: “¿Hinallachu kay pichqa kaq killapi+ waqaspay mana mikusaq watan-watan ruwasqayman hina?”, nispa.
4 Angelkunata kamachiq Jehova Diosmi kaqmanta rimapayawaspan niwarqa: 5 “Kay allpapi llapallan runakunamanwan sacerdotekunaman nimuy: ‘Kay 70 watantin,+ pichqa kaq killapiwan qanchis kaq killapi+ ayunaspa wanakuspaykichikqa, ¿chiqaptapunichu ñuqarayku mana mikurqankichik? 6 Mikukuspa tomakuspaykichikqa, ¿manachu qamkunarayku mikukuspa tomakurqankichik? 7 ¿Manachu kasukunaykichik karqa Jehova Diospa ñawpaq willakuqninkunawan+ nisqankunata? ¿Manachu kasukunaykichik karqa Jerusalenwan hichpanpi llaqtakuna runayuqraq kachkaptin hinaspa hawkayaypiraq kachkaptin? ¿Manachu kasukunaykichik karqa Neguebwan Sefela runayuqraq kachkaptin?’”, nispa.
8 Jehova Diosmi kaqmanta Zacariasta rimapayaspan nirqa: 9 “Angelkunata kamachiq Jehova Diosmi nin: ‘Pipapas imam ruwasqantaqa qawachiychik allin ruwayman hinayá,+ sapakamayá kuyanakuychik*,+ llakipayanakuychik. 10 Viudatawan mana taytayuqtaqa+ amayá ima mana allintapas ruwaychikchu, huklaw llaqtayuqtawan+ wakchataqa+ amayá ima mana allintapas ruwaychikchu, amayá sunquykichikpiqa tantiaychikchu hukkunata ima mana allintapas ruwanaykichikpaqqa’, nispa.+ 11 Paykunam ichaqa mana uyarikurqakuchu,+ qalaypaq mana kasukuqmi karqaku, qipanpakuruspankum+ rinrinkutapas tapakurqakuraq mana uyarinankupaq.+ 12 Rumi sunqum* rikurirurqaku,+ kamachikuytapas manam kasukurqakuchu, angelkunata kamachiq Jehova Dios atiyninwan yanapaptin ñawpaq willakuqninkunapa nisqantapas manam kasukurqakuchu.+ Chayraykum angelkunata kamachiq Jehova Diosqa llumpa-llumpayta piñakurqa”, nispa.+
13 Angelkunata kamachiq Jehova Diosmi nin: “Imaynam paykunapas qayakuptiy mana uyariwarqakuchu,+ chaynam ñuqapas qayakamuwaptinku mana uyarirqanichu.+ 14 Llumpa-llumpay wayrawan hinam mana riqsisqanku nacionkunaman kayman-chayman chiqirachirqani,+ yachasqanku* allpapas mana imayuqmi qiparqa, manam pipas rirqachu nitaq hamurqachu,+ paykunaqa suma-sumaq allpatam manchakuypaqta ruwarurqaku”, nispa.
8 Angelkunata kamachiq Jehova Diosmi kaqmanta rimapayawaspan niwarqa: 2 “Angelkunata kamachiq Jehova Diosmi nin: ‘Sionta kuyasqayraykum tukuyta ruwasaq,+ ancha piñasqam payrayku tukuyta ruwasaq’”, nispa.
3 “Jehova Diosmi nin: ‘Sionman+ kutispaymi Jerusalenpi+ yachasaq*, Jerusalentaqa riqsinqaku “chiqap kaqpa kanan llaqta” nispam,+ angelkunata kamachiq Jehova Diospa urquntapas riqsinqaku “chuya urqu” nispañam’”, nispa.+
4 “Angelkunata kamachiq Jehova Diosmi nin: ‘Machukunapas payakunapas Jerusalenpa hawa law punkunkunapim kaqmanta tiyanqa, yuyaqña kasqankuraykum tawnachantinkama tiyanqaku.+ 5 Llaqtapa hawa law punkunkunapipas warmakunam huntallaña kanqa, qari warmakunawan warmi warmakunam pukllanqa’”, nispa.+
6 “Angelkunata kamachiq Jehova Diosmi nin: ‘Chay punchawkunapi kay llaqtapi puchuqkunapaq sasa rikchakusqanraykuchu, ¿ñuqapaqpas sasa rikchakuwanman?’, nispa. Angelkunata kamachiq Jehova Diosmi chaynata nin”.
7 “Angelkunata kamachiq Jehova Diosmi nin: ‘Runaykunatam hurqumusaq intipa qispimunan lawmanta hinaspa intipa siqaykunan lawmanta.+ 8 Kutichimuptiymi Jerusalenpi yachanqaku,+ paykunaqa runaykunam kanqa, ñuqapas manam saqisaqchu, allin ruwaq Diosninkum kasaq’”, nispa.+
9 “Angelkunata kamachiq Jehova Diosmi nin: ‘Willakuqniykunapa* nisqankunata uyariqkuna,+ qarinchakuychikyá,+ kunan uyarisqaykichikta hinallam nirqaku angelkunata kamachiq Jehova Diospa wasinta* ruwayta qallarisqanku punchawpipas. 10 Chay punchawkunamanta ñawpaqtaqa manam llamkasqankumantaqa imatapas chaskirqakuchu runakunapas nitaq animalkunapas,+ chiqniqninkuraykum mana maymanpas riyta atiqkuchu, manataqmi hamuytapas atiqkuchu, chaynaqa karqaku llapallan runakunata chiqninarachisqayraykum’, nispa.
11 Angelkunata kamachiq Jehova Diosmi nin: ‘Kunanqa manañam kay llaqtapi puchuqkunataqa ñawpaqta hinañachu ruwasaq.+ 12 Paykunaqa hawkayay apamuq mugutam tarpunqaku, uvaskunapas sumaqllatañam rurunqa, kawsaykunapas achkanpim qispinqa,+ sullam sullamunqa, kay llaqtapi puchuqkunam tukuy kaykunawan qipanqaku.+ 13 Judapa mirayninkunawan Israelpa mirayninkuna, nacionkunapaqqa mana allinninpaqmi karqankichik,+ kunanmi ichaqa bendicion hinaña kankichik,+ chaynaqa kankichik ñuqa yanapaptiymi. ¡Amayá manchakuychikchu!+ Qarinchakuychikyá’, nispa.+
14 Angelkunata kamachiq Jehova Diosmi nichkan: ‘“Ñawpaq abueloykichikkuna piñachiwasqanraykum ñakariyta kacharimunaypaq tantiarurqani, manam llakipayarqanichu,+ angelkunata kamachiq ñuqa Jehova Diosmi chaynata nini. 15 Kunanmi ichaqa Jerusalenpaqwan Judapa mirayninkunapaq allin kaqtaña ruwanaypaq tantiaruni.+ ¡Amayá manchakuychikchu!”’ nispa.+
16 ‘Qamkunaqa kaytam ruwanaykichik, sapakamam imam kaqta rimanaykichik,+ ima sasachakuyninkuta allichaspapas imam kaqtayá ruwaychik, hawkalla kaytayá maskaychik.+ 17 Sunquykichikpiqa amayá tantiaychikchu hukkunata ima mana allintapas ruwanaykichikpaqqa,+ amataqyá yanqa rimasqankutapas allinpaqqa hapiychikchu,+ ñuqaqa chaykunataqa qalaypaqmi chiqnini’,+ Jehova Diosmi chaynata nin”, nispa.
18 Angelkunata kamachiq Jehova Diosmi kaqmanta rimapayawarqa: 19 “Angelkunata kamachiq Jehova Diosmi nin: ‘Tawa kaq killapi mana mikuyqa*,+ pichqa kaq killapi mana mikuyqa,+ qanchis kaq killapi mana mikuyqa+ hinaspa chunka kaq killapi mana mikuyqa+ Judapa mirayninkuna ancha-anchata kusikunanku punchawkunam* kanqa, kusikunapaq hatun punchawkunam kanqa.+ Chaynaqa imam kaqtayá rimaychik, hawkalla kaytayá maskaychik’, nispa.
20 Angelkunata kamachiq Jehova Diosmi nin: ‘Hamuchkanmi punchaw llaqtachakunamanta hinaspa hatun llaqtakunamanta runakuna hamunankupaq, 21 Huklaw llaqtamanta runakuna rispankum huklaw llaqtapi yachaq runakunata ninqaku: “¡Hakuchik! Hakuchik Jehova Diospa llakipayakuyninta mañakuq, hakuchik angelkunata kamachiq Jehova Diosta maskaq. Ñuqapas risaqmi”, nispa.+ 22 Achka llaqtakunamanta runakunam, atiyniyuq nacionkunamanta runakunam Jerusalenman hamunqaku angelkunata kamachiq Jehova Diosta maskaq,+ Jehova Diospa llakipayakuyninta mañakuq’, nispa.
23 Angelkunata kamachiq Jehova Diosmi nin: ‘Chay punchawkunapim tukuy hinastinmanta tukuy rimayniyuq chunka runakuna+ hapipakunqaku. Arí, judiopa pachanmantam* alli-allinta hapipakunqaku, hinaspam ninqaku: “Qamkunawan riytam munaniku,+ Dios qamkunawan kasqantam uyariruniku”’”, nispa.+
9 Kayqa willakuymi:
“Kay willakuyqa Jehova Diosmantam hamun Hadrac allpapaq,
astawanqa Damascopaqmi.+
Jehova Diosqa llapallan runakunatam qawachkan,+
llapallan Israel ayllukunatam qawachkan.
3 Tiro llaqtayuqkunam ruwakurun hatun pirqakunata.
Allpata hinam qullqita huñukurun,
ñankunapi mituta hinam qurita huñukurun.+
4 ¡Uyariychik! Jehova Diosmi tukuy ima kapuqninta qichunqa.+
Soldadonkunatapas lamar quchapim chinkachinqa.
Ninam rupanqa.+
5 Asquelonmi chayta qawaspa manchakuywan kanqa.
Gazapas llumpa-llumpaytam llakikunqa.
Ecronpas anchatam llakikunqa, tukuy imata suyasqanraykum pinqaypi kanqa.
Gazaqa mana kamachiqniyuqmi qipanqa,
Asquelonpas mana runayuqmi qipanqa.+
6 Asdodpipas hukpa churinmi yachanqa*.
Ñuqam Filistea runakunapa hatuntukuq kayninta tukusaq.+
7 Mikusqanku yawartam siminkumanta qichusaq.
Millakuypaq kaqkunata mikusqankutam kirunkumanta qichusaq.
Paymanta pipas puchuqqa Diosninchikpaqmi kanqa.
Judapim kamachiq hinaraq kanqa.+
Ecronpas Jebus runa hinam kanqa.+
8 Soldado hinam wasiypa punkunpi kasaq wasiyta waqaychanaypaq,+
manam saqisaqchu kayninta pipas lluqsinantaqa nitaq kayman pipas hamunantaqa.
Manam pipas runata ñakarichiqqa chaynintaqa purinqañachu.+
Kikiypunim ñawiywan chaykunata* rikurqani.
9 Sionpa wawan, ancha-anchatayá kusikuy.
Jerusalenpa wawan, kusikuymantayá qapariy.
¡Qawariy! Waqaya kamachiqniki hamuchkan.+
Payqa allin ruwaqmi, chiqniqninkunatam saruparun,
payqa llampu sunqum,+ asnopi sillakuykuspam hamuchkan.
Malta asnochapi* sillakuykuspam hamuchkan.+
10 Efrainpa peleanan carretantam ñutusaq,
Jerusalenpa caballontam tukusaq.
Peleanankupaq flechanankupas chinkanqam.
Hinaptinmi payqa nacionkunaman hawkayaymanta willanqa.+
Paymi kamachinqa lamar quchapa patanmanta huknin patankama.
Eufrates mayumanta qallaykuspam kuchun-kuchun kay allpa pachata kamachinqa.+
12 Wichqasqa runakuna, kusisqallañayá hatun pirqaman kutiychik.+
Kunanmi niki:
‘Yaw warmi, qusqaymanta huk chaynatawanmi qusqayki.+
13 Judatam flechanayta hina sumaqta tiqusaq.
Efrainñataqmi flechaypa ñawchi kaspin hina kanqa.
Sion, churikikunatam rikcharichisaq
Grecia nacionwan peleananpaq.
Qamtaqa* soldadopa espadanta hinam ruwasqayki’, nispa.
14 Jehova Diosqa paykunawan kasqantam qawanqaku.
Flechantam llipyayta hina kacharimunqa.
Llapallan kamachiq Jehova Diosmi waqrata pukunqa,+
sur lawmanta wayra hinam payqa hamunqa.
15 Angelkunata kamachiq Jehova Diosmi runankunarayku tukuyta ruwanqa.
Paykunañataqmi warakamusqanku rumikunata mikunqaku hinaspa sarunqaku.+
Tomaspankum kusisqallaña kanqaku vinowan hinaraq,
vino hunta mati hinam paykunaqa kanqaku,
16 Chay punchawqa Jehova Diosninkum waqaychanqa.
Kanchantin ovejata hinam runankunata waqaychanqa.+
Paykunaqa kanqaku allpanpi llipipipichkaq coronapi kuyayllapaq rumikuna hinam.+
17 ¡Mayna hatunmi paypa allin sunqu kayninqa!+
¡Mayna hatunmi paypa suma-sumaq kayninqa!
Kawsaykuna kasqanraykum musukunaqa kallpasapa kanqaku.
Chayllaraq ruwasqa vino kasqanraykum qariwan manaraq puñuq sipaskunapas kallpasapa kanqaku”, nispa.+
10 “Puquy tiempo tukunayaytayá Jehova Diosta parachimunanpaq mañakuychik.
Jehova Diosmi yanay-yanay puyukunata ruwaqqa,
paymi runakunapaqqa parachimun,+
paymi allpapi tukuy ima kaqkunata llapallankupaq wiñachin.
2 Sapa wasipa taytachankuqa yanqa rimaykunatam rikurirachin,
qatipaqkunapas yanqa kaqkunallatam musquypi hina* qawanku.
Yanqakuna sueñosqankumantam rimanku,
chayqa manam imapaqpas allinchu.
Runakunapa sunquntam tiyaykachiyta munanku, ichaqa yanqam.
Chayraykum runakunaqa chiqisqa oveja hina kayman-chayman rinqaku,
michiqninku mana kasqanraykum ñakarinqaku.
3 Michiqkunapaqmi piñasqa kachkani,
umalliq kachkaspanku pitapas ñakarichiqkunamanmi ñakariyta kacharisaq.
Angelkunata kamachiq Jehova Diosqa ovejankunamantam yuyarirun,+ Juda runakunamantam yuyarirun.
Guerrapi suma-sumaq kallpasapa caballota hinam paykunataqa ruwarun.
4 Paymantam* kanqa alli-allin qari,
paymantam kanqa yanapaqninku kamachikuq,
paymantam kanqa guerrapi flechanaqa.
Paymantam kanqa llapallan umalliqkuna, llapallankum paymanta kanqaku.
5 Peleaspa ñankunapi mituta saruq soldadokuna hinam kanqaku.
Paykunawan Jehova Dios kasqanraykum guerraman rinqaku.+
Sillada hamuqkunapas pinqaypim qipanqaku.+
6 Llapallankumanta hatuntam Judapa mirayninkunata ruwasaq,
Joseypa mirayninkunatapas waqaychasaqmi.+
Llakipayasqayraykum kaqmanta kutichimusaq.+
Mana haykapipas qipanchasqay hinam kanqaku.+
Ñuqaqa Jehova Diosninkum kani,
chayraykum uyarisaq.
7 Efrainmanta kaqkunam kallpasapa soldado hina kanqaku,
sunqunkupas vinowan hinaraqmi kusisqa kanqa.+
Churinkupas chayta qawaspankum kusikunqaku,
Jehova Diosraykum sunqunkupas kusisqa kanqa.+
9 Muguta maqchichkaq hina llaqtakunaman chiqirachiptiypas
chaynataq karu llaqtakunapi kaspankupas ñuqamantam yuyarinqaku.
Churinkuwan kuskam kawsarimuchkaq hina kutimunqaku.
10 Kaqmantam kutichimusaq Egipto allpamanta,
huñumusaqmi Asiriamantapas.+
11 Lamar qucha ñanninkuta harkaptinpas ñuqam kichasaq,
lamar quchapa urquchakusqantapas chinkachisaqmi,+
ñanninkuta harkakuptinqa Nilo mayutapas chakichisaqmi,
Asiriatapas hatuntukusqanraykum pinqayman churasaq,
Egiptopa atiyninpas chinkanqam.+
12 Ñuqa Jehova Diosraykum paykuna hinaqa mana pipas kanqachu,+
paykunaqa sutiypim purinqaku’,+ Jehova Diosmi chaynata nin”.
11 “Yaw Libano, punkuykikunata kichay,
kichay cedro sachaykikunata nina rupananpaq.
2 ¡Cipres sacha qaparkachayá,
cedro sacham wichiykun, suma-sumaq sachakunam chinkarun!
¡Basan lawpi roble sachakuna, qaparkachaychikyá,
Montem qalaypaq chinkarun!
3 ¡Qawaychik! Michiqkunam qaparkachachkanku,
tukuy ima kapuqninkum qalaypaq chinkarun.
¡Uyariychik! Malta leonkunam qaparichkan,
Jordan mayu patanpi tukuy imam qalaypaq ruparun.
4 Jehova Diosniymi nin: ‘Nakanankupaq akllasqanku ovejakunata michiy.+ 5 Pipas rantiqqa nakanpunim,+ chaywanpas paykunataqa mana huchayuqpaqmi hapinku. Rantikuqkunapas*+ kaynatam ninku: “Jehova Diosyá hatunchasqa kachun, ñuqaqa apuñam kasaq”, nispa. Michiqkunapas ovejakunataqa manam llakipayankuchu’, nispa.+
6 Jehova Diosmi nin: ‘Ñuqaqa manañam llakipayasaqñachu kay llaqtapi yachaqkunataqa*, tukuytam ruwasaq llapallan runakuna runamasinpa makinman wichinanpaq hinaspa kamachiqninkupa makinman wichinanpaq. Llaqtata chinkachiptinkupas paykunapa makinmantaqa manam librasaqchu’”, nispa.
7 Chaymantam nakanankupaq akllasqa ovejakunata michirqani.+ Ovejakunamanta llakisqa kaqkuna, qamkunaraykum ruwarqani. Iskay tawnakunatam ruwakurqani, huknintam suticharqani Allin sunquyuqwan, huknintañataqmi Huklla kaywan,+ hinaspam chay ovejakunata michirqani. 8 Huk killallapim kimsa michiqkunata qarqururqani, qarqururqaniqa paykunata amirusqayraykum hinaspa paykunapas ñuqata chiqnikuwasqankuraykum. 9 Chaymi nirqani: “Manañam michisqaykichikñachu, wañunayaqkunaqa wañuchun, wañunanpaq kaqkunapas wañuchun, puchuq kaqkunapas kikinkupura mikunakuchunku”, nispay. 10 Chaymantam Allin sunquyuqwan+ sutichasqa tawnayta hapiykuspay pakiparurqani, chaynatam llapallan llaqtakunawan contrato* ruwasqayta yanqacharurqani. 11 Chay punchawpim yanqachakururqa, ovejakunamanta llakisqa kaqkunapas qawawaspankum yacharurqaku chayqa Jehova Diosmanta willakuy kasqanta.
12 Chaymantam nirqani: “Qamkunapaq allin rikchakapusuptikichikqa qupuwanaykichik kaqtayá qupuwaychik, mana allin rikchakapusuptikichikqa qipakuychikyá”, nispay. Hinaptinmi qupuwananku kaqta qupuwarqaku, 30 qullqitam* qupuwarqaku.+
13 Chaymantam Jehova Dios niwarqa: “Qullqi churanankuman chayta wischuykuy, chayna qullqillapaqmi kasqani”, nispa.+ Chaynata niwaptinmi chay 30 qullqita hapiykuspay Jehova Diospa wasinpi qullqi churanankuman wischuykurqani.+
14 Chaymantam Huklla kaywan+ sutichasqa tawnayta hapiykuspay pakiparurqani, chaynatam Judatawan Israelta wawqintin kachkaptinku yanqacharurqani.+
15 Chaymantam Jehova Diosñataq niwarqa: “Mana allin michiqpata tukuy imanta apakuy.+ 16 Ñuqam llaqtapi churasaq michiq kananpaq, payqa manam wañunayaq ovejakunataqa qawayllapas-qawarinqachu,+ ovejakunapa uñantapas manam maskanqachu, heridakuqkunatapas manam hampinqachu,+ manataqmi qaranqachu allin kaq ovejakunamanpas.+ Aswanqa puqusqan ovejakunatam mikukunqa, ovejakunapa situntam chustunqa.+
17 ¡Imaynaraq kanqa chay mana allin michiqqa!+ ¡Imaynaraq kanqa ovejakunata saqiruq michiqqa!+
Paytaqa espadam makintawan ñawinta tuksinqa.
Hinaptinmi makinqa qalaypaq chakinqa,
alliq* ñawinpas qalaypaq mana qawakuqmi kanqa”, nispa.
12 Kayqa willakuymi:
“Israelmanta ñuqa Jehova Diospa nisqaykuna”, Jehova Diosmi chaynata nin,
hanaq pachata mastariqmi chaynata nin,+
kay allpa pachata suma-sumaqta takyachiqmi chaynata nin,+
runaman samayta* quqmi chaynata nin.
2 “Jerusalenmanta vasota ruwaptiymi hichpanpi kaq llaqtakunata katkatatachinqa, hinaptinmi Judaman yaykunankupaq muyurirunqaku, Jerusalenman yaykunankupaqmi muyurirunqaku.+ 3 Chay punchawqa Jerusalentam llasaq rumita hina ruwasaq llapallan llaqtakunapaq. Pipas huqariqqa wañuy patanpim kanqa,+ kay allpa pachapi llapallan nacionkunam paypa makinpi kanankupaq huñunakunqaku.+ 4 Chay punchawqa tukuyta ruwasqayraykum caballokunapas manchakuymanta kanqa, sillakuqninkunapas muspaypi hinam kanqaku. Chay punchawqa Judapa mirayninkunawanmi kasaq, ichaqa tukuytam ruwasaq llaqtakunapi llapallan caballokuna ñawsayarunanpaq. Jehova Diosmi chaynata nin. 5 Judapi kamachiqkunapas sunqunkupim ninqaku: ‘Angelkunata kamachiq Jehova Diospa kallpanchasqanmi Jerusalenpi yachaqkunaqa*’, nispa.+ 6 Chay punchawqa Judapi kamachiqkunatam yantapa chawpinpi sansapa kananta hina ruwasaq, siqinpi rutusqa kawsayman pigachinankupaq hapisqanku ninata hinam ruwasaq,+ hichpanpi kaq llapallan llaqtakunatam qalaypaq chinkachinqaku, alliqninpi* kaqtapas ichuqninpi* kaqtapas lliwtam chinkachinqaku,+ Jerusalen runakunaqa kaqmantam Jerusalen llaqtankupi yachanankupaq kutinqaku.+
7 Jehova Diosqa puntatam Juda runakunata yanapanqa, chaytaqa ruwanqa Davidpa mirayninkunawan Jerusalenpi yachaqkuna Judamanta aswan kuyayllapaq mana kanankupaqmi. 8 Chay punchawqa Jehova Diosmi Jerusalenpi yachaqkunata muyuriqninmanta harkanqa,+ chay punchawqa yanqachallaña kaqpas David hinam kanqa, Davidpa mirayninkunapas Dios hinam kanqaku, paykunapa ñawpaqninta riq Jehova Diospa angelnin hinam kanqaku.+ 9 Chay punchawqa Jerusalenpa contranpi kaq llapallan nacionkunatam chinkachisaq.+
10 Chay punchawqa Davidpa mirayninkunawan Jerusalenpi yachaqkunam atiyniyta qawanqaku, hinaspam yachanqaku ñuqaqa paykunawan kasqayta, qayakuwasqankuta uyarisqayta, tuksirusqanku kaqtam qawanqaku,+ payraykum chullalla churinkumanta hina waqanqaku, hikchuy-hikchuytam waqanqaku, piwi* churinkumantapas hinam qaparkachanqaku. 11 Chay punchawpi Jerusalenpa waqasqanqa kanqa Meguido muqupi+ Hadadrimonpa waqasqan hinaraqmi. 12 Llaqtapi runakunapas waqanqam, sapa ayllum waqanqa, Davidpa mirayninmanta kaqkunapas waqanqam, warminkupas sapakamam waqanqaku, Natanpa+ mirayninmanta kaqkunapas waqanqam, warminkupas sapakamam waqanqaku, 13 Leviypa+ mirayninmanta kaqkunapas waqanqam, warminkupas sapakamam waqanqaku, Simei+ runakunapa ayllunpas waqanqam, warminkupas sapakamam waqanqaku, 14 puchuq ayllukunapas llapallanmi waqanqa, sapa ayllum waqanqa, warminkupas sapakamam waqanqaku”, nispa.
13 “Chay punchawqa uchkutam uchkunqaku Davidpa mirayninpaqwan Jerusalenpi yachaqkunapaq*, hinaptinmi huchankumantawan millakuypaq kaqkunamanta chuyanchasqa kanqaku.+
2 Chay punchawqa llaqtapi taytacha-mamachakunapa sutintam chinkachisaq,+ manañam haykapipas yuyarinqakuñachu. Llaqtamantam willakuqtukuqkunata* chinkachisaq,+ mana allin atiytam chinkachisaq, angelkunata kamachiq Jehova Diosmi chaynata nin. 3 Huk runa kaqmanta willakuqtukuptinqa, churyakuqnin taytanwan wachakuqnin mamanmi ninqaku: ‘Qamqa wañunkim, qamqa Jehova Diospa sutinpim llullallata rimarqanki’, nispa. Hinaptinmi churyakuqnin taytanwan wachakuqnin mamallan willakuqtukusqanrayku wañuchinqaku.+
4 Chay punchawqa llapallan willakuqtukuqkunam musquypi hina* qawasqankumanta willakuspanku pinqakunqaku. Pantachinankupaqqa manam churakunqakuchu willakunankupaq chukchamanta pachawanpas.+ 5 Sapakamam ninqaku: ‘Ñuqaqa manam willakuqchu kani, chakrapi llamkakuq runallam kani. Ñuqataqa huk runam rantiruwarqa musullaraq kachkaptiy’, nispa. 6 Pipas ‘¿imanasqataq makikikunata heridakurunki’ niptinñataqmi ‘riqsinakusqaykunapa wasinpim kaynaramuwanku’ ninqa”.
7 Angelkunata kamachiq Jehova Diosmi nin:
“Espada rikchariy,+ michiqta tuksinaykipaq rikchariy,
puriqmasiy runata tuksinaykipaq rikchariy.
Michiqta wañuchiy,+ michisqan ovejakunapas chiqichun.+
Mana kaqpaq hapisqanku kaqkunamanmi makiyta churasaq”, nispa.
8 Jehova Diosmi nin: “Llapallan llaqta ukupim
iskay parte chinkanqa, wañunqa.
Wakillanñam puchunqa.
9 Puchuq kaqtañataqmi ninaman churaspay
qullqita hina chuyanchasaq,
qurita hinam ninaman churasaq imayna kasqankuta yachanaypaq.+
Paykuna sutiymanta qayakamuwaptinkum
ñuqañataq paykunapa qayakamuwasqanta uyariykusaq.
Ñuqam nisaq: ‘Paykunaqa runaykunam’, nispay.+
Paykunañataqmi ninqaku: ‘Jehova Diosmi Diosninchikqa’”, nispa.
14 “¡Uyariychik! Punchawmi hamuchkan, chay punchawqa Jehova Diospa punchawninmi. Chay punchawqa tukuy ima kapuqnikikunatam* rakinakuspa apakunqaku. 2 Chay punchawqa llapallan nacionkunatam huñusaq Jerusalenpi kaqkunata wañuchinankupaq. Llaqtamanmi yaykunqaku, wasikunapi tukuy ima kaqkunatam apakunqaku, mana munakuchkaqtam warmikunatapas tukuyta ruwanqaku. Llaqtapi yachaqkunamanta* wakinmi huklawman apasqa kanqa, llaqtapi puchuqkunam ichaqa mana chinkanqachu.
3 Chay punchawqa Jehova Diosmi guerrapi hina+ chay nacionkunawan peleanqa.+ 4 Chay punchawqa Jerusalenpa chimpanpi intipa qispimunan law Olivos muqupim chakinkuna kanqa.+ Chay punchawqa Olivos muqum iskayman rakikunqa, intipa qispimunan lawmanmi hinaspa intipa siqaykunan lawmanmi rakikunqa. Hatu-hatun wayqum kanqa, chay urqupa partenmi rakikunqa norte lawman, huklawnin partenñataqmi sur lawman. 5 Qamkunaqa urquykunapa sikin wayqukunamanmi ayqikunkichik, urquykunapa sikin wayqukunaqa Azelkamam kanqa. Juda runakunata Uzias kamachichkaptin terremotomanta hinam ayqinkichik.+ Hinaptinmi Jehova Diosniy hamunqa, llapallan chuya kaqkunam paywan kanqa.+
6 Chay punchawqa sumaqllataña achkimuqkunapas manam achkimunqachu.+ Imapas manam kuyurinqachu. 7 Chay punchawqa Jehova Diospa punchawnin kasqantam yachanqaku,+ manam punchawpas nitaq tutapas kanqachu. Tutaykuqtañataqmi achki kanqa. 8 Chay punchawqa kawsay qukuq yakum Jerusalenmanta+ tuqyanqa.+ Wakinmi tuqyanqa intipa qispimunan lamar qucha* lawman,+ wakinñataqmi intipa siqaykunan lamar qucha* lawman.+ Chaynallam kanqa usyay tiempopas puquy tiempopas. 9 Jehova Diosmi llapallan kay allpa pachata kamachinqa.+ Chay punchawqa manam pipas Jehova Dios hinaqa kanqachu.+ Manataqmi ima sutipas sutin hinaqa kanqachu.+
10 Jerusalenpa sur lawnin llaqtapas Guebamanta+ Rimonkamam+ Araba+ pampa hina kanqa. Jerusalenpas llapallanpa hawanpim kanqa, hina maymi kasqanpim runayuq kanqa.+ Benjaminpa+ punkunmanta punta kaq punkukamam runayuq kanqa, qichqarayaqpi punkukamam runayuq kanqa. Hananelpa+ torrenmanta kamachiqpaq vino ruwananku* sitiokamam runayuq kanqa. 11 Runayuqmi kanqa, manañam haykapipas kaqmanta chinkananpaqqa ñakanqakuñachu,+ Jerusalenpiqa hawkañam kawsakunqaku.+
12 Jerusalenpi yachaqkunata wañuchinankupaq riq llapallan llaqtakunamanmi Jehova Diosqa ñakariyta kacharinqa.+ Kawsachkaptinkuraqmi paykunapa aychanqa ismunqa, kawsachkaptinkuraqmi ñawinkupas ismunqa, kawsachkaptinkuraqmi qallunkupas siminkupi ismunqa.
13 Jehova Diosmi tukuyta ruwanqa mancharisqallaña kanankupaq hinaspa pantanakunankupaq. Pantanakuruspankum kikinkupuralla maqanakunqaku, kikinkupurallam wañuchinakunqaku.+ 14 Judapas Jerusalenpi wañuchinakuymanmi rinqa, hinaspam hichpanpi nacionkunapa tukuy imanta apakunqa. Apakunqam quri-qullqintawan achkallay-achka pachanta.+
15 Hina chay ñakariyllam kanqa caballokunapaqpas, mulakunapaqpas, camellokunapaqpas, asnokunapaqpas chaynataq chay carpakunapi llapallan animalkunapaqpas.
16 Jerusalenpi yachaqkunata wañuchinankupaq riq llapallan nacionkunamanta puchuqkunaqa sapa watam Jerusalenman rinqaku.+ Rinqakuqa kamachiq Diospa ñawpaqninpi qunqurakunankupaqmi, angelkunata kamachiq Jehova Diospa ñawpaqninpi qunqurakunankupaqmi+ hinaspa ramada ruway hatun punchawta* yuyarinankupaqmi.+ 17 Kay allpapi ayllukunamanta kamachiq Diospa ñawpaqninpi qunqurakunankupaq Jerusalenman mana riptinkum ichaqa chay ayllupaqqa para mana kanqachu, angelkunata kamachiq Jehova Diospa ñawpaqninpi mana qunqurakuptinkum ichaqa chay ayllupaqqa para mana kanqachu.+ 18 Egipto runakunapas Jerusalenman mana riptinkuqa, Jerusalenman mana yaykuptinkuqa, paykunapaqpas paraqa manam kanqachu. Aswanqa ramada ruway hatun punchawta yuyarinankupaq Jerusalenman mana riq nacionkunatawanmi Jehova Dios castiganqa. 19 Egiptopas Jerusalenman mana risqanwan huchallikusqanraykum para mana kanqachu. Llapallan nacionkuna Jerusalenman ramada ruway hatun punchawta yuyarinankupaq mana risqankuraykum paykunapaqqa para mana kanqachu.
20 Chay punchawqa ‘¡Jehova Diosllam chuyay-chuyayqa!’+ niqmi caballokunapa esquelankunapipas qillqasqa kanqa. Jehova Diospa wasinpi mankakunapas+ altarpa ñawpaqninpi matikuna+ hinam kanqa. 21 Jerusalenpiwan Judapi llapallan mankakunaqa chuyañam kanqa, angelkunata kamachiq Jehova Diospaqmi kanqa. Haykam animalta kañaqkunapas yaykuspankum wakin mankakunapi yanukunqaku. Chay punchawqa angelkunata kamachiq Jehova Diospa wasinpiqa manañam Canaan* runakunaqa kanqachu”.+
Utaq: “Profeta”. Qaway palabrapa ima ninan kasqanta.
“Zacarias” ninanqa: “Jehova Diosmi yuyarirun”, ninanmi.
Qaway B15 kaq yachachikuyta.
Utaq: “Revelacionpi”.
Utaq: “Raskispayki”.
Utaq: “Tiyanqa”.
Hebreo rimaypiqa nichkan: “Hanaq pachapa tawan lawnin wayrakunapa kasqanmanmi”, nispam.
Qaway kay palabrapa ima ninan kasqanta.
Utaq: “Chikllipa”.
Utaq: “Pañanpi”.
Utaq: “Lluqinpi”.
Kayqa aceitunas sachapa karkay-karkay ruruyuq kallmankunam.
Utaq: “20 kuchus”. Qaway B14 kaq yachachikuyta.
Utaq: “Chunka kuchus”.
Utaq: “Efa”. Qaway B14 kaq yachachikuyta.
Kayqa Babilonia llaqtam.
Utaq: “Tiyanqa”.
Utaq: “Raskimuchkaqta”.
Kayqa carretam.
Utaq: “Chikllipawan”.
Utaq: “Templonta”.
Qaway B15 kaq yachachikuyta.
Utaq: “Templonpi”.
Utaq: “Profetakunata”.
Kaypiqa rimachkan imaña kaptinpas hinalla kuyakuq kanamantam.
Utaq: “Diamante rumi hina sunquyuqmi”.
Utaq: “Tiyasqanku”.
Utaq: “Tiyasaq”.
Utaq: “Profetaykunapa”.
Utaq: “Templonta”.
Utaq: “Ayunayqa”.
Utaq: “Fiestakunam”.
Utaq: “Pachanpa patanmantam”.
Utaq: “Tiyanqa”.
Kaypiqa yaqachusmi runankunapa ñakarisqankumanta rimachkan.
Hebreo rimaypiqa nichkan: “China asnopa uñan asnochapi”, nispam.
Utaq: “Pactota”. Qaway kay palabrapa ima ninan kasqanta.
Kaypiqa yaqachusmi rimachkan Sionmanta.
Qaway kay palabrapa ima ninan kasqanta.
Utaq: “Revelacionpi”.
Utaq: “Judamantam”.
Utaq: “Vendeqkunapas”.
Utaq: “Tiyaqkunataqa”.
Utaq: “Pacto”. Qaway kay palabrapa ima ninan kasqanta.
Utaq: “Rumichakuna hina qullqitam”.
Utaq: “Paña”.
Hebreo rimaypiqa nichkan: “Espirituta”, nispam. Qaway kay palabrapa ima ninan kasqanta.
Utaq: “Tiyaqkunaqa”.
Utaq: “Pañanpi”.
Utaq: “Lluqinpi”.
Utaq: “Punta naceq”.
Utaq: “Tiyaqkunapaq”.
Utaq: “Profetatukuqkunata”.
Utaq: “Revelacionpi”.
Kayqa iskay kaq versiculopi willakusqan llaqtam.
Utaq: “Tiyaqkunamanta”.
Kaypiqa rimachkan Kachi quchamantam.
Kaypiqa rimachkan Hatun lamar quchamantam.
Utaq: “Uvasta sarunanku”.
Utaq: “Fiestata”.
Ichapas kanman: “Negociowan riq”, niqpas.