Rutmanta hinaspa Noemiymanta

Israel nacionpi yarqay kaptinmi Noemiyqa qusanwan hinaspa iskay qari wawankunapiwan Moab nacionman ripukurqaku. Chaypim qusan wañukurqa, qari wawankunañataqmi Moab kasta warmikunawan casarakururqaku. Llumchuyninkunapa sutinmi karqa Rut hinaspa Orpa. Tiempopa risqanman hinataqmi wawankunapas wañukurqaku.

Noemiyqa uyarirurqam Israel nacionpi yarqay manaña kasqanmanta, chaymi kutinanpaq tantiarurqa. Iskaynin llumchuyninkunapas paywan rinankupaqmi nirqaku. Ichaqa ñanpim Noemiy nirqa: “Qamkunaqa sumaq sunquyuqmi kankichik, aylluykichikman kutikuspayá kaqmanta casarakamuychik”, nispa. Paykunañataqmi nirqaku: “Anchatam kuyaykiku. Manam saqikimankuchu”, nispa. Ichaqa Noemiy hikutaptinmi Orpaqa kutikurqa, Rutñataqmi mana. Chaymi Noemiyqa Ruttapas hinalla nirqa: “Waqaya llumchuymasi­kiqa llaqtanmanwan diosninkunaman kutikun, qampas mamaykipa ­wasinmanyá kutikuy”, nispa. Rutmi ichaqa nirqa: “Manam saqikimanchu. Llaqtaykim llaqtay kanqa, Diosnikipas Diosniymi kanqa”, nispa. Chaywanqa Noemiyqa anchatachá kusikurqa, ¿aw?

Rutwan Noemiyqa Israel nacionmanmi cebada rutuy qallaykuchkaptin chayarurqaku, chaymi Rutqa Boazpa chakranta pallapakuq rirqa. Boazqa karqa Rahabpa wawanmi. Boazqa yacharqam Rutqa Moab nacionniyuq kasqanta hinaspa suedranta yanapaq qatimusqantapas, chaymi llamkapuqninkunata nirqa: “Amam lliwchataqa ruturunkichikchu, saqiykunkichikmi Rut pallapakunanpaq”, nispa.

Chay tutam Noemiyqa Rutta tapurqa: “¿Maypitaq pallapakamurqanki?”, nispa. Rutñataqmi nirqa: “Boazpa chakranpim”, nispa. Hinaptinmi Noemiyqa nirqa: “Boazqa qusaypa ayllunmi, chakrallanpiyá pallapakuy”, nispa.

Rutqa suedranta kasukuspam chay chakrallapi pallapakurqa, chaynapim Boazpas Rutpa allin llamkasqanta qawarqa. Chay tiempopiqa pi qaripas mana churiyuq wañukuptinqa chay wañukuqpa ayllunmi viudawan casarakuyta atinman karqa, chayraykum Boazqa Rutwan casarakurqa. Hinaptinmi churin karqa Obed, chaymi warmikuna Noemiyta kusisqa nirqaku: “Diosmi kuyakuq llumchuyta quykusunki hinaspa willkatapas, chayraykuyá Jehova Dios hatunchasqa kachun”, nispa. Chaymantañataqmi Obedqa kamachiq Davidpa abuelon karqa.