EFESIOS

1 Diospa munayninman hina Jesucristopa* apostolnin* ñuqa Pablom Efeso+ llaqtapi Diospa runankunaman qillqamuykichik, qamkunaqa kankichik Jesucristota tukuy sunquykichikwan qatikuqkunam:

2 Qamkunapaqyá kachun Dios taytanchikpa hinaspa señorninchik Jesucristopa ancha kuyakuynin* chaynataq hawkayaynin.

3 Señorninchik Jesucristopa taytan Diosyá hatunchasqa kachun, paymi Cristowan* huklla kasqanchikrayku atiyninwan* hanaq pachapi allin kaqkunata quykuwanchik,+ 4 Diosmi runakuna manaraq mirachkaptin* Jesucristowan huklla kananchikpaq akllawarqanchik, chaynapi paypa qayllanpi kuyakuq kaspa paypaq sapaqchasqa runaña hinaspa mana huchayuqña kananchikpaq.+ 5 Diosmi churinkunaña+ kananchikpaq Jesucristorayku ñawpaqmantaraq akllawarqanchik,+ chaytaqa ruwarqa paypaq allin kasqanman hinam chaynataq munasqanman hinam.+ 6 Diosqa akllawarqanchik kuyasqa kanapaq hina mana kachkaptinchikpas anchata kuyawasqanchikrayku+ payta hatunchanapaqmi. Arí, chayna kuyawasqanchiktaqa yachanchik ancha kuyasqan churinwanmi.+ 7 Runakunapa rantinpi churinpa pagasqanwanmi librasqa kanchik.+ Arí, kuyasqa kananchikpaq hina mana kachkaptinchikpas Diosqa anchata kuyawasqanchikraykum churinpa yawarninwan huchanchikta pampachaykuwarqanchik.+

8 Chaynatam Diosqa anchata kuyawaspanchik* tukuy yachayta hinaspa allin tantiaq kayta quwarqanchik. 9 Chaymantapas payqa munayninmanta pakasqa kaqkunatam riqsichiwarqanchik.+ Diosqa paypaq allin kasqanman hinam tantiarqa 10 imapas imayna ruwasqa kananta*, chaynaqa kanqa tantiasqan tiempo tukuruptinmi. Chayna kananpaqqa tantiarqa hanaq pachapi kaqkunapas chaynataq kay pachapi kaqkunapas llapallan huñusqa kaptin Cristowan huklla kananpaqmi.+ Arí, Cristowanmi tukuy ima huñusqa kanqa. 11 Jesucristowanmi ñuqayku judiokunaqa huklla kachkaniku, hinaspapas herencia chaskinaykupaqmi akllasqa kachkaniku,+ ñuqaykutaqa Diosmi ñawpaqmantaraq tantiasqanman hina akllawarqaku, payqa munayninman hina tantiaspanmi imatapas ruwan. 12 Chaynapi ñuqaykuwan Dios hatunchasqa hinaspa alabasqa kananpaq, ñuqaykuqa Cristopi punta iñiqkunam kaniku. 13 Mana judio kaqkunapas salvakunaykichikpaqmi chiqap sumaq willakuyta uyarisqaykichik qipata paypi iñirqankichik, iñiruspaykichikmi qusunaykichik Diospa atiyninwan* Jesucristorayku sellowan+ sellasqa karqankichik. 14 Diospa atiyninta* chaskisqanchikraykum mana iskayrayanchikchu herencia chaskinanchikmantaqa,+ Diosmi chaynata ruwarqa runankunata librananpaq preciota pagaspan,+ chaynapi ancha-ancha alabasqa kananpaq.+

15 Chaymi ñuqapas señor Jesuspi iñisqaykichikmanta hinaspa Diospa llapallan runankuna kuyasqaykichikmanta uyariruspay 16 qamkunamanta tukuy tiempo agradecekuni. Ñuqaqa qamkunapaqmi Diosta mañakuni 17 chaynapi riqsichisqan chiqap yachachikuyninta Dios qusunaykichikpaq, payqa kanchariq taytam hinaspa señorninchik Jesucristopa Diosninmi.+ 18 Paymi sunquykichikta kanchaykun qusunaykichikpaq suyasqaykichik ima kasqanta yachanaykichikpaq hinaspa runankunaman suma-sumaq herencia qunanmanta yachanaykichikpaq.+ 19 Chaymantapas sunquykichiktam Diosqa kanchaykun paypi iñiqkunaman hatun atiyninta qawachiwasqanchikta yachanaykichikpaq.+ Chayqa qawakun atiyninwan tukuy ima ruwasqanpim, 20 chay atiywanmi wañusqakunapa kasqanmanta Cristota kawsarichirqa, hinaspam hanaq pachapi alliq* lawninpi tiyaykachirqa,+ 21 paytam churarun kunan tiempopipas* hamuq tiempopipas llapa gobiernaqkunamanta, kamachikuqkunamanta, atiyniyuqkunamanta, munaychakuqkunamanta hinaspa imaymana sutiyuqkunamanta+ aswan atiyniyuq kananpaq. 22 Jesucristopa sarupakunanpim llapa imata churarun.+ Hina paytataqmi churaykun iñiqkunamanta tukuy imapi nanachikuq kananpaqpas.+ 23 Iñiqkunaqa Jesucristopa cuerponmi,+ paywanmi iñiqkunaqa huntaña kachkan, paytaqmi tukuy imapi llapa imata huntachin.

2 Chaymantapas mana kasukusqaykichikrayku hinaspa huchaykichikraykum qamkunaqa wañusqa hina karqankichik,+ chayna kachkaptikichikmi Diosqa kawsarichisurqankichik. 2 Qamkunaqa ñawpaq tiempopim Diospi mana iñiq runakunapa imayna kawsasqanman hina kawsarqankichik*,+ kawsarqankichikqa runakunapa imayna piensasqankuta+ munaychakuqpa munasqanman hinam. Chayna piensasqankuqa mana kasukuq runakunapim kachkan, hinaspapas wayra hinam tukuy hinastinpi kachkan.+ 3 Ñawpaqtaqa ñuqanchikpas llapallanchikmi kawsarqanchik paykuna hina,+ aychanchikpa munasqanta ruwaspa chaynataq piensasqanchikman hina kawsaspa.+ Ñuqanchikqa nacesqanchikmantapacham wakin runakuna hina Diospa piñakuyninta chaskinanchik karqa.+ 4 Ichaqa ancha llakipayakuq Diosmi+ anchata kuyawaspanchik+ 5 kawsariykachiwanchik, hinaspam Cristowan* hukllawaykuwanchik, chaytam ruwarqa mana kasukusqanchikrayku wañusqa hinaña kachkaptinchikpas.+ Qamkunataqa kuyasqa kanaykichikpaq hina mana kachkaptikichikpas Diosmi anchata kuyasusqaykichikrayku salvasurqankichik. 6 Diosqa kawsarichiwaspanchikmi hanaq pachapi tiyaykachiwanchik hinaspam Jesucristowan hukllawaykuwanchik,+ 7 chaynapi hamuq tiempokunapi* ñuqanchikpaq allin kaqkunata ruwaspan ancha kuyawasqanchikta* qawachiwananchikpaq, ñuqanchikqa kanchik Jesucristopa qatiqninkunam.

8 Kuyasqa kanaykichikpaq hina mana kachkaptikichikpas Diospa ancha kuyakuyninraykum qamkunaqa paypi iñispaykichik salvasqa karqankichik,+ chayqa manam qamkunamantachu, salvasqa kasqaykichikqa Diospa mana imallapaq qususqaykichikmi. 9 Arí, salvasqaqa kankichik manam imapas ruwasqaykichikraykuchu,+ chaynapi pipas mana alabakunanpaq. 10 Ñuqanchikqa Diospa ruwasqanmi kanchik, hinaspapas Jesucristowan huklla kasqanchikraykum+ allin kaqkunata ruwanapaq unanchawarqanchik.+ Chay allin ruwaykunata ruwananchikpaqqa Diosmi ñawpaqmantaraq tantiarqa.

11 Chaynaqa, nacesqaykichikmantapacha huklaw nacionniyuqkuna, amayá kayta qunqaychikchu: Ñawpaq tiempopim “qari kayninpi señalachikuq” runakuna qamkunata sutichasurqankichik “qari kayninpi mana señalasqa runakuna” nispa. Paykunaqa karqa runapa señalasqanmi. 12 Chay tiempopiqa manam Cristotaqa riqsirqankichikchu, Israel nacionmantapas karunchasqam karqankichik, runankunawan Diospa contrato* ruwasqanpas manam qamkunapaqchu karqa.+ Qamkunaqa imatapas mana suyaspaykichikmi kawsakurqankichik, hinaspapas wakin runakuna hina kaspaykichikmi Diostapas mana riqsirqankichikchu.+ 13 Qamkunaqa ñawpaqtam Diosta mana riqsirqankichikchu, kunanmi ichaqa Jesucristopa yawarninrayku riqsinkichikña, qamkunaqa Cristowan huklla kaqkunam kankichik. 14 Jesucristom hawkayayta quwanchik,+ payqa judiokunatawan mana judio kaqkunatam hukllawarun,+ chaymantapas iskayninta rakiq pirqatam tuñirachin.+ 15 Jesucristoqa cuerponta entregaspanmi Moisespa chaskisqan kamachikuykunata mana valeqpaqña rikurirachin, chaynapi judiokunawan mana judio kaqkuna llapanku hukllaña musuq runa hina kanankupaq,+ chay kamachikuykunam paykunata chiqninachirqa. Arí, Jesucristom paykunata allinyanarachin paywan hukllaña kasqankurayku. 16 Chaymantapas chay kamachikuykunataqa chinkarachirqa judiokunatawan mana judio kaqkunata Dioswan allinyanachinanpaqmi, chaynapi hukllaña kanankupaq, chaytaqa ruwarqa ñakarichikuq qirupi* wañukusqanwanmi,+ wañukusqanwantaqmi chiqninakuytapas chinkarachirqa.+ 17 Paymi hamuspan hawkayay qukuq sumaq willakuyta karupi kaqkunaman willasurqankichik, willarqataqmi hichpallapi kaqkunamanpas. 18 Jesus wañukusqanraykum judiokunapas chaynataq mana judio kaqkunapas hanaq pacha taytanchikman mana imapa harkasqan asuykunchik, chaytaqa ruwanchik Diospa atiyninta llapallanchik chaskisqanchikraykum.

19 Hinaptinqa manañam mana riqsisqa runakunañachu nitaq huklaw nacionniyuqñachu kankichik,+ aswanqa Diospa runankunapa llaqtamasinñam+ hinaspa Diospa ayllunñam.+ 20 Qamkunaqa pirqasqa wasi hinam kankichik apostolkunapi hinaspa Diosmanta willakuqkunapi* cimientasqa,+ Jesucristoñataqmi chay cimientopa esquinanpi hapiq rumi.+ 21 Paywan hukllawasqa kaspam enteron wasi qispichkan, tukuy imankunapas sumaq tupanachisqa,+ chaynapi Jehova* Diospaq sapaqchasqa wasi kananpaq.+ 22 Jesucristowan huklla kasqaykichikraykum Diosqa qamkunatapas hinaspa paykunatapas paypa yachasqan* wasita ruwarusunkichik, chay wasipi Diospa atiynin kasqanrayku.+

3 Ñuqa Pablom Jesucristorayku preso kachkani+ qamkunapa allinnikichikpaq, qamkunaqa kankichik huklaw nacionniyuqkunam. 2 Ñuqaqa kamachisqa kachkani qamkunata yanapanaypaqmi,+ chaynapi Diospa ancha kuyakuyninta* chaskinaykichikpaq. 3 Arí, pakasqa kaqtam Dios riqsichiwarqa, kaykunamantaqa wakintam qallariypi qillqamurqaykichikña. 4 Chaynaqa kaykunata leespaykichikpas cuentatam qukunkichik Cristomanta* pakasqa kaqta+ entiendesqayta. 5 Chay pakasqa kaqqa manam riqsichisqachu karqa ñawpa tiempopi runakunamanqa, kunanmi ichaqa atiyninwan* Dios riqsiykachin sapaqchakusqan apostolninkunaman hinaspa paymanta willakuqninkunaman*.+ 6 Chay pakasqa kaqqa kaymi: Jesucristopa qatiqnin kasqankurayku hinaspa sumaq willakuyraykum huklaw nacionniyuqkunapas Jesucristopa herencia chaskiqmasin kanku, Jesucristopa cuerponpa partellanmi kanku,+ hinaspapas Diospa prometewasqanchik kaqkunatapas ñuqanchik hinam chaskinqaku. 7 Chay pakasqa kaqta yachanaykichikpaq yanapaqnikichikmi rikuriruni kuyasqa kanaypaq hina mana kachkaptiypas Dios anchata kuyawasqanrayku, chaytaqa atiyninwanmi Diosninchik qawaykachiwan.+

8 Ñuqaqa kani Diospa runankunamanta menospaq hapikuqmantapas aswan menosmi,+ ñuqamanmi Diosqa ancha kuyakuyninta*+ qawachiwarqa chaynapi Cristopa hatu-hatun valorniyuq kaqninkunamanta sumaq willakuyta huklaw nacionniyuqkunaman willakunaypaq, 9 hinaspa tukuy ima unanchaq Diospa chay pakasqan kaqta+ imayna riqsichisqanta llapallan runakunaman willanaypaq, chaytaqa Diosmi runakunamanta unay tiempo pakarqa. 10 Chaynaqa karqa Diospa tukuy imaymana yachaynin+ hanaq pachapi kamachiqkunaman hinaspa autoridadkunaman iñiqkunawan+ kunan tiempopi riqsichisqa kananpaqmi. 11 Chayqa karqa Diospa wiñaypaq munayninman hinam, chay munayninqa Cristowanmi tupan,+ payqa señorninchik Jesusmi. 12 Payraykum mana manchakuspa rimachwan, hinaspapas paypi iñispanchikmi mana manchakuspa Diosman asuykuchwan.+ 13 Chayraykum ruegakuykichik qamkunarayku ñakarisqaywan ama hukmanyanaykichikpaq, ñakarisqaykunaraykum qamkuna hatunchasqa kankichik.+

14 Tukuy kaykunaraykum hanaq pacha taytanchikpa ñawpaqninpi qunqurakuni. 15 Payraykum hanaq pachapipas kay pachapipas lliw ayllukuna kachkan. 16 Diosqa hatu-hatun kanchariyniyuqmi, paytam mañakuchkani atiyninwan sunquykichikta+ hinaspa yuyaynikichikta kallpanchananpaq. 17 Mañakuchkanitaqmi Cristopi iñisqaykichikrayku kuyanakusqaykichikwan sunquykichikpi Cristo kananpaqpas.+ Mañakunitaqmi qamkunaqa allin sapichasqa sacha hina+ chaynataq alli-allin cimientasqa wasi hina kanaykichikpaqpas,+ 18 chaynapi Diospa llapallan runankuna hina qamkunapas Diosmanta chiqap kaqpa anchonta, largonta, mayna hatun kasqanta hinaspa mayna uku kasqanta sumaqta entiendenaykichikpaq 19 hinaspa Cristopa+ kuyakuynintapas yachanaykichikpaq, chaynapi Diospa qusqan kaqkunata chaskinaykichikpaq, Cristopa kuyakuyninqa tukuy yachaymantapas aswan allinmi.

20 Diosqa atiyninwanmi ñuqanchikpi+ tukuy imata ruwan mañakusqanchikmantapas hinaspa piensasqanchikmantapas aswan mastaraq.+ 21 Iñiqkunawan hinaspa Jesucristowan tukuy ima ruwasqanraykuyá Diosqa hatunchasqa kachun wiña-wiñaypaq. Chaynayá kachun*.

4 Señorninchikrayku preso+ kaq ñuqa Pablom qamkunata ruegakamuykichik akllasqa kasqaykichikman hina allinta kawsakunaykichikpaq.+ 2 Kawsakuychikqa mana hatuntukuspa,+ llampu sunqu kaspa, pacienciakuspa,+ kuyakuywan aguantanakuspa,+ 3 hawkalla kaspa hinaspa Diospa atiyninpa yanapakuyninwan huk sunqulla kanaykichikpaq anchata kallpanchakuspa.+ 4 Chaymantapas, imaynam Diospa quwananchik premiopas chullalla,+ chaynam cuerpopas chullalla,+ chullallam Diospa atiyninpas*,+ 5 chullallam señorpas,+ chullallam chiqap yachachikuypas, bautismopas, 6 chullallataqmi llapallanchikpa taytanchik Diospas, payqa llapallantam kamachin, llapallanwanmi imatapas ruwan, llapallanpitaqmi atiyninpas kachkan.

7 Diosqa sapakamamanmi ancha kuyakuyninta* qawachiwanchik, chaytam mana imallapaq Cristowan* quwarqanchik.+ 8 Chaymi Diospa qillqan nin: “Payqa altomanmi qispirqa. Presokunatam pusakurqa. Runakunatapas regalota hinam quykuwanchik”, nispa.+ 9 Hinaptinqa, ¿imatataq nichkan ‘hanaq pachamanmi qispirqa’ nispanqa? Kaypiqa nichkan puntata kay pachaman uraykamusqanmantam. 10 Kikin uraykamuqmi cielokunapa hawankamaraq qispirqa,+ chaynapi tukuy imata cumplichinanpaq.

11 Chay churasqan runakunamanta wakinmi karqa apostolkuna,+ wakinñataqmi Diospa nisqankunamanta willakuqkuna*,+ wakinñataqmi sumaq willakuymanta willakuqkuna,+ hukkunañataqmi iñiqkunata michiqkuna hinaspa yachachiqkuna.+ 12 Paykunatam churarqa Diospa runankunata allin ñanpi purichinankupaq, iñiqkunata servinankupaq hinaspa Cristopi iñiqkunata kallpanchanankupaq*.+ 13 Chaynaqa kanqa yachasqanchikkunapi llapallanchik huklla kananchikkamam hinaspa Diospa churinmanta allintapuni yachananchikkamam, chaynapi allin yuyayniyuq runaña kananchikpaq.+ Arí, imayna kasqanchikpi Cristo hina cabal runa kananchikpaq. 14 Chaynaqa, amañayá wawakuna hinañachu kasunchik llulla yachachiq runakunapa yachachisqanta uyarispaqa, chaynapi lamar quchapi olakuna hinaspa wayrapa apakachasqan botekuna hina mana kananchikpaq,+ chay llulla runakunaqa sumaqllataña rimaspankum hukkunata pantachinku. 15 Aswanqa imam kaqta rimaspayá kuyakuq kaspa tukuy imapi wiñasunchik, chaynapi umanchik Cristoman rikchakunapaq.+ 16 Ñuqanchikqa runapa cuerpon+ hinam kanchik. Cuerpopa sapa partenkunaqa sumaq hukllawasqam kachkan, cuerpopa partenkunaqa yanapanakunkum ankukuna allinta takyachiptin, hinaspapas cuerpopa sapa partenkunaqa imam ruwanantam ruwan. Chaynam ñuqanchikpas Jesucristorayku huk cuerpo hinalla kanchik, chaymi sapakama yanapanakuspaqa kuyanakusqanchikrayku aswan allin kasun*.+

17 Chaynaqa kaytam nikichik, kay nisqaymantataqmi señorninchikpa sutinpipas willakuni: Amayá qamkunaqa huklaw nacionniyuqkuna hinaqa kawsaychikchu,+ paykunaqa kawsanku mana yuyayniyuqkuna hinam.+ 18 Paykunaqa yuyayninkupim tutayaypi hina kachkanku, karupitaqmi kachkanku Diospa qunan kawsakuymantapas, chaynaqa kachkanku Diosmanta mana yachayta munasqankuraykum. Arí, chaynam kachkanku sunqunku rumiyarusqanrayku. 19 Paykunaqa qara uya rikuriruspankum mana pinqakuspa mana allin ruwayllamanña*+ qukurunku, chaynapi imaymana millakuypaq kaqkunata aswan-aswanraq ruwanankupaq.

20 Qamkunam ichaqa mana chaynatachu Cristomanta yacharqankichik. 21 Sichu Jesucristota uyarirqankichik hinaspa paypa yachachisqan karqankichik hinaspaqa allintam chaymanta yachachkankichik chiqap kaqta Jesus yachachisqanrayku. 22 Qamkunaqa ñawpa vidaykichikta saqinaykichikpaqmi yachachisqa karqankichik,+ ñawpaqpi imayna kawsasqaykichikqa llumpay mana allinmi karqa, ñawpa vidaykichikqa engañasuqnikichik mana allin munaykunamanmi aysasurqankichik.+ 23 Hinallayá imayna piensasqaykichikta musuqyachiychik,+ 24 chaymantapas musuq pachawan pachakuchkaq hinayá musuq runaña kaychik,+ chayna kawsakuyqa kachkan Diospa munasqanman hina allin ruwaypi hinaspa Diosman sunqu kaypi takyachisqam.

25 Qamkunaqa ñam llullakuyta saqirunkichikña, chaynaqa sapakamayá amaña llullakuspa imam kaqta runamasikichikwan rimaychik,+ ñuqanchikqa llapallanchikmi kanchik huk cuerpopa partellan.+ 26 Piñasqa kaspaykichikpas amataqyá huchallikuychikchu,+ amayá inti siqaykunankamaqa piñasqaqa kaychikchu.+ 27 Amayá imatapas diablo urmaykachisunaykichikpaq hinaqa ruwaychikchu.+ 28 Pipas suwakuqqa amañayá suwakuchunchu, aswanqa anchata llamkachun imapas allin llamkaypi,+ chaynapi mana imayuqkunaman imallantapas haywaykunanpaq.+ 29 Amayá simikichikmantaqa mana allin* rimaykunaqa lluqsichunchu,+ aswanqa necesitakusqanman hinayá kallpanchanapaq allin rimaykunallata rimaychik, chaynapi uyariqnikichikkunapa allinninpaq kananpaq.+ 30 Chaymantapas, amayá Diostaqa llakichiychikchu atiyninpa* contranpi churakuspaqa*,+ chay atiyninwanmi sellowan sellasqa+ hina karqankichik chaynapi librakunaykichik punchaw chayamuptin librasqa kanaykichikpaq.+

31 Qamkunaqa amañayá kaychikchu sientikuqqa,+ piñakuqqa, rabiakuqqa, qaqchakuqqa, nanay simiqa*+ chaynataq tukuy mana allin kaqkuna ruwaqqa.+ 32 Aswanqa sumaq sunquyá* kaychik, sunqumanta llakipayakuq,+ hinaspayá tukuy sunqumanta pampachanakuychik imaynam Diospas Cristorayku mana amispa pampachasusqaykichikman hina.+

5 Qamkunaqa kankichik Diospa kuyasqan churinkunam, chaynaqa paytayá qatipakuychik.+ 2 Chaymantapas hinallayá kuyakuq kaychik+ imaynam Cristopas* ñuqanchikta kuyawasqanchikman hina*,+ Cristoqa ñuqanchikraykum* vidanta qurqa, chayqa karqa Diospaq qusqankuta kañachkay hina miskillaña asnariqmi.+

3 Qamkunaqa Diospa runankunam kankichik, chaynaqa amayá rimayllapas-rimaychikchu huchapakuymantaqa*,+ tukuy rikchaq millakuypaq kaqkunamantaqa nitaq imatapas llumpay munapayaymantaqa.+ 4 Amataqyá imayna kawsasqaykichikqa pinqakuypaqqa* kachunchu, amataqyá rimaychikchu yanqakunamantaqa nitaq tupa-tupaykachispapas,+ chay rimaykunaqa manapunim allinchu, aswanqa Diostayá agradecekuychik.+ 5 Qamkunaqa kaytam yachankichik hinaspapas entiendenkichikmi: Diosña kamachiwaptinchikqa* manam kanqachu huchapakuqkunaqa,+ millakuypaq ruwaqkunaqa nitaq imatapas llumpayta munapayaqkunaqa,+ imatapas munapayayqa taytacha-mamacha yupaychay hinam. Diosqa Cristotam kamachiq kananpaq churaykun.+

6 Manam pipas yanqakuna rimasqanwanqa engañasunaykichikchu, chay mana allin ruwaykunaraykum Diospa piñakuynin hamunqa mana kasukuq runakunaman. 7 Chaynaqa, amayá mana allin ruwaqmasinqa kaychikchu. 8 Qamkunaqa ñawpaqtam tutayaypi hina karqankichik, kunanmi ichaqa señorninchikwan hukllaña kasqaykichikrayku+ achkipi+ hinaña kachkankichik, chaynaqa hinallayá achkipi kaqkuna hina kawsaychik*. 9 Chay achkiqa yanapawanchik tukuy imapi allin sunquyuq* kanapaqmi, allinta ruwanapaqmi hinaspa imam kaqta rimanapaqmi.+ 10 Hinallayá yachaychik señorninchikpa munasqanman hina imakuna kasqanmanta.+ 11 Amañayá ruwaychikchu tutayaypi ruwana mana allin kaqkunataqa,+ aswanqa chay ruwaykunata mana allinpaq hapisqaykichikyá sutilla kachun. 12 Paykunapa pakallapi ruwasqankumanta rimariyllapas-rimayqa pinqakuypaqmi. 13 Achkiwanqa imapas sutillam rikukun, chaynapim imapas mana allin kaqkunaqa sutilla yachakun. 14 Chayraykum Diosqa nin: “Yaw puñuq, puñusqaykimanta rikchariy, wañusqakunapa kasqanmanta kawsarimuy+ hinaptinqa Cristom kanchariykusunki”, nispa.+

15 Chaynaqa, amayá ruqru umakuna hinaqa kawsakuychikchu, aswanqa yachayniyuqkuna hinayá kawsakuychik 16 tiempoykichikta ama usuchispa.+ Kay punchawkunaqa mana allinllañam. 17 Chayraykuyá mana entiendeqqa amaña kaychikchu, aswanqa Jehova* Diospa imam munaynin kasqantayá allinta yachaychik.+ 18 Chaymantapas amataqyá vinowanqa sinkakuychikchu,+ chayqa llumpay mana allin ruwaykunamanmi apakun, aswanqa Diospa atiyninwanyá huntasqa kaychik. 19 Chaymantapas llapallaykichikyá kallpanchanakuychik* salmokunata takispa, Diosta hatunchaspa hinaspa Diospaq takikunata takispa.+ Tukuy sunqumantayá Jehova* Diospaq+ takiychik, 20 chaynallataqyá señor Jesucristopa sutinpi+ Dios taytanchikta tukuy imamanta tukuy tiempo agradecekuychik.+

21 Cristota anchata respetasqaykichikraykuyá llapallaykichik kasunakuychik.+ 22 Warmikunaqa qusankutayá+ kasukuchunku imaynam señorninchikta kasukusqankuman hina, 23 qusaqa warminpa umanmi chaynam Cristopas iñiqkunapa uman,+ iñiqkunaqa Cristopa cuerponmi,+ Cristoñataqmi salvaqnin. 24 Imaynam iñiqkunaqa Cristota kasukunku, chaynam warmikunapas qusankuta tukuypi kasukunanku. 25 Imaynam Cristopas iñiqkunata kuyaspan paykunarayku wañukurqa,+ chaynayá qusakunapas warmikichikta kuyaychik.+ 26 Jesucristoqa wañukurqa iñiqkunata yakuwan hina mayllaspa Diospa palabranwan chuyanchananpaqmi,+ 27 chaynapi paypa qayllanpi iñiqkuna sumaqllaña kancharichkaq kanankupaq, paykunaqa kananku manam qanrachasqachu, imapas faltayuqchu nitaq chaykunaman rikchakuqchu,+ aswanmi kananku chuyay-chuyay hinaspa mana huchayuq.+

28 Chaynallataqmi qusakunapas kikinkupa cuerponkuta hina warminkuta kuyananku. Warmin kuyaq qariqa kikintam kuyakun, 29 manam pipas kikinpa cuerpontaqa chiqninchu, aswanqa mikuchinmi hinaspapas kuyanmi, chaynatapunim Cristopas iñiqninkunawan ruwan, 30 ñuqanchikqa Cristopa cuerponpa partenkunam kanchik.+ 31 “Chayraykum qariqa tayta-mamanta saqispan warminmanña hukllawakunqa, chaynapim paykunaqa hukllaña* kanqaku”.+ 32 Chay pakasqa kaqqa+ hatu-hatunmi. Ñuqaqa rimachkani Cristomantawan iñiqkunamantam.+ 33 Chaynaqa, kikikichikta hinayá warmikichikta sapakama kuyaychik,+ warmiñataqyá qusanta anchata respetachun.+

6 Churi-wawakuna, tayta-mamaykichiktayá kasukuychik,+ chayqa allinpunim señorninchikpa munasqanman hina. 2 Allin kanamanta Diospa punta kaq kamachikuyninmi nin: “Tayta-mamaykitayá kuyay hinaspa kasukuy.+ 3 Chaynapi allin kanaykipaq* hinaspa kay pachapi unay kawsanaykipaq”, nispa. 4 Qamkunapas taytakuna, churikichiktaqa amayá piñachiychikchu,+ aswanqa sumaqllatayá uywaychik Jehova* Diospa yachachisqanman hina*+ hinaspa rimapayasusqaykichikman hina.+

5 Sirvientekuna, qamkunapas kay pachapi patronnikichiktayá respetowan hinaspa manchakuywan tukuy sunqumanta kasukuychik,+ imaynam Cristotapas* kasukusqaykichikman hina, 6 chaytaqa ruwaychik amayá qawasqa kaspallaykichikchu, qawasqallaqa kasukunku runakunapa allin qawasqan kayta munaqkunallam,+ aswanqa Cristopa serviqnin hinayá Diospa munayninta ruwaychik tukuy vidaykichikwan*.+ 7 Tukuy sunquwanyá allinta llamkaychik Jehova* Diospaq llamkachkaq hina,+ amayá runapaq hinachu, 8 yachasqaykichikman hinaqa sirviente utaq mana sirviente kaptikichikpas Jehova* Diosmi imapas allin ruwasqaykichikmantaqa kutichipusunkichik.+ 9 Qamkunapas patronkuna, chaynallatayá sirvientekichikkunawan allinta kawsakuychik ama amenazaspa. Yachasqaykichikpi hinapas qamkunapa chaynataq paykunapa patronnikichikqa hanaq pachapim kachkan,+ payqa manam pimanpas sayapakunchu.

10 Chaynaqa, hinallayá señorninchikwan kuyachikuspa ancha hatun kallpanta chaskiychik.+ 11 Chaymantapas, churakuychikyá peleanaykichikpaq+ Diospa tukuy ima qususqaykichikwan, chaynapi diablopa tuqllankunaman mana wichiykunaykichikpaq. 12 Peleachkankichikqa+ manam aychayuq tulluyuq kaqkunawanchu, aswanqa hanaq pachapi kaq mana allin espiritukunapa contranpim,+ paykunaqa tutayaypi hina kaq runakunata kamachiqkunam, gobiernaqkunam chaynataq munaychakuqkunam. 13 Chayraykuyá, peleanaykichikpaq Diospa tukuy ima qususqaykichikwan churakuychik,+ chaynapi mana allin punchawpi allinta takyanaykichikpaq, hinaspa tukuy imapi listo kaspaykichik allinta sayanaykichikpaq.

14 Chaynaqa allintayá sayaychik, chiqap kaqwan wiqawnikichikta allinta watakuspa,+ allinkuna ruwanapaq qasqu harkachikunawan churakuspa,+ 15 hawkayay qukuq sumaq willakuymanta willakuywan usutasqa hina kaspa.+ 16 Llapallanmanta aswanqa hapiychik harkachikuna hatun* escudota,+ chayqa Diospi hapipakuymi, chaywanmi satanaspa* rupachkaq llapallan flechankunata* amachankichik.+ 17 Chaymantapas salvasqa kanaykichikwanyá cascowan+ hina churakuychik, hapiychiktaq atiyninwan Diospa quwasqanchik espadatapas, chayqa Diospa palabranmi.+ 18 Chaymantapas tukuy imaymana mañakuywan hinaspa ruegakuywan Diosta tukuy tiempo mañakuychik+ atiyninpa* yanapakuyninwan.+ Chaypaqyá rikchan-rikchanlla kaychik, Diospa llapallan runankunapaq tukuy tiempo ruegakuspa. 19 Ñuqapaqpas mañakuychiktaqyá imamanta rimanayta yachanaypaq, chaynapi pakasqa sumaq willakuymanta willakuspay mana manchakuspa rimanaypaq,+ 20 mañakuychiktaqyá chay sumaq willakuymanta mana manchakuspa allinta rimanaypaqpas, ñuqaqa kani Diospa rantinpi sumaq willakuymanta willakuq presom.+

21 Chaymantapas, ñuqamanta hinaspa imayna tarikusqaymantam willasunkichik kuyasqa wawqinchik Tiquico,+ payqa señorninchikta tukuy sunqunwan serviqmi.+ 22 Paytaqa kachamuchkani imayna kasqaykumanta willasunaykichikpaqmi hinaspa sunquykichikta tiyaykachinanpaqmi.

23 Wawqi-paninchikkunapaqyá hawkayay kachun, Diospiyá hapipakuchunku hinaspapas kuyakuqyá kachunku. Tukuy chayqa Dios taytamanta hinaspa señor Jesucristomantam hamun. 24 Diospa ancha kuyakuyninyá* kachun señorninchik Jesucristota wiñaypaq llapallan kuyaqkunapaq.