MALAQUIAS

1 Kayqa huk willakuymi.

Jehova Diosmi kaytaqa Israel runakunaman Malaquiaswan* willachirqa:

2 “Jehova Diosmi nin: ‘Ñuqaqa qamkunatam kuyarqaykichik’”, nispa.+

Qamkunam ichaqa ninkichik: “¿Haykapitaq kuyawarqankiku?”, nispa.

Jehova Diosmi nin: “¿Manachu Esauqa Jacobpa wawqin karqa?+ Ñuqaqa Jacobtam kuyarqani, 3 Esautañataqmi chiqnirqani.+ Urquykichikkunatapas mana imayuqtam saqirurqani,+ allpaykichiktapas mana imapa kananpi atuqkunapaqñam saqirurqani”, nispa.+

4 “Chaywanpas Edomqa kaynatam nichkan: ‘Qalaypaqmi saruparuwarqanchik, ichaqa rispanchikmi kaqmanta wak raqayllanña kaqta pirqasunchik’, nispa. Angelkunata kamachiq Jehova Diosñataqmi nin: ‘Paykuna kaqmanta hatarichiptinkupas ñuqam tuñichisaq, hinaptinmi sutichanqaku “mana allinpa kanan allpa” nispaña, “Jehova Diospa wiñaypaq ñakasqan llaqta” nispaña.+ 5 Qamkunam ichaqa kikikichik ñawikichikwan qawaspa ninkichik: “Llapallan Israel allpapiyá Jehova Dios hatunchasqa kachun”’”, nispa.

6 “Sutiyta mana valeqta hina hapiq sacerdotekuna*,+ angelkunata kamachiq ñuqa Jehova Diosmi nikichik: ‘Churiqa taytantam kasukun,+ llamkapakuqpas patronnintam kasukun. Chaynaqa, ¿imaynanpitaq mana kasukuwankichikchu ñuqa taytaykichik kachkaptiyqa?+ ¿Imaynanpitaq mana manchakuwankichikchu ñuqa patronnikichik kachkaptiyqa?’, nispa.

‘Qamkunam ichaqa ninkichik: “¿Haykapitaq sutikita mana valeqta hina hapirqaniku?”’, nispa.

7 ‘Altarniypi* millakuypaq mikuyta churaspaykichikpas’

‘qamkunaqa ninkichikmi: “¿Ima mana allintataq ruwarqaykiku?”’, nispa.

‘“Millakuypaqtam ruwaruwankichik, Jehova Diospa altarnintaqa*+ kaqpaq mana kaqpaqpas hapichwanmi” nispaykichik. 8 Ñawsa animalta nakapuwaspaykichikpas ninkichikraqmi: “Allinllatam ruwachkanchikqa, manam mana allintachu”, nispa. Wiqru* animalkunatawan unquypa hapisqan animalkunata nakapuwaspaykichikpas ninkichikmi: “Allinllatam ruwachkanchikqa, manam mana allintachu”’”, nispa.+

Angelkunata kamachiq Jehova Diosmi nin: “Ama hina kaspayá, kamachiqnikichikman mana allin kaq animalkunata quykuychik. ¿Yaqachus pay kusisqa kanqa? ¿Yaqachus allinta chaskiykusunki?”, nispa.

9 “Kunanyá ichaqa ama hina kaspaykichik Diosta qayakuychik, llakipayaykuwananchikpaqyá mañakuychik. Chayna animalkunata quptikichikqa, ¿yaqachu mayqanllaykichiktapas allinta chaskiykusunkichik?”, angelkunata kamachiq Jehova Diosmi chaynata nin.

10 Angelkunata kamachiq Jehova Diosmi nin: “¿Mayqannikichiktaq punkuta wichqaq kawaqchik*?+ Qamkunaqa manam altarniypi ninatapas mana imallapaqqa ratachiwaqchikchu.+ Qamkunaqa manam kusikunaypaq hinachu kankichik. Manataqmi ima quwasqaykichik ofrendawanpas kusikunichu”, nispa.+

11 Angelkunata kamachiq Jehova Diosmi nin: “Intipa qispimunan lawmanta intipa siqaykunan lawkamam sutiyqa ancha riqsisqa kanqa, nacionkunapim ancha riqsisqa kanqa.+ Tukuy hinastinpim animalta kañapuwanqaku, tukuy hinastinpim sutiyrayku animalta nakapuwanqaku. Chayqa kuyakuyninkupi quwasqankum kanqa, chuyam kanqa. Sutiyqa nacionkunapim ancha riqsisqa kanqa”, nispa.+

12 “Qamkunam ichaqa yanqacharunkichik*+ ‘Jehova Diospaq animal kañanankuqa millakuypaqmi, ima qusqankupas millakuypaqmi’ nispaykichik.+ 13 Ninkichiktaqmi: ‘¡Mayñaya!’, nispa. Hinaspam mana valeqta hina qawankichik, nispam angelkunata kamachiq Jehova Dios nin. Qamkunaqa apamunkichik suwasqa animalkunatam, ñawsa animalkunatam hinaspa unquypa hapisqan animalkunatam. Qamkunapaqqa chaymi kuyakuynikichik. ¿Yaqachu ñuqaqa chayta chaskikichikman?”,+ nispam Jehova Dios nin.

14 Angelkunata kamachiq Jehova Diosmi nin: “Ñakasqayá kachun sakri runaqa hinaspa sano carneron kachkaptin imatapas ruwananpaq nispan mana allin kaq animalta Jehova Diospaq nakapuq runaqa. Ñuqaqa hatu-hatun kamachiqmi kani,+ sutiypas manchakunankupaqmi kanqa, nacionkuna manchakunanpaqmi kanqa”, nispa.+

2 “Sacerdotekuna, kay kamachikuyqa qamkunapaqmi.+ 2 Mana uyariptikichikqa hinaspa sutiyta sunqumanta mana hatunchaptikichikqa ñakasqaykichikmi,+ allinnikichikpaq kaqkunapas mana allinnikichikpaqñam kanqa.+ Arí, yanqapaq hapisqaykichikraykum allinnikichikpaq kaqkunatapas mana allinnikichikpaqña ruwaruni”, angelkunata kamachiq Jehova Diosmi chaynata nin.

3 “¡Uyariychik! Chayta ruwasqaykichikraykum tarpukusqaykichik mana qispinanpaq tukuyta ruwasaq.+ Akawanmi uyaykichikpi laqasqaykichik, hatun punchawpi* nakasqaykichik animalpa akanwanmi laqasqaykichik. Qamkunapas ispaypa kasqanmanmi apasqa kankichik*. 4 Hinaptinmi qamkunaqa yachankichik kay kamachikuy Leviywan contrato* ruwasqay+ hinalla kananpaq kamachikuy kasqanta”, angelkunata kamachiq Jehova Diosmi chaynata nin.

5 “Paywan contrato ruwasqayqa karqa sumaq kawsakunapaqmi, hawka kawsakunapaqmi. Chaynapim yanaparqani manchakuwananpaq, payqa manchakuwarqam. Arí, ancha-anchatam sutiyta manchakurqa. 6 Chiqap kaq kamachikuyllam paypa siminmantaqa lluqsirqa,+ manam mana allin kaqkunaqa paypa siminmantaqa lluqsirqachu. Payqa ñuqawan kuskam hawka kayta maskarqa,+ allin ñanpim purirqa, achkaqtam allin ñanman kutichirqa. 7 Sacerdotepa siminqa yachaytam waqaychanan. Paypa siminpim llaqta runakunaqa kamachikuyta maskananku.+ Payqa angelkunata kamachiq Jehova Diospa willakuqninmi.

8 Ichaqa allin ñanmantam karunchakururqankichik. Qamkunam huchayuq kankichik kamachikuyman hina* achkaq mana ruwanankupaq.+ Leviywan contrato ruwasqaykutam yanqacharurqankichik,+ angelkunata kamachiq Jehova Diosmi chaynata nin. 9 Mana allin qawasqa kanaykichikpaqmi tukuyta ruwasaq, llapallan runakunapa qayllanpim pinqayman churasqaykichik. Qamkunaqa ñanniykunapi purinaykichikmantaqa kamachikuypa nisqankunatam pimanpas sayapakuspa ruwarqankichik”.+

10 “¿Manachu huk taytallamanta kanchik?+ ¿Manachu huk Dioslla unanchawarqanchik? Chayna kachkaptinqa, ¿imaynanpitaq mana allinta ruwanakunchik+ ñawpaq abuelonchikkunapa contrato ruwasqanta yanqachaspa? 11 Juda runakunaqa manam allintachu ruwanku, Israelpiwan Jerusalenpipas millakuypaq kaqtam ruwarunku. Judaqa Jehova Diospa chuya kaynintam* yanqacharun,+ chayqa Diospa ancha kuyasqan kaqmi. Taytacha yupaychaq warmikunawanmi casarakurun.+ 12 Chayna ruwaqtaqa Jehova Diosmi Jacobpa carpan ukumanta chinkachinqa. Piña-mayña kaptinpas chinkachinqam, angelkunata kamachiq Jehova Diosman imapas qunan ofrendata quchkaptinpas chinkachinqam”.+

13 “Chaymantapas qamkunaqa tukuytam ruwankichik. Chayraykum Jehova Diospa altarnintapas wiqikichikwan nuyuchispa qaparisparaq waqankichik. Chaymi payqa manaña qawarinñachu imapas qusqaykichiktaqa, manañam kusikunñachu imapas qusqaykichikwanqa.+ 14 Chaywanpas qamkunaqa ninkichikraqmi: ‘¿Imaraykutaq kayna kachkan?’, nispa. Jehova Diosmi testigo qanmantawan musu kachkaspallaraq casarasqayki warmikimanta, ichaqa hukwan tupakuruspam payta saqirurqanki. Hukwanmi tupakururqanki vida pasaqmasiki kachkaptinpas, hukwanmi tupakururqanki warmiki kananpaq contratota ruwachkaspaykipas.+ 15 Ichaqa karqaraqmi chayta mana ruwaq, manaqa ruwarqachu Diospa atiynin wakillanpas paypi kasqanraykum. ¿Imatataq payqa maskachkarqa? Diosmanta kaq miraytam, chaynaqa imayna kasqaykichiktayá qawarikuychik. Amayá hukwan tupakuruspaqa musullaraq kachkaspa casarasqaykichik warmikichiktaqa saqiruychikchu. 16 Ñuqaqa chiqninim rakinakuytaqa*+ nispam Jehova Dios nin, Israelpa Diosninmi chaynata nin. Mana allin ruwaq runatapas chiqninim, ninmi angelkunata kamachiq Jehova Dios. Imayna kasqaykichiktayá qawarikuychik, warmikichiktapas amayá saqiychikchu huk warmiraykuqa.+

17 Qamkunaqa tukuy ima nisqaykichikwanmi Jehova Diosta piñarachinkichik,+ chaywanpas ninkichikraqmi: ‘¿Imatañataq nirunchik amiruwananchikpaqqa?’, nisparaq. Piñarachinkichikqa ‘mana allin ruwaqkunataqa llapallankutam Jehova Diosqa allinpaq hapin, llakipayanmi’+ nispaykichikmi, ‘¿maytaq chay allin Diosqa?’ nispaykichikmi”.

3 “¡Uyariychik! Willakuqniytam kachamusaq, paymi ñawpaqniyta rispa ñanta kichanqa.+ Hinaptinmi maskasqaykichik taytaqa qunqayllamanta wasinman* hamunqa.+ Kusikuyllawanña suyasqaykichikmi hamunqa, contrato* ruwasqaykichikmanta willakuqmi hamunqa. ¡Uyariychikyá! Hamunqapunim”, angelkunata kamachiq Jehova Diosmi chaynata nin.

2 “Ichaqa, ¿pitaq hamusqan punchaw allinta takyanman? ¿Pitaq rikuriykamuptin allinta sayanman? Payqa kanqa chulluchiq nina hinam, pacha taqsakuqkunapa jabonnin hinam.+ 3 Payqa qullqita chulluchiq hinam tiyaykunqa, qullqita chuyanchaq hinam tiyaykunqa,+ Leviypa churinkunatam chuyanchanqa. Qurita hinam chuyanchanqa, qullqita hinam chuyanchanqa, hinaptinmi paykunaqa kanqaku allin ruwayman hina tukuy ima ofrendata Jehova Diosman quqkuna. 4 Judapawan Jerusalenpa ima ofrendapas qusqanqa Jehova Diostam kusichinqa, ñawpaq tiempokunapi hinam kusichinqa, ñawpaq watakunapi hinam kusichinqa.+

5 Imam ruwasqaykichikta qawachinaypaqmi asuykamusqaykichik, layqa ruwaqkunapa imam ruwasqantam qawachisaqpuni,+ hukwan kakuqkunapa imam ruwasqantam qawachisaqpuni, yanqa rimaqkunapa imam rimasqantam qawachisaqpuni,+ yanqa llamkachikuqkunapa imam ruwasqantam qawachisaqpuni,+ viudatapas, mana taytayuqtapas imam ruwasqankutam qawachisaq,+ huklaw llaqtayuqta mana yanapayta munaqkunapa imam ruwasqankutam qawachisaqpuni.+ Kay runakunaqa manam manchakuwanchu”, nispam angelkunata kamachiq Jehova Dios nin.

6 “Ñuqaqa Jehova Diosmi kani, ñuqaqa hina kaqllam kani.+ Qamkunaqa kankichik Jacobpa churinkunam, qamkunaqa manaraqmi chinkankichikraqchu. 7 Ñawpaq abueloykichikkunapa punchawninmantaraqmi qamkunaqa kamachikuyniykunamanta rakikururqankichik, manam qatirqankichikchu.+ Kutirikamuwaychik ñuqapas qamkunaman kutirikamunaypaq”,+ nispam angelkunata kamachiq Jehova Dios nin.

Qamkunam ichaqa ninkichik: “¿Imaynamá ñuqanchikqa kutirikusunqa?”, nispa.

8 “¿Yaqachu runaqa Diosmanta suwakunman? Arí, qamkunaqa suwakuwachkankichikmi”.

Qamkunam ichaqa ninkichik: “¿Haykapitaq ñuqayku suwakurqaykiku?”, nispa.

“Suwakuwachkankichikmi diezmota* mana quspaykichik hinaspa imam qunaykichikta mana quspaykichik. 9 Qamkunaqa suwakuwasqaykichikraykum ñakasqa kachkankichik*. Arí chaynam, llaqtapi llapallan runakunam chayta ruwachkanku. 10 Kawsaykuna churanamanyá diezmota imam kaqta apamuychik,+ wasiypi mikuy kananpaqyá apamuychik.+ Ama hina kaspaykichikyá riqsiykuwaychik imayna kasqayta, ñuqaqa hanaq pachapa punkunkunata kichaykuspaymi bendicionniyta qumusqaykichik,+ hinaptinmi imaykichikpas mana pisipusunkichikchu”,+ nispam angelkunata kamachiq Jehova Dios nin.

11 “Qamkunaraykum tukuy ima tukuqta* qaqchasaq, hinaptinmi tarpukusqaykichik kawsaytaqa manaña imananqachu, uvasnikichikpas manañam mana ruruyuqqa kanqachu”,+ nispam angelkunata kamachiq Jehova Dios nin.

12 “Llapallan nacionkunam ‘kusisqa’ nisunkichik,+ qamkunaqa kusisqallañam chay allpapi kankichik”, nispam angelkunata kamachiq Jehova Dios nin.

13 “Qamkunaqa tukuy imatam ñuqamanta nirqankichik”, nispam Jehova Dios nin.

Hinaspapas niwankichikraqmi: “¿Haykapitaq qanmanta mana allinta rimarqaniku?”, nispa.+

14 “Qamkunaqa nichkankichikmi: ‘Diosta yupaychayqa yanqam.+ ¿Imapaqtaq allin karqa paypaq imatapas ruway? ¿Imapaqtaq allin karqa angelkunata kamachiq Jehova Diospa ñawpaqninpi llakisqa puriy?’, nispa. 15 Nichkankichiktaqmi: ‘Hatuntukuqkunaqa kusisqam kawsakunku, mana allin ruwaqkunapas allinmi kawsakuchkanku,+ Diosta llullankuta piñachispankupas hawkam kawsakunku’”, nispa.

16 Chay punchawkunapiqa Jehova Diosta manchakuqkunam kikinkupura rimanakurqaku, sapakamam puriqmasinkuwan rimanakurqaku, hinaptinmi Jehova Diospas sumaqta uyarirqa. Chaymantam Jehova Diospa ñawpaqninpi huk libro qillqasqa karqa,+ chaynapi manchakuqnin hinaspa sutinpi yuyaymanaq runakuna yuyasqa kanankupaq.+

17 Angelkunata kamachiq Jehova Diosmi nin: “Paykunaqa ñuqapam kanqa,+ akllasqay punchawmantapunim paykunaqa ñuqapaq kanqa.+ Imaynam runapas yanapaqnin churinta kuyapayan chaynam ñuqapas kuyapayasaq.+ 18 Qamkunaqa kaqmantam qawankichik pim allin ruwaq kasqanta, pim mana allin ruwaq kasqanta,+ pim Diosta yupaychaq kasqanta hinaspa pim Diosta mana yupaychaq kasqanta”, nispa.

4 Angelkunata kamachiq Jehova Diosmi nin: “¡Uyariychik! Hamuchkanmi punchaw, chay punchawqa kanqa rupachkaq horno hinam,+ chay punchawqa hatuntukuqkuna hinaspa mana allin ruwaqkunam chakisqa qura hina kanqaku. Chay punchawmi paykunaqa chinkanqa, manam chulla sapillatapas saqinqachu, manam chulla kallmallatapas saqinqachu. 2 Allin kaqta ruwananpaq intim ichaqa alli-allinta kanchasunkichik. Sutiyta manchakuqkuna, qamkunatam kanchasunkichik, kanchayninmi allinyachisunkichik. Hinaptinmi qamkunaqa puqusqa uña vaca hina pawaykachankichik”, nispa.

3 Angelkunata kamachiq Jehova Diosmi nin: “Qamkunaqa mana allin ruwaqkunatam sarupankichik, chay punchawmi chakikichikpa pampanpi ñutu allpata hina ruwasaq”, nispa.

4 “Yupaychaqniy Moisesman qusqay kamachikuytayá yuyariychik, llapallan Israel runakuna kasukunankupaq Horebpi qusqay llapallan nisqaykunatawan llapallan tantiasqaykunatayá yuyariychik.+

5 ¡Uyariychik! Jehova Diospa suma-sumaq punchawnin, hatu-hatun punchawnin manaraq hamuchkaptinmi+ willakuqniy* Eliasta kachamusqaykichik.+ 6 Taytankupa sunqunpas churinkupa sunqun hinañam kanqa,+ churinkupa sunqunpas taytankupa sunqun hinañam kanqa. Chaynapi hamuruspay kay allpa pachata mana chinkarachinaypaq”.

(Kaypim tukun hebreo rimaypiwan arameo rimaypi qillqasqankuqa, kaymanta qipamanqa griego rimaypi qillqasqankuñam rikurin).