INTERNETPI QILLQAKUNA Watchtower
INTERNETPI QILLQAKUNA
Watchtower
Quechua (Ayacucho)
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ñ
  • ñ
  • BIBLIA
  • QILLQAKUNA
  • HUÑUNAKUYKUNA
  • nwt 2 Timoteo 1:1-4:22
  • 2 Timoteo

Kaypaqa manam videon kanraqchu

Pampachaykullawayku, kaqmanta ñitiy videota qawanaykipaq.

  • 2 Timoteo
  • Musuq allpa pachapi kawsaqkunapaq biblia
Musuq allpa pachapi kawsaqkunapaq biblia
2 Timoteo

2 TIMOTEO

1 Ñuqa Pablom Diospa munasqanman hina Jesucristopa* apostolnin* kani, Jesucristopa qatiqnin kasqanchikrayku allin kawsakuyta Dios quwasqanchikmanta willakuqmi kani.+ 2 Qanmanmi qillqamuyki kuyasqay churiy Timoteo:+

Qampaqyá kachun taytanchik Diospa hinaspa señorninchik Jesucristopa ancha kuyakuynin*, llakipayakuynin chaynataq hawkayaynin.

3 Diostam allin concienciayuq hinaspa ñawpaq abueloykuna hina servichkani, tuta-punchaw ruegakuspaymi tukuy tiempo qamta yuyarispay Diosta agradecekuni. 4 Waqasqaykita yuyarispaymi qanwan tupaykuyta anchata munachkani, chaynapi ancha kusisqa kanaypaq. 5 Diospi chiqap iñikuq kasqaykitam yuyarini,+ chaynaqa karqanki abuelayki Loidapas hinaspa mamayki Eunicepas puntata Diospi iñikusqankuraykum, chaymi ñuqaqa mana iskayrayanichu qampas chayna iñikuq kasqaykimantaqa.

6 Chayraykum kayta yuyarichiki: Makiyta hawaykiman churaykuptiymi Diospa imam qususqaykita chaskikurqanki, chay chaskisqaykitayá ninata ratachichkawaqpas hina hinalla kawsachiy.+ 7 Diosqa atiynintaqa quwarqanchik manam manchakunanchikpaqchu,+ aswanqa kallpayuq,+ kuyakuq hinaspa allin yuyayniyuq kananchikpaqmi. 8 Chaynaqa, amayá ñuqamantaqa pinqakuychu nitaq señorninchikmanta+ willakuytapas, payraykum ñuqaqa preso kachkani, aswanqa listollañam kanayki Diospa atiyninpi hapipakuspa+ sumaq willakuyrayku ñakarinaykipaq.+ 9 Paymi salvawarqanchik hinaspa qayawarqanchik chuya runa kananchikpaq,+ chayqa karqa munasqanman hina chaynataq ancha kuyakuyninman* hinam, ichaqa manam imapas ruwasqanchikraykuchu. Ñuqanchikqa ñawpaqmantaraqmi Diospa ancha kuyakuyninta+ chaskirqanchik Jesucristorayku. 10 Chaymi kunan chayna kuyakuynin chaskisqanchikqa sutilla qawakun salvawaqninchik Jesucristopa+ rikurimusqanwan, paymi wañuyta chinkarachin,+ hinaspam sumaq willakuywan+ riqsiykachiwanchik mana ismuq cuerpoyuq kawsakuyta+ imayna chaskinamanta.+ 11 Ñuqaqa akllasqam karqani chay sumaq willakuymanta willakuq kanaypaq, apostol kanaypaq chaynataq yachachiq kanaypaq.+

12 Chayraykum kaynata ñakarichkani,+ ichaqa manam pinqakunichu.+ Ñuqaqa riqsinim piman iñisqaytaqa, manataqmi iskayrayanichu cuidananpaq makinpi churasqayta juicio punchawkama pay waqaychananmantapas.+ 13 Hinallayá hapipakuy lliwman yachachisqay chiqap* kaq yachachikuykunapi,+ sutillayá kachun Jesucristowan huklla kasqaykirayku Diospi iñiq hinaspa kuyakuq kasqaykipas. 14 Ñuqanchikpi kaq Diospa atiyninpa* yanapakuyninwanyá allinta waqaychay chaskisqayki ancha chaninniyuq kaqta.+

15 Yachasqaykipi hinapas Asia+ provinciamanta kaqkunaqa llapallanmi saqiruwanku, saqiruwantaqmi Figelowan Hermogenespas. 16 Onesiforopa+ aylluntayá señorninchik llakipayariykuchun, payqa achka kutipim kallpanchaykuwarqa, manataqmi carcelpi cadenasqa kaptiypas pinqakuspaqa saqiruwarqachu. 17 Aswanqa Roma llaqtaman chayaramuspanmi tariwanankama sumaqta maskawarqa. 18 Jehova* Dios taytanchikyá juicio punchawpi payta kuyapayarichun. Yachasqaykipi hinapas payqa Efeso llaqtapi kachkaspanmi tukuy imapi yanapakurqa.

2 Churilláy+ Timoteo, Jesucristopa ancha kuyasusqaykiwanyá* hinalla kallpanchasqa kay. 2 Chaymantapas, achka runakunapa qayllanpi+ ñuqamanta uyarisqaykikunatayá rimasqanman hina ruwaq runakunaman yachachiy, chaynapim paykunapas atinqaku hukkunaman allinta yachachiyta. 3 Qamqa listollañayá kay Jesucristopa allin soldadon hina+ sasachakuykunapi ñakarinaykipaq.+ 4 Soldadokunaqa kamachiqninpa allin qawasqan kayta munaspankuqa manam ima negociomanpas* chapukunkuchu. 5 Pukllaykunapipas imayna pukllana kasqanman hina pukllaqkunallam chaskinku premiotaqa*.+ 6 Chaymantapas chakrapi anchata llamkaqmi tarpusqanpa ruruntaqa puntata mikunan. 7 Kay nisqaykunapiyá tukuy tiempo sumaqta yuyaymanay, señorninchikqa tukuy imapi yachayniyuq* kanaykipaqmi yanapasunki.

8 Amayá qunqaychu wañusqakunapa kasqanmanta Jesucristo kawsarimusqantaqa+ hinaspa Davidpa mirayninmanta kasqantaqa,+ chaykunam willakusqay sumaq willakuykuna,+ 9 chay sumaq willakuyraykum ñakariypi tarikuni hinaspa mana allinkunallaña ruwaq runa hina presochasqa kachkani,+ Diospa palabranmi ichaqa mana presochasqachu kachkan.+ 10 Chaymi tukuyta aguantachkani akllasqakunarayku,+ chaynapi paykunapas Jesucristorayku salvacionta haypanankupaq hinaspa wiña-wiñaypaq hatunchasqa kanankupaq. 11 Kay palabraqa chiqapmi: Sichum paywan wañukusun hinaspaqa paywantaqmi kawsakusunpas,+ 12 sasachakuykunata aguantaspaqa paywanmi kamachisun,+ payta “manam riqsikichu” niptinchikqa, paypas “manam riqsikichikchu” niwasunmi,+ 13 munasqanta mana ruwaptinchikpas, payqa hinallam rimasqantaqa ruwan, payqa imayna kasqanman hinam imatapas ruwan.

14 Ima rimaymantapas ama atipanakunankupaq Diospa qayllanpi yachachispa* kay nisqaykunata hinalla yuyarichiy, chayna atipanakuyninkuqa manam imapaqpas valenchu, aswanqa uyariqkunapa mana allinninpaqmi*. 15 Anchata kallpanchakuy Diospa chaskisqan kanaykipaq, allin llamkaq kasqaykirayku mana imamantapas pinqakunaykipaq hinaspa Diospa chiqap palabranmanta allin yachachiq chaynataq entiendechiq kanaykipaq.+ 16 Diospa contranpi yanqa yachachikuykunataqa amayá uyariychu,+ chayna yachachikuykunaqa runakunatam tanqanqa aswan mana allinkunamanraq. 17 Chay yachachikuykunaqa runapa cuerponta ismuchiq* unquy hinam mirarunqa. Chay yachachikuykunata chiqichiqkunawanmi kachkan Himeneo hinaspa Fileto.+ 18 Paykunam chiqap kaqmanta karunchakurunku “wañuqkunaqa ñam kawsarirunkuña” nispanku.+ Paykunaqa wakinkunatam Diosmanta karunchachkanku. 19 Chayna kachkaptinpas Diospa churasqan cimientoqa hinallam allin takyasqa kachkan, chay cimientopim sellasqa hina qillqasqa kachkan: “Jehova* Diosqa riqsinmi pim yupaychaqnin kasqanta”, niq.+ Nintaqmi: “Jehova*+ Diosta sutinta qayakuqkunaqa mana allin ruwaykunamantayá karunchakuchunku”, nispapas.

20 Hatun wasipi serviciokunaqa manam qurillamantachu nitaq qullqillamantachu kachkan, kachkantaqmi kullumantapas chaynataq allpamantapas, wakinmi allin kaqkunapi servichikunapaq, wakinñataqmi pinqaypaq kaqkunapi servichikunapaq. 21 Sichu pipas pinqaypaq kaqkunamanta sapaqchakunqa hinaspanqa allin kaqkunapi servichikunapaq vasom kanqa, dueñonpa allin servichikunan chuyanchasqa hinaspa imatapas allinta ruwananpaq yachachisqa. 22 Chaynaqa ayqikuyá musu-sipaskunapa munapayasqankumanta, hinaspayá kallpanchakuy allin ruwaq kanaykipaq, Diospi hinalla iñinaykipaq* hinaspa kuyakuq kanaykipaq, hawkallataqyá kawsakuypas. Chaynayá kay chuya sunqunkuwan señorninchikta qayakuqkunawan kuska.

23 Amayá chapukuychu runakunapa yanqa atipanakusqankumanqa,+ yachasqaykipi hinapas chaykunaqa peleollatam hatarichin. 24 Señorpa serviqninqa manam peleananchu, aswanqa llapallanwanmi kuyakuqllaña kanan*,+ yachachinanpaqpas allin yachaqmi kanan, mana allinkunata ruwaptinkupas controlakuqmi kanan,+ 25 yachachikuykunata mana kasukuqkunatapas llampu sunqullawanmi yachaykachinan,+ icharaqpas wanakunankupaq Dios saqiykunman, chaynapi chiqap kaqta riqsinankupaq+ 26 hinaspa pantaypi kasqankuta riqsikuspanku diablopa tuqllanmanta lluptinankupaq. Paykunataqa kawsachkaqllatam diablo hapirun paypa munayninta ruwanankupaq.+

3 Kaytam yachanayki, tukupay punchawkunapiqa+ mana haykapipas qawasqanchik sasallaña punchawkunam kanqa. 2 Runakunam kanqaku kikillankupi piensaqkuna, qullqilla kuyaqkuna, alabakuqkuna, hatuntukuqkuna, hukkuna kamiqkuna, tayta-mamanku mana kasukuqkuna, mana agradecekuqkuna, runamasin qipanchaqkuna*, 3 ayllunta mana kuyaqkuna, acuerdoman mana yaykuqkuna, runamasinta yanqamanta tumpaqkuna, mana controlakuqkuna, animal hina piña runakuna, allin kaqkuna ruwayta mana munaqkuna, 4 runamasin traicionaqkuna, mana uyarikuqkuna, capaztukuqkuna* hinaspa Diosta kuyanankumantaqa kusirikuykunallataña kuyaqkuna. 5 Ninqakum: “Diostam tukuy sunquwan serviniku”, nispanku. Ruwasqankuwanmi ichaqa mana chayna kasqankuta qawachinqaku.+ Karunchakuyá chayna runakunamantaqa. 6 Chayna runakunamantam rikurimun mana allinkunata ruway munaq qarikuna, chay qarikunaqa wasikunaman rispam huchapakuq hinaspa imapas nisqankuta chaylla creeruq warmikunata engañanku*, chay warmikunaqa sunqunkupa munasqanwan aysachikuqllañam kanku. 7 Chay warmikunaqa tukuy tiempom tukuy imamanta yachachkanku, chaywanpas manam haykapipas chiqap yachachikuytaqa entiendenkuchu.

8 Imaynam Janes hinaspa Jambres sutiyuq runakunapas Moisespa contranpi karqaku, chaynam kay runakunapas chiqap yachachikuypa contranpi kachkanku. Paykunaqa kanku mana allinkuna piensaq runakunam, iñisqankuman hina mana kawsasqankuraykum Diospas paykunataqa mana chaskinchu. 9 Chay runakunaqa manañam aswan mana allinkunataqa ruwanqakuñachu mana yuyayniyuq kasqankuta lliw yacharusqankurayku, chaynam karqa chay iskay runakunawanpas.+ 10 Qanmi ichaqa allinta hapipakuchkanki yachachisqaykunaman, allintataqmi qatipakuchkanki imayna kawsasqaytapas,+ ima ruway munasqaytapas, Diospi iñisqaytapas, pacienciakuq kasqaytapas, sasachakuykunata aguantasqaytapas chaynataq kuyakuq kasqaytapas. 11 Yachankitaqmi runakuna maskawaspa ñakarichiwasqankutapas hinaspa llumpay sasachakuykunapi kasqaytapas. Chaynam karqani Antioquia,+ Iconio+ hinaspa Listra+ llaqtakunapi. Chayna sasachakuykunatam atiparqani, ichaqa señormi tukuy chaykunamanta libraykullawarqa.+ 12 Pipas Jesucristota qatispan tukuy sunqunwan Diosta serviy munaqqa chiqnikuq runakunapa maskasqanmi* kanqa.+ 13 Mana allin runakuna hinaspa engañakuq runakunam ichaqa aswan-aswanraq mana allin ruwaq kanqaku, paykunaqa hukkunatam pantachinqaku, kikinkupas hukkunapa pantachisqantaqmi kanqaku.+

14 Qamyá ichaqa hinalla kasukuy yachasqaykikunata hinaspa hukkunapas sumaqta yuyaymanachispa yachachisusqaykikunata,+ chaykunataqa allinta riqsisqayki runakunam yachachisurqanki, 15 yachankitaqmi warmacha kasqaykimantaraq*+ Diospa qillqanmanta yachasqaykitapas,+ chay qillqapi yachachikuykunawanqa yachayniyuqmi kanki Jesucristopi iñispa salvakunaykipaq.+ 16 Diospa llapallan palabranqa atiyninwan qillqachisqam kachkan,+ allinmi runakunata yachachinapaq,+ pantaypi kasqanta qawachinapaq, allin ñanman kutirikunapaq* chaynataq Diospa kamachikuyninman hina yachachisqa kanapaq.+ 17 Chaynapi Diospa runankuna tukuy ima allin kaqkunata ruwanankupaq, alli-allin yachachisqa kanankupaq hinaspa listolla kanankupaq.

4 Jesucristom rikuriramuspan+ hinaspa Diospa churasqan kamachiq+ hinaña hamuspan wañuqkunatapas kawsaqkunatapas+ juzganqa.+ Paypa hinaspa Diospa qayllanpim kayta kamachiki: 2 Diospa palabrantayá willakuy+ hinaspa chay ruwayman qukuy* allin tiempopipas chaynataq mana allin tiempopipas, hukkunatapas pantaypi kasqankuta qawachiy,+ corregiy hinaspa rimapayay*. Chaytaqa ruway anchata pacienciakuspa hinaspa sumaqta yachachispa.+ 3 Chayamunqam tiempo allin yachachikuykunata qipanchanankupaq,+ chay qipanchaq runakunaqa munasqallankuta maskaspankum uyariy munasqallankuta yachachiqkunawan hukllawakunqaku.+ 4 Chiqap yachachikuymantam karunchakunqaku, hinaspam yanqa cuentokunataña uyarinqaku. 5 Qamyá ichaqa tukuy tiempo allin yuyayniyuq kay, ñakariykunata aguantay,+ sumaq willakuymanta hinalla willakuy hinaspa Diospa kamachisusqayki llamkayta allintapuni ruway.+

6 Ñuqaqa Diosninchikpaq animalta kañasqankupa hawanman tallisqanku vino hinañam kachkani,+ librakunay+ tiempopas chayamunqañam. 7 Allin peleaytam pelearuniña,+ mayman kallpasqaymanmi* chayaruniña,+ hinallam Diospi iñisqaypipas allinta takyachkani. 8 Allinta juzgaq+ señormi kunanmantapacha premiota* sapaqcharapuwan.+ Chay premioqa allin ruwaq runakunapaqmi kachkan. Señorqa hamuq punchawpim chay premiotaqa quwanqa,+ ichaqa manam ñuqallamanchu, aswanqa paypa rikurimunanta lliw munaqkunamanwanmi*.

9 Imaynata ruwaspaykipas qawaykuwanaykipaqyá chaylla hamuy. 10 Crescentem pasan Galacia lawman, Titoñataqmi Dalmacia lawman, Demasñataqmi+ saqiruwan kay tiempopi* runakuna hina kawsakuyta munaspan*, hinaspam pasakun Tesalonica llaqtaman. 11 Lucasllañam ñuqawan kachkan. Marcosta pusarikamuy, payqa Diospa llamkay quwasqanpi anchata yanapawaqniymi. 12 Tiquicotañataqmi+ Efeso llaqtaman kacharuni. 13 Hamuspaykim aparikamunki Troas llaqtapi Carpo sutiyuq iñiqmasinchikpa wasinpi saqimusqay capata, aparikamunkitaqmi wankukuq qillqakunatapas, astawanqa qalas qarapi qillqakunatamá aparikamuwanki.

14 Herrero Alejandrom tukuy mana allinta ruwawarqa, Jehova* Diosmi ruwasqanmanta kutichipunqa.+ 15 Qampas paymantaqa cuidakunaykim, payqa willakusqaykupa contranpim llumpayta churakurun.

16 Autoridadkunapa qayllanpi puntata defiendekuptiyqa manam pipas ñuqawanqa karqachu, llapallankum saqiruwarqaku, ichaqa Diosninchikyá chay ruwasqankumantaqa pampachaykuchun. 17 Señormi ichaqa hichpallaypi kaspan kallpanchaykuwarqa, chaynapi cabaltapuni sumaq willakuyta willakuptiy enteron pachapi lliw runakuna yachanankupaq,+ señorqa libraykuwarqam leonpa siminmantapas.+ 18 Señortaqmi tukuy mana allin ruwaykunamanta librawanqa, hinaspam waqaychawanqa hanaq pachapi Diospa gobiernonpi* kanaypaq.+ Señorninchikyá wiña-wiñaypaq hatunchasqa kachun. Chaynayá kachun*.

19 Saludaykapuwaychikyá Priscatawan Aquilata+ chaynataq Onesiforopa+ wasinpi kaqkunatapas.

20 Erastom+ Corinto llaqtapi qiparamun, Trofimotañataqmi+ unquchkaqta saqiramuni Mileto llaqtapi. 21 Tukuy atisqaykitayá ruway, chaynapi manaraq paranan hinaspa chirinan tiempo kachkaptin chayamunaykipaq.

Saludamusunkim iñiqmasinchik Eubulopas, Pudentepas, Linopas, Claudiapas chaynataq llapallan wawqi-paninchikkunapas.

22 Diospa munasqanman hina piensasqaykiraykuyá señorninchik yanapasunki. Diospa ancha kuyakuyninyá* qamkunawan kachun.

Griego rimaypiqa nichkan: “Cristo Jesuspa”, nispam.

Utaq: “Kachasqan runa”.

Kaypiqa rimachkan mana kuyana kachkaspa kuyasqa kaymantam. Qaway “punta apaqkunapa yanapaqnin” niqpa ima ninan kasqanta.

Kaypiqa rimachkan mana kuyana kachkaspa kuyasqa kaymantam.

Utaq: “Riqsisqa”.

Utaq: “Chuya espiritupa”. Qaway kaypa ima ninan kasqanta.

Qaway A5 kaq yachachikuyta.

Kaypiqa rimachkan mana kuyana kachkaspa kuyasqa kaymantam.

Ichapas kanman: “Manam runakunapa sapa punchaw imapas ruwasqankumanqa”, niqpas.

Utaq: “Coronataqa”.

Utaq: “Yuyayniyuq”.

Utaq: “Lliwta willaspa”.

Utaq: “Uyariqkunatam ñakarichin”.

Utaq: “Gangrena”.

Qaway A5 kaq yachachikuyta.

Qaway A5 kaq yachachikuyta.

Utaq: “Anchata hapipakunaykipaq”.

Utaq: “Kuyakuywan imatapas rimanan”.

Utaq: “Diosta qipanchaqkuna”.

Utaq: “Qaritukuqkuna”.

Utaq: “Warmikunapa sunqunta suwanku”.

Utaq: “Ñakarichisqanmi”.

Utaq: “Nacesqayki punchawmantaraq”.

Utaq: “Correginapaq”.

Utaq: “Chay ruwayta chaylla ruway”.

Utaq: “Kallpanchay”.

Utaq: “Raskisqaymanmi”.

Utaq: “Coronata”.

Utaq: “Suyaqkunamanwanmi”.

Qaway “kay tiempo” niqpa ima ninan kasqanta.

Utaq: “Kuyaspan”.

Qaway A5 kaq yachachikuyta.

Qaway “Diospa gobiernon” niqpa ima ninan kasqanta.

Utaq: “Amen”.

Kaypiqa rimachkan mana kuyana kachkaspa kuyasqa kaymantam.

    Quechua (Ayacucho) Qillqakuna (2004-2025)
    Lluqsiy
    Yaykuy
    • Quechua (Ayacucho)
    • Compartir
    • Munasqaykiman hina kananpaq
    • Copyright © 2025 Watch Tower Bible and Tract Society of Pennsylvania
    • Imaynata servichikunapaq
    • Waqaychasqa kanapaq
    • Configuración de privacidad
    • JW.ORG
    • Yaykuy
    Compartir