Leeqkunapa tapukuyninkuna

¿Imaynatam entiendenanchik enteron Pachapi watantin predicasqanchikmanta willakuyta?

Anuario qellqapi watantin predicasqanchikmanta willakuytam anchata qawayta munanchik. Lliwmi kusikunchik Jehová Diospa llaqtan enteron Pachapi imayna wiñasqanmanta chaypi qawaspanchik. Chay watantin predicasqanchikmanta willakuyta allinta entiendenapaqqa, yachananchikmi imayna kasqanmanta. Qawasun wakinkunata.

Watantin predicasqanchikmanta. Anuario qellqapim pasaq watapi predicasqanchikmanta willawanchik, chayqa septiembre killamanta qatiqnin watapa agosto killankamam. Chaynapim Anuario 2011 qellqanchikqa willawanchik 2010 watapi predicasqanchikmanta, kaymi qallarirqa 2009 watapa 1 septiembre killamanta 2010 watapa 31 agosto killakama.

Llapanpi hinaspa yaqa llapanpi hayka predicaqkuna kasqanmanta. “Predicaqkunaqa” kanku, Diosmanta willakunankupaq ancianokunapa chaskisqan kaqkunam, kanmankum bautizasqa otaq manaraq bautizasqa kaqkunapas. ¿Imaynam yupasqa kanku “llapanpi predicaqkuna”? Chayqa yupakunmi watantin predicasqanchikmanta huk killapi achka iñiqmasinchikkuna informenkuta qosqankuwan. Ichaqa yuyarisun, pasaq killata pipas mana informenta qospanqa iskay kutikamam huk killapi yupasqa kanman. Chaymantapas, pipas mana informenta qospanqa manam chaypi yupasqachu kanman. ¿Imaynam yupasqa kanku “yaqa llapanpi predicaqkuna”? Kaypaqqa watapi lliw informekunatam 12 killawan dividinku.

Llapanpi hayka hora kasqanmanta. Anuario 2011 qellqapa nisqanman hinaqa pasaq watapim 1.600 millon masnin horata predicarqanchik. Ichaqa manamá chaypiqa yupasqachu kachkan sapa semana Biblia estudiasqanchik, yuyaymanasqanchik nitaq ancianokuna iñiqmasinkuta watukusqanku tiempopas.

Qollqemanta. Jehová Diospa testigonkunaqa, 155 millon dolar qollqetam 2010 watapi servichikurqaku precursor especialkunapi, misionerokunapi hinaspa congregacionkunata watukuq ancianokunapipas. Ichaqa kaypiqa manam yupakunchu qellqanchikkunata ruranapaq hinaspa 20.000 masnin Betel wasipi llamkaqkunapaq hayka qollqeta servichikusqankumantaqa.

Jesucristopa wañukuyninta yuyarinapaq huñunakuypi tantata mikuqkunawan vinota tomaqkuna hayka kasqankumanta. Kayqa manapaschá lliw hanaq pachaman rinankupaq suyakuyniyoq kaqkunachu kanmanku. Wakinkum piensanmanku hanaq pachaman rinankupaq suyakuyniyoq kasqankuta, ñawpaqpi huk religionniyoq kasqankurayku otaq umankuwan mana allin kasqankurayku. Chaymi mana allintaqa yachachwanchu enteron Pachapi hayka kasqankumantaqa, nitaqmi yachananchikraqchu. Manataqmi Diospa Llaqtanpi Punta Apaqkunapas paykunapa sutinkutaqa waqaychankuchu, nitaqmi paykunawanqa qayanakunkuchu.a

Ichaqa yachanchikmi hanaq pachaman riqkunamanta wakiqninkuna llumpa-llumpay ñakariy kaptin kay Pachapi hinallaraq kanankumanta (Apo. 7:1-3). Chaykamaqa hinallamá paykunaqa predicaypi hinaspa yachachiypipas ñawparinqaku. Kay watantinpi predicasqanchikmi qawachiwanchik Jehová Diospa llaqtanpi paykuna ima rurasqankumanta.

[Willakuy]