1 TIMOTEO

1 Ñuqa Pablom Jesucristopa* apostolnin* kani, salvaqninchik Diospa chaynataq Jesucristopa kamachisqanman hina. Ñuqanchikqa Jesusraykum chaskinanchik kaqta mana iskayrayaspa suyachkanchik.+ 2 Kuyasqay Timoteo*,+ ñuqam qanman qillqamuyki, qamqa Diospi iñiqmasiymi kanki churiy hina:+

Qampaqyá kachun taytanchik Diospa hinaspa señorninchik Jesucristopa ancha kuyakuynin*, llakipayakuynin hinaspa hawkayaynin.

3 Macedonia lawman rinaypaq kachkaspaymi Efeso llaqtapi qipakunaykipaq nirqayki, chaynallataqmi kunanpas valekuyki wakin runakunata anyanaykipaq, chaynapi pantay yachachikuykunata ama yachachinankupaq. 4 Chaynallataqyá anyay yanqa cuentokunata ama uyarinankupaq+ hinaspa ñawpaq abuelokuna pikuna kasqanmanta ama atipanakunankupaq. Chaykunaqa yanqapaqmi,+ manam Diosmantachu hamun, manataqmi Diospi astawan iñinanchikpaqqa yanapawanchikchu, aswanqa yanqa rimaykunallatam rikurichin. 5 Kay kamachikuykunata kasukuspaqa kuyakuqmi+ kasunchik, chayna kuyakuqqa kasun chuya sunqu kaspam, allin concienciayuq kaspam hinaspa chiqaptapuni Diospi hapipakuspam.+ 6 Wakinkunam chaykunamanta karunchakuruspa yanqa rimaykunata rimachkanku.+ 7 Paykunaqa Diospa kamachikuyninkunamantam yachachiyta munanku,+ yachachisqankutam ichaqa mana entiendenkuchu, manataqmi entiendenkuchu mana iskayrayaspa rimasqankutapas.

8 Yachanchikmi Moisespa chaskisqan kamachikuykunaqa allin kasqanta, ichaqa pipas allin kananpaqqa qillqasqa kasqanman hinam kasukunan. 9 Yachasqanchikpi hinapas Diospa kamachikuyninkunaqa qusqa karqa manam allin ruwaq runakunapaqchu, aswanqa Diospa kamachikuyninkunata qipanchaqkunapaqmi,+ mana kasukuqkunapaqmi, mana allin ruwaqkunapaqmi, huchasapakunapaqmi, mana chiqap kuyakuqkunapaqmi, Diospa kaqta mana respetaqkunapaqmi, tayta-maman wañuchiqkunapaqmi, runa wañuchiqkunapaqmi, 10 huchapakuqkunapaqmi*, qarimasinwan kaqkunapaqmi, runamasinta hapiruspan pakaruq runakunapaqmi, llullakuqkunapaqmi, rimasqanman hina mana ruwaqkunapaqmi* hinaspa allin yachachikuykunapa contranpi kaqkunapaqmi.+ 11 Kay allin yachachikuyqa suma-sumaq willakuykunaman hinam hamun kusisqalla kaq Diosmanta, chaymanta willakunaypaqmi ñuqaqa kamachisqa kachkani.+

12 Agradecekunim atiy quwaqniy señorninchik Jesucristota, payqa allinpaq hapiwaspanmi Diosta servispa llamkanaypaq kamachiwarqa.+ 13 Chaynatam ruwarqa ñawpaqta Diospa contranpi mana allinkunata rimachkaptiypas hinaspa iñiqkunata hatuntukuqllaña kaspay ñakarichichkaptiypas.+ Ichaqa Jesucristom llakipayaykuwarqa manaraq iñisqayrayku hinaspa mana yachaywan chaykunata ruwasqayrayku. 14 Chaywanpas señorninchikmi ancha-anchata kuyawarqa*, chaymi Jesucristopa qatiqnin kasqayrayku yanapawarqa señorninchikpi anchata hapipakunaypaq hinaspa kuyakuq kanaypaq. 15 Jesucristom kay pachaman hamurqa huchasapakunata salvananpaq,+ kay nisqayqa chiqapmi, lliwtam creenanchik. Ñuqam huchasapakunamanta aswan huchallikuqqa kallani.+ 16 Chaywanpas llakipayasqam karqani, chaynapi aswan huchasapa kachkaptiypas Jesucristo tukuy pacienciakuyninta ñuqawan qawachinanpaq, chaynataq haykam wiñay kawsayta suyaspa paypi iñiqkunapa qatipakunan kanaypaq.+

17 Chaynaqa, Diosyá wiña-wiñaypaq respetasqa hinaspa hatunchasqa kachun. Payqa wiña-wiñaypaq kamachiqmi,+ wiña-wiñaypaq kawsaqmi+ hinaspa mana rikuy atina+ chullalla Diosmi.+ Chaynayá kachun*.

18 Churilláy Timoteo, kaytaqa kamachimuyki ñawpaqmantaraq qanmanta willakusqankuman hinam. Qamqa chay willakusqankuman hinayá guerrapi peleachkaq soldado hina hinalla peleay, chay peleasqaykiqa allinpunim.+ 19 Chaytaqa ruwanayki Diospi hinalla hapipakuspam hinaspa allin concienciayuq kaspam,+ wakinqa chayna mana kaspankum yakuman chinkaykuq bote hina Diospiqa manaña hapipakunkuchu. 20 Chaynam Himeneowan+ Alejandropas kachkanku. Chaymi satanaspa+ makinpi saqiykuni*, chaynapi corregisqa kaspanku Diospa contranpi manaña rimanankupaq.

2 Imamantapas puntataqa kaytam nimuykichik, llapallan runakunapaqmi Diosta mañakunaykichik, qayakunaykichik, ruegakunaykichik hinaspa agradecekunaykichik. 2 Chaynallatataqmi ruwana lliw kamachikuqkunapaqpas chaynataq autoridadkunapaqpas,+ chaynapi tukuy sunquwan Diosta servispa chaynataq tukuy imata allinta ruwaspa allinlla hinaspa hawkalla kawsakunanchikpaq.+ 3 Chayqa allinpunim hinaspapas salvaqninchik Diospa munasqanman hinam.+ 4 Diosninchikqa munachkan tukuy rikchaq runakuna salvakunankutam+ hinaspa chiqap kaq yachachikuyta imam kaqta yachanankutam. 5 Hukllam Diosqa,+ hukllataqmi Dioswan runakuna contrato ruwananpaq yanapaqpas,+ chay yanapaqqa Jesucristom.+ 6 Paymi llapallan runakuna huchamanta librasqa kananchikpaq+ necesitakusqan preciota vidanwan pagarqa, kaykunamantaqa tiempollanpim willakuna. 7 Chaypaqmi Dios churawarqa willakuq kanaypaq,+ apostol kanaypaq,+ hinaspa huklaw nacionniyuqkunapa yachachiqnin kanaypaq,+ paykunatam yachachini Diospi iñikuymanta hinaspa chiqap yachachikuymanta. Ñuqaqa mana llullakuspaymi chiqapta rimachkani.

8 Ñuqam munachkani maypipas huñunakusqankupi kaq qarikuna makinkuta huqarispanku Diosta hinalla mañakunankuta, chaytaqa ruwananku Diosman sunqu kaspankum,+ manam piñakuspachu+ nitaq atipanakuspachu.+ 9 Warmikunapas respetanapaq hinayá allinta pachakuchunku, allin yuyaywan hinaspa ama pitapas hukmanta piensachinankupaq hina, ama suma-sumaqta chukchanta simpapakuspachu nitaq qurimanta utaq perlasmanta alaqakunawanchu nitaq achka qullqipa chanin pachakunawanchu,+ 10 aswanqa Diospa munasqanman hina kawsaq warmikuna hinayá allichakuchunku,+ sumaqllaña kasqankuqa qawakunan allin kaqkuna ruwasqankupim.

11 Warmikunaqa yachachikuytayá upallalla* uyarichunku, tukuy imapi kasukuspa.+ 12 Manam munanichu warmikuna huñunakuypi yachachinantaqa nitaq qarita kamachinantapas, aswanqa upallallayá kachunku.+ 13 Puntataqa Adanmi unanchasqa karqa, chaymantañam Evaqa.+ 14 Chaymantapas manam Adanchu engañasqaqa karqa, aswanqa warmim pasaypaq engañasqaqa karqa,+ chaywanmi mana kasukuq rikurirurqa*. 15 Warmitaqa wawayuq kayninmi yanapanqa mana imamanpas wichiykunanpaq,+ ichaqa hinallam kallpanchakunan Diospi ancha iñiq kananpaq, kuyakuq kananpaq, allin yuyayniyuq kananpaq hinaspa chuya kananpaq.+

3 Chiqapmi kayqa: Iñiqkunamanta nanachikuq* kananpaq pipas kallpanchakuqqa+ allin llamkaytam munachkan. 2 Iñiqkunamanta nanachikuqqa* kanan mana pipapas anyananmi, huk warmiyuqllam, imapipas controlakuqmi*, allin yuyaywan imapas ruwaqmi,+ mana hawanpi-ukunpi imapas ruwaqmi, samaykachikuqmi*,+ hukkunatapas allin yachachiqmi*,+ 3 mana sinkakuqmi,+ mana maqakuqmi*, mana hikutakuqmi*,+ mana atipanakuqmi,+ qullqilla mana kuyaqmi+ 4 hinaspa wasinpi kaqkunata allinta uywaqmi*, churinkunapas kananku tukuy imapi kasukuqmi hinaspa allin kawsakuqmi*.+ 5 Wasinpi kaqkunata allin uywayta* mana atispanqa, ¿imaynamá Diospi iñiqkunamantaqa nanachikunman? 6 Iñiqkunamanta nanachikuyta* munaqqa manam chayllaraq iñikuqqa kananchu,+ yanqañataq hatuntukuruspan diablo hina juzgasqa kanman. 7 Chaymantapas mana iñiq runakunapa allin qawasqanmi kanan,+ chaynapi pinqaypi mana kananpaq hinaspa diablopa tuqllanman mana wichiykunanpaq.

8 Iñiqkunapi punta apaqkunapa yanapaqninkunapas* kananku: Kamachisqankuta ruwaq*, mana iskay-kimsa rimaq hinaspa vinota mana llumpay tomaq. Paykunaqa manataqmi mana allinkunata ruwaspa qullqita ganakuyta munaqchu kananku.+ 9 Paykunaqa allin concienciayuq kaspankum Diospa chiqap yachachikuyninkunaman hapipakunanku, chayqa pakasqa kaq yachachikuymi.+

10 Chaymantapas yanapakunankupaq hina allin utaq mana allin kasqantayá puntataqa qawaychik, imamantapas hukkunapa mana tumpasqan kaspanqa iñiqkunata serviqyá kachun.+

11 Chaynallataqmi warmikunapas kananku allin respetana, runamasinta yanqamanta mana tumpaq,+ imapipas controlakuq hinaspa tukuy imapi Diosman sunqu.+

12 Iñiqkunapi punta apaqkunapa yanapaqninkunaqa kananku huk warmiyuqllam hinaspa wasinpi kaqkunatawan churinkunata allintapuni uywaqmi*. 13 Kamachisqankuta allinta ruwaq yanapakuqkunaqa hukkunapa allin qawasqanmi kachkanku, Jesucristopi iñisqankumantapas mana manchakuspam rimachkanku.

14 Kaykunatam qillqamuchkayki, ichaqa chayllam qanman watukaykamuyta munachkani. 15 Sichum unaramuptiyqa imaynam Diospa wasinpi allin kawsayta yachanaykipaqmi qillqamuchkayki,+ chay wasiqa Diospi iñiqkunam, paykunaqa wasipa pilarnin hinam chiqap kaqta takyachinku ima mana allinmantapas harkaspa. 16 Tukuy sunqunwan Diosta servinanmanta pakasqa hina kaq willakuyqa mayna-mayna sumaqmi: ‘Jesusmi ñuqanchik hina runaña karqa,+ espiritu cuerpoyuq rikuriruspanmi allin ruwaqpaq chaskisqa karqa,+ payqa angelkunamanmi rikuriykurqa,+ paymantaqa llapallan nacionkunapim willakurqaku,+ paypim runakuna iñirqaku,+ payqa hatunchasqam hanaq pachapipas chaskisqa karqa’.

4 Diosmanta kaq willakuymi niwanchik tukupay punchawkunapi wakinkuna chiqap yachachikuyta qipanchanankumanta,+ qipanchanqakuqa Diosmantapas kanman hina pantay yachachikuykunata chaynataq demoniokunapa yachachikuyninta uyarispankum. 2 Chaymantapas paykunaqa iskay uya llulla runakunatañam uyarinqaku,+ chay llulla runakunapa conciencianqa qarayasqañam kachkan rupaq fierrowan marcasqa hina mana ima musyaq. 3 Chay llulla runakunaqa harkakunkum pipas casarakunanta,+ kamachinkutaqmi Diospa unanchasqan+ wakin mikuykunatapas mana mikunapaq,+ chay mikuytaqa agradecekuspam mikunmanku Diosmanta imam kaqta yachaq iñikuqkunaqa.+ 4 Diospa tukuy ima unanchasqanqa allinpunim,+ chaymi quwasqanchikmanta Diosta agradecekuspaqa imatapas mana wischupakunachu,+ 5 Diospa palabranwan hinaspa Diosta mañakusqanchikwanmi mikuykunaqa chuyanchasqaña.

6 Kaykunata wawqi-paninchikkunaman yachachispaykiqa Jesucristopa allin serviqninmi kanki. Chayna kaptikiqa yachanqakum Diospi hapipakunapaq palabrakunawan yachachisqa kasqaykita hinaspa kasukusqayki alli-allin yachachikuykunawan allin yachachisqa kasqaykita.+ 7 Amayá uyariychu payakunapa willakusqanku hina yanqa cuentokunataqa,+ chay willakusqankuqa Diospa contranpim kachkan, aswanqa hinallayá anchata kallpanchakuy* tukuy sunquwan Diosta servinaykipaq. 8 Cuerponchikwan ejercicio ruwayqa cuerponchikpaqmi allin, tukuy sunquwan Diosta serviymi ichaqa aswan allinraq tukuy imapi yanapawasqanchikrayku, kayqa yanapawanchikmi kunan kawsakuyninchikpi, yanapawasuntaqmi hamuq tiempopi kawsakuyninchikpipas.+ 9 Kay palabraqa chiqapmi, chaymi manapuni imamantapas iskayrayachwanchu. 10 Chayraykum mana samaykuspa Diospaq llamkachkanchik hinaspa kallpanchakuchkanchik,+ ñuqanchikqa Diospim hapipakuchkanchik, payqa tukuy rikchaq runakunata+ salvaqmi,+ astawanraqmi iñiqkunataqa.

11 Hinallayá kaykunamanta kamachiy hinaspa yachachiy. 12 Amapuniyá musu kasqaykiraykuqa pipas mana kaqpaqta hinaqa hapisunkichu, aswanqa iñiqkunapa qatipakunanyá kay sumaq rimayniyuq, allin kawsakuq, kuyakuq, Diospi ancha iñiq hinaspa chuya sunqu*. 13 Chayamunaykamayá hinalla kallpanchakuy hukkunapa qayllanpi allinta leenaykipaq,+ hukkunata kallpanchanaykipaq* hinaspa yachachinaykipaq. 14 Hinallataqyá allinta kasukuy imam ruwanaykipaq Diospa kamachisusqaykitapas, chay ruwaytaqa chaskirqanki iñiqkunapi punta apaqkuna* makinkuta hawaykiman churaykuptinkum, chayqa karqa ñawpaqmantaraq qanmanta willasqa kasqanman hinam.+ 15 Tukuy chaykunapiyá yuyaymanay, chaykunatayá tukuy sunquykiwan ruway, chaynapi Diosta servisqaykipi ñawparisqaykita llapallan runakuna sutillata qawanankupaq. 16 Tukuy tiempoyá imayna kawsasqaykita qawarikuy, qawarikuytaqyá imam yachachisqaykitapas.+ Amayá kaykuna ruwaytaqa qunqaychu, chaynata ruwaspam kikikipas salvakunki chaynataq uyarisuqnikikunatapas salvanki.+

5 Amayá qaqchaychu mayor kaq qarikunataqa,+ aswanqa respetowanyá rimapayay taytaykita hina, musukunatapas wawqikikunata hina, 2 mayor kaq warmikunatapas mamaykita hina, sipaskunatapas panikikunata hinayá respetowan* rimapayay.

3 Pasaypaq mana piyniyuq* viudakunatayá cuidaspa respetay.+ 4 Sichum huk viudapa kanman wawan utaq willkanpas, hinaptinqa paykunayá wasinpi kaqkunataqa uywachunku,+ chayta ruwaspam riqsichikunqaku Diosta tukuy sunquwan servisqankuta. Tayta-mamankuwan hinaspa abuelonkuwan manupi kachkanmankupas hinayá paykunataqa uywachunku.+ Chayna ruwayqa Diospa munasqanman hinam.+ 5 Mana piyniyuq hinaspa wakcha viudaqa Diospim hapipakun,+ payqa tuta-punchawmi mana qunqaspa Diosta ruegakun hinaspa mañakun.+ 6 Aychanpa munasqanman hina kawsaq viudam ichaqa kawsachkaspanpas wañusqa hina kachkan. 7 Chayraykuyá kay yachachikuykunata* hinalla yachachiy, chaynapi llapallanku mana pipapas qaqchanan kanankupaq. 8 Pipas ayllun uywayta mana yuyaspanqa Diospi iñisqantapas qipancharunñam, aswanraqmi wasinpi kaqkunata mana mantienespanqa Diospi iñisqantapas qipancharun, Diospi mana iñiq runakunamantapas aswan mana allinraqmi payqa rikurirun.+

9 Listamanqa churana 60 masnin watayuq viudallatam, payqa kanan qusan kawsachkaptinraq mana engañaqmi*. 10 Payqa tukuy imata allintapuni ruwasqanwanmi riqsisqa kanan:+ Wawankunata allinta uywasqanwan,+ samaykachikuq kasqanwan,+ Diospa runankunapa chakin mayllaykusqanwan,+ ñakariqkunata yanapasqanwan+ hinaspa imapas allinkuna ruwananpaq kallpanchakusqanwan.

11 Casarakuy munaq sipasraq viudakunaqa amayá listamanqa churasqachu kachunku, paykunaqa Cristota* qatinanku kachkaptinmi qariwan puñuyta munaspanku casarakuyta munachkanku. 12 Paykunaqa juzgasqam kachkanku punta tantiasqankuman hina mana ruwasqankurayku. 13 Chaynallataqmi mana imapas ruwayniyuq kaspanku qillayarunku, hinaspam wasin-wasin purinku, chaymantapas cuento qipi kaytam yacharunku,+ hinaspam hukkunapa vidanpi chapukuspa mana rimananku kaqkunamanta rimanku. 14 Chaymi ñuqaqa munayman sipasraq kaq viudakuna casarakunankuta,+ wawayuq kanankuta+ hinaspa wasinkupi imapas ruwayninku ruwanankuta. Chaynapi chiqniwaqninchikkuna ñuqanchikmanta mana allinkunata mana rimanankupaq. 15 Wakin viudakunaqa allin ñanta saqiruspankum satanastaña qatichkanku. 16 Iñiq warmipa ayllunpi viudakuna kaptinqa, paymi chay viudakunataqa yanapanan, chaynapi lliw iñiqkunata amaña sasachanankupaq, chayna kaptinqa pasaypaq mana piyniyuq* viudakunallatañam iñiqkunaqa yanapanqaku.+

17 Iñiqkunata allinta pusaq punta apaqkunaqa*+ wakinkunamantapas aswan respetasqayá kachunku,+ astawan respetasqaqa kachunku willakunankupaq hinaspa yachachinankupaq anchata kallpanchakuqkunayá.+ 18 Diospa qillqanmi nin: “Iraspaykichikqa amam toroykichiktaqa sinqachankichikchu”, nispa.+ Nintaqmi: “Llamkaqqa pagontam chaskinan”, nispapas.+ 19 Iñiqkunapi punta apaqta* pipas imamantapas tumpaptinqa ama uyariychu, uyariyqa iskay utaq kimsa rikuqninkuna tumpaptillanyá.+ 20 Huchapi puriqkunataqa+ llapallankupa qayllanpiyá qaqchay,+ chaynapi hukkunapas manchakunankupaq. 21 Ñuqam Diospa qayllanpi, señor Jesucristopa qayllanpi hinaspa akllasqa angelkunapa qayllanpi kamachiki kay kamachikuykunata kasukunaykipaq, kay nisqaytaqa ruwanayki imatapas allinta yachaykuspam chaynataq pimanpas mana sayapakuspam.+

22 Amayá mana sumaqta tantiarispaqa pitapas chayllaqa akllaychu kamachiq kananpaqqa*,+ amataqyá hukkunapa huchallikuqmasinpas kaychu. Qamqa chuya sunqullayá kawsakuy*.

23 Wiksa nanayniyuq kasqaykiraykuyá hinaspa sapa kuti unqusqaykiraykuyá amaña yakutaqa tomaychu, aswanqa as vinochatañayá tomay.

24 Wakin runakunapa huchanqa lliwpa yachasqanmi, chaymi chaylla juzgasqa kanku, wakinkunapa huchankum ichaqa chaymantaña yachakun.+ 25 Chaynallataqmi runapa allinkuna ruwasqanpas lliwpa yachasqan,+ mana allinkuna ruwasqanpas manataqmi pakasqallaqa kanmanchu.+

6 Sirvientekunaqa anchatayá patronninkuta respetachunku,+ chaynapi Diospa sutinmanta hinaspa yachachikuyninmanta mana allinta ama pipas rimananpaq.+ 2 Diospi iñiq patronniyuq sirvientekunapas amayá patronninwanqa iñiqmasin kasqanraykuqa mana respetoyuqqa kachunkuchu. Aswanqa allintaraqyá servichunku patronninku iñiqmasinku hinaspa kuyasqanku kasqanrayku.

Kaykunamantayá hinalla yachachiy hinaspa rimapayay*. 3 Sichum pipas yachachinqa huk yachachikuyta, manataq señorninchik Jesucristopa chiqap yachachikuyninman* hinachu+ nitaq Diosta tukuy sunquwan imayna servinapaq yachachikuyman hinachu,+ 4 hinaspanqa hatuntukuq mana imapas entiendeqmi rikurirun.+ Payqa puramintitam palabrakunamanta atipanakuyllata munan,+ chaykunamantam rikurimun envidianakuykuna, piñanakuykuna, yanqamanta tumpanakuykuna*, hukkunamanta mana allin piensaykuna, 5 hinaspa yanqakunamanta chaylla-chaylla atipanakuykunapas. Chaykunamantaqa atipanakunku mana allinkunata piensaq+ hinaspa chiqapmanta mana entiendeq runakunam, paykunaqa apuyayta munasqankuraykullam Diosta tukuy sunquwan servikuyta munanku.+ 6 Arí, imapas kapuqllanchikwan kusisqa kaspa Diosta tukuy sunquwan servispaqa allin kaqkunatam achkata tarisun.+ 7 Nacespanchikqa manam imatapas kay pachamanqa apamurqanchikchu, wañukuspanchikpas manataqmi imatapas apakusunchu.+ 8 Chayrayku, mikunanchikpas pachanchikpas* kaptinqa chaywanyá hawka kawsakusun.+

9 Apuyaylla munaqkunaqa mana allin ruwaykunamanmi* hinaspa tuqllamanmi wichiykunku,+ munapayankutaqmi mana valeq hinaspa mana allin kaqkunatapas, chaykunaqa wañuyllaman hinaspa mana allinllamanmi apurawman apakun.+ 10 Qullqilla kuyayqa tukuy mana allin ruwaykunapa qallariyninmi. Wakinmi qullqita kuyaruspanku Diospiqa manaña hapipakunkuñachu, hinaspam sasachakuykunapi kasqankurayku llumpayta ñakarinku.+

11 Qamyá ichaqa chaykunamanta ayqikuy, hinaspayá kallpanchakuy allin ruwaq kanaykipaq, Diosta tukuy sunquwan servinaykipaq, Diospi hapipakunaykipaq, kuyakuq kanaykipaq, hinalla aguantanaykipaq chaynataq llampu sunqu kanaykipaq, qamqa Diospa runanmi kanki.+ 12 Chiqap yachachikuykunata defiendenaykipaqmi peleachkaq hina tukuy imata ruwanayki, chay ruwasqaykiqa ancha allinmi. Hinaspapas suyasqayki wiñay kawsaypi allinta hapipakuy, chayta chaskinaykipaqmi Diosqa akllasurqanki, chaymantam allinta willakurqanki achka runakunapa qayllanpi.

13 Poncio Pilatopa+ ñawpaqninpi allintapuni willakuq Jesucristopa qayllanpi hinaspa tukuy imata kawsachiq Diospa qayllanpim kayta kamachimuyki: 14 Qusqay kamachikuykunatayá mana pantaspa hinaspa mana pipapas anyasqan kasukuy, kasukunaykiqa señorninchik Jesucristo atiyninta qawachinankamam.+ 15 Payqa kusisqa hinaspa atiyniyuq sapallan señormi, paymi chay atiyninta qawachinqa tantiasqan tiempokunapi, payqa kamachiqkunapapas kamachiqninmi hinaspa gobiernaqkunapapas señorninmi,+ 16 payllam mana haykapipas wañuqqa,+ mana asuykuy atina achkipim kawsakun,+ paytaqa manam pi runapas rikurqachu, nitaqmi rikuyta atinmanchu.+ Payyá hatunchasqa kachun, atiyninpas wiña-wiñaypaqyá kachun. Chaynayá kachun*.

17 Kay tiempopi* llapa apukunata rimapayay* ama hatuntukunankupaq, rimapayaytaq chinkaruqlla kapuqninkunapi ama hapipakunankupaqpas,+ aswanqa Diosllapi hapipakunankupaq, payllam kusikunanchikpaq achkanpi llapa imapas quwaqninchikqa.+ 18 Niyá imapas allinkunata ruwanankupaq, allinkuna ruwasqankuwan apu hina kanankupaq, sunqumanta qukuykuq hinaspa imankutapas haywakuykuqllaña kanankupaq,+ 19 chaynata ruwaspankum Diosmanta chaskisqanku kaqkunata huñunqaku,+ chayqa hamuq tiempopi allin kawsakuymi, chaynapi chiqap kawsakuy suyasqankupi allinta hapipakunankupaq.+

20 Kuyasqay Timoteo, amayá Diosmanta chaskisqaykitaqa saqiruychu,+ chaypaqqa amayá uyariychu Diospa contranpi kaq yanqa rimaykunataqa nitaq yachaqtukuq runakunapa yachachisqantaqa, chay yachachisqankuqa chiqap yachachikuypa contranpim kachkan.+ 21 Wakinkum alabasqa kanankupaq chaykunamanta yachachinku, chaymi chiqap yachachikuymanta karunchakurunku.

Llapallaykichikwanyá Diospa ancha kuyakuynin* kachun.