Bibliam vidankuta cambiarurqa
¿IMATAQ huk sipasta kallpancharqa tayta-mamanpa yachachisqan religionman kutiykunanpaq? Reparasun kikinpuni willakusqanpi.
“Kunanqa manam yanqapaqchu vidayqa” (LISA ANDRÉ)
NACESQAN WATA: 1986
NACIONNINMI: LUXEMBURGO
HUK WILLAKUYKUNA: HUCHANMANTA WANAKUQ SIPAS
ÑAWPAQ VIDAY: Luxemburgo llaqtapa hichpan Bertrange sutiyoq llaqtapim wiñarqani. Chay llaqtaqa limpio, hawka hinaspa kapuqniyoq kanapaqmi. Tawa turi-ñañaykunamantam sullka kaq kani. Tayta-mamaymi Jehová Diospa testigon, paykunam taksachaykumantapacha Diosmanta yachachiwarqaku.
Ichaqa sipasyasqay tiempopim iskayrayarqani Jehová Diospa yachachikuyninkunamanta. Chayraykum iñiyniy pisi-pisimanta chiriyarurqa. Tayta-mamayqa tukuytam rurarqaku Diospa munasqanman hina kawsanaypaq, ichaqa manam munarqanichu yanapawanankuta. Paykunaman mana willaspaymi pitapas mana respetaq warmakunawan lloqsiyta qallaykurqani. Chay warmakuna hinam ñoqapas munasqayman hina kawsayta munarqani. Fiestakunamanmi riq kaniku, hukwan-hukwanmi pierdekuq kaniku hinaspa tragotawan drogakunatam llumpayta servichikuq kaniku. Qallariypiqa chay warmakunawan kanaypaqmi tantearqani, paykuna hina gozakuytam munarqani.
Ichaqa manam kusikuyta tarirqanichu. Chayna kawsayqa yanqapaq hinam karqa: imapas pasasqanmantaqa manam imapas qokuqchu amistadniykunamanqa. Ñoqatam ichaqa llakichiwaq allpantinpi mana allin ruraykuna pasasqan. Tiempo pasasqanman hinam astawan hukmanyasqa tarikurqani.
VIDAYTAM BIBLIA CAMBIARURQA: 17 wataypiña kachkaptiymi mamay cuentata qokururqa llumpay llakisqa kasqaymanta hinaptinmi kallpanchawarqa kaqmanta Bibliata estudianaypaq. Tukuy sonqoywan estudianaypaq hinaspa chayman hina tanteaspa kawsanaypaqmi niwarqa. Chayna niwasqanmi kallpanchawarqa vidayta cambianaypaq. Chaymi mayor kaq ñañay Caroline hinaspa qosan Akif, Bibliamanta yachachiwanankupaq tantearqani. Cuñadoy Akifqa yuyayniyoq kaspanñam Jehová Diospa testigon karqa. Chaymi allinpaq rikchakapuwarqa confianzawan imamantapas rimanaypaq.
Yacharqanim imayna kawsasqayqa Diospa agradonpaq mana kasqanta, ichaqa piensarqanim chayna kawsasqayqa kikillaypaq mana allin kasqanta. Bibliata estudiaruspaymi ichaqa musyakurqani imayna portakusqayqa Jehová Diospa sonqon llakichisqanta (Salmo 78:40, 41; Proverbios 27:11). Musyakurqanitaqmi imayna portakusqaywanqa hukkunatapas llakichisqayta.
Astawan estudiaspaymi cuentata qokurqani, Bibliaqa Diospa palabran kasqanta. Bibliapi willakuykuna admirakuypaq imayna cumplikusqanmanta hinaspa imanasqa Diospa Palabran kasqanmanta entienderuspaymi convencesqa karqani. Chaykuna yachasqaymi yanapawarqa manaña iskayrayanaypaq.
Wataña kaqmanta Biblia estudiasqay pasaytam tayta-mamaywan mayor turiy watukuq rirqaniku, payqa Alemania nacionpim Betel wasipi tukuy sonqonwan Diosta servirqa. Admirakurqanim kusisqa tarikusqanwan. Chayna kusikuytam ñoqapas munarqani. Chaymantapas admirakurqanim Betel wasipi llamkaqkunata reqsispay. Paykunaqa manamá ñoqawan puriq mana allin runakuna hinachu karqaku. Chay punchawkuna pasaruptillanmi Diosman asuykurqani oracionwan hinaspam tukuy sonqoywan prometekurqani kawsanaykama servinaypaq. 19 wataypim Jehová Diosman qokusqayta hinaspa serviy munasqayta qawachirqani bautizakuspay.
BENDICIONKUNA CHASKISQAYMANTA: Kunanqa manam yanqapaqchu vidayqa. Kusisqam runamasiykunata yanapani hinaspa Diosmanta chaynataq promesankunamanta yachachini. Kunanqa familiaypas hawkañam, manañam ñoqamantaqa preocupakunkuñachu.
Mana allinkunatam ñawpa vidaypi rurarqani, ichaqa chaykunapi mana piensanaypaqmi kallpanchakuni. Astawanmi piensani Jehová Diosqa pampachakuq hinaspa ancha kuyakuq kasqanpi. Tukuy sonqoywanmi ñoqapas nini: ‘Diospa bendicionninmi apuyachin runataqa. [. . .] Bendicionninqa manam apamunchu llakikuytaqa’, nispa (Proverbios 10:22).
[24 kaq paginapi suti rikuylla kaq willakuy]
“Fiestakunamanmi riq kaniku, hukwan-hukwanmi pierdekuq kaniku hinaspa tragotawan drogakunatam llumpayta servichikuq kaniku”
[25 kaq paginapi suti rikuylla kaq willakuy]
“Mana allinkunatam ñawpa vidaypi rurarqani, ichaqa chaykunapi mana piensanaypaqmi kallpanchakuni”