Juanpa musquypi hina rikusqanmanta

Apostol Juanmi Patmos sutiyuq islapi presochasqa karqa. Chaypim Jesusqa musquykunapi hina 16 kutipi Juanman qawachirqa hamuq tiempopi Jehova Diospa sutin imayna chuyanchasqa kananmanta, imayna kamachimunanmanta chaynataq kay pachapipas munaynin imayna ruwakunanmanta.

Huknin qawasqanpim Juanqa rikurqa Jehova Dios achkirichkaq tiyananpi tiyachkaqta hinaspa muyuriqninpi 24 kamachiqkuna tiyachkaqtapas. Paykunaqa kachkasqaku yuraq pachawan pachasqakama hinaspa umanpi qurimanta coronayuqkamam. Chay tiyanamantam llipyaykunapas lluqsimuchkasqa, uyarikurqataqmi rayopa tunrururuyninkunapas, 24 kamachiqkunapas qunquraspam yupaychachkasqaku. Huknin qawasqanpiñataqmi rikururqa llapallan nacionkunamanta achkallay-achka runakuna Jehova Diosllata yupaychachkaqta. Paykunatam malta carnero utaq Jesus michichkasqa, hinaspam kawsachiq yakuman pusachkasqa. Hukninpiñataqmi rikurqa hanaq pachamanta 24 kamachiqkunawan Jesus kamachiyta qallaykamuchkaqta. Rikurqataqmi manchakuypaq culebrawan utaq satanaswan hinaspa demoniokunawan Jesus peleasqantapas. Juan qawachkaptinmi Jesusqa hanaq pachamanta kay pachaman paykunata wischuramurqa.

Chaymantapas Juanqa rikurqam Sion muqupi malta carnerowan utaq Jesuswan 144.000 akllasqakuna sayachkaqta. Rikurqataqmi enteron allpa pachapi huk angel kaynata nispan muyuqtapas: “Jehova Diosta hatunchaspa yupaychaychik”, nispa.

Huknin qawasqanpiñataqmi Juanqa rikurqa Armagedon sutiyuq guerrata, chaypim Jesusqa angelkunapiwan satanaspa munaychakusqanta chinkachichkasqa. Tukunanpaqñataqmi Juanqa rikurqa hanaq pachapiwan kay pachapi kusikuyllaña kasqanta, satanaswan lliw qatiqninkuna chinkachisqa kasqantapas, rikurqataqmi llapallan runakuna Jehova Diosllataña yupaychasqankuta hinaspa sutinta hatunchasqankutapas.