14 KAQ YACHACHIKUY
Diosmanta willakuq profetakuna
Jehová Diosmi profetakunata akllan Diospa juicionkunamanta, cheqap yupaychaymanta hinaspa Mesiasmantapas willakunankupaq
REYKUNAPA kamachisqanku tiempopim Israelpi hinaspa Juda lawpipas rikurirqaku profetakuna. Paykunaqa Diospa nisqankunata willanankupaqmi qarinchakuspa iñiyniyoq kananku karqa. Kaykunamantam willakurqaku:
1. Jerusalen puchukachisqa kananmanta. Diospa willakuqnin Isaiaswan Jeremiasmi ñawpaqmantaraq willakurqaku Jerusalen purmachisqa hinaspa saqesqa kananmanta. Willakurqakutaqmi Jerusalenpi runakuna imata ruraspanku Diosta piñachisqankumanta. Diospa llaqtan kasqankuta niptinkupas, mana allin yupaychasqanku hinaspa mana allinkuna rurasqankum qawachirqa mana chayna kasqankuta (2 Reyes 21:10-15; Isaias 3:1-8, 16-26; Jeremias 2:1–3:13).
2. Cheqap yupaychay kaqlla qallarichisqa kananmanta. Diospa llaqtan 70 wata Babiloniapi kasqankumantam Jerusalenman kutinanku karqa, hinaspam Diospa templonta allichaspanku cheqap yupaychayta kaqlla qallarichinanku karqa (Jeremias 46:27; Amos 9:13-15). 200 wata ñawpaqtaraqmi Isaias willakurqa, Ciro sutiyoq runa Babiloniata munaychakuspan Diospa llaqtanta librananmanta. Willarqataqmi imaynata Babiloniaman yaykunankumantapas (Isaias 44:24–45:3).
3. Mesiaspa rikurisqanmantawan imayna kananmanta. Mesiasqa Belen sutiyoq llaqtapim nacenan karqa (Miqueas 5:2). Payqa humildem kanan karqa, hinaspa Jerusalen llaqtamanmi asnopi sillakuykuspan yaykunan karqa (Zacarias 9:9). Runakunata kuyaptinpas, achkam cheqninanku karqa (Isaias 42:1-3; 53:1, 3). Arí, ñakarispanmi wañunan karqa. ¿Kaywanchu pasaypaqta Mesias chinkanman karqa? Manamá, payqa kawsarichisqa kaspanmi vidan qosqanpa valorninta qawachinan karqa, chaynapi runakunapa huchan pampachasqa kananpaq (Isaias 53:4, 5, 9-12).
4. Mesiaspa gobiernonmanta. Pantaq runakunaqa manamá allin gobiernaytaqa atinmankuchu, Rey Mesiasmi ichaqa. Chaymi Hawkayay Qokuq Kamachikuqwan sutichasqa kanan karqa (Isaias 9:6, 7; Jeremias 10:23). Kay Pachata kamachiptinqa hawkayaymi kanqa, runaqa hawkañam animalkunawanpas kawsanqa (Isaias 11:3-7). Onqoypas chinkanqam (Isaias 33:24). Kanqañachuqaya wañuypas (Isaias 25:8). Millonnintin runakunapas kawsarimunqakum (Daniel 12:13).
(Isaias, Jeremias, Daniel, Amos, Miqueas, Zacarias librokunamanta.)