Ganaswan rimanapaq

GANASWAN rimasqanchikqa yachachisqanchiktam sumaqyachin. Imamanta yachachisqanchik allinpaq kaptinpas tukuy sonqowan rimaptinchikmi uyariwaqninchikkunaqa atencionwan uyarinqaku. Maymanta kaspaykipas otaq imayna tarikuspaykipas ganaswan yachachiytaqa atiwaqmi.

Sonqomanta rimay. Samariamanta kaq warmimanmi Jesus nirqa Jehova Diosta yupaychaqkunaqa ‘cheqapwan chaynataq espirituwan’ yupaychanankupaq (Juan 4:24). Diostaqa agradecekuspam Bibliapa nisqanman hina tukuy sonqowan yupaychana. Tukuy sonqonchikwan agradecekusqanchiktam qawachinchik imayna rimasqanchikwan. Tukuy ima chaskisqanmanta agradecekuqqa Jehova Diosmantam willakuyta munan. Chaytam sutillata qawachin uyanwanpas makinwanpas yanapachikuspa rimasqanpi.

Wakinqa Diosta kuyachkaspankupas chaynataq yachachinankupaq kaqmanta mana iskayrayaspankupas, ¿imanasqataq mana ganaswanchu rimanku? Ganaswan rimanapaqqa manam allinta preparakuyllachu. Yachachinapaq kaqtaqa tukuy sonqowanmi rimana. Kaypi piensarisun, ichapas nisunkiman Jesucristo rantinchikpi wañusqanmanta discursota qonaykipaq. Yachachispaykiqa manam imamanta yachachinaykipaq kaqkunallapichu reparanayki aswanqa rantinchikpi wañusqanmanta tukuy sonqoykiwan agradecekusqaykitam qawachinayki. Chaypaqqa reparanaykim Jehova Diostawan Jesucristota mayna agradecekusqaykita. Reparanaykitaqmi rantinchikpi Jesuspa wañusqanrayku hamuq tiempopi suma-sumaq Allpapi manaña onqospa suyakuyniyoq kasqanchikpipas. Chaykunapi yuyaymanaspaqa tukuy sonqoykiwanmi rimanki.

Diospa Leyninmanta yachachiq Esdrasmi ‘sinchillataña [sonqonta] prepararqa Tayta Diospa yachachikuyninta estudiananpaq, cumplinanpaq chaynataq decretonkunatapas reglamentonkunatapas Israel castakunaman yachachinanpaq’ (Esd. 7:10). Ñoqanchikpas sonqonchiktam preparana manam yachachinanchikpaq kaqkunallatachu, chaynapim tukuy sonqonchikmanta rimaspa uyariqninchikkunata allintapuni yanapasun Diospa yachachisqankunata kasukunankupaq.

Uyarisuqnikikunapi reparay. Ganaswan rimanaykipaqqa yanapasunkitaqmi uyarisuqnikikunapa yachay munasqankupi reparasqaykipas. Yachachinaykipaq otaq rimanaykipaq preparakuspaqa manam yachachikuykunallatachu maskanayki, aswanqa Jehova Diostam yanapasunaykipaq mañakunayki uyarisuqnikikunata preparakusqaykiwan yanapanaykipaq (Sal. 32:8; Mat. 7:7, 8). Preparakusqayki imanasqa allinninkupaq kasqanpi reparay, imayna yanapasqanpi chaynataq imaynata yachachinaykipaq kasqanpipas.

Discurso qonaykipaq kaqta allinta preparakuy ganaswan rimanaykipaq hina. Chaypaqqa manam huk yachachikuykunataraqchu maskanayki aswanqa piensanaykim uyarisuqnikikunata yachachisqaykiwan imayna kallpanchanaykipaq. Preparakusqaykiqa uyarisuqnikikunatam yanapanan Diosman sonqo kanankupaq, bendicionkuna chaskisqankumanta agradecekunankupaq, sasachakuykunata atipanankupaq otaq allinta predicanankupaqpas, chaynapim tukuy sonqomanta rimanaykipaq kallpanchasqa kanki.

Leeyqa manam palabrakunata imam kaqta leeyllachu. Leenaykipaq kaqtaqa estudianaykim. Bibliata leenayki kaptinpas leenaykipaq kaq textokunamantaraqmi astawan yachanayki. Entiendenaykitaqmi leesqayki imamanta yachachisqanta. Piensaytaq imayna yanapasusqaykipi chaynataq uyarisuqnikikunata imayna yanapasqanpipas hinaspa chayman hina allinta leey.

¿Predicaq rinaykipaqchu preparakuchkanki? Reparay imamanta yachachinaykipaq chaynataq mayqen textokunata leenaykipaq kasqanpi. Piensaytaq runakuna imamanta yachay munasqankupipas. ¿Ima noticiakunamantataq rimachkanku? ¿Ima sasachakuykunapitaq tarikunku? Sasachakuykuna imayna allichasqa kananmanta Diospa Palabranpi qawachispaykiqa allintam predicanki, rimasqaykipas sonqoykimantam kanqa.

Ganaswan yachachiy. Ganaswan rimasqanchikqa sutillam kanman imayna rimasqanchikpi chaynataq kusisqa kasqanchikpipas. Sonqomantam rimana ichaqa manam kamachichkaq hinachu.

Chayna kananpaqqa allintam tanteana. Kusisqallaña otaq qaparichkaq hina rimaqtaqa yanapachwanmi discurso qosqanpi sapa kutilla chaynata ama rimananpaq, mana chayqa uyariqninkunam payllapiña reparanmanku yachachisqankunapiñataqmi mana. Manchapakuspa rimaqkunatam ichaqa ganaswan rimanankupaq kallpanchana.

Ganaswan rimayqa hukkunatapas kallpanchanmi. Uyariqninchikkunata qawaspa kallpanchanapaq rimasqaqa ganaswanmi paykunapas uyarinku. Apolos sutiyoq cristianom chaynata yachachiq. Ganaswan rimanapaq Diospa yanapayninta mañakuspaqa uyariwaqninchikkunatam kasukunankupaq kallpanchasun (Hech. 18:24, 25; Rom. 12:11).

Yachachisqaykiman hina ganaswan rimay. Lliw yachachisqaykipi kusisqallaña otaq qaparichkaq hina mana rimanaykipaqmi tanteanayki mana chayqa uyarisuqnikikunatam hukmanyachiwaq. Chaynata yachachiptikiqa manam ima uyarisqankutapas kasukunqakuchu. Chaymi yachachispaykiqa tupasqanman hina ganaswan rimanayki. Amataqyá mana ganasniyoq hinaqa rimaychu. Yachachinaykipaq kaqkunata allinta akllaptikiqa discursoykipim allinta yanapasunki, chaykunamanta wakintaqa tupasqanman hinam ganaswan rimanayki wakintañataqmi mana.

Aswan allinnin kaq yachachikuykunataqa astawanraqmi ganaswan rimanayki. Yachachisqaykipiqa sutillam kanan allinnin kaq yachachikuykuna chaykunamanta ganaswan rimanaykipaq, chaymi uyarisuqnikikunata kasukunankupaq kallpanchanqa. Ganaswan rimasqaykiqa uyarisuqnikikunapa sonqonmanmi chayanqa, chaynapim rimasqaykiqa sonqoykimanta kanqa.