Kasukuq tawa musuchakunamanta

Kamachiq Nabucodonosormi Juda nacionpi kamachiqkunapa kastankunata Babiloniaman aparurqa, hinaspam serviqninkunapa kamachiqnin Aspenazpa makinman churaykurqa. Chaymantapas kamachirqam allin yuyayniyuq sano musuchakunata akllananpaq. Chay musuchakunatam kimsa wata yachachinanku karqa Babiloniapi allin riqsisqa kanankupaq, hinaspapas Babilonia runakunapa rimaynintam yachananku karqa, qillqasqankutapas leeytam yachananku karqa. Mikunankutaqmi karqa kamachiq Nabucodonosorpa mikunantapas. Chay musuchakunatam Babiloniapi kaq sutikunawan Aspenaz suticharurqa: Danieltam Beltsasarwan, Hananiastam Sadracwan, Misaeltam Mesacwan, Azariastañataqmi Abednegowan. Tukuy chaykunaqa Diosmantam paykunataqa karuncharunman karqa, ¿aw?

Chayna kaptinpas chay tawa musuchakunaqa Jehova Diosllatam kasukurqaku. Paykunaqa yacharqakum Diospa mana munasqan mikuykunataqa mana mikunankuta, chaymi kamachiq quptinpas mana mikunanku kaqtaqa mana mikurqakuchu. Aspenaztam nirqaku: “Ama hikutawaykuchu kamachiqpa mikunanta mikunaykupaqqa”, nispa. Aspenazñataqmi nirqa: “Allinta mana mikuptikichikqa unquqta hina kamachiq qawaykususpaykichikmi wañurachiwanqa”, nispa.

Chaymi Danielqa cuidaqninku runata yuyaywan nirqa: “Ama hina kaspayá verduratawan yakullata 10 punchaw quwayku. Hinaspañayá kamachiqpa mikunanta mikuqkunawan ñuqaykuta tupachiwayku”, nispa. Cuidaqninku runañataqmi “arí” nirqa.

10 punchawmantam Danielwan amistadninkunaqa wakinkunamantapas sanoy-sanoy qawakurqa. Kasukusqankuwanmi Diosqa anchata kusikurqa. Danielqa Diospa yanapakuyninwanmi sueñoykunapa ima ninan kasqantapas allinta yacharqa.

Kimsa wata yachachisqa kasqankumantam musuchakunataqa Nabucodonosormanña Aspenazqa pusarqa. Nabucodonosorqa musyarurqam chay musuchakuna wakinkunamantapas yachaysapallaña kasqankuta. Chaymi serviqninkuna kananpaq akllarurqa, akllarqataqmi imapipas allinta tantiaysinanpaq. Jehova Diosqa chay musuchakunatam aswan yachayniyuq kanankupaq yanaparqa, chaymi yachaysapakunamantawan layqa runakunamantapas aswan yachaysaparaq karqaku.

Daniel, Hananias, Misael hinaspa Azariasqa huklaw nacionpi kaspankupas manam Jehova Diostaqa qunqarqakuchu. Qampas tayta-mamaykiwan mana kaspaykipas Jehova Diostaqa manam qunqanaykichu.