Diospa Palabranmanta yachay
¿Imanasqam Diospaqa llaqtan kan?
Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.
1. ¿Imanasqam Jehová Diosqa Israel nacionta ordenninpi kawsachirqa?
Abrahampa mirayninkunatam Diosqa huñurqa nacionnin kananpaq hinaspam kamachikuykunata qorqa. Chay naciontam suticharqa Israelwan hinaspam kamachirqa cheqap yupaychaytawan Palabranta defiendenankupaq (Salmo 147:19, 20). Chayqa kay pachapi runakunapa allinninkupaqmi. (Leey Genesis 22:18.)
Diosmi israelitakunata akllarqa testigon kanankupaq. Chaymi kamachikuyninkunata kasukunanku karqa, kasukuspankuñataq allinpi tukuqku (Deuteronomio 4:6). Israel nacionmanta yachaspam cheqap Diosmanta astawan yachasun. (Leey Isaias 43:10, 12.)
2. ¿Imanasqataq cheqap cristianokunaqa huñulla tarikunku?
Jehová Diosmi cristiana congregacionta akllarqa payta qepanchaq israelitakunapa rantinpi kananpaq (Mateo 21:43; 23:37, 38). Ñawpaqpiqa israelitakunam Diospa testigon karqaku, kunanñataqmi testigonkunaqa cheqap cristianokuna. (Leey Hechos 15:14, 17.)
Jesusmi qatiqninkunata yachachirqa Jehová Diosmanta willakunankupaq chaynapi llapallan nacionpi runakuna Jesuspa qatiqnin kanankupaq (Mateo 10:7, 11; 24:14; 28:19, 20). Chayqa kunan tiemponchikpim astawanraq rurakuchkan. Jehová Diosmi wara-waranqantin runakunata huñuchkan cheqap religionman (Apocalipsis 7:9, 10). Diospa llaqtanpi kaspankum kallpanchanakunku chaynataq yanapanakunku. Enteron allpapitaqmi huñunakuyninkupi Bibliamanta yachachikuykunata chaskinku. (Leey Hebreos 10:24, 25.)
3. ¿Imaynatam kunan tiempopi Jehová Diospa testigonkunaqa qallarirqa?
Bibliata aslla estudiaqkunam 1870 watapa qatiqnin watakunapi yachachiyta qallaykurqaku Bibliamanta unay wata qonqasqa yachachikuykunata. Paykunaqa yacharqakum predicanankupaq cristiana congregacionta Jesus qallarichisqanta. Chayraykum llapallan nacionkunapi Diospa Gobiernonmanta predicayta qallaykurqaku. 1931 watapim Jehová Diospa testigonkuna nispa sutichakurqaku. (Leey Hechos 1:8; 2:1, 4; 5:42.)
4. ¿Imayna dirigisqam kachkanku Jehová Diospa testigonkunaqa?
Punta pachak watapim achka cristiana congregacionkunaqa dirigisqa karqaku congregacionpa Uman Jesucristo kasqanta reqsikuqkunawan, paykunam Diospa llaqtanpi punta apaqkuna karqaku (Hechos 16:4, 5). Chaynallataqmi kunanpas Jehová Diospa testigonkunaqa reqsikunku kamachiqninku Jesus kasqanta (Mateo 23:9, 10). Yanapachikunkutaqmi Diospa Llaqtanpi Punta Apaqkunapa yachachikuyninwanpas, paykunaqa experienciayoq cristianokunam kanku hinaspataqmi Bibliata servichikunku enteron allpapi yaqa pachak waranqa masnin congregacionkunata kallpanchanankupaq hinaspa yachachinankupaqpas. Sapa congregacionpim kan experienciayoq cristianokuna otaq ancianokuna, paykunam kuyakuywan nanachikunku iñiqmasinkumanta. (Leey 1 Pedro 5:2, 3.)
Enteron pachapim Jehová Diospa testigonkunaqa Diospa Gobiernonmanta lliw runakunaman willakunankupaq preparasqa kachkanku. Chaymi Bibliamanta qellqakunata tikramunku, ruramunku chaynataq yaqa pichqa pachak masnin idiomakunapipas qellqakunata runakunaman chayachinku. Jesuspa apostolninkuna hinataqmi wasin-wasin predicanku (Hechos 20:20). Jehová Diosmanta yachay munaqkunamanmi yachachinku. Diosta kusichinanpaq chaynataq runakunata yanapananpaq kallpanchakusqankuraykum llapallanku kusisqa tarikunku. (Leey Salmo 33:12; Hechos 20:35.)
Astawan yachayta munaspaqa qawariy ¿Imatapunim Bibliaqa yachachin? libropa 19 kaq yachachikuyninta, kay libroqa Jehová Diospa testigonkunapa rurasqanmi.