Imaynata Jehova Diosta mañakunamanta

Fariseo runakunaqa imatapas ruwaqku runakuna qawanallankupaqmi. Paykunaqa lliw runakunapa qayllanpim umallankumanta kuti-kutirispa hina chaynallata mañakuqku, una-unaytam callekunapi chaynataq huñunakuna wasikunapipas chaynata mañakuqku. Jesusmi ichaqa kaynata nirqa: “Amam fariseokuna hinaqa mañakunkichikchu. Paykunaqa piensankum llumpayta rimasqankurayku Diospa uyarisqan kasqankuta, ichaqa manam Jehova Diosqa uyarinchu. Qamkunaqa sapallaykichikpim Dioswan rimanaykichik. Amataqyá kuti-kutirispaqa hina kaqllataqa rimaychikchu, Jehova Diosqa munan sunqumanta mañakunaykichiktam”, nispa.

Jesusqa imaynata Diosta mañakunamanta hinalla yachachispanmi nirqa: “Kaynatam mañakunaykichik: ‘Hanaq pachapi taytayku, sutikiyá chuyanchasqa kachun. Qamñayá kamachiwayku. Munasqaykiyá ruwasqa kachun kay pachapipas hanaq pachapi hina’”, nispa. Yachachirqataqmi mikuyninkupaq, huchankumanta pampachasqa kanankupaq chaynataq allinlla kanankupaq mañakunankupaqpas.

Chaymantapas Jesusmi nirqa: “Taytaykichik Jehova Diostaqa hinallam mañakunaykichik. Lliw tayta-mamakunam churi-wawankuman allin kaqta qunku. Warmanku tantata mañakuptinqa, ¿quykunmankuchu rumita? Challwa kankata mañakuptinpas, ¿quykunmankuchu culebrata?”, nispa.

Chaywanqa ima niyta munasqanmanta yachanankupaqmi nirqa: “Qamkunaqa allin kaqkunatam warmaykichikmanqa qunkichik. Hinaptinqa, ¡aswanraqchiki qamkunamanqa taytaykichik Jehova Diosqa chuya espirituta qusunkichik!”, nispa. Chaywanqa yachachichkarqam taytanchik Jehova Diosta chuya espiritunta quwananchikpaq mañakunamanta. Qamqa, ¿Jesuspa yachachisqanman hinachu mañakunki? ¿Imata qusunaykipaqtaq Diosta mañakunki?