Dioswanyá wiñaypaq kuyachikusun

Piwanpas hinalla kuyachikunapaqqa anchatam kallpanchakuna. Dioswan hinalla kuyachikunapaq kallpanchakuspaqa achka bendicionkunatam chaskisun. Jesusmi paypi iñiq runakunata nirqa: ‘Chiqap yachasqaykichikmi librasunkichik’, nispa (Juan 8:32 NM). ¿Imatam chaywan niyta munarqa?

¿Imakunamantam librakuchwan? Pantay yachachikuykunamanta hinaspa satanaspa llullakuna rimasqanmantam. Chaymantapas librakuchwanmi llaki vidamanta, chayna llakipim tarikunku Jehova Diosta mana riqsiq runakuna (Romanos 8:22). Dioswan kuyachikuqkunaqa librakuchwanmi ‘wañuy manchakuymantapas’ (Hebreos 2:14, 15).

Musuq pachapiqa librem kasunchik. ¡Mayna sumaqchá kanqa hamuq tiempopi tukuy ñakarichiwaqninchik kaqkunamanta libreña kaspa kawsakuyqa! Kay allpa pacha sumaq huertaman tikrakuptinmi manaña kanqachu guerrakuna, unquykuna nitaq mana allin ruwaqkunapas. Manataqmi yarqaypas nitaq wakchayaypas kanqañachu. Librasqam kasunchik machu-payayaymanta, wañuymanta, manchakuymanta, ñakariymanta hinaspa mana allinkunamantapas. Diosmantam biblia niwanchik: “Makillaykita kicharispam llapallan kawsaqkunata saksaykachinki”, nispa (Salmo 145:16).

Dioswan kuyachikuqkunaqa wiñaypaqmi kawsanqaku. Wiñay kawsayqa Diospa suma-sumaq regalonmi, wiñaypaqmi kawsakunqaku Dioswan kuyachikuqkunaqa (Romanos 6:23). ¡Mayna sumaqchá kanqa wiñaypaq kawsayqa!

Tukuy imata ruwanapaqmi tiempoyuq kasunchik. Ichapas yachayta munasun guitarra tocayta utaq imapas tocayta, imatapas dibujayta, carpintero kayta, animalkunamantawan plantakunamanta yachayta utaq maymanpas riyta hinaspa huk nacionkunamanta runakuna riqsiytapas. Wiñay kawsayniyuq kaspanchikmi tukuy kaykunata ruwasun.

Achka runakunawan kuyachikunapaqmi tiemponchik kanqa. Wiñaypaq kawsakusqanchikraykum Diospa kuyasqan runakunata riqsisunchik. Yachasuntaqmi imakuna ruway yachasqankuta, imayna kasqankuta hinaspam paykunawanpas kuyanakusun (1 Corintios 13:8). Wiñaypaq kawsasqanchikraykutaqmi kay pachapi llapallan runakunawanpas kuyachikusun. Aswanraqchá, tiempo risqanman hinaqa Jehova Dioswan astawan kuyachikusun. Chaynaqa, ¡Dioswanyá wiñaypaq kuyachikusun!